އަހަރެން އިނީ ބުނާނެ އެއްޗެއް ނޭނގިފައެވެ. މިއީ ހުވަފެނެއްބާވައޭ ހިތަށް އެރިއެވެ. އަދި އަހަރެންނަށް ބުނެވުނެވެ. " އާދޭސް ކޮށްފައި ބުނަން މިގޭގައި ބަހައްޓާލަދީ، ތިފަދަ ނިކަމެތި ހާލެއް އަހަރެންނަށް ނުޖައްސާ ހެޔޮނުވާނެ.. އަހަރެންގެ ހުރިހާ އެއްޗެއް ގުރުބާން ކޮށްފައި އައުމުގެ ނަތީޖާ އަކީ މިއީތަ؟ މިއަދު އަހަރެން ގޮސް ވަންނާނެ ތަނެއް ނެތް." އަހަރެން ރޮއި ރޮއި ހުއްޓާ ނާޒިމް ނިކުމެގެން ހިނގައްޖެއެވެ.

އަހަރެންގެ ދުނިޔެ ބަނަވިއެވެ. ވަގުތުން ލަމްހާއަށް ގުޅީމެވެ. ލަމްހާ އަށް މިޚަބަރު ލިބުމާއެކު ބުނާނެއެއްޗެއް ނޭނގިފައިހުއްޓެވެ. އަހަރެން ނާޒިމަށް ވީ ގުރުބާނީ އެންމެ ރަނގަޅަށް އެނގޭނެ އެކަކީ ލަމްހާއެވެ. އަހަރެން ގޮތް ހުސްވިއެވެ. ލަމްހާއަށް ގިސްލަގިސްލާފައި ރޮވެން ފެށުނެވެ. ކުއްލިއަކަށް ހިތަށްއެރީ ހޮސްޕިޓަލުގައި އެހީވި އަހަރެންގެ އެކުވެރިޔާ މަތިންނެވެ. އޭނާއަށް ގުޅާފައި އެވާހަކަ ބުނުމުން އޭނަ އަހަރެން ހޯދަން އައެވެ.

އަހަރެންގެ ބޮޑު ދަރިފުޅު ރޮމުން ވަރަށް ސުވާލު ކުރިއެވެ. "މަންމަ ކީއްވެ މިގެއިން ތިދަނީ ކޮއްކޮމެން ގޮވައިގެން. ދެން ބައްޕަވެސް ނުފެންނާނެއެއްނު." އަހަރެންގެ އެކުވެރިޔާ އަހަރެންނަށް ވަރަށް ރަނގަޅެވެ. އޭނާގެ އެހީގައި އެގެއަށް ގޮސް ހުރީމެވެ. އެއީ ވަރަށް ކުޑަ ތަންކޮޅެކެވެ. ނާޒިމް އަހަރެން ވަރި ކުރިފަހުން ކުދިންގެ ހާލު ބަލާލަންވެސް ނުގުޅައެވެ. އަހަރެން އަނބުރާ ރަށަށް ދާން ނިންމީމެވެ. ކޮންމެގޮތެއް ވަރިހަމަ ކަމުގައިވެސް ހެޔޮކަމަށެވެ. މުޅި ދުނިޔެވެސް އަހަރެންނަށް މަލާމާތް ކުރާހެން ހީވިއެވެ.

Advertisement

ލަމްހާ ކައިރިން އަހައިގެން ރަށަށް ފުރާ ދޯންޏެއް ހޯދައިގެން ރަށަށް ދިޔައީމެވެ. ރަށަށް ގޮސް މައިންބަފައިންގެ ގެއާއި އަރާ ހަމަވިތަނާ އަހަރެންގެ އަތްފައި ތުރުތުރު އަޅަން ފެށިއެވެ. ކުއްލިއަކަށް ހުއްޓެވުނެވެ. އަހަރެންމީ ކިހާ ބަދުނަސީބު މީހެއްތާއެވެ. ލޯތްބައްޓަކާއި އުފަން މަންމަ ހިތުގައި ޖައްސާފައި، އަމިއްލަ ވަޒަން ދޫކޮށް ފުރައިގެން ދިޔައީ މީގެ 15 އަހަރު ކުރިންނެވެ. އަހަރެން ގޮސް އައްސަލާމް އަލައިކުމް ކިޔާފައި ގެއަށް ވަނީމެވެ. ގޭތެރޭގައި ގޮނޑިއެއްގައި މަންމަ އިށީދެލައިގެން އިނެވެ. މަންމަ ފެނުމާއެކު އަހަރެންނަށް ރޮއިގަނެވުނެވެ. އަދި އަހަރެންނަށް މާފުކޮށްދޭށޭ ބުނީމެވެ. އެމަންމަގެ ލޮލުން ފައިބަމުންދިޔަ ކަރުނައިން އެތައް ކަމެއް ދޭހަވިއެވެ. އެ މޫނުމަތިން ފެންނަނީ އަސަރުން ފުރިގެންވާ އެތައް ވާހަކައެކެވެ.

އަހަރެންގެ މަންމަ އަހަރެންނަށް މާފު ކުރިއެވެ. އަދި އަހަރެން ބުނީމެވެ. މަންމާއެވެ. އަހަރެން މަންމަ ކައިރިއަށް މިއައީ މަންމަ ދޫކޮށްލާފައި ދެން އަނބުރާ ދުވަހަކުވެސް ނުދާގޮތަށެވެ. މަންމަ ހުރީ ބަސްހުއްޓިފައެވެ. ވެގެން އުޅޭގޮތެއްވެސް މަންމައަކަށް ނޭނގޭނެތާއެވެ. އަހަރެންގެ ދެކުދިން ފެނިފައި މަންމަ އެކުދިން ގައިގައި ބައްދާލިއެވެ. އަދި މިއީ ދަރިފުޅުމެންގެ މާމަ އޭ ބުނެލިއެވެ. އެވަގުތު ބައްޕައައިސް ގެއަށް ވަނުމުން އަހަރެން ގޮވާލީމެވެ. ބައްޕަ އެއްވެސް އެއްޗެއް ނުބުނެ ކޮޓަރިއަށް ވަނެވެ. އަހަރެންނަށް ރޮވެން ފެށުނެވެ. ލަދުވެސްގަތެވެ. ވެގެން އުޅޭ ހުރިހާ ގޮތެއް މަންމައަށް ކިޔާދިނީމެވެ. ހުރިހާ ވާހަކައެއް ކިޔާދީ ނިމުނުއިރު އަހަރެން އިނީ ހިތުގައި ޖެހިޖެހި ހިތް ހަލާކުވެފައެވެ.

މަންމަ ގޮސް ބައްޕައަށް ވެގެންއުޅޭ ގޮތް ކިޔާދިނުމުން ބައްޕަގެ ހިތަށް ކުރި އަސަރުން ބައްޕަ އައިސް ދަރިފުޅާއޭ ކިޔާފައި ގޮވާލިއެވެ. އެވަގުތު އަހަރެން ހިތަށް ލިބުނު ހިތްހަމަޖެހުމާ ވީއުފަލެއް ބުނެދޭން ނޭނގުނެވެ. އަހަރެންގެ ބައްޕަ އަހަރެންނަށް މާފުކުރުން ވީ އަހަރެންނަށް ހަޔާތުގައި ލިބުނު އެންމެ ބޮޑު ހިތްހަމަޖެހުމެވެ. އަހަރެން ހަޔާތުގައި ލޯބި ހޯދުމަށްޓަކައި ދޫކޮށްފަ ދިޔަ އަމިއްލަ ވަޒަނާއި ލޯބިވާ މައިންބަފައިން އަބުރާ ލިބުން ވީ އަހަރެންނަށް ލިބުނު އެންމެ ބޮޑު ނަސީބެވެ. މިދުނިޔެ މަތީގައި މައިންބަފައިންގެ ލޯތްބަށް ވުރެ މުހިންމު ލޯތްބެއް ނެތްކަންވެސް ވިސްނުނެވެ. އެދުވަހު އަހަރެންގެ މައިންބަފައިން ހިތުގައި ޖައްސާފައި ފުރައިގެން ދިޔައީ އެމީހުންގެ ލޯތްބަތް ވުރެ މާބޮޑު ލޯތްބެއް ލިބޭނެ ކަމުގެ ހުވަފެން ދެކިގެންނެވެ. އެއީ މުޅިން ކުށް ހީއެކެވެ. ކިތަންމެ ނިކަމެތި ހާލުގައި އުޅެން ޖެހުނު ނަމަވެސް މައިންބަފައިންގެ ފަރާތުން ލިބޭ ލޯބި ދޫކޮށްފައި ދާނީ އަހަރެން ކަހަލަ މޮޔައެއްތާއެވެ. އެމީހުންގެ ހިތުގައި ޖައްސާފައި ދިރިއުޅުމުގެ އެއްވެސް އުފަލެއް ހާސިލު ނުވާނެ ކަމީ ހަމަ ޔަގީން ކަމެކެވެ. މިކަހަލަ އެތަކެއް ހިޔާލުތަކެއްގެ ތެރެއަށް ގެއްލިފައި އިދެވުނެވެ. މަންމައާއި ބައްޕަގެ ކާފަ މާމަ ދަރިން ގޮވައިގެން ގޭތެރޭގައި އުޅޭ ލޯބި ލޯބި މަންޒަރު ފެނުމުން އަހަރެން ހައިރާންވެ އަންތަރީސްވެއެވެ. އެކުދިންނަށް ކާފަ މާމަ ލޯބި ނުލިބޭތާ ވީ ޒަމާނެއްވެސް ނޭނގެއެވެ. އިރުކޮޅެއްވީތަނާ ލަމްހާ އައިސް ވަންތަން ފެނުނެވެ. ލަމްހާ އައުމުން ދެމީހުން އޮލަ ވާހަކައިގެ ތެރޭގައި ތިއްބާ ރޭގަނޑުވެއްޖެއެވެ. ވާހަކަ ކުރު ކޮށްލާފައި ކުދިން ނިންދެވުމުގެ ކަންތައްތައް ކޮށްލުމަށްފަހު މަންމަ ކައިރިއަށް އައިސް ވާހަކަ ދައްކާލަން އިނީމެވެ. އަދި ކޮއްކޮމެންވެސް އަހަރެން އައުމުން އުފާވެ އެކަމަށް މަރުހަބާ ކިޔެވެ.

ޖެހިގެން އައިދުވަހު ހޭލައިގެން ކުދިން ގޮވައިގެން ރަށު ސްކޫލަށް ވެއްދުމުގެ ކަންކަން ހަމަޖެއްސީމެވެ. އެހާ އުދަގުލަކާ ނުލާ ހުރިހާ ކަމެއްވެސް ހަމަޖެހުނެވެ. އަހަރެން އައުމުން މަންމަގެ މޫނުމަތިން ފެންނަ އުޖާލާކަމާ ހިނިތުންވުން ފާހަގަވެގެންދާ ވާހަކަ އަވައްޓެރިންގެ ފަރާތުން އެނގުނެވެ. ރަށުގެ ހިތްފަސޭހަ އުފާވެރި މާހައުލުގެ ސަބަބުން އަހަރެންގެ ދެކުދިންވެސް އެކަމާ ވަރަށް ގަޔާވާކަން ފާހަގަވިއެވެ. ދޭތެރެއަކުން ކުދިންގެ ބައްޕަ ކޮބައިތޯ އެކުދިން އަހާލައެވެ. ނަމަވެސް އެކުދިންގެ ބައްޕަ އެކުދިންގެ ހާލު ބަލާލަން ހިތަށްވެސް ނާރައެވެ. އެކަމަކާ މާބޮޑު ސަމާލުމަކެއް ނުދެމެވެ. ދުނިޔެއަކީ ކިހާ ކެހިވެރި މަކަރުވެރިން ގިނަތަނެއްކަން މިހާރު އަހަރެންނަށް ވިސްނެއެވެ. "ވިދާހާ އެއްޗަކީ ރަނެއް ނޫނެވެ." ކޮންމެ ރީތި ކަމަކާ މުއްސަދި ކަމަކުން އުފާވެރި ހަޔާތެއް ނުލިބޭނެކަން ވިސްނުނު އިރު މާބޮޑަށް ލަސްވެއްޖެއެވެ.

ރަށަށްއައިސް 2 މަސް ވީތަނާ ރަށު ހޮސްޕިޓަލުގެ މެނޭޖަރުކަން އަހަރެންނަށް ލިބުނެވެ. ކުދިންވެސް އެކަމަށް މަރްހަބާ ކިޔެވެ. އެކުދިންވެސް ވިސްނަނީ އަހަރެންގެ ކުރިއެރުމާ އަހަރެންގެ އުފަލަށެވެ. ﷲގެ ރަހުމަތްފުޅުން އަހަރެންނަށް ލިބިފައިވަނީ ވަރަށް ބަސްއަހާ ދެކުދިންނެވެ. މަންމައާއި އެކު ގްރުއާން ކިޔަވައެވެ. ބައްޕައާއި އެކު ވަގުތު ޖެހުމުން މިސްކިތައް ދެއެވެ. ކުދިންގެ ބައްޕަގެ ފަރާތުން އުނިވެފައިވާ ލޯބި އެދިންނަށް ލިބެނީ އެކުދިންގެ ކާފައާއި މާމަގެ ފަރާތުންނެވެ.

އޭގެ އެއް އަހަރު ފަހެވެ. އާދައިގެ މަތިން އަހަރެންވެސް އޮފީސް ނިންމާލާފައި ގޭގައި އުޅެނިކޮށް މީހަކު އައިސް އައްސަލާމް ޢަލައިކުމް ކިޔާފައި ގޮވާލިއެވެ. ވަރަށް ދަންނަ އަޑެއްހެން ހީވިއެވެ. ނަމަވެސް އަހަރެން ހުރީ ކޮޓަރި ތެރޭގައި ފެންވަރާލައިގެން ނުކުމެ ރީތިވާށެވެ. "މަޑުކޮށްލާ އެބަ އަންނަން"  އަހަރެން މިހެން ބުނެލާފައި އެމީހަކަށް ޖަވާބު ދިނީމެވެ. އެވަގުތަކީ މަންމަވެސް ބައްޕަވެސް ގޭގައި ނޫޅޭ ވަގުތެކެވެ. ވަރަށް އަވަސް އަވަހަށް ރީތިވެލައިގެން ކޮޓަރިން ނުކުތީމެވެ. ދޮރުމަތީގައި ހުއްޓިގެން އެހުރީ ނާޒިމެވެ.

ނުނިމޭ..