ޗިލްޑްރަންސް އޮމްބަޑްސްޕަރސަންގެ އޮފީހުގެ މިއަހަރުގެ މައިގަނޑު ބޮޑު މަސައްކަތަކީ ކޮމިއުނިޓީ އޮޑިޓެއް ހެދުމެވެ. އެގޮތުން މިއަހަރުގެ ފުރަތަމަ ކުއާޓަރުގައި އޮޑިޓް ކުރާނެ 10 ރަށެއް މިހާރު ވަނީ ކަނޑައަޅާފައެވެ.
ޒީޓައިމްސްއަށް ދެއްވި ޚާއްސަ ބަސްދީގަތުމެއްގައި ޗިލްޑްރަންސް އޮމްބަޑްސްޕަރސަން، ނިޢުމާތު ޝަފީގް ވިދާޅުވީ ކޮމިއުނިޓީ އޮޑިޓާއި އެއްކޮށް މިއަހަރުވެސް އެޑްވޮކެސީގެ މަސައްކަތް ވަރަށް ބޮޑަށް ހިގާނެ ކަމަށެވެ.
"ކުޑަކުދިންގެ ހައްޤުތައް ރައްކާތެރިކުރުމުގެ ޤާނޫނާއި ގުޅުންހުރި ހުރިހާ އިދާރާތައް އެއްކޮށް އޮޑިޓް ކުރާނީ. އެ އިދާރާއަކަށް މަސްއޫލިއްޔަތު ކުރެވިފައި ހުރި ކަންކަން ކުރޭތޯ ބެލޭނެ. އަދި ކުޑަކުދިންގެ ހައްޤުތައް ރައްކާތެރިކުރުމުގެ ޤާނޫނަށާއި، ކުޑަކުދިންގެ ހައްޤުތައް ރައްކާތެރިކުރުމާއި ބެހޭ ބައިނަލްއަޤްވާމީ މުއާހަދާ (ޔޫއެންސީއާރްސީ) އަށް އަހުލުވެރިވެފައިވާ މިންވަރު ބެލުން، ހަމައެއާއެކު އަހުލުވެރި ކުރުމުގެ ޕްރޮގްރާމްތަކެއްވެސް ހިންގާނެ. މި ތިން ކަންތައް ކޮންމެ ރަށެއްގައިވެސް ހިނގާނެ" ކަމަށް ނިޢުމާތު ވިދާޅުވިއެވެ.
އިތުރަށް ވިދާޅުވި އޮޑިޓް ނިމޭއިރު ސުކޫލުތައް، ކައުންސިލްތައް، ހޮސްޕިޓަލް ނުވަތަ ހެލްތް ޕޯސްޓްތަކުން މަސައްކަތް ކުރިއަށްގެންދާ ގޮތް ބަލާ އެތަންތަން ހުންނާނީ އޮޓިޑް ކުރެވިފައި ކަމަށެވެ. އަދި ފުލުހުންނާއި ޖެންޑާ މިނިސްޓްރީގެ ޑެސްކްތަކެއް ހުރިނަމަ އެތަންތަނާއި ކުޑަކުދިން ބަލަހައްޓާ މަރުކަޒެއް ހުރިނަމަ އެތަންތަންވެސް ހުންނާނީ އޮޑިޓް ކުރެވިފައި ކަމަށެވެ.
ޗިލްޑްރަންސް އޮމްބަޑްސްޕަރސަންގެ އޮފީހުން މިދޔަ އަހަރު މަސައްކަތް ކުރަމުން ގެންދިޔައީ ދައުލަތުގެ އިދާރާތަކުން ކުޑަކުދިންގެ ހައްޤުތައް ރައްކާތެރިކުރުމުގެ ޤާނޫނު ތަންފީޒު ކުރަމުންދާ މިންވަރު ބެލުމުގެ މަސައްކަތެވެ. އަދި ހަމަ އެގޮތަށް ކުޑަކުދިންގެ ހައްޤުތައް ހިމާޔަތްކުރުމާއި ބެހޭ ބައިނަލް އަޤްވާމީ މުއާހަދާ (ޔޫއެންސީއާރްސީ) އަށް އަމަލު ކުރަމުންދާ މިންވަރު ބެލުމެވެ. ބައެއް ހާދިސާތަކާއި ގުޅިގެން ހަދާ ސްޕޮޓް އޮޑިޓިންތަކެއްވެސް މިދިޔަ އަހަރު ހަދާފައިވެއެވެ.
ހުޅުމާލޭ ފިޔަވަތީގައި އުޅޭ ކުދިންތަކެއް މިދިޔައަހަރު ފުރާޅަށް އަރައި ގެއްލުންތަކެއްދިން މައްސަލަ ބޮޑުވިއިރު، އޮންބަޑްސްޕަރސަންގެ އޮފީހުން ވަނީ އާންމުންގެ ސަމާލުކަމަށް އެކަން އައުމުގެ ކުރިން އެތަނުގެ ސްޕޮޓް އޮޑިޓެއްވެސް ހަދާފައެވެ.
ފިޔަވަތީގެ މައްސަލައާއި ގުޅޭގޮތުން ނިޢުމާތު ވިދާޅުވީ "އަޅުގަނޑު ދަންނަވާނީ ބައެއްކަންކަން ހިންގާ ވަކި ކަހަލަ މަޤްސަދެއްގައި. ހިޔާގައި ނޫނީ ފިޔަވަތީގައި މިތިބެނީ ކޮންމެވެސް ކަމެއް ގޭތެރޭގައި ވެގެން ދައުލަތަށް ނެގޭ ކުދިން. ހިޔާގަ ތިބޭ ކުދިންނާއި ގޭގަ ތިބޭ ކުދިންނާ މެދު އެއްގޮތަކަށް އެހެން ބެލުން އެއީ އެންމެ ރަނގަޅު ގޮތެއް ނޫން. ފުރާޅަށް އެރުން އެއީ މައްސަލައެއް ނޫން. ރައްކާތެރިކަމާއެކު އެކަން ކުރަންޏާ."
އަދި ސަމާލުކަން ބޭނުންވާ ކުދިބަޔަކަށް އެހެން ސަމާލުކަން ދިނީމަ އެކަން ބޮޑުވުމުގެ ފުރުސަތު ދެވޭ ކަމަށާއި، ފިޔަވަތީގެ މުވައްޒަފުން އޭރުވެސް ހުރީ ކުދިންނަށް ފުރާޅަށް ނޭރޭ ގޮތް ހެދުމަށް ވަރަށް މަސައްކަތް ކޮށްފައި ކަމަށް ވިދާޅުވިއެވެ. ފިޔަވަތީގައި ކުދިން ނިކުމެ އުޅެލާނެ ތަންކޮޅުވެސް ހެދިފަ ނެތްކަމަށް ފާހަގަ ކުރައްވާ އޭނާ ވިދާޅުވީ އެއީ ބަންދުވެފައި ތިބި ކުދިންކޮޅެއް ކަމަށެވެ.
"އޮޑިޓް ކުރަންދިޔަ ހަފްތާ ނޫން އަނެއް ހަފްތާގައި މި މައްސަލަ ދިމާވީ. އެހެންވީމަ ވަރަށް ބޮޑަށް އެތަން ބެލިފައި އޮތީ. ރިޕޯޓެއްވެސް ހެދިފަ އޮތީ. އެތަނުގެ ހާލަތާއި ކުދިންގެ ހާލަތުވެސް ބެލިފަ އޮތީ. ބައެއް ކުދިން ރީއިންޓަގްރޭޝަން ޕްރޮގްރާމަށް ލެވިފަ ތިބީ. އެކަން ޑިލޭވެގެން އެކަމުގެ ހިތްހަމަ ނުޖެހުމުގައި ކުދިންތިބީ" ނިޢުމާތު ވިދާޅުވިއެވެ.
ނިޢުމާތު ވިދާޅުވީ 14، 15 އަހަރުގެ ބޮޑެތި ކުދިންވެސް ފިޔަވަތީގައި ތިބިކަން ފާހަގަ ކުރެވިގެން އެކުދިން އެހެން ތަނަކަށް ބަދަލުކުރުމަށް ހުށަހަޅައިފައި ވާނެ ކަމަށެވެ. އަދި އެނޫންވެސް ބައިވަރު މައްސަލަތައް ފާހަގަކުރެވުނު ކަމަށާއި އެއީ އެއްދުވަހަކުން ރަނގަޅު ކުރެވޭނެ ކަންކަން ނޫން ކަމަށް އޭނާ ވިދާޅުވިއެވެ. ރަނގަޅު ކުރަންޖެހޭ ގިނަ ކަންކަން ކޮވިޑާއި ގުޅިގެން ނުކުރެވި ނުވަތަ ލަސްވެފައިވެސް ހުރި ކަމަށް ފާހަގަ ކުރެއްވިއެވެ.
ޗިލްޑްރަންސް އޮމްބަޑްސްޕަރސަން އޮފީހަށް ދިމާވާ ގޮންޖެހުންތަކާއި ގުޅޭގޮތުން ވިދާޅުވީ މިދިޔަ އަހަރު އެންމެ ބޮޑު ގޮންޖެހުމަކަށްވީ ކޮވިޑާއި ގުޅިގެން ބަޖެޓް ކުޑަވުން ކަމަށެވެ. އެހެންނަމަވެސް ކުރަން ބޭނުންވި ކަންތައްތައް ކުރެވުނެވެ. މިދިޔަ އަހަރު ފުރަތަމަ މަސައްކަތް ފެށިއިރު ދިމާވާ ދަތިތަކަކީ އެ އޮފީހަށް ހުށަހެޅޭ މައްސަލަތަކާއި ގުޅިގެން ބޭނުންވާ މައުލޫމާތު އެ ލިބެންވާ ގޮތަށް އޮފީސްތަކުން ނުލިބުމެވެ.
ސީދާ މިނިސްޓަރަށް ދަންނަވައިގެން ވަރަށް ގިނަ ބައްދަލުވުންތައް ބާއްވައިގެން މިހާރު އެކަން ވަނީ ރަނގަޅު ކުރެވިފައެވެ. އަދި ކުރިޔަށްއޮތްތަނުގައި ތަންތަނުން މައުލޫމާތު ހޯދުމަށް މިހާރަށްވުރެ ރަނގަޅު ސިސްޓަމެއް ޤާއިމުކުރުގެ މަސައްކަތް ކުރައްވާނެ ކަމަށް ނިޢުމާތު ވިދާޅުވިއެވެ.
