މިހާރަކަށް އައިސް އަޅުގަނޑުމެން ދިވެހިންނަކީ ދުނިޔޭގެ ރީތި މަންޒިލްތަކަށް ދަތުރު ކުރުމުގެ ފޯރި ނަގަމުންދާ ބައެއްގެ ގޮތުގައި ފާހަގަކުރެވޭ ބައެކެވެ. ގުދުރަތީ ރީތި މަންޒަރުތަކާއި އުސް އިމާރާތްތަކާއި އަދި އާސާރީ ތަންތަނުގެ ފޮޓޯ ތައް ފޭސްބުކް އަދި އިސްޓަގްރާމުން ވަރަށްގިނައިން ފެނެއެވެ. މިގޮތުން ތައިލެންޑުގެ ވެރިރަށް ބެންކޮކަކީވެސް ދިވެހިންގެ މެދުގައި ވަރަށް އާންމު މަންޒިލެކެވެ. ބެންކޮކަކީ އާންމު ގޮތެއްގައި ވިޔަފާރި، ބޭސްފަރުވާ އަދި ތައުލީމް ޙާސިލު ކުރުމަށް އަންނަ މަންޒިލެކެވެ. ބެންކޮކް ސިޓީ ލައިފް ދައްކުވައިދެނީ ކާރުބާރު ބޮޑު ތަނެއްގެ ގޮތުގައެވެ. ނަމަވެސް ތައިލެންޑުގެ އެހެން ސިޓީ ތަކަކީ ބެންކޮކުގެ ދިރިއުޅުމާއި ވަރަށް ތަފާތު މަންޒިލް ތަކެކެވެ. ގުދުރަތީ ރީތި މަންޒަރުތައް ބަލާލުމަށް ސިޓީ އާއި ކުޑަކޮށް ދުރަށް ޖެހިލަމާ ހިނގާށެވެ. ހަމަހިމޭންކަމާއި ހިތްގައިމުކަން ދައްކުވައިދޭ ފެހިކަންގަދަ ތަނެއްގެ ގޮތުގައި "ކައޮޔާއި" ފާހަގަކޮށްލަމާ ހިނގާށެވެ. ކައޮޔާއި އަކީ ބެންކޮކުން 3 ގަޑި އިރުން ދެވެން އޮންނަ ރީތި މަންޒިލެކެވެ. މިތަނުގެ އެންމެ ޚާއްސަ އެއްތަނަކަށް އޮންނަނީ ފެހިކަންގަދަ ރީތި ޕާކެކެވެ.
- ކައޮޔާއި ނެޝަނަލް ޕާރކް
"ކައޮޔާއި ނެޝަނަލް ޕާކްގެ ނަމުން ނަން ދެވިފައިވާ މިޕާކަކީ ތައިލެންޑުގައި ދެވަނަ އަށް އޮންނަ އެންމެބޮޑު ޕާކެވެ. 1962ވަނަ އަހަރުން ފެށިގެން ގާއިމު ކުރެވިފައިވާ މިޕާކަކީ ތައިލެންޑުގެ ފުރަތަމަ ޕާކެވެ. މިޕާކުގެ ބޮޑުމިނަކީ 2168 ކިލޯ މީޓަރ ކިއުބެވެ. 2019ވަނަ އަހަރު މިލިއަނެއްހާ މީހުން ޒިޔާރަތް ކޮށްފައިވާ މިޕާކަކީ ވަރަށް ހިތްގައިމު ރީތި ޕާކެކެވެ. މިޕާކުގެ ވަށައިގެން ފެންނަން އޮންނަ ފަރުބަދަތަކުގެ ރީތިކަމާއި ފެހިކަން ގަދަ ވިނަތަކުން ދައްކުވައިދޭ ރީތިކަމުގެ ވާހަކަ އަކީ ހަމަ ލޮލުން ފެނިގެން ނޫނީ ބުނެދޭންވެސް ނޭނގޭހާ ރީތިކަމެއް އެކުލެވިގެންވާ ޕާކެކެވެ. ރީތި ވޯޓަރފޯލް ތައް އެކުލެވިފައިވެއެވެ.
މިޕާކް ތެރޭގައި 4 ނުވަތަ 5 ގަޑިއިރު ހައިކު ކޮށްފައި ދެވޭ ޖަންގައްޔެއްވެސް އޮވެއެވެ. އެޖަންގަލީ ތެރޭގައި ބައެއްކަހަލަ ބޮޑެތި ޖަނަވާރު އުޅެއެވެ. ބޮޑެތި ޖަނަވާރުތަކާއި އެކު ފޮޓޯ ނަގާލާ އަދި އެފަދަ ބޮޑެތި ޖަނަވާރުތައް ހަމަ ލޮލަށް ފެނުމުގެ ފުރުސަތުވެސް ލިބިގެންދެއެވެ. މިތަނަކީ ހަފްތާގެ ހުރިހާ ދުވަހެއްގައިވެސް ހުޅުވިފައި ހުންނަ ތަނެކެވެ. މިތަނަށް ވަނުމުގެ ފީއަކީ ބޮޑުމީހެއްނަމަ 200 ރުފިޔާއެވެ. ކުޑަކުއްޖެނަމަ 100 ރުފިޔާއެވެ.
- ޕްރިމޯ ޕިއާޒާ
ދުނިޔޭގެ މަޝްހޫރު ގައުމުތަކުގެ ތެރެއިން އިޓަލީ އަކީ ވަރަށްގިނަ ބޭފުޅުން ދާން ބޭނުންވާ ހިތްގައިމު މަންޒިލެއްގެ ގޮތުގައި ހިމެނޭ ތަނެކެވެ. އެހުވަފެން ދެކި ހަގީގަތަކަށް ނުވިނަމަވެސް އިޓަލީއަށް ދެވުނު ކަމުގެ އިހްސާސް ކޮށްލުމަށް ޕްރިމިއޯ ޕިއާޒާއަށް ޒިޔާރަތް ކޮށްލަމާ ހިނގާށެވެ. އިޓަލީގެ ހިތްގައިމު އާކިޓެކްޓުއަލް ތީމަށް ހަދާފައިވާ ރީތި އިމާރާތްތައް ޕްރިމޯ ޕިއާޒާއިން ދައްކުވައިދެއެވެ. މިތަނުގައި ހިނގަން އޮންނަ މަގަކީ އިޓަލީގެ މަގުތަކުގެ ނަކަލެކެވެ. ކުދިކުދިކޮށް އަތުރާލާފައި ހުންނަ ގާތަކުން ހެދިފައިވާ ރީތި މަގުތަކުން އިޓަލީގެ ޗާލުކަން އިތުރަށް ދައްކުވައިދެއެވެ. އެހާމެ ފެހިކަން ގަދަ ވިނަތަކުން މުޅިތަން ފުރާލާފައި އޮންނަ އިރު، އެތަނުގައި ފޮޓޯއެއް ނަގާލުމުން އިޓަލީގައި ނަގާފައިވާ ފޮޓޯއަކާ މާބޮޑު ތަފާތެއް ނުހުންނާނެއެވެ. މި ހަމަހިމޭން މާހައުލުގައި އިދެ ކޮފީއެއް ބޯލުމުން އެލިބޭ ހިތްހަމަޖެހުންވެސް ވަރަށް ބޮޑެވެ. ކުޑަކުދިން ގޮވައިގެންދާން ބޭނުންނަމަ އެތަނުގެ ތެރޭގައި އޮންނަ ކަންބަޅި ތަކާއި އެކު މަޖާކޮށްލާ އެއަށް ކާންދިނުމުންވެސް އެކުދިން މަޖާކުރާނެއެވެ. މިތަނަށް ޒިޔާރަތްކޮށްލަން ހަފްތާގެ ކޮންމެ ދުވަހެއްވެސް ރަނގަޅެވެ. ހުޅުވިފައި ހުންނަ ގަޑިތަކަކީ ހެނދުނު 9 އަކުން އިރުއޮއްސި 6 އަށެވެ. މިތަނަށް ވަނުމުގެ ފީއަކީ އެންމެ 50 ރުފިޔާއެވެ.
- ޕީބީ ވެލީ.
މިތަނުގެ ހިތްގައިމު ކަމަކީ މޭބިސްކަދުރު ދަނޑުތައް ބަލާލާ ތާޒާ މޭބިސްކަދުރު ކާލުމެވެ. އަދި މޭބިސްކަދުރުން އުފައްދާ ތާޒާ ޖޫސް ރަހަބަލާލާ އެއުފައްދާތަންވެސް ފެނިގެންދެއެވެ. އަދި ހަމަ އެއާއެކު މިތަނުގައި ކޮފީވެސް އުފައްދައެވެ. މިތަނަކީވެސް ވަރަށް ޗާލު ރީތި ތަނެއްގެ ގޮތުގައި ފާހަގަ ކުރެވިފައިވާ ތަނެކެވެ. މިތަނުގެ ތެރޭގައި އޮންނަ މޭބިސްކަދުރު ދަނޑުތައް ބަލާލުމަށް ޚާއްސަ ދަތުރެއްވެސް އޮވެއެވެ. މޭބިސްކަދުރު ދަނޑުތައް ބަލާލުމަށް ދުވާލަކު އޮންނަނީ 6 ދަތުރެވެ. ހުޅުވިފައި ހުންނަނީ ހެނދުނު 8.30 އިން ހަވީރު 4 އަށެވެ. މިތަނަށް ވަނުމުގެ ފީއެއްގެ ގޮތުގައި ނަގަނީ 125 ރުފިޔާއެވެ. 20 އަހަރުން ދަށުގެ ކުދިންގެ އަތުން ފީއެއް ނުނަގާ ވަދެވޭނެއެވެ.
- ޔޫ ކައޮޔާއި.
މިތަނަކީ ޔޫރަޕުގެ ހިތްގައިމު މަންޒިލަށް ދާން ބޭނުންވެ އެހުވަފެން ހާސިލުނުވާނަމަ ކުޑަ ހަރަދަކުން ދެވިދާނެ ތަނެކެވެ. މިތަނުން ދައްކުވައިދެނީ ފަރަންސޭސި ވިލާތުގެ އެންމެ އާސާރީ ހިތްގައިމު ކަމެވެ. މިތަނުގައި ހުންނަ ހޮޓަލަކީ ހިތްގައިމު ހޮޓަލެއްގެ ގޮތުގައި މަޝަހޫރުވެފައި އޮންނަ ހޮޓަލެކެވެ. މިތަނުގައި ހުރެ އެއްދުވަސް ނުވަތަ ދެދުވަސް ހޭދަކޮށްލުމުން އެލިބޭ ހިތްހަމަޖެހުން ވަރަށް ބޮޑެވެ. މިތަނުގެ ރީތި ފޮޓޯތަކުން ދައްކުވައިދޭ ރީތިކަން ހަމަލޮލުން ދެކިލުމަށް ޒިޔާރަތް ކޮށްލުމަކީ ހިތްހަމަޖެހޭނެ ކަމެކެވެ. މިތަނުގައި ހުންނަ ހޮޓަލުގެ އަގަކީ 1450 ރުފިޔާއެވެ.
- ތެމްސްވެލީ
މިތަނަކީ އަދި މުޅިން ތަފާތު އިހްސާސްތަކެއް ކޮށްލަދޭ ހިތްގައިމު ތަނެކެވެ. މިފަހަރުގެ މަންޒިލަކަށް އިނގިރޭސި ވިލާތުގެ ލަންޑަން ޚިޔާރު ކުރައްވަން ބޭނުންފުޅުނަމަ ތެމްސްވެލީއިން އެހިތްގައިމުކަން ގެނެސްދެއެވެ. މިތަނުގައި ހިނގަން އޮންނަ މަގަކީ ވަށައިގެން ކޯރު ފެންނަން އޮންނަ ހިތްގައިމު މަގެކެވެ. މިތަނުގެ ރީތިކަމާއި ހިތްގައިމުކަން އެކުލެވިގެންވާ ޕާކެއްވެސް އޮވެއެވެ. މިތަނުގައި ހުންނަ ކޮޓަރި ތަކަކީވެސް ލަންޑަނުގެ ހޮޓަލުތަކުގެ އަސްލަކަށް ބަލައިގެން ހެދިފައިވާ ކޮޓަރިތަކެކެވެ. މިތަނުގައި އޮންނަ ރެސްޓޯރެންޓަކީ ކާސަލްއެއް ގޮތަށް ހަދާފައި ހުރި ތަނެކެވެ.
ތައިލެންޑުގެ ވެރިރަށާއި މާދުރު ނޫން ސިޓީއަކަށްވާ ކަންޗަނަބުރިއަކީވެސް އެހާމެ ރީތި ހިތްގައިމު ތަނެއްގެ ގޮތުގައި ފާހަގަކުރެވޭތަނެކެވެ. މިތަނުގައި ހުންނަ ކެފޭ ތަކަކީ ވަރަށް ހިތްގައިމު ކަމެއް އެކުލެވިގެންވާ ވަށައިގެން ކޯރު ފެންނަން ހުންނަން ކެފޭ ތަކެކެކެވެ. މިގޮތުން "ލޭކް ވިއު ކެފޭ" އަކީ ޤުދުރަތީ ރީތި މަންޒަރުން ފުރިގެންވާ ތަނެއްގެ ގޮތުގައި ފާހަގަކޮށްލެވޭ ތަނެކެވެ. މިތަން ހުޅުވިފައި ހުންނަނީ ހެނދުނު 9 އަކުން ހަވީރު 6 އަށެވެ. ހެނދުނުގެ ނާސްތާ ނުވަތަ މެންދުރުގެ ކެއުންވެސް މިތަނުން ލިބެން ހުރެއެވެ.
ބެންކޮކުން 1 ގަޑި އިރާ 30 މިނިޓް ދުރުގައި އޮންނަ "ސަންފްލާވަރ" ފީލްޑުގެ ރީތި ކަމަކީ އަޖައިބުވާހާ ރީތިކަމެކެވެ. ސަންފްލާވަރ ފީލްޑް އެންމެ ރީތިކޮށް ހެދިފައި އޮންނަނީ "ސަރަބުރި" ޕްރޮވިންސްގައެވެ. މިތަނުގެ މާތައް ފޮޅިފައި ހުންނާނީ ޑިސެމްބަރ މަހުން ޖެނުއަރީ މަހަށެވެ.
ތައިލެންޑުގެ އެންމެ ދެކުނަށް ޖެހިލާއިރު "އުޑޮންތާނީ" އަކީ ވަރަށް ތަފާތު ހިތްގައިމު ސިޓީއެކެވެ. މިސިޓީގެ ތަފާތު ކަމަކީ މިތަނުގައި ހެދިފައިވާ "ރެޑް ލޮޓަސް ލޭކް" ގެ ހިތްގައިމު ކަމުގެ ވާހަކައެވެ. ބެންކޮކުން 1 ގަޑިއިރު ފުލައިޓް ނަގައިގެން ދަތުރު ކުރެވެން އޮންނަ އުޑޮންތާނީއަށް ޒިޔާރަތް ކޮށްލުމުން ރެޑް ލޮޓަސް ލޭކުގެ ރީތިކަން ފެނިގެންދާނެއެވެ. މިތަނުގައި ހުންނަ ލޮޓަސް މާތައް ފޮޅިފައި ހުންނަނީ ޑިސެމްބަރ އިން ފެށިގެން ފެބުރުއަރީއަށެވެ. މިތަނަށް ދިއުމަށް އެންމެ ރަނގަޅު ގަޑިއަކީ ހެނދުނު 6 އިން 11 އަށެވެ.
ތައިލެންޑުގައި ހިތްހަމަޖައްސާލުމަށް ދެން ދެވިދާނެ އެހެން މަންޒިލަކީ ކޮބައިތޯ ބަލާލާއިރު އެހެން ސިޓީއަކަށް ޖެހިލާނަމެވެ. މިގޮތުން ބެންކޮކުން 3 ގަޑިއިރު ދުއްވާފައިދެވޭ އިތުރު ތަނަކަށް "ހުވަހިންގެ" ރީތިކަންވެސް ހިމަނާލާނަމެވެ. މިފަހަރު ވަރަށް ތަފާތު ރީތި މަންޒިލެއްގެ އިހްސާސް ކުރެވިގެންދާނެއެވެ. ގްރީސްގެ" ސަންޓޮރިނީ" އަކީވެސް ވަރަށްގިނަ ބޭފުޅުންގެ ބަކެޓް ލިސްޓުގައި ހިމެނިފައިވާ ތަނެއްގެ ގޮތުގައި ފާހަގަކުރެވިފައިވާ ތަނެކެވެ. މިގޮތުން ހުވަހިންގައި އޮންނަ ސަންޓޮރިނީ ޕާރކަކީ ސަންޓޮރިނީގެ އަސްލަކަށް ބަލައިގެން ހެދިފައިވާ ތަނެއްގެ ގޮތުގައިވެއެވެ. ހުދު ކުލައާއި ނޫކުލަ ހިމަނައިގެން ހަދާފައިވާ މިރީތި އިމާރާތްތަކުން ގެނެސްދީފައިވާ ރީތި ކަމަކީ ގްރީސްގެ ސަންޓޮރިނީއިން އެފެންނަ ރީތި ކަމާއި މާބޮޑު ތަފާތެއް ނެތް ތަނެކެވެ. ހިނގަން އޮންނަ މަގުގައި އަތުރާލާފައި ހުންނަ ގާތަކާއި އިމާރާތްތަކުގެ އެއްގޮތްކަންވެސް މާބޮޑު ތަފާތެއް ނެތެވެ. ވަށައިގެން ހުންނަ ފިހާރަތަކާއި ރެސްޓޯރެންޓްތަކުގެ އެއްގޮތް ކަންވެސް ވަރަށް ބޮޑެވެ. މިތަނުގައި އޮންނަ ތީމް ޕާރކަކީ ވަރަށްބޮޑު އަދި ވަރަށްގިނަ ކުޅިވަރުތައް ކުޅެވެން އޮންނަ ޕާކެކެވެ. ކުޑަކުދިން ގޮވައިގެން ތަފާތު ރައިޑްސްތައް ދުއްވާލަންވެސް ދެވަނައެއް ނެތްފަދަ ތަނެކެވެ. މިތަން ހުޅުވިފައި ހުންނަނީ ހެނދުނު 9 އަކުން ރޭގަނޑު 7 އަށެވެ. މިތަނަށް ވަނުމުގެ ފީ އަކީ 65 ރުފިޔާއެވެ.
ތައިލެންޑުގެ އުތުރަށް ޖެހިލާނަމަ ވަރަށް ހިތްގައިމު މަންޒިލެއްގެ ގޮތުގައި ދެވިދާނެ ތަނަކަށް "ޗިއަންމައި" ހިމަނާލާނަމެވެ. ބެންކޮކުން 685 ކިލޯމީޓަރ ދުރުގައި އޮންނަ ޗިއަންމައިއަށް އާންމު ގޮތެއްގައި ދަތުރު ކުރަނީ މަތިންދާ ބޯޓުގައެވެ. ނަމަވެސް އެއްގަމު މަގުންވެސް ދަތުރު ކުރެވެއެވެ. އެއްގަމު މަގުން ދަތުރުކުރާނަމަ 12 ގަޑި އިރުން ދެވެއެވެ. ޗިއަންމައި ހުޅުވިފައިވަނީ 1296 ވަނަ އަހަރުއެވެ. ލަންނަ ރަސްކަމުގައި ވެރިރަށެއްގެ ގޮތުގައި 1558 ވަނަ އަހަރާ ހަމައަށް އޮތެވެ. މިތަނަކީ ފަރުބަދަ މަތީ ރަށެކެވެ. މިތަނުގެ ފިނިހޫނުމިން އާންމުގޮތެއްގައި ހުންނަނީ 21 ޑިގްރީގައެވެ. ޑިސެމްބަރ މަހާއި ޖެނުއަރީމަހު މިތަނުގެ ފިނި 8 ޑިގްރީއަށްވެސް ދެއެވެ. މިތަނުގައި ހުންނަ ފަރުބަދަތަކުން ފެންނަ ހިތްގައިމު ރީތި މަންޒަރު ތަކަކީ ވަރަށް ތަފާތު މަންޒަރު ތަކެކެވެ.
ތައިލެންޑުގެ އެންމެ އުސްފަރުބަދަ މަތީގައި އޮންނަ މަޝްހޫރު ޕާކެއްގެ ގޮތުގައި ނަންދެވިފަވާ ޕާކެއް އޮވެއެވެ. އެއީ "ޑޮއި އިންތަނޯން" ކިޔާ ޕާކެކެވެ. ވަރަށް ޗާލު މާމެލާމެލި ހައްދާފައިވާ މިޕާރކަށް ދިއުމަށް ދުއްވާ އެއްޗެއް ބޭނުންވެއެވެ. އެހާ އުހުގައި އޮންނަ ޕާރކަކަށް ވެފައި މިޕާރކަށް އެރުމަށް 2 ގަޑިއިރު ހޭދަވެއެވެ. ޕާރކުގެ އެންމެ އުހަށް އަރާލެވުމުން ވަށައިގެން ފެންނަ މަންޒަރު ތަކަކީ ހާދަހާވާ ރީތި މަންޒަރު ތަކެކެކެވެ. ގުދުރަތީ ރީތިކަމުގެ ވާހަކަ ދައްކާ ހުސްނުވާހާ ރީއްޗެވެ. އިރުއަރައިގެން އަންނަ މަންޒަރާއި އިރު އޮއްސެމުން އަންނަ މަންޒަރުވެސް ތަފާތުވެފައި ރީއްޗެވެ. މިޕާކުގައި ހެދިފައިވާ ގަހުން ފޮޅިފައި ހުންނަ ޗެރީ ބްލޮސަމްގެ ރީތި ހިތްގައިމު މަންޒަރުގެ ވާހަކަ އަކީ ދައްކާ ހުސްނުވާހާ ރީތިކަމުގެ ވާހަކައެކެވެ.
"ޗިއަންމައި" އާއި ޖެހިގެން ދެން އޮންނަ "ޗިއަން ރައި" އަކީވެސް ވަރަށް ހިތްގައިމު ރީތި މަންޒިލެކެވެ. ހިތްހަމަޖައްސާލުމަށް ފަރުބަދަ މަތީ ރިސޯޓަކަށް ޖައްސާލުން ކިހިނެއްވާނެތޯއެވެ. "ޓާރާ މޮންޓަނަރ"ގެ ނަމުން ނަންދެވިފައިވާ ޕްރައިވެޓް ރިސޯޓެއްގެ ގޮތުގައި ޗުއްޓީ ހޭދަކޮށްލުމަށް މިރިސޯޓް ވަރަށް ތަފާތެވެ. ވިލާތަކުގެ ތެރޭގައި އުޅޭވޭކަހަލަ އިހްސާސެއް ގެނެސްދޭ މިރިސޯޓަކީ ވަރަށް ތަފާތު ރިސޯޓެކެވެ.
ހެނދުނު އިރުއަރައިގެން އަންނަ މަންޒަރާއި ބެލްކަނީގައި ބެހެއްޓިފައި ހުންނަ ކޮފީ މޭޒުގައި އިށީދެލައިގެން އިންނަ އިރު އެލިބޭ އަރާމުކަން އިހްސާސް ކޮށްލުމުގެ ފުރުސަތު ހޯދާލަން މިތަނަށް ޒިޔާރަތް ކޮށްލުން ރަނގަޅެވެ. އޯޕަން ޓޮއިލެޓްއެއް ހުންނައިރު އެތަނުގައި ބަހައްޓާލާފައި ހުންނަ ޖަކޫސީގައި އޮވެލައި އުޑުމަތިން ފެންނަ ރީތި މަންޒަރުން ހިތް ފުރާލަދޭ ކަހަލައެވެ. މިތަނުގެ އަގަކީ ދުވާލަކަށް 1900 ރުފިޔާއެވެ.
މިގެނެސްދެވުނީ ތައިލެންޑުގެ ހިތްގައިމު ރީތި ބައެއް ތަންތަނާއި ގުޅޭ މައުލޫމާތެވެ.
