ނާޒިމް އިތުރަށް ވާހަކަ ދެއްކިއެވެ. އޭނާ ހޮސްޕިޓަލުގައި އޮންނަން ޖެހުނީ ކީއްވެގެންތޯ އަނެއްކާވެސް ސުވާލު ކުރިއެވެ. ކައިރީގައި ހުރި އަހަރެންގެ ބައްޕައާއި ބައްޕަގެ ރަހުމަތްތެރި ކުޑަތުއްތުއަކީ ކީއްކުރަން އައިސް ތިބި ބައެއްތޯ އެހިއެވެ. އަހަރެންނަށް ބަސްހުއްޓިފައި އިދެވުނެވެ. ހަމަ ރަނގަޅަށްވެސް އަހަރެން ހުރީ ބުނާނެ އެއްޗެއް ނޭނގިފައެވެ. ނާޒިމްގެ ހަރަކާތްތަކުން އަހަރެންގެ ހިތަށް ނުތަނަވަސްކަން ވެރިވެގެން ދިޔައެވެ. ހުވަފެނަކުން ހޭލެވެލިގެން އުޅެނީބާއޭ ހިތަށް އެރިއެވެ.
ބައްޕަ އަހަރެންނާ މުޚާތަބު ކުރީ ވަރަށް ވިސްނުންތެރިކަމާ އެކުއެވެ. "ދަރިފުޅާ ނާޒިމަށް ކާއެއްޗެއް ތައްޔާރުކޮށްލަން ގެއަށް ދާންވީއެއްނު"؟ އަހަރެންގެހިތަށް އަރާ ފައިބަމުން ދިޔަ ޖަވާބު ނުދީ ވާހަކަ އޮޅުވާލަން މަސައްކަތް ކުރީމެވެ. "ޑޮކްޓަރ ބައްލަވާ ގަޑިވެސް ޖެހުނީދޯ". މިހެން ބުނުމަށްފަހު ނަރުހުންގެ ޖަގަހައަށް ދިއުމަށް މިސްރާބު ޖެހީމެވެ. ވެގެން އުޅޭގޮތް ކޮންމެވެސް ވަރަކަށް ވިސްނުމުން އެވާހަކަ ނަރުސް ކުދިންނާ ހިއްސާކޮށްލީމެވެ.
ފަންޑިތަ ސިހުރާ ގުޅޭ ވާހަކަތައް ޤަބޫލުކުރަން އަހަރެން ބޭނުން ނުވި ނަމަވެސް ލޯ ކުރިމަތިން ސިފަވި މަންޒަރުން އެކަމާ ދެކޮޅު ހެދޭނެ ޖާގައެއް ނެތެވެ. ނަރުހުންވެސް ތިބީ އާޝޯޚުވެފައެވެ. ބަލިވެގެން ހާލެއްނެތިފައި އޮތް މީހަކަށް މިއައި ބަދަލު އެންމެ ރަނގަޅަށް ފެނިގެންދިޔަ އެއްބަޔަކީ ނަރުހުންނެވެ. ކުއްލިއަކަށް ޑޮކްޓަރ ވަޑައިގެންނެވިތަން ފެނުމުން ނާޒިމްގެ ކޮޓަރިއާއި ދިމާލަށް ހިނގައިގަތީމެވެ. ނާޒިމް ފެނިފައި ހައިރާންވެގެން ޑޮކްޓަރ ބަލަން ހުއްޓެވެ. އެންމެންގެ މޫނުމަތިންވެސް ފެންނަމުން ދިޔައީ ހައިރާންވެ އަންތަރީސްވެފައިވާ މަންޒަރެވެ. ނާޒިމްގެ ގައިގައި ހަލާކުވެފައިވާ ފާރުގަނޑުގެވެސް އަސަރެއް ނެތުމާއި ނާޒިމްގެ ހަށިގަނޑުން ބަލީގެ އެއްވެސް އަސަރެއް ފެންނަން ނެތުމުންނެވެ. ވަރަށް ގިނަ ގޮތްގޮތަށް ބެއްލެވުމަށްފަހު ނާޒިމް ގެއަށް ދޫކޮށްލުމަށް ޑޮކްޓަރ ލަފާދެއްވިއެވެ. އިތުރަށް އެއްވެސް މައްސަލައެއް ދިމާވެއްޖެނަމަ ބޭސް ބަދަލުކުރުމަށް އިރުޝާދުދެއްވިއެވެ.
ހޮސްޕިޓަލުން ދޫކޮށްލުމުން ގެއަށް ދިއުމަށް އަވަސްވެގަތީމެވެ. ނަމަވެސް ނާޒިމްގެ ސުވާލުތަކަށް ނިމުމެއްނައެވެ. އޭނާ ހޮސްޕިޓަލަށް ގެނެވުނު ގޮތަކާއިމެދު އެކިކަހަލަ ސުވާލުތައް ކުރަން ފަށާއިރަށް ވާހަކަ ބަދަލުކޮށްލަން އަހަރެން މަސައްކަތް ކުރީމެވެ. ބައްޕައާއި ބައްޕަގެ ރަހުމަތްތެރިޔާ މިސްކިތަށްދާ ވާހަކަ ބުނުމަށްފަހު ހިނގައިގަތެވެ. އަހަރެން ޓެކްސީއަކަށް ގުޅުމަށްފަހު ނާޒިމްއާއެކު ގެއަށް ދިޔައީމެވެ. ޖޯލީގައި މަންމަ އަލްޔާ ގޮވައިގެން އިނެވެ. ނާޒިމް ފެނުމާއެކު ޝަކުވާގެ ރާގަކަށް އަލްޔާ ރޯންފެށިއެވެ. ނާޒިމްގެ އަޑު އިވިގެން ގޭގައި ތިބި 3 ކުދިން ދުވެފައި އައިސް ނާޒިމްގެ ގައިގައި ބައްދާލިއެވެ. ހުރިހާ ކުދިންގެ މޫނުމަތިންވެސް ފެންނަމުން ދިޔައީ އުފާވެރި ކަމުގެ ކުލަވަރެވެ. ދުވަސް ނިމިގެންދިޔައީ ކުދިންނާއެކު އެކި ކަންކަމުގައި އަވަދިނެތި އުޅުމަށްފަހު އެވެ.
ރޭގަނޑުވުމުން ލަމްހާއާއި އަހަރެން ބޭރަށް ނުކުމެލީ ބޯހަމަޖައްސާލުމަށެވެ. ދެމީހުން ބައްދަލުވެ ވާހަކަދައްކާ ނުލެވޭތާ ވަރަށް ދުވަސް ވެއްޖެއެވެ. ޖެހިގެން އައި ދުވަހު އަހަރެން އޮފީހަށް ނުކުތީމެވެ. ނާޒިމްގެ ހާލު މިހާރު ރަނގަޅެވެ. ގޭތެރޭގެ ކަންކަމުގައި މަންމައަށް އެހީތެރިވެދެނީ ނާޒިމެވެ. މަންމައަށް ނާޒިމް ވަރަށް ރަނގަޅެވެ. އަހަރެން އޮފީސް ނިންމާފައި ގެއަށް އައިއިރު ވަރަށް މީރު ކެއުމެއް ތައްޔާރު ކޮށްފައި ހުއްޓެވެ. އެއީ އަހަރެންނަށް އެންމެ މީރު ބިރިޔާނީއެވެ. ކާން އިށީއިނުމާއެކު މަންމަ ބުނެލިއެވެ. "ދަރިފުޅާ ސަހާ ނާޒިމަކީ ހާދަ މޮޅު ކައްކާއެކޭ ދޯ". ވަގުތުން އަހަރެންގެ ނަޒަރު ހުއްޓުނީ ނާޒިމަށެވެ. އެވަގުތު ނާޒިމްވެސް އިނީ އަހަރެންނާ ދިމާލަށް ބަލާށެވެ. އަހަރެން ލަދުން އިސްޖަހާލީމެވެ.
އަހަރެން ހީކުރީ ކައްކާފައި ހުރި ބިރިޔާނީ އަކީ މަންމަ ކައްކާފައި ހުރި އެއްޗެއް ކަމަށެވެ. ނާޒިމް އަހަރެންނާ ކައިވެނިކޮށްގެން އުޅުނުއިރު އެއްވެސް ވަރަކަށް ކައްކާ ނޫޅޭތީ އަހަރެން ހީކުރީ ނާޒިމަށް ކައްކަން ނޭނގޭ ކަމަށެވެ. ނާޒިމާމެދު ކުށްހީތަކެއް ކުރެވިފައިވީނަމަވެސް މިހާރު އެ ހީތަށް ޔަގީނަށް ބަދަލުވެއްޖެއެވެ. "ނާޒިމް މިހާ މީރުކޮށް ކައްކަން ދަސްކުރީ ކޮންތާކުންތަ"؟ އަހަރެންނަށް އަހާލެވުނެވެ. ޖަވާބުގައި ނާޒިމްގެ ދަރިފުޅު ހާޒިމް ޖަވާބު ދިނެވެ. "ސަހާ ދައްތާ އަޅުގަނޑުމެންގެ މަންމަ ދިޔަފަހުން އަޅުގަނޑުމެންނަށް ކައްކާފައި ކާންދެނީ ބައްޕައޭ. ބައްޕަ އަބަދުވެސް ޔޫޓިއުބް ބަލައިގެން ކައްކާނެ. ވަރަށް މީރުކޮށް ބައްޕަ ކައްކާނެ" ހާޒިމްގެ އެވާހަކައިން އަނެއްކާވެސް އަހަރެންގެ ހިތުގައި ސުވާލުތައް ފުނިޖެހެމުން ދިޔައެވެ. އެކުދިންގެ މަންމަ އެކުދިން ދޫކޮށްލާފައި ދިޔަތާ ވީދުވަހެއް އަހަރެންނަށް އަހާލަންވެސް ނުކެރެއެވެ.
ކެއުމުގެ ފޯރީގައި ތިއްބާ އައިސް ވަނީ ލަމްހާއެވެ. "ސަހާ ހިނގާބަލަ ހުކުރު ދުވަހު ދަތުރު ދާން ދޯ". ލަމްހާ އެހެން ބުނުމާއެކު ކުދިންގެ މޫނުމަތިން އުފާވެރި ކަމުގެ ކުލަވަރު ފެނުނެވެ. އަހަރެން ލަމްހާގެ ވާހަކަ އާއި އެއްބައިވެލީމެވެ. އަދި ނާޒިމް ކައިރިން ދާނަންތޯވެސް އަހާލީމެވެ. ނާޒިމްވެސް އެކަމާ އެއްބަސްވިއެވެ. ކައިނިމިގެން އަހަރެންނާއި ލަމްހާ ދަތުރު ދިއުމުގެ ކަންތައްތައް ރާވާލީމެވެ. މަންމަވެސް މިކަމުގައި ވަރަށް ފޯރި ހިފާލާފައި ކައްކާނެ ތަކެތީގެ ލިސްޓެއްވެސް ހަދާލިއެވެ. ދުވަސް ނިމި ރޭގަނޑުގެ ހަމަހިމޭން ކަމުގެ ތެރެއިން އަހަރެންގެ ހިތުގައި ކޮށްޓާލީ ނާޒިމްގެ ހަޔާތުގެ ސަފްހާއަކުން ސަފްހާއެކެވެ. މާޒީގެ ކުލަވަރު ތަކުން އަހަރެންގެ މިވަގުތުކޮޅުގެ އުފާވެރިކަން ގެއްލުނަ ނުދޭން މަސައްކަތް ކުރީމެވެ. މިޚިޔާލުތަކުން އަހަރެންގެ ސިކުނޑިއަށް ވެރިވެގެން ދިޔަ ވިސްނުން ތަކަށް ނިމުމެއްގެނުވީ އަލްޔާގެ އަޑެވެ. ބާރަކަށް އައިސް މަންމީ ކިޔާލާފައި އަހަރެންގެ ކޮލަށް ދޮނެއް ދިނެވެ. އެކުޑަ ކުޑަ މައުސޫމް ކުއްޖާ އަހަރެންގެ ހިތުން ޖާގައެއް ހޯދީ އެހާމެ ކުޑަ ދުވަސް ކޮޅެއްގެ ތެރޭގައެވެ. އަހަރެން އަލްޔާ އާއި އެކު ބްލޮކްސް ކުޅެ މަޖާ ވަގުތުކޮޅެއް ހޭދަކުރަމުން ދަނިކޮށް ނާޒިމް އައިސް އަހަރެންގެ އަތުގައި ހިފާލާފައި ޖޯލި ކައިރިއަށް އައުމަށް އެދުނެވެ.
ކުއްލިއަކަށް އަހަރެންގެ ފޯނު ރިންގުވާން ފެށިއެވެ. ވަގުތުން ފޯނަށް ޖަވާބު ދިނުމަށް ފޯނު ނަގާލީމެވެ. ފޯނު ކުރީ ހޮސްޕިޓަލުންނެވެ. އަވަސް ގޮތަކަށް ޑިއުޓީއަށް ނުކުތުމަށް އެންގިއެވެ. މިރޭ ޑިއުޓީއަށް ނުކުންނަން ހުރި ކުއްޖާ ސަލާމް ބުނުމުން ސީނިއަރ ބޭފުޅެއް ބޭނުންވާ ކަމަށް ބުނުމަށްފަހު އަވަހަށް އައިސް ދިނުމަށް އެދުނެވެ. އަވަސް އަވަހަށް ޑިއުޓީއަށް ދިއުމަށް ތައްޔާރުވެލަމުން މަންމަ ކައިރީ އެވާހަކަ ބުނެފައި ހޮސްޕޓަލަށް ދިޔައީމެވެ. ނާޒިމް ކުދިންގެ ކަންކަން ކޮށްލަދީ ގޭތެރޭގައި މަންމައަށް އެހީވުމަކީ އާންމު ކަމެއްކަން އަހަރެންނަށް އެނގޭތީ އެކަމާ ފިކުރުބޮޑެއް ނުވެއެވެ. އަހަރެން ގެއަށް އައީ އަނެއްދުވަހު ޑިއުޓީ ނިންމާލުމަށްފަހު ހެނދުނު 8 ޖަހަނިކޮށެވެ.
ގެއަށް އައިއިރު ހެނދުނުގެ ނާސްތާ ވަރަށް ފުރިހަމައަށް ތައްޔާރުކޮށްފައި ހުއްޓެވެ. ރެސްޓޯރެންޓެއްގެ މޭޒުމައްޗަށް ވުރެ ތަނަވަހެވެ. ތައްޔާރުކޮށްފައި ހުރިލެއް ފުރިހަމަ ކަމުން އަޖައިބުވެ އަންތަރީސްވިއެވެ. އެހާ ފުރިހަމައަށް އެކަން ކުރާނީ ނާޒިމް ނޫން ދެވަނަ މީހެއް ނޫންކަން އަހަރެންނަށް ކަށަވަރެވެ. މަޑުމަޑުން އަހަރެންގެ ހިތުގައި ނާޒިމާ ދޭތެރޭގައި އޮތް ހިތްހަމަނުޖެހުން ހަމްދަރުދީއަށް ބަދަލުވެ ނިމިއްޖެއެވެ. މާދަމާއަކީ ހުކުރު ދުވަސް ކަމަށްވާތީ ދަތުރު ދިއުމުގެ ހުރިހާ ކަމެއް ރާވާލުމަށްފަހު އަހަރެން އަވަސްވެގަތީ ބާޒާރަށް ދިއުމަށެވެ. އަހަރެންގެ ހިތަށް އުފާވެރިކަން ގެނުވާ އެއްބަޔަކީ 4 ކުދިންނެވެ. ދަތުރު ދިއުމަށް ފުރަން ހަމަޖެހިފައިވަނީ ހެދުނު 7 ޖަހާއިރު ކަމަށްވާތީ އަވަހަށް ނިދަން ޖެހޭނެ ކަމަށް ކުދިންކައިރީ ބުނެލީމެވެ. ވެފައިވާ ވަރުބަލިކަމުގައި ގޮސް އަހަރެންނަށް ވަރަށް އަވަހަށް ނިދިއްޖެއެވެ.
ދަތުރުދިއުމަށް ފުރަން ހަމަޖެހިފައިވާ ދިމާލަށް އަހަރެންގެ އާއިލާ ދިޔައެވެ. ލަމްހާއާއި ލަމްހާގެ އާއިލާވެސް ތިބީ ފިސާރި ތައްޔާރުވެގެންނެވެ. ދަތުރު ދިއުމަށް ހަމަޖެހިފައިވާ ފަޅުރަށް ކަމުގައިވާ މުއްދޫއަށް ދެވުނީ ބަރާބަރު 45 މިނިޓުންނެވެ. ދުވަހަކީ އަވިގަދަ އުޑުމަތި ސާފު ދުވަހެކެވެ. މޫދު ކުޅިވަރުތައް ރާވާލާފައިވަނީ ވެސް ބައިބަޔަށެވެ. ހުރިހާ ކުދިންވެސް ވަރަށް ފޯރީގައި ކުޅެން އުޅުނެވެ. ކެއްކުމުގެ ހުރިހާ ކަމެއްގައި އިސްވެ އުޅުނީ ނާޒިމެވެ. ވަލުތެރެއިން ދަރު ހޮވައިގެން އައިސް ކެއްކުމުގައި އަވަދިނެތި ނާޒިމް އާއި މަންމަ އުޅުނެވެ. އަހަރެން އުޅުނީ ކުދިން ބެލުމުގައެވެ. މޫދަށް އެރެން އެންމެ ފޯރި ހުންނަނީ އަލްޔާއެވެ.
މެންދުރު ކާގަޑި ޖެހުނުއިރުވެސް އެންމެން ތިބީ ކުޅިވަރުގެތެރެއަށް ގެއްލިފައެވެ. ކާން ތައްޔާރުކޮށް ނިމުމުން ނާޒިމް އައިސް އަހަރެމެންނަށް ގޮވިއެވެ. ހުރިހާ އެންމެންވެސް ކާއެއްޗެތި މީރުވެގެން އެވާހަކަ ދައްކަން ތިބެފައި ކުއްލިއަކަށް ނާޒިމް ނެތްކަން ފާހަގަ ކުރެވިއްޖެއެވެ. ނާޒިމްވެސް އަހަރެމެންނާއެކު ކާން އިނެވެ. އެންމެންވެސް ހީކުރީ ނާޒިމް ދިޔައީ މޫދާ ދިމާލަށް ކަމަށެވެ. އެހެން ހިތާ އެދިމާލަށް ދިޔައީމެވެ. ނާޒިމް ފެންނާކަށް ނެތެވެ. އަހަރެން ހާސްވާން ފެށިއެވެ. ބައްޕަ ރަށުގެ ފުއްޓަރު ފަރާތާއި ދިމާލަށް މިސްރާބު ޖެހިއެވެ. އަހަރެންނާ ލަމްހާ އަތިރިމަތީގެ އެކި ދިމަ ދިމާލަށް ދިޔައީމެވެ. އެއްވެސް ތާކުން ނާޒިމް ފެންނާކަށް ނެތެވެ.
އަހަރެން ބިރުން ގޮސް ރޮވެން ފެށިއެވެ. ކުއްލިއަކަށް އަވި ނިވާލައިފިއެވެ. އުޑުމަތިން ވިލާގަނޑެއްގެ އަސަރު ފެންނަން ފެށުމުން އަހަރެންގެ ހިތް އިތުރަށް ނުތަނަވަސްވިއެވެ. ބައްޕަ ނާޒިމް ފެނޭތޯ ވަރަށް މަސައްކަތް ކޮށްފިއެވެ. އެއްވެސް ތަނަކުން ނާޒިމެއް ނުފެނުނެވެ. ރަށު އޮފީހަށްވެސް މިކަން އަންގަން އަހަރެން ބައްޕަކައިރީގައި އެދުނީމެވެ. ކުއްލިއަކަށް ވިދާ ގުގުރަން ފަށައިފިއެވެ. އަލްޔާވެސް ހުއްޓާނުލާ ރޮނީ އެވެ. އަހަރެންގެ ހާސްކަން ބޮޑުވަމުން ދިޔަވަރަކަށް ހަދާނެގޮތް ހުސްވިއެވެ. އަނެއްކާވެސް ނާޒިމް ފެނޭތޯ ހިނގަން ފެށީމެވެ. ހުރިހާ ކުދިން މަންމަ ކައިރީގައި ބައިތިއްބާފައި އެތެރޭގައި އިންނަ ހަނި މަގަކުން އަހަރެންނާއި ލަމްހާ ހިނގަން ފެށީމެވެ. ކުއްލިއަކަށް އެތަނުގައި ހުރި ނިކަ ގަހެއްގެ ބުޑުން މީހެއްގެ ރުއިމުގެ އަޑު އިވެން ފެށިއެވެ. އެކަމަކު އެރަށުގައި އިތުރު ބަޔަކު އައިސް އުޅޭ ކަމެއް އެނގިފައި ނުވެއެވެ. އަހަރެންނާ ލަމްހާއާއި ދެމީހުންނަށް އެއްފަހަރާ ހަޅޭލަވައި ގަނެވުނެވެ. ކައިރިވަމުން ދިޔަ ވަރަކަށް އެމީހެއްގެ ރުއިމުގެ އަޑު ގަދަވާން ފެށިއެވެ. އަނެއްކާވެސް ވަރަށް ބާރު ގުގުރިއެއް ޖެހި އަޑު އިވުނެވެ. އެވަގުތު އަލިފާން ކަނިތައެއް ބުރައިގެން ދިޔަތަން ފެނުނެވެ. އަހަރެން ހިތް ހީވީ ހުއްޓުނު ހެންނެވެ. އައިކޮޅަށް ދާން ނޭނގިފައި މަގު އޮޅުނު ކަހަލައެވެ.
ނުނިމޭ..
