ފެޝަނަކީ އަބަދުވެސް ބަދަލުވަމުން އަންނަ އެއްޗެކެވެ. ޚާއްސަކޮށް 21 ވަނަ ގަރުނަށް ބަލާލާއިރު ފެޝަނަށް ވަރަށް ބޮޑެތި ބަދަލުތަކެއް އައިސްފައިވާކަން ފާހަގަކުރެވެއެވެ. ގިނަ މީހުން އަބަދުވެސް ލޯބިކުރަނީ އެންމެފަހުގެ ފެޝަނަށެވެ. ހެދުން އެޅުމުން ފެށިގެން ގޮސް އަރަން ގެންގުޅޭ ބޫޓް ފައިވާން އަދި އަތްދަބަސްވިޔަސް ހެވެވެ. މިހާރަކަށް އައިސް އާއްމުވަމުން އަންނަ ފެޝަންތަކަށް ބަލާލަމާ ހިނގާށެވެ.
ފައިކުރި ފުޅާ ހަރުވާޅު ނުވަތަ ޖީންސް:
މިހާރު އެންމެކުރީގައި އުޅޭ ފެޝަނަށް ބަލާލާއިރު ފައިކުރި ފުޅާ ހަރުވާޅު ނުވަތަ ޖީންސް ލައިގެން އުޅޭ ކުދިން ވަރަށް ގިނައެވެ. މީގެ އަހަރުތަކެއް ކުރިން އަހަރެމެންގެ ތެރޭގައި ފައިކުރިއަށް ހިމަ ޖިންސް ނޫން އެއްޗެއް ކަމަކުވެސް ނުދެއެވެ. އެހެންނަމަވެސް އެފެޝަން މިހާރު މަޑުމަޑުން ނެތެމުންދާކަން ފާހަގަކުރެވެއެވެ. ޚާއްސަކޮށް ފުރާވަރު އަންހެން ކުދިންގެ މެދުގައި މިފެޝަން ވަނީ ވަރަށް ބޮޑަށް އާއްމުވެފައެވެ.
ޖީންސް ނުވަތަ ހަރުވާޅުގެ ތެރެއިންވެސް ހުދުކުލަ އަކީ ވަރަށް މަޤްބޫލު ކުލައަކަށް ވަނީ ވެފައެވެ. އާއްމުކޮށް ދިވެހިންނަކީ ކަޅުކުލައިގެ އެއްޗިއްސަށް ލޯބިކުރާ ބައެކެވެ. އެއީ ހެދުންލާއިރު ގުޅުވަން ފަސޭހައަކަށެވެ. ކަޅުކުލައަކީ ހުރިހާ ކުލައަކާވެސް ގުޅޭ ކުލައަކަށްވާތީއެވެ.
"އޯވަރ ސައިޒު" ގަޔަށްދޫކޮށް ހުންނަ ހެދުން:
ހެދުންލުމުގައި ގިނަ ކުދިން ޚިޔާރުކުރަނީ ގަޔަށްދޫކޮށް ހުންނަ ޓޮޕް ނުވަތަ ޓީޝާޓެވެ. ސްޓައިލް ހަދާލާފައި ހުންނައިރު ގަޔަށް ބޮޑުކޮށް ބެގީކޮށްލައިގެން ތިބޭއިރު ނިކަން ޗާލުކަމަށް ދައްކައެވެ. އަދި ހަމަ އެސްޓައިލާ ގުޅޭގޮތަށް މޭކަޕް ކޮށްލުމުން އިތުރު ފުރިހަމަކަމެއް ގެނެސްދެއެވެ.
"ޓްރާންސްޕޭރެންޓް" ކޮށް ހުންނަ ފައިވާން:
ފައިވާނެއް ހޯދާއިރު ގިނަކުދިން ބަލަނީ ފައިވާނުގެ މަތި "ޓްރާންސްޕޭރެންޓް" ކޮށް ހުންނަ ފައިވާނެއް ލިބޭތޯއެވެ. ފައިވާނެއް ގަންނައިރުވެސް ބޮޑަށް ބަލަނީ ހުދުކުލަ ނުވަތަ އަލި ކުލަތައް އަދި "ޕެސްޓެލް" ކުލަތައް ލިބޭތޯއެވެ.
"ކުދިމާޖެހި ޝިފޯން ޝޯލް ނުވަތަ ބެޓިކް ޝޯލް"
އާއްމުކޮށް ހެދުން އަޅަނީ އެއްކުލައިގެ ފޮތިން ކަމަށްވާއިރު ބުރުގާއެއް ނުވަތަ ޝޯލްއެއް ހޯދަން ބޭނުންނަމަ ގިނަކުދިންނަށް ކަމުދަނީ ކުދިމާޖެހި ޝޯލްއެވެ. އަދި ހަމަ މިއާއެކު "ބެޓިކް" ކުލަތަކުގެ ޝޯލްވެސް ބޭނުންކުރާ ކުދިން އުޅެއެވެ. އެއްކުލައިގެ ޝޯލް ކުރިން ވަރަށް މަޝްހޫރުވިއިރު އަދިވެސް އެވައްތަރުތައް ބޭނުންކުރާ އުމުރު ފުރައެއް އުޅެއެވެ. ފުރާވަރުގެ ކުދިން އަބަދުވެސް ލޯބި ކުރާނީ އެންމެފަހުގެ ފެޝަނެވެ. އެހެންނަމަވެސް ފެޝަން ބަދަލުކުރަން ބޭނުންނުވާ މީހުންވެސް އަހަރެމެންގެ ތެރޭގައި އުޅެއެވެ. އެއީ ބައެއްކަހަލަ "މެޓީރިއަލް" އަކީ ގަޔަށް ފަސޭހަ "މެޓީރިއަލް" އަކަށް ވާތީއެވެ. 40 އިން މަތީގެ އުމުރުގެ ގިނަ މީހުން ބޭނުންވާނީ އެމީހަކު ލާން ގެންގުޅޭ އެއްޗެއްގައި ހިފައިގެން އުޅޭށެވެ. އެމީހުންގެ ފެޝަން ބަދަލު ކުރުމުގެ ވިސްނުން އެހާ ބޮޑަކަށް ނުހުރެއެވެ.
