މާތް ﷲ އެންމެހާ ޚަލްގުތަކުން އުފެއްދެވީ އެކަލާންގެ އެއްކައުވަންތަކޮށް އެކަލާންގެއާ ޝަރީކު ކުރުމާ ދުރުހެލިވުމަށެވެ. ﷲ ތަޢާލާ ވަޙީ ކުރައްވައިފައިވާ އާޔަތްތަކުން އެނގޭ ގޮތުގައި އެކަލާނގެއާ ޝަރީކު ކުރުމަކީ އެންމެ ބޮޑު ފާފައެވެ. އަޅުކަންތައް މާތް ﷲ އަށް ޚާލިޞް ނުކޮށް އެއީ ސައްޙަ އަޅުކަމަކަށް ނުވާނެއެވެ.
ކުރާ ހެޔޮ އަމަލުތަކުގެ ޘަވާބު ނެތިކޮށްލާ ކަންތައްތަކުގެ ތެރޭގައި ކުޑަ ޝިރްކު ވެއެވެ. އޭގެ ތެރޭގައި ކަންދެއްކުން ވެއެވެ. ރަސޫލާ ޞައްލަﷲ ޢަލައިހި ވަޞައްލަމް ވަނީ އެކަލޭގެފާނުގެ ޞަހާބީންނަށް ކަންދެއްކުމާ ދުރުހެލިވެ ވަޑައިގަތުމަށް ނަސޭހަތް ދެއްވާފައެވެ.
" ކުޑަ ޝިރްކަކީ ވަރަށް ވަންހަނާކަން ބޮޑު ކަމެއް. ކަޅު އަނދިރި ރޭރޭގައި، ކަޅު ހިލަމަތީގައި ކަޅު ހިނި ހިރޭ ހިރުމަށްވުރެ މިކަމުގެ ވަންހަނާކަން ބޮޑު"
މާތް ﷲ ރުއްސުންލެއްވި އަބޫ ސަޢީދުލް ޚުދްރީގެ އަރިހުން ރިވާވެގެންވާ ގޮތުގައި އެއް ދުވަހަކު އެބޭކަލުން ދައްޖާލުގެ ވާހަކަ ދައްކަވަން ތިއްބަވަނިކޮށް، ރަސޫލުﷲ ޞައްލަﷲ ޢަލައިހި ވަޞައްލަމް އެތަނަށް ވަޑައިގެން ހަދީޘް ކުރެއްވިއެވެ. ދައްޖާލަށް ވުރެ ތިޔަބައިމީހުންގެ މައްޗަށް ބިރުވެރިކަން ބޮޑު ކަމެއްގެ ވާހަކަ ވިދާޅުވެދެއްވަން ހެއްޔެވެ؟ އެބޭކަލުން އާދޭހޭ ދެންނެވުމުން ހަދީޘް ކުރެއްވިއެވެ. އެއީ ކުޑަ ޝިރްކެވެ. ކުޑަ ޝިރްކަކީ ކޮބައިތޯ ޞަޙާބީން ސުވާލު ކުރެއްވުމުން އެއީ ކަންދެއްކުންކަމަށް ހަދީޘް ކުރެއްވިއެވެ. އަދި އެއީ މާތް ﷲ ގެ އަޅާ ކަމެއް ކޮށް، މީސްތަކުންނަށް އެކަން ދައްކައި އެކަމަށް ސަނާ އާއި ތައުރީފް ހޯދުމެވެ. މިއީ އޭނާ ކުރި ހެޔޮ ޢަމަލުގެ ޘަވާބު ނެތިކޮށްލާނެ ކަމެކެވެ.
" މީހަކު ކަމެއް ކުރާއިރު އެކަން މާތް ﷲ އަށް ޚާލިޞް ނުކުރާނަމަ އާޚިރަތްދުވަހުން އޭނާ މީސްތަކުންގެ ކުރިމަތީގައި ފަޟީހަތް ކުރައްވާނެ. އަމިއްލަ އެދުންތައް ބޮޑުވެ މަދަޙަ ތާރީފުކުރުމަށް ލޯބި ކުރެވުނު ވަރަކަށް އިޚްލާސްތެރިކަމުގެ ބައްތި ކަނިވަމުން ދާނެ. ފަޚްރުވެރިވުމަށާއި މަޝްހޫރުވުމަށް ލޯބިކުރެވުނު ވަރަކަށް، އިޚްލާސްތެރިކަން ފަނޑުވަމުން ދާނެ. މާތް ﷲ ގަބޫލު ކުރައްވާނީ އެއްވެސް ކިލަނބުކަމެއް ނެތް ސާފު ޞާލިޙު އަމަލުތައް"
އަޅުގަނޑުމެންގެ ރަނގަޅު އަމަލުތައް ނުބައި އަމަލުތަކަށް ބަދަލުކޮށްލާ އެންމެ ވަރުގަދަ ބާރަކީ ކަންދެއްކުމެވެ. ކަންދެއްކުމުގެ ކުޑަ މިންވަރަކީ ވެސް ޝިރްކެކެވެ. އަދި އެއީ މުނާފިގުންގެ ސިފައެކެވެ. ކަންދެއްކުމަކީ ރަނގަޅު ޞާލިޙު އަމަލުތައް ވެސް ފާސިދުވެގެންދާ ކަމެކެވެ. ނަމާދާމެދު ޣާފިލުވެތިބެ ނަމާދުކުރާ މީހުންނަށް ގެއްލުމާއި ހަލާކު ހުއްޓެވެ. އެބައިމީހުންނަކީ ކަންދެއްކުމަށް ނަމާދުކުރާ މީހުންނެވެ. އިޚްލާސްތެރިކަމެއް ނެތި ދެއްކުމަށް ކުރެވޭ ނަމާދަކީ ޘަވާބުގެ ބަދަލުގައި އެއިން އަޛާބު ލިބެނިވި އަމަލެކެވެ.
ގިޔާމަތް ދުވަހު އެންމެ ފުރަތަމަ ނަރަކައަށް ވައްދަވާނީ ކަންދައްކާ މީހުންނެވެ. މާތް ﷲ ރުއްސުންލެއްވި އަބޫހުރައިރަތުގެފާނުގެ އަރިހުން ރިވާވެގެންވާ ރަސޫލުﷲ ޞައްލަﷲ ޢަލައިހި ވަޞައްލަމްގެ ވަރަށް ދިގު ހަދީޘް ބަސްފުޅެއްގެ މާނައިގައި ވެއެވެ. "ގިޔާމަތްދުވަހުން އެންމެ ފުރަތަމަ ހިސާބު ބެލެވޭނެ މީހުންގެ ތެރޭގައި ޝަހީދަކު ވެއެވެ. އޭނާ ﷲ ގެ ހަޟްރަތަށް ގެނެވި، އޭނާއަށް ދެއްވި ނިއުމަތްތައް ދައްކަވާނެތެވެ. ވަހީ ކުރައްވާނެތެވެ. މި ނިއުމަތްތަކުގެ ބޭނުން ތިބާ ކުރީ ކިހިނަކުން ހެއްޔެވެ؟ އޭނާ ދަންނަވާނެތެވެ. އިބަ ރަސްކަލާނގެ މަގުގައި ޝަހީދުވެއްޖައުމަށް ދާންދެން މި އަޅާ ހަނގުރާމަ ކުރީމުއެވެ". ވަހީ ކުރައްވާނެތެވެ. "ތިބާ ތިޔަހެދީ ދޮގެކެވެ. އެހެނަސް ތިބާ ހަނގުރާމަ ކުރީ، ތިބާއަކީ ހިތްވަރުގަދަ މީހެކޭ މީސްތަކުން ލައްވައި ބުނުވުމަށްޓަކައެވެ. ހަމަކަށަވަރުން އެފަދައިން ބުނެވުނެވެ. އެއަށްފަހު އެކަލާނގެ އަމުރުކުރައްވައި، އޭނާ މޫނުވަތަށް ވައްޓައިލެވި ދަމާފައި ގެންގޮސް ނަރަކައަށް އެއްލައިލެވޭނެއެވެ.
މާތްﷲ ދެއްވި ނިއުމަތްތަކުގެ ބޭނުން ހެޔޮގޮތުގައި ހިފަނީ އަޅުގަނޑުމެންގެ ތެރެއިން ކިތައް މީހުން ހެއްޔެވެ؟ މި ސުވާލު އަމިއްލަ ނަފްސާކުރުމަށްފަހު އިސްލާހުވަމާ ހިނގާށެވެ.
މައުލޫމާތު: ހުކުރު ޚުތުބާ
