ދިވެހި ވަޒަން ބަހުރުވައިގެ އެންމެ މުސްކުޅި ވައްތަރުކަމުގައިވާ ބަންޖަކީ ދިވެހި ޅެންވެރިކަމުގެ ބާވަތްތަކުގެތެރެއިން މިހާރު އާންމުކޮށް ފެންނަން ނެތް ތަދު ބާވަތެކެވެ. އިހުގައި ކިޔައި އުޅުނު ބަނދިތައް ލިޔެވި ފަހަށް ފެންނަން ހުންނާނެ ގޮތަކަށް ރައްކާކުރެވިފައި ނެތެވެ. ދޫދޫމަތިން ކިޔަމުން އައި ބަނދިތަކުގެ ތެރެއިން މިއަދާ ހަމައަށް ފެންނަންހުރީ މަދު ބަންޖެކެވެ. މުސްކުޅި ބަނދިތަކުގެ ތެރެއިން ލިޔެވިފައިވާ މަދު ބަންޖެއް ހުރީ އަލްގާޟީ ހުސައިން އަފީފުއްދީން ބޮޑު ފެންވަޅުގޭ ސީދީ ކަންޒުލް އަދަބުގައި ލިޔުއްވާފައިވާ މުޤައްދިމާގައެވެ. މީގެ ތެރޭގައި ހިމެނެނީ ތިރީގައި މިވާ ބަނދިތަކެވެ.
ދިޔޯ އިތުރު ބޮޑުކަންނާ، ހެދިނަވަށް ވަޑައިގަންނަވާ
ފައިދޮންނަ ގަލެއްކަމުލީ، ފީރޯޒުގަނޑެކެ ނަންކީ
މި ބަނދީގައި މިބުނާ ފީރޯޒަކީ އެހަށާއި ފަށުފުލަށް ބޭނުންކުރާ ފެހިކުލައިގެ އަގުހުރި ހިލައެކެވެ. ދިޔޯ ކިޔައި އުޅެނީ ރީތި އަންހެނުންނަށެވެ. ދިޔޯ ނަވެއް ބަންނަވާ ފައިދޮންނަން ގަލެއްކަމުގައި ލީ އަގުބޮޑު ފީރޯޒުގަނޑެކެވެ.
މިއީ ވަރަށް ދިގު ބަންޖެއްކަމަށް ސީދީ ލިޔުއްވާފައިވެއެވެ. މިސާލު ގެނައުމަށްޓަކައި ބަނދިން ހަތަރުބަސް ލިޔުއްވާފައިވިއަސް ފަހަށް އޮތް ބަސްތައް ހޯދޭނެ އިތުރު ގޮތެއް މިހާރަކު ނެތެވެ.
ބަންޖާއި ގުޅޭގޮތުން ސީދީ ކަންޒުލް އަދަބުގައި ލިޔުއްވާފައިވަނީ:
ބަނދި މިއީ، ދިގުމިނަކަށް ބަހުގެ އަދަދަކަށް ކަނޑައެޅިފައި ވަކި މިންވަރެއް އޮތްކަން އެނގޭ އެއްޗެއް ނޫނެވެ. ވަރަށް ދިގު ބަނދި ހުރިފަދައިން ކުރު ބަނދި ވެސް ހުރި ކަމަށް ފާހަގަކުރައްވާފައިވެއެވެ.
" ބާރަ ފިލި ނޫން ވަޒަނަކަށް އޮތް ބަންޖެއް ނުފެނުނު. އަދި ރައިވަރު ފަދައިން ބަސްތައް ފެށޭކޮޅުގެ ފިލިކޯޅިތައް ހަމައެއްގެމަތީން ވަކިގޮތަކަށް ހިފެހެއްޓިފައެއްވެސް ނުހުރޭ. އެހެނަސް ބަސްތައް ހުއްޓޭ ކާފިޔާތައް، ވައްތަރުކޮށް އެއްގޮތްކުރާން އުޅުމާއި އެކުވެސް މާބޮޑު ފަރުވާތެރިކަމެއް އެކަމަކަށް ނުބަހައްޓާ."
ސަމަންދަރޯ ސަމަންދަރޯ، މާކަނޑުމާ ސަމަންދަރޯ
ސަމަކުރަންދި ކަޅުބިލަބަސް، ދަހިވެވިގެން ކަޅިވެވިގެން
މިއޮޑިއަށް އަރާ ބާނީ، މަރްޖަލް ބަޙްރައިނީ
ބަނދީގެ ވަޒަން
ބަނދީގެ ވަޒަނެއްކަމުގައި ބެލެވެމުން އަންނަނީ 12 ފިއްޔެވެ. ސަމަންދަރޯ ސަމަންދަރޯ އަކީ 12 ފިއްޔެވެ. މާކަނޑުމާ ސަމަންދަރޯ އަކީ އަނެއް 12 ފިއްޔެވެ. މިގޮތަށް 12 ފިލި ދެ ބަހުން ހަތަރުފަށް ކުރަމުން ބަނދި ދިގުކުރަމުން ދަނީއެވެ. ބަނޑުވައް އަކުރު އެއްގޮތްކުރުމާއި ކާފިޔާ އެއްގޮތްކުރުމަށް ފަރުވާލެއް ނުބަހައްޓައެވެ.
އިހުގައި ކިޔާއުޅުނު ބައެއް ބަނދިތަކުގެތެރެއިން ބޮޑުބުޅާ ބަނދި:
ބޮޑުބުޅަލާ ނާދޭ، ނާދެ ހިނގައިދާންދޭ
މިގެޔަކު ނެތް ރޯކުއްޖެއް، އެގޭ ތިބީ ރޯ ދެކުދިން
އެގޭދޮށަށް ދާނދޭ، ބޮޑުބުޅަލާ ދާންދޭ
ގޭގެއުތުރު ވަރުވާކަނު ގަލެއްވެއްޓި ބަލެއްއޮތޭ
އެބަލުން ދުވެ ދަގަބުޅަލާ ބޮޑުބުޅަލާ ދާންދޭ
ނާދެ ހިނގައިދާންދޭ
އައްސަރަނގު ކާލިވަޅަށް ކެތި ދިޔަމަގު ދަންނަމުތަޅައޭ
އެމަގުން ދުވެދާންދޭ، ބޮޑުބުޅަލާ ދާންދޭ، ނާދޭ، ނާދެހިނގައިދާންދޭ
މިއީ ބަނދި ތަރައްގީވެ ކުދީން ޅޮއްސަން އިހުގައި ކިޔާއުޅުނު ބަންޖެކެވެ. އައްސަރަނގަކީ ގަހާތަރި ކައިރީ ވަކިގޮތަކަށް އެތުރިފައި ހުންނަ އަލިގަދައަށް ތަރިއަށް ކިޔާނަމެކެވެ.
ނޯޓް: މިލިޔުމުގައި ހިމަނާފައިވާ މައުލޫމާތު ނަގާފައިވަނީ ތާރީޚް ދިރާސާކުރައްވާ ތަފާތު ލިޔުންތައް ލިޔުއްވަމުން ގެންދަވާ ލޫކަސްޖަލީލުގެ ވެބްސައިޓުންނެވެ.
