ކެއުންބުއިމުގެ ހުރިހާކަމެއް ބިނާވެފައިވާ ބަދިގެތެރޭގެ ސާފުތާހިރު ކަމަކީ ވަރަށް ބޮޑަށް ވިސްނާލަންޖެހޭ ކަމެކެވެ. ކެއްކުމުގެ ކުރިން އަދި ފަހުންވެސް ބަދިގެތެރެ ސާފުކޮށް އޮތުމަކީ ވަރަށްމުހިންމު ކަމެކެވެ. ބަލިތަކުން ރައްކާތެރިވުމާއި، ޖަރާސީމުން ރައްކާތެރިވުމުގައިވެސް ސާފުތާހިރުކަން ހިމެނިގެންދެއެވެ. އެންމެ މުހިންމު ކަމަކަށް ވަނީ ބަދިގެތެރޭގައި ހިފާގެންގުޅޭ ތަކެއްޗަކީ އެންމެ ރައްކާތެރި ގޮތުގައި ގެންގުޅެވޭ އެއްޗެހިތޯ ބެލުމެވެ.
ބަދިގެތެރޭގައި ތަފާތު ބާވަތްތައް ކޮށުމަށް ބޭނުންކުރާ ބޯޑުގެ ގޮތުގައި ގިނަ މީހުން ބޭނުންކުރަނީ ހުރިހާ ކަމަކަށް އެއް ބޯޑެކެވެ. އެއީ އެންމެ ރައްކާތެރި ގޮތް ކަމުގައި ނުބެލެވެއެވެ. މިގޮތުން މަސް ކޮށުމަށް ބޭނުންކުރާ ބޯޑުގައި ތަރުކާރީ ނުވަތަ މޭވާ ކޮށާނަމަ އެއީ އެންމެ ރައްކާތެރި ކަމެއް ނޫނެވެ. އޭގެ ބަދަލުގައި ކޮންމެ ކަމަކަށް ވަކި ބޯޑެއް ބޭނުންކުރުން ރަނގަޅުވާނެއެވެ. އެކަމުގެ ސަބަބުން ބެކްޓީރިއާ އުފެދުމާއި ދުރުކޮށްދެއެވެ. މަސް ކޮށާފައިވާ ބޯޑެއް ސާފު ކުރިނަމަވެސް ކޮންމެވެސް ވަރަކަށް މަސް ހަރުލާފައި ހުރެއްޖެނަމަ ބެކްޓީރިއާ އުފެދިގެން ދެއެވެ.
ބަދިގެތެރޭގައި ގެންގުޅޭ ސްޕޮންޖަކީވެސް އަވަސް އަވަހަށް ބަދަލުކުރަންޖެހޭ އެއްޗެކެވެ. ސަބަބަކަށް ވެފައިވަނީ ތަށި ދޮންނަން ބޭނުންކުރާ ސްޕޮންޖްގައި ކާތަކެތި ހަރުލާފައި ހުރުމެވެ. އެންމެ ރައްކާތެރި ގޮތަކީ ކާތަށި ދޮންނަން ވަކި ސްޕޮންޖެއް އަދި ހަމަ ފެންބޯ ބިއްލޫރިތަށި ނުވަތަ ޖޯޑު ފަދަ ތަށި ދޮންނަށް ވަކި ސްޕޮންޖެއް ބޭނުންކުރުމެވެ. ބަދިގެތެރޭގައި ގެންގުޅޭ ތުވާލި ފަދަ ތަކެތީގައިވެސް ވަރަށް އަވަހަށް ބެކްޓީރިއާ އަށަގަނެއެވެ. އެފަދަ ތަކެއްޗަކީވެސް އަވަސް އަވަހަށް ދޮންނަންޖެހޭ ތަކެތި ކަމުގައި ހަދަންޖެހެއެވެ.
ވަޅި އަދި ދަޅުކެނޑި ފަދަ ތަކެއްޗަކީވެސް ބޭނުންކުރުމަށްފަހު ވަރަށް ރަނގަޅަށް ސާފު ކުރަންޖެހޭ ތަކެއްޗެކެވެ. ރަނގަޅަށް ސާފު ނުކުރެވޭނަމަ މިއެއްޗެތީގައިވެސް ބެކްޓީރިއާ އުފެދި އަދި ދަބަރު ޖެހުންވެސް އެކަށީގެންވެއެވެ. ކެއްކުމަށް ބޭނުންކުރާ އުނދުން، އަވަން، އަދި މައިކްރޯވޭވް ސާފު ތާހިރުކޮށް ބެހެއްޓުމަކީވެސް ވަރަށް މުހިންމު ކަމަކެވެ. ބައެއްފަހަރު އުނދުނުގެ ބޭރު ކައިރީގައި ކާއެއްޗެތި ހަރުލާފައި ހުންނަކަން ފާހަގަވެއެވެ. ކެއުމަށް ބޭނުންކުރާ ތަކެއްޗަކީ ސިއްޙީ ގޮތުން ރައްކާތެރި ތަކެތި ކަމުގައި ހެދުމަށްޓަކައި ބަދިގޭގައި ހުންނަ ހުރިހާ ތަކެތި ސާފުތާހިރުކޮށް ބަހައްޓަންޖެހެއެވެ. ބަދިގޭގައި ހުންނަ ޑަސްޓްބިންއަކީ މަތިޖަހާފައި ހުންނަ ޑަސްޓްބިނަކަށް ވުންވެސް ވަރަށް މުހިންމެވެ. އަދި ޑަސްޓްބިން ހުރުން ރަނގަޅީ ކާއެއްޗެއްސާއި ބޮޑަށް ދުރުގައެވެ.
ކާނާ ރައްކާތެރިކޮށް އަދި ގިނަ ދުވަހު ހަލާކުނުވެ ބެހެއްޓުމަށް ސަމާލުކަންދޭންވީ ބައެއްކަންކަން
1 ތަރުކާރީ ކަހަލަ ބާވަތްތައް ގިނަ ދުވަހު ބެހެއްޓުމަށްޓަކައި ކަރުދާސް އޮޅާލުމަށްފަހު ވަކި ވަކި ތަށީގައި ބެހެއްޓިދާނެއެވެ. ނުވަތަ ރަބަރު އޮޅާލުމަށްފަހު އައިސް އަލަމާރީގައި ބެހެއްޓިދާނެއެވެ.
2 މަހުގެ ބާވަތްތައް އެދުވަހަކަށް ކައްކަން ބޭނުންވާވަރަށް ބައިބައި ކޮށްލުމަށްފަހު ފްރީޒަރުގައި ބެހެއްޓުމުން ފިނި ކެޑުވުމަށްފަހު އަލުން އަލަމާރިއަށް ލުމުގެ ބަދަލުގައި އެވަގުތު ބޭނުންކުރާ ވަރަށް ނެގިދާނެއެވެ.
3 ޓޮމާޓޯ ޕޭސްޓް ކަހަލަ ދަޅު ދަޅުގައި ހުންނަ އެއްޗެހި ޕްލާސްޓިކް ކޮންޓެއިނާއަކަށް އަޅާފައި ބެހެއްޓުމުން ފޫނުޖަހާ ގިނަ ދުވަހު ބޭނުން ކުރެވެއެވެ.
4 މޭވާ އެއްޗެހިވެސް ކޮތަޅަކަށް ނުވަތަ ކޮންޓެއިނާއަކަށް އަޅާފައި ހުންނަނަމަ ގިނަ ދުވަހު ތާޒާކަން މަތީގައި ހުރެއެވެ.
ކާއެއްޗެތި ރައްކާކުރުމަށް ބޭނުން ކުރާ އައިސް އަލަމާރި އަކީ ވެސް މަދުވެގެން ހަފްތާއަކު އެއްފަހަރު ސާފުކުރެވޭ އެއްޗަކަށް ވާންޖެހެއެވެ. ކައްކާފައި އައިސް އަލަމާރީގައި ރައްކާކޮށްފައި ހުންނަ ތަކެތި އެހާ ގިނަ ދުވަހު ބެހެއްޓުންވެސް ރައްކާތެރިއެއް ނޫނެވެ. ގިނަ ބަލިތަކުން ރައްކާތެރިވެ ތިބުމަށްޓަކައި މިފަދަ ކަންތައްތަކަށް ވިސްނުމަކީ މުހިންމު ކަމެކެވެ.
