ބެލްޖިއަމްގެ ޒާރާ ރުތާފޯޑް އަކީ އެންމެ 19 އަހަރުގައި ރިކޯޑެއް ހަދާ ގީނިސް ވޯލްޑް ރިކޯޑް ލިސްޓުން ޖާގަ ހޯދި އެންމެ ހަގު މީހާއެވެ. މިއީ 155 ދުވަހުން ދުނިޔޭގެ 52 އަށްވުރެގިނަ ގައުމުތަކުގެ މަތިން އެކަނިމާއެކަނި މަތިންދާބޯޓެއްގައި އުދުހިގެން ހަދާފައިވާ ދުނިޔޭގެ ރިކޯޑެކެވެ. މި ޒުވާން ޕައިލެޓް އޭނާގެ ހުވަފެން ހަގީގަތަކަށް ހެދީ އެއްވެސް އިތުރު މީހެއް ނެތް ފްލައިޓެއް ދުއްވައިގެން 2022 ޖެނުއަރީ 20 ވީ ބުރާސްފަތި ދުވަހުއެވެ.
މި ރިކޯޑާއިއެކު ޒާރާ މިވަނީ މައިކްރޯލައިޓް ފްލައިޓެއްގައި (ވަރަށް ކުޑަ، ލުއި އަދި އެންމެ މީހެއް ނުވަތަ ދެމީހެއްގެ ޖާގައިގެ މަތިންދާ ބޯޓެއް) އުދުހުނު ދުނިޔޭގެ އެންމެ ހަގު އަންހެން ޕައިލެޓްގެ ރިކޯޑް ގާއިމްކޮށްފައެވެ. މީގެ ކުރިން މި ރިކޯޑް އޮތީ އަފްގާނިސްތާނަށް އުފަން އެމެރިކާގެ ރަށްވެއްސެއް ކަމުގައިވާ 30 އަހަރުގެ ޝައިސްތާ ވާއިސްގެ އަތުގައެވެ. އެއީ 2017 ވަނަ އަހަރު ސައިޝްތާ ގާއިމުކުރި ރިކޯޑެކެވެ.
ޒާރާގެ ހުވަފެން ހަގީގަތަކަށް ހެދުމަށް ކުޑަ މަތިންބޯޓެއްގައި އެކަނި ދަތުރު ކުރުމުގެ 'ވޯލްޑް މިޝަން' ފެށީ 18 އޯގަސްޓް 2021 ގައެވެ. ދުނިޔޭގެ އެންމެ ހަލުވި މައިކްރޯލައިޓް މަތިންދާ ބޯޓުގައި ޒާރާ ދަތުރުފެށީ ބެލްޖިއަމުން ނައްޓާލައިގެން އެޓްލާންޓިކް މަތިންނެވެ. ދެން މިސްރާބު ޖެހީ ކެނެޑާގެ ދެކުނުން ކެރީބިއަން ސަރަހައްދުންގޮސް ކެނެޑާއަށް ދިއުމަށެވެ. ކެނެޑާއިން އެމެރިކާގެ އަލަސްކާގެ ހުޅަނގު ގޮނޑުދޮށާއި ކައިރިން އުދުހެމުންގޮސް ރަޝިއާ ސަރަހައްދުން ބެރިން ކަނޑުގެ މަތިންވެސް އުދުހުނެވެ. ޒާރާގެ ދަތުރުގެ އެންމެ ފަހު މަރުހަލާގައި އޭނާ ދަތުރު ކުރީ އޭޝިއާ އާއި މިޑްލްއީސްޓްގައި އުދުހުމަށްފަހު އެންމެފަހު މަންޒިލެއްގެ ގޮތުން ޔޫރަޕަށެވެ. ބެލްޖިއަމަށް އެނބުރި ޒާރާގެ ފްލައިޓް ޖެއްސީ ކޯޓްރެއިކް ވެވެލްޖެމް އެއާޕޯޓަށެވެ. މި ދަތުރު އެއްކޮށް ނިންމާލާފައިވަނީ އޮކްޓޫބަރު 2021 ގައެވެ. ފަސްމަސްދުވަހުގެ ދަތުރަކަށްފަހު ޒާރާގެ ހުވަފެން ހަގީގަތަކަށް ހެދިއިރު އޭނާއަށް މަތިންދާބޯޓު ދުއްވުމުގެ ލައިސަންސް ލިބިފައިވަނީ މީގެ ދެއަހަރު ކުރިންނެވެ. އެއީ ދުނިޔޭގެ އެކި ހިސާބުތަކަށް ދަތުރުކުރި 70 އަށްވުރެ ގިނަ ފްލައިޓްގައި 51،000 ކިލޯމީޓަރަށް އުދުހުމަށްފަހުއެވެ.
މި މިޝަން އާއި އެކު ޒާރާ ބޭނުންވީ ސައިންސް، ޓެކްނޮލޮޖީ، އިންޖިނިއަރިން އަދި ހިސާބު އިލްމްގެ ވިޔަފާރިތަކަށް އަންހެނުން ހޭލުންތެރިކުރުމަށެވެ. އަދި އޭނާ އުންމީދަށްވީ ސައިންސާއި ޓެކްނޮލޮޖީ އާއި އިންޖިނިއަރިން އާއި ހިސާބު އިލްމު އަދި އޭވިއޭޝަން ދާއިރާގެ ވަޒީފާތަކުގައި އޮންނަ ޖިންސީ ފަރަގު ކުޑަކުރުމަށެވެ.
ޒާރާގެ މި މިޝަންގެ ސަމާލުކަން ހޯދި އެއްފަރާތަކީ އޭވިއޭޝަން އިންޑަސްޓްރީގެ އިނގިރޭސިވިލާތުގެ މަޝްހޫރު ވާޖިން ގުރޫޕުގެ ވެރިޔާ ރިޗާޑް ބްރެންސަންގެ އަންހެން ދަރިފުޅު ހޮލީ ބްރެންސަން އެވެ. ހޮލީ ބުނީ އެއްދުވަހަކު ހޭލިއިރު ޒާރާ ދަތުރަށް ތައްޔާރުވަމުން އަންނަކަމަށް ބުނެ އޭނާގެ ވަރަށްގިނަ ރައްޓެހިންގެ މެސެޖްތައް ލިބިފައިހުރި ކަމަށެވެ. ޒާރާ ދުނިޔޭގެ ރިކޯޑެއް ގާއިމުކުރަން އުޅޭ ވާހަކަ ރައްޓެހިންގެ ފަރާތުން އެނގިގެން ހޮލީވެސް އެދަތުރު ކާމިޔާބުކޮށްދިނުމަށް ބޭނުންވިއެވެ. އަދި ޒާރާއަށް ގުޅާ އެދަތުރު ވާޖިން އިން ސޮޕޮންސަރ ކޮށްދޭނެކަމަށް ބުނީވެސް ހޮލީ އަމިއްލައަށެވެ. ހޮލީ ބުނީ ޒާރާ އެދަތުރަށް އަމިއްލައަށް ފައިސާ އެއްކުރަމުން ދިޔަކަން އެނގުނުކަމަށާއި ފައިސާ ހޯދުމަށް ޒާރާގެ އާއިލާގެ އެންމެ ކުރީގެ ކާރުވެސް ވިއްކާލި ކަމަށެވެ.
ޒާރާގެ ދަތުރަކީ ސައިންސް، ޓެކްނޮލޮޖީ، އިންޖިނިއަރިން އަދި ހިސާބުގެ ދާއިރާއަށް ގިނަ އަންހެނުން ވެއްދުމަށް ހިތްވަރުދޭ ކަމެއް ކަމަށްވާތީ ހޮލީވެސް ބޭނުންވީ އޭވިއޭޝަން ދާއިރާގައި އަންހެނުންގެ ބައިވެރިވުން އިތުރު ކުރުމަށް މިކަމަށް ސަޕޯޓް ކުރުމަށެވެ.
ޒާރާ އަކީ ބެލްޖިއަމް އަދި އިނގިރޭސިވިލާތަށް ނިސްބަތްވާ ޒުވާނެކެވެ. އޭނާގެ ބައްޕަ އަކީ އިނގިރޭސިވިލާތުގެ ޕައިލެޓެކެވެ. އަދި މަންމައަކީ ބެލްޖިއަމްގެ ޕައިލެޓެކެވެ.
ޒާރާގެ މައިންބަފައިން ޒާރާގެ މިދަތުރު ސިފަކުރީ އޭވިއޭޝަން، ސައިންސް އަދި ޓެކްނޮލޮޖީގެ ދާއިރާގައި ހަރަކާތްތެރިވާ އަންހެނުންގެ އަދަދު އިތުރުކުރުމަށް ހިތްވަރުދޭފަދަ ދަތުރެއްގެ ގޮތުގައެވެ.
ޒާރާގެ މި ދަތުރަށްފަހު އޭނާ ބުނީ މިހާރު އުންމީދުކުރަނީ މިއަހަރުގެ ފަހުކޮޅު އިނގިރޭސިވިލާތް ނުވަތަ އެމެރިކާއިން އިންޖިނިއަރިން ޑިގްރީއެއް ހޯދުމަށެވެ.
ޒާރާ ބުނީ އޭނާ ބޮޑުވަމުން އައިއިރު މަތިންދާ ބޯޓު ދުއްވާ އަންހެން ކުއްޖެއް ނުދަންނަ ކަމަށެވެ. އަދި މިހާރު މިއޮތް ޒުވާން ޖެނެރޭޝަނަށް ކުރީގެ ވިސްނުން ބަދަލުކޮށް އަންހެން ކުދިން ޕައިލެޓުންނަށް ވުމަކީ ދެން ޔުނިކް ކަމެއްގެ ގޮތުގައި ނުދެކޭވެނެ ކަމަށް އޭނާގެ ދަތުރުން ހާމަކޮށްދެވިއްޖެ ކަމަށެވެ.
ޒާރާ ބުނީ ސައިންޓިސްޓުންނާއި، އެސްޓްރޯނޯޓުންނާއި ސީއީއޯ ނުވަތަ ރައީސްކަން ކުރެވޭނީ ފިރިހެން ކުދިންނަށް ކަމަށް ކުދިން ކުޑައިރު ހީކުރާ ކަމަށެވެ. އެހެންނަމަވެސް ޒާރާގެ މި ދަތުރުން އޭނާ ދައްކައިދޭން ބޭނުންވަނީ އަންހެން ކުދިންނަށްވެސް އެފަދަ ވަރުގަދަ ވަޒީފާތައް އަދާކުރެވިދާނެކަމެވެ. އަންހެންކުދިން ބޭނުންވާ ދާއިރާއަކުން ކުރިޔަށްދިއުމަށް ކުޑައިރުންފެށިގެން ދެކެމުން އަންނަ ހުވަފެން ހަގީގަތަށް ހެދޭނެ ކަމެވެ.
ޒާރާ ބުނީ އޭނާގެ މި ދަތުރުގައި ނަމޫނާ އަންހެނުންނާއިވެސް ބައްދަލުވިކަމަށެވެ. އެގޮތުން ކެނެޑާއިން ރެސްކިއު ހެލިކޮޕްޓަރ ޕައިލެޓަކާއި ދިމާވި ކަމަށާއި، އެއީ ވަރަށް މޮޅު އަންހެނެއް ކަމަށް ޒާރާ ސިފަކުރިއެވެ.
އަދި ހަނގުރާމަ މަތީ މަތިންބޯޓު ދުއްވާ އަންހެން ޕައިލެޓުންނާއި މެލޭޝިއާއިން ދިމާވި ކަމަށާއި، އެމެރިކާއިން އަންހެން އެސްޓްރޮނޯޓުންނާއިވެސް ބައްދަލުވެ އެމީހުންނާއެކު ދެކެވުނު ވާހަކަތަކީ ހަނދާނުން ނުފިލާވަރުގެ ވާހަކަތަކެއްކަމަށް ޒާރާ ބުންޏެވެ.
ޒާރާ ބުނީ ދުނިޔެވަށާ އެކަނި އުދުހުމަކީ އޭނާ އަބަދުވެސް ދެކެމުން އައި ހުވަފެނެއް ކަމަށެވެ. އެހެންނަމަވެސް އެކަން ހާސިލުކުރެވޭނެ ކަމަށް ގަބޫލުނުކުރާ ކަމަށާއިި ކުރިން ހީކުރީ އެއީ މާނުރައްކާތެރި އުނދަގޫ އަދި އެހާ އަގުބޮޑު ކަމަކަށްވާތީ މިކަން ނުވާނެ ކަމަށެވެ.
ސުކޫލު ނިންމުމަށްފަހު ޒާރާގެ މިވިސްނުން ބަދަލުކޮށް ތަފާތު ކަމެއް ކުރުމަށް މަސައްކަތް ފެށީ މައިންފަބައިންގެ އެހީއާއެކުގައެވެ. މިދަތުރުގެ ލޮޖިސްޓިކް ކަންކަން ހަމަޖެއްސުމަށް ޒާރާ ވަނީ 30 އަށްވުރެ ގިނަ ގައުމަށް ދަތުރުކޮށް އެކި ގައުމުތަކުގެ މޫސުން ތަޖުރިބާ ކޮށްފައެވެ. 32 ޑިގްރީ ސެލްސިއަސްގެ އިންޑޮނޭޝިއާ އާއި ހަމައިން ގޮސް 34- ޑިގްރީ ސެލްސިއަސްގެ ރަޝިއާއަށް ދަތުރުކޮށް ފިނިހޫނު މިނުގެ އެކި މިންވަރު ތަޖްރިބާ ކުރިއެވެ.
ޒާރާ ބުނީ މިއީ އޭނާ ހީކުރިވަރަށްވުރެ އުނދަގޫ ދަތުރެއް ކަމަށެވެ. އަދި އެންމެ ފަހުވަގުތުގައި ބަދަލުތައްވެސް ގެންނަންޖެހުނު ކަމަށެވެ. އެގޮތުން އުތުރު އިންޑިއާ ސަރަހައްދުގެ ޖައްވުތެރޭގެ ވައި ނުސާފުކަމުންނާއި ފިލިޕީންސްއަށް އެރި ތޫފާން 'ރާއީ'ގެ ސަބަބުން ދަތުރަށް ބަދަލު ގެންނަން ޖެހުނު ކަމަށެވެ.
އަދި އޭގެ ކުރިން ރަޝިއާއިން ވިސާ ލިބެންދެން އަލަސްކާގައި މަހެއްހާ ދުވަހު ޒާރާ މަޑުކުރިއެވެ. އަދި އިރުމަތީ ރަޝިއާގައި ފިނިގަދަވުމުގެ ސަބަބުން 41 ދުވަހު މަޑުކުރަން މަޖުބޫރުވިއެވެ.
ދަތުރުގައި އެންމެ ގިނަ ދަތިތައް ކުރިމަތިވީ މޫސުމީ ބަދަލުތަކުގެ ސަބަބުން ކަމަށް ޒާރާ ބުންޏެވެ.
ދުނިޔޭގައި އެކިކަންކޮޅުތަކުގައި ސޯލޯ ފްލައިޓެއް ދުއްވި އެންމެ ހަގު އަންހެން ޕައިލެޓް އަދި ސޯލޯ ފްލައިޓެއް ދުއްވި އެންމެ ހަގު މީހާގެ ރެކޯޑް ހެދުމަށްފަހު ޒާރާ ބުނީ އޭނާ ވާން ބޭނުންވަނީ އެސްޓްރޮނޯޓަކަށް ކަމަށެވެ.
ޒާރާ އަކީ ދުނިޔެވަށާ ސިންގަލް އިންޖީން އެޅި މަތިންދާބޯޓެއް ދުއްވި ބެލްޖިއަމްގެވެސް ފުރަތަމަ މީހާއެވެ.
