އަހްމަދު ނައުޝާން އަބްދުﷲ އަކީ އުމުރުން 21 އަހަރުގެ ޒުވާނެކެވެ. މިހާ ޅައުމުރެއްގައި ހެވީވެހިކަލް އޮޕަރޭޓަރެއްގެ ވަޒީފާ (ބަރު އެއްގަމު އުޅަދު ދުއްވާ އޮޕަރޭޓްކުރުން) ފުރުސަތު ލިބުމަކީ އޭނާ ދެކޭގޮތުގައި ލިބުނު ވަރަށް ރަނގަޅު ތަޖުރިބާއެކެވެ. ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ) އިން ހުޅުވާލި ޕްރޮގްރާމެއްގައި ބައިވެރިވެ، ނައުޝާން އެޕްރޮގްރާމް ފުރިހަމަކުރީ މި އަހަރު އެވެ.
" 4 މަހުގެ ޕްރޮގްރާމެއް ފުރިހަމަކޮށް އެޗްޑީސީގެ ވަޒީފާ ހަމަޖެހުނީ އޮކްޓޯބަރު މަހު. މުޅިން އަލަށް ބޮޑެތި ވެހިކަލްތަކެއް ދުއްވުމުގައި މިއުޅެނީ. މިހާރު ދުއްވަން އެކްސްކަވޭޓަރ، ފޯކްލިފްޓް، ބޮޑެތި ޕިކަޕްފަދަ އުޅަދުތައް." ހުޅުމާލޭގެ ސެންޓްރަލް ޕާކްގައި ކުރިއަށްގެންދިޔަ އޮފީސް މަސައްކަތެއްގައި ހުރެ 'ޒީޓައިމްސް' އަށް މައުލޫމާތު ދެމުން ނައުޝާން ބުންޏެވެ.
ނައުޝާން ފަދަ ޒުވާނުންނަށް އެޗްޑީސީއިން ހިލޭ ފަހިކޮށްދިން ފުރުސަތުގެ ތަފްސީލަށް ބަލާލީމެވެ.
މޯލްޑިވްސް ނެޝަނަލް ސްކިލްސް ޑިވެލޮޕްމެންޓް އޮތޯރިޓީ އިން ދޭ ސެޓިފިކެޓް ލެވެލް 3 ގެ ސަނަދެއް ހާސިލުވާނެގޮތަށް 4 މަސް ދުވަހަށް ކުރިއަށްގެންދިޔަ ޕްރޮގްރާމްތަކަކީ، މިކަމަށް ޚާއްސަކޮށްގެން ހޮވާލެވުނު ތަމްރީނުދޭ މަރުކަޒުތަކެއް މެދުވެރިކޮށް ކުރިއަށްގެންދެވުނު ޕްރޮގްރާމްތަކެއް ކަމަށް އެޗްޑީސީ އިން ވަނީ މައުލޫމާތުދީފައެވެ.
މަސައްކަތުގެ ދާއިރާތައް
- ބަގީޗާހެއްދުން
މި ޕްރޮގްރާމުން ބައިވެރިންނަށް ޕާކުތަކާއި ބަގީޗާތައް، އަދި މުނިފޫހިފިލުވުމަށް ޚާއްސަކުރެވިފައިވާ ސަރަހައްދުތައް ބަލަހައްޓާ ހިންގުމުގެ އިލްމާއި ހުނަރު ލިބިގެންދާނެއެވެ. މީގެ އިތުރުން ގަސް ކާނާއާއި، ޕާރކުގެ ވަސީލަތްތައް ބެލެހެއްޓުމާއި ގުޅުންހުރި އެކި މެޝިނަރީ އޮޕަރޭޓްކުރުމުގެ ހުނަރު ދަސްކޮށްދެއެވެ.
- ރޭނުން
ރޭނުމުގެ މަސައްކަތަކީ ވަޒީފާގެ ބާޒާރުގައި ދުވަހެއް ދުވަހަކަށް ފުރުސަތު އިތުރުވަމުންދާ މަސައްކަތެކެވެ. މިޕްރޮގްރާމްގެ ތެރެއިން ބައިވެރިންނަށް ރޭނުމާއި މަރާމާތުކުރުމަށް ދަސްކޮށްދެއެވެ.
- ވެލްޑިންގ
މި ޕްރޮގްރާމުގެ މަޤްޞަދަކީ މިދާއިރާގެ ފަންނުވެރި އިލްމާއި ހުނަރު ލިބިގެންވާ ފަންނުވެރިންތަކެއް އުފެއްދުމެވެ. އަދި މެޝިނަރީއާއި ތަކެތި މަރާމާތުކޮށް ބެލެހެއްޓުމުގެ ސިނާއަތަށް ބޭނުންވާ އަމިއްލަ މަސައްކަތްތެރިންނާއި މި ދާއިރާގެ ވަޒީފާތަކަށް ބޭނުންވާ ފަރާތްތައް ބިނާކުރުމެވެ. ވެލްޑިންގެ ހުނަރުތައް ބައިވެރިންނަށް ދަސްކޮށްދެއެވެ.
- އިމާރާތްކުރުން
މި ޕްރޮގްރާމްގައި އިމާރާތްކުރުމުގެ ދާއިރާގެ މަސައްކަތްތައް ދަސްކޮށްދެއެވެ. "ވަޒީފާގެ ފުރުސަތު ބޮޑު މިމަސައްކަތުގެ ދާއިރާގައި، އިމާރާތްކުރުމުގެ ސަލާމަތީ ކަންކަން ދަސްކޮށްދެވޭނެ. ޕްރޮގްރާމް ފުރިހަމަކުރުމުން ސުޕަވައިޒަރުންނާއި، އެސިސްޓެންޓް ކޮންސްޓްރަކްޝަން އޮފިސަރުން ފަދަ ވަޒީފާގެ ފުރުސަތުތައް ލިބުން މަގުފަހިވާނެ." އެޗްޑީސީ އިން ވަނީ މައުލޫމާތު ދީފައެވެ.
- ކަރަންޓް މަސައްކަތް
ކަރަންޓް ގުޅައިދީ، ދިމާވާ މައްސަލަތައް ދެނެގަތުން ފަދަ ކަންކަން ކިޔަވައިދެއެވެ. އަދި ކަރަންޓްގެ މަސައްކަތާއި ގުޅުންހުރި ގަވާއިދުތަކާއި، އަމަލީގޮތުން ދާއިރާގައި މަސައްކަތް ކުރާނެގޮތް ދަސްކޮށްދެއެވެ.
- ހެވީ ވެހިކަލް އޮޕަރޭޓަރސް
މި ކޯހުގައި ބަރު އެއްގަމު އުޅަދު ދުއްވަން ދަސްކޮށްދިނުމުގެ އިތުރަށް އެ އުޅަނދުތަކަށް ދިމާވާ މައްސަލަތައް ދެނެގަނެ މަރާމާތުކުރާނެ ގޮތްވެސް ދަސްކޮށްދެއެވެ.
ޕްރޮގްރާމްގައި ބައިވެރިވުމުގެ ޝަރުތު
- ގްރޭޑް 10 ފުރިހަމަކޮށްފައިވުން ނުވަތަ މޯލްޑިވްސް ކޮލިފިކޭޝަން އޮތޯރިޓީ (އެމްކިޔުއޭ) އިން ޤަބޫލުކުރާ ލެވެލް 2 ގެ ސަނަދެއް ހާސިލުކޮށްފައިވުން.
- އުމުރުން 18 އަހަރާއި 30 އަހަރާ ދެމެދުގެ މީހެއް ކަމުގައިވުން.
އިތުރު ތަފްސީލް
މި ޕްރޮގްރާމްތައް ކުރިއަށް ގެންގޮސްފައިވަނީ 60 ބައިވެރިންނަށް އަމާޒުކޮށްގެން، ޕްރޮގްރާމްގެ މުއްދަތުގައި ކޮންމެ ބައިވެރިއަކަށް މަހަކު 6000 ރުފިޔާ ދޭގޮތަށެވެ. ހުޅުމާލޭގައި ދިރިއުޅޭ މީހުންނަށް އިސްކަންދީގެން ކުރިއަށްގެންދިޔަ މި ޕްރޮގްރާމުން ފާހަގަކުރެވުނު ކާމިޔާބީ ހޯދި މީހުންނަށް އެޗްޑީސީ އިން ދަނީ ވަޒީފާ ހަމަޖައްސައިދެމުންނެވެ. ކުރިއަށް އޮތް އަހަރު ވެސް ޒުވާނުންނަށް އަމާޒުކޮށްގެން ތަމްރީން ޕްރޮގްރާމްތަކެއް ހުޅުވާލާނެ ކަމަށް ވަނީ މައުލޫމާތު ދީފައެވެ.
" މި ޕްރޮގްރާމްގެ މަޤްސަދަކީ، ތަފާތު ދަތިތަކާހުރެ ސްކޫލުގައި އެކަށީގެންވާ ނަތީޖާތަކެއް ހޯދިފައި ނެތުމުގެ ސަބަބުން އިތުރަށް ކުރިއަށްދިއުމަށް ހުރަސްތަކާ ކުރިމަތިވެފައިވާ ފަރާތްތަކަށް އިތުރު ފުރުޞަތެއް ހޯދައިދިނުން. ކޮންމެ ބައިވެރިއަކަށް ކާމިޔާބުކަމާއެކު ޕްރޮގްރާމް ފުރިހަމަކުރުމަށް އެހީތެރިވެދޭނެ މީހަކު ޚާއްސަކުރެވިފައިވޭ. ޤައުމީ ފެންވަރުގެ ސަނަދެއް ލިބުމުގެ އިތުރަށް އުނގެނުމާއެކު މަސައްކަތުގެ ތަޖުރިބާ އަމަލީގޮތުން ލިބުން މިއީ ބައިވެރިންނަށް އޮތް ފައިދާއެއް." އެޗްޑީސީ އިން މައުލޫމާތު ދިނެވެ.
ނިންމުން
އެޗްޑީސީ އިން ކުރިއަށްގެންދިޔަ ތަމްރީން ފުރުސަތުގައި ބައިވެރިވި ޒުވާނުންނަށް މިވަނީ މަސައްކަތުގެ މައިދާނުގައި ކުރިއަށްދާނެ ރަނގަޅު މަގެއް ފަހިވެފައެވެ. ދެން އޮތީ ހިތްވަރާއެކު ކުރިއަށް ދިއުމެވެ.
ނައުޝާން ފަދަ ޒުވާނަކަށް ދާއިމީ ވަޒީފާ ލިބި، މަހަކު މަދުވެގެން 12000 ރުފިޔާ ގެއަށް ގެންދަން ލިބުމަކީ، ކޮވިޑްގެ މިދަތި ދުވަސްވަރުގައި ލިބުނު ނަސީބެކެވެ. ނައުޝާންގެ ވާހަކައިން ދޭހަވީ ބައެއް ދުވަސް ދުވަހު އިތުރުގަޑީގައި ވެސް މަސައްކަތް ކުރަނީ އެމަސައްކަތަށް ހުރި ޝައުގެއްގެ ބޮޑުކަމުން ކަމެވެ. މިއަދު މުޖުތަމައުގައި ބޭނުންވަނީ ހިތްވަރާއެކު މަސައްކަތުގެ މައިދާނުގައި ކުރިއަށްދާނެ ޒުވާނުންނެވެ.
