ނިޝާން ޢަސްކަރީގެ ވެރިކަމުގެ ޢިއްޒަތް، މޭޖަރ ޖެނެރަލް (ރިޓަޔަރޑް) މޫސާ ޢަލީ ޖަލީލަށް ދެއްވީ މިރޭ ކުރިއަށްގެންދާ ނަސްރުގެ ދުވަހުގެ ޚާއްސަ ޖަލްސާގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އެވެ.
މި ޢިއްޒަތް، މޭޖަރ ޖެނެރަލް (ރިޓަޔަރޑް) މޫސާ ޢަލީ ޖަލީލަށް އެރުވީ، ދިވެހި ޤައުމާއި ރައްޔިތުންގެ ސަލާމަތަށްޓަކައި ޢަސްކަރީ ގޮތުން ކުރެއްވި އަގުހުރި ޚިދުމަތްތަކާއި، ޤައުމުގެ އިސްތިޤްލާލާއި ސިޔާދަތު ރައްކާތެރިކޮށް ދެމެހެއްޓުމަށްޓަކައި ކޮށްދެއްވި މަސައްކަތްޕުޅުތަކާއި، ޚާއްޞަކޮށް، 1988 ނޮވެންބަރު މަހުގެ 3 ވަނަ ދުވަހު ރާއްޖެއަށް ކުރިމަތިވި ނުރައްކާތެރި ޢުދުވާނީ ޙަމަލާއާ ގުޅިގެން، ދިވެހި ޤައުމާއި ރައްޔިތުންގެ ދިފާޢުގައި ކުރެއްވި މަތިވެރި ޖިހާދުގެ އަގު ވަޒަންކުރެއްވުމުގެ ގޮތުންނެވެ.
މި ޢިއްޒަތް ދެއްވުމަށް ރައީސުލްޖުމްހޫރިއްޔާ ކަނޑައެޅުއްވީ، ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 115 ވަނަ މާއްދާއިންނާއި، ޤާނޫނު ނަންބަރު 97/1 (ދިވެހިރާއްޖޭގެ ޢިއްޒަތުގެ ޤާނޫނު)ގެ ދަށުން ރައީސުލްޖުމްހޫރިއްޔާއަށް ލިބިވަޑައިގަންނަވާ އިޚްތިޔާރުގެ ދަށުންނެވެ.
މޫސާ އަލީ ޖަލީލަކީ ރާއްޖޭގެ އަސްކަރީ ހަޔާތުގައި މުހިންމު ހިދުމަތްތަކެއް ކޮށްދެއްވާފައިވާ ސިފައިންގެ ބޭކަލެކެވެ. ރިޓަޔަރ ކުރެއްވިފަހުންވެސް ދައުލަތަށް އަގުހުރި ހިދުމަތްތަކެއް ކޮށްދެއްވާފައިވެއެވެ. އަދި ރާއްޖޭގެ ދިފާއީ ވުޒާރާގެ ވަޒީރުކަންވެސް ކުރެއްވިއެެވެ. އެމަނިކުފާނަކީ 3 ނޮވެމްބަރު ގައި ފާހަގަކުރާ ނަސްޜުގެ ދުވަހުގެ ހަޤީޤީ ބަތަލެކެވެ. ދުޝްމަނުންގެ ކިބައިން ގައުމު ސަލާމަތްކޮށްދެއްވުމުގައި ޖާނުން ގުރުބާންވެ ވަޑައިގެންނެވި ޤައުމީ ބަތަލެކެވެ.
