މުޖުތަމައުގައި ކުޑަކުދިންނާ މެދު އިހުމާލުވާ މިންވަރު އަންނަނީ އިތުރުވަމުންނެވެ. ގިނަ ފަހަރަށް ކުށްކުރާ ފަރާތްތަކުގެ އަމާޒަކަށްވެސް ވެފައި އޮންނަނީ ކުޑަކުދިންނެވެ. މާދަމާގެ މުސްތަގްބަލް ކަމުގައިވާ ޅަ ދަރިންނާމެދު އިހުމާލުވަމުންދާއިރު އަންނަން އޮތް ޖީލަށް އެކުދިން ތައްޔާރު ކުރާނީ ކިހިނެތް ހެއްޔެވެ. އެ ކުދިންނަށް ތަފާތު ބާވަތްތަކުގެ އަނިޔާ ކުރުމާއި ގަނާ ކުރުމާއި ގޯނާ ކޮށްގެން މުސްތަގްބަލް އަނދިރިކޮށް ނުލާށެވެ. ކުޑަކުދިންނަށް ދެވޭ އަނިޔާއާއި ދެކޮޅަށް ތެދުވާށެވެ. އަމަލީގޮތުން އެކަން ހުއްޓުވާށެވެ. އެފަދަ މީހުންނަށް ކުށް ތަކުރާރު ކުރުމުގެ ފުރުސަތު ނުދޭށެވެ. މިނިސްޓްރީ އޮފް ޖެންޑަރ ފެމިލީ އެންޑް ސޯޝަލް ސާވިސަސްއިން އެންމެ ފަހުން އާންމުކޮށްފައިވާ ތަފާސް ހިސާބުތަކަށް ބަލާލުމުންވެސް އެންމެ ގިނައިން ރިޕޯޓް ކުރަނީ ކުޑަކުދިންނަށް ކުރާ އެކި ބާވަތުގެ އަނިޔާގެ މައްސަލަތައްކަން އެނގެއެވެ.
އެ މިނިސްޓްރީގެ ވެބްސައިޓްގައި އާންމުކޮށްފައިވާ ތަފާސް ހިސާބުތަކުން ދައްކާގޮތުގައި މިއަހަރުގެ އޮކްޓޯބަރު މަހު އެކަނިވެސް އެ މިނިސްޓްރީއަށް ޖުމްލަ 222 މައްސަލަ ހުށަހެޅި އެޓެންޑްކޮށްފައިވެއެވެ. އޭގެތެރޭގައި ކުޑަކުދިންނަށް ކުރާ އެކި ބާވަތުގެ އަނިޔާއާއި ގުޅޭ 95 މައްސަލައެއް ރިޕޯޓްކޮށްފައިވެއެވެ. މީގެތެރެއިން 30 މައްސަލައަކީ ޖިންސީ ގޯނާގެ މައްސަލައެވެ. މިއީ އޭގެ ކުރީ މަހާއި އަލާ ބަލާއިރު އިތުރު އަދަދެވެ. ސެޕްޓެމްބަރުގައި ހުށަހެޅުނު މައްސަލަތަކުގެތެރެއިން ޖިންސީގޯނާގެ ގޮތުގައި ރިޕޯޓް ކޮށްފައިވަނީ 25 މައްސަލައެކެވެ.
މީގެ އިތުރުން ކުޑަކުދިންނަށް އިހުމާލުވުމުގެ 20 މައްސަލައަކާއި ޖިސްމާނީ ހާނިއްކައިގެ 12 މައްސަލަ އަކާއި ނަފްސާނީ ހާނިއްކައިގެ 10 މައްސަލައެއްވެސް ހުށަހެޅިފައިވެއެވެ. އެހެންކުދިންގެ ފަރާތުން ގަނާލިބުން(ބުލީ) އަދި ފުރައްސާރައިގެ ޝިކާރައަކަށްވުމުގެ 5 މައްސަލައަކާއި ނަހަމަ ގޮތުގައި ބޭނުން ކުރުމުގެ 2 މައްސަލައެއްވެސް ކުޑަކުދިންނާއި ގުޅޭ 95 މައްސަލައިގެ ތެރޭގައި ރިޕޯޓްކޮށްފައިވެއެވެ.
އޮކްޓޯބަރު މަހު ހުށަހަޅާފައިވާ އަހްލާގީ މައްސަލަތަކުގެތެރޭގައި ކުޑަކުދިންގެ އަހްލާގާއި ގުޅުންހުރި 20 މައްސަލައެއް ހިމެނެއެވެ. މިފަދަ މައްސަލަތަކުގެ ތެރޭގައި ރުޅި އިސްކުރުމާއި ރުޅި ގަދަވެގެން އުޅުމުގެ 11 މައްސަލައެއް ހިމެނެއެވެ. އަދި ސުކޫލަށްދާން ބޭނުން ނުވުމުގެ 4 މައްސަލައަކާއި ގެއިން ނުކުމެގެން ދިއުމުގެ 3 މައްސަލައެއް ހިމެނެވެ. މީގެ އިތުރުން އިންޓަނެޓް މެދުވެރިކޮށް އެހެން ކުދިންނަށް ގަނާ ކުރުމުގެ މައްސަލައަކާއި އިތުރު އަހްލާގީ މައްސަލައެއްވެސް ރިޕޯޓްކޮށްފައިވެއެވެ.
ހައްގުތަކުން ކުޑަކުދިން މަހްރޫމް ކުރުމުގެ 04 މައްސަލައެއްވެސް އޮކްޓޯބަރުމަހު މިނިސްޓްރީއަށް ހުށަހަޅާފައިވެއެވެ. އެގޮތުން ކުދިން ސުކޫލަށް ނުފޮނުވުމުގެ 2 މައްސަލައަކާއި ވެކްސިން ނުދިނުމުގެ މައްސަލައަކާއި ސިއްހީ ފަރުވާއަށް ހުރަސްއެޅުން ނުވަތަ ނުދިނުމުގެ މައްސަލައެއް ހުށަހެޅުނެވެ.
އަމިއްލަ ނަފްސަށް ގެއްލުން ދިނުމާއި ގުޅޭ 07 މައްސަލައެއް ޖެންޑާ މިނިސްޓްރީއަށް އޮކްޓޯބަރުމަހު ރިޕޯޓްކުރިއެވެ. އޭގެތެރޭގައި އަމިއްލައަށް މަރުވާން އުޅުމުގެ 4 މައްސަލައަކާއި، އަމިއްލަ ނަފްސަށް ގެއްލުންދިނުމުގެ 2 މައްސަލަ އަކާއި އަމިއްލައަށް މަރުވާން ހިޔާލު އައުމުގެ 1 މައްސަލަ ރިޕޯޓްކޮށް އެއަށް އެޓެންޑްކޮށްފައިވެއެވެ.
އޮކްޓޯބަރު މަހު ހުށަހެޅުނު މައްސަލަތަކުގެތެރޭގައި ނުކުޅެދުންތެރިކަން ހުންނަ ފަރާތްތަކަށް އެހީތެރިކަން ބޭނުންވެގެން 13 މައްސަލައެއް ރިޕޯޓްކޮށްފައިވެއެވެ. އަދި އުމުރުން ދުވަސްވީ މީހުންނަށް އަޅާލުމާއި އެހީތެރިކަން ބޭނުންވެގެން 2 މައްސަލައެއް ރިޕޯޓްކޮށްފައިވެއެވެ.
އޮކްޓޯބަރު މަހު ޖެންޑާ މިނިސްޓްރީއަށް ރިޕޯޓްކޮށްފައިވާ އެހެނިހެން މައްސަލަތަކަށް ބަލާއިރު ވަކި ޖިންސަކަށްވީތީ ކުރާ އަނިޔާއާއި ގެވެށި އަނިޔާގެ 45 މައްސަލަ ހުށަހަޅާފައިވެއެވެ. މީގެތެރެއިން އެންމެ ގިނައިން ރިޕޯޓްކޮށްފައިވަނީ ޖިސްމާނީ އަނިޔާ ކުރުމުގެ މައްސަލަތަކެވެ. އެފަދަ 13 މައްސަލައެއް ރިޕޯޓްކޮށްފައިވެއެވެ. ނަފްސާނީ އަނިޔާ ކުރުމާއި އަނގަބަހުން ކުރެވޭ އަނިޔާގެ 10 މައްސަލަ، އިހުމާލުވުމުގެ 4 މައްސަލަ، ހިފެހެއްޓުމުގެ 4 މައްސަލަ ރިޕޯޓްކޮށްއފައިވެއެވެ. އަދި ޖިންސީ ހާނިއްކަ ކުރުމުގެ 3 މައްސަލަ، ގަދަކަމުން ޖިންސީ ގޯނާ ކުރުމުގެ 2 މައްސަލަ، ބިރުދެއްކުމުގެ 4 މައްސަލަ އާއި މުދާ ހިފެހެއްޓުން ނުވަތަ މުދަލަށް ގެއްލުން ދިނުމުގެ 2 މައްސަލަ، އަދި މާލީ ފުދުންތެރިކަން ފޯރުކޮށްދިނުމަށް ހުރަސްއެޅުމުގެ މައްސަލައެއްވެސް ގެވެށި އަނިޔާގެ ތެރޭގައި ރިޕޯޓް ކޮށްފައިވެއެވެ.
އޮކްޓޯބަރު މަހު ޖެންޑާ މިނިސްޓްރީއަށް އާއިލީ މައްސަލަތަކުގެ ގޮތުގައި ޖުމްލަ 24 މައްސަލައެއް ހުށަހެޅިފައިވެއެވެ. އެއީ ކުދިން ބެލުމުގައި ޖެހޭ 12 މައްސަލަ އަކާއި ކުދިންނާއި ބައްދަލުކުރުމުގައި ޖެހޭ 12 މައްސަލައެކެވެ.
މިހާ ގިނަ އަދަދަކަށް މަހެއްގެ މައްޗަށް މައްސަލަތައް ހުށަހެޅޭއިރު ކުޑަކުދިިންނާއި ގުޅުުންހުރި މައްސަލަތައް ނުހަނު ގިނައެވެ. މިކަންކަން ހުއްޓުވުމަކީ ހުރިހާ އާއިލާއެއްގެ ޒިންމާއެކެވެ. ކުޑަކުދިންނާއި މެދު އިހްމާލުވުމުގެ ބަދަލުގައި އެކުދިންނަށް ލޯތްބާއި އަޅާލުންދީގެން ބޮޑުކުރަން ޖެހެއެވެ. އެ ކުދިންނަކީ މާދަމާ މައިންބަފައިން މުސްކުޅިވެ ގައިބާރު ދެރަވުމުން ބަލަން ތިބޭނެ މަދަދުގާރުންނެވެ.
