ޔޫކްރެއިންގެ ބޯޑަރު ކައިރީގައި ރަޝިއާގެ ގިނަ އަދަދެއްގެ ސިފައިން ގާއިމްވެފައިތިބިއިރު، ހަނގުރާމައެއް ފެށިދާނެކަމުގެ ބިރުވެރިކަން ވަނީ އުފެދިފައެވެ. ދިވެހިންނަށް އޮތް އެންމެބޮޑު ކަންބޮޑުވުމަކީ ޔޫކްރެއިންގައި ތިބި ދިވެހި ދަރިވަރުންގެ ރައްކާތެރިކަން ގާއިމްވެފައިވޭތޯ ޔަގީން ނުވާތީއެވެ.
ޔޫކްރެއިންގެ 'ހަރްކިވް ނެޝަނަލް މެޑިކަލް ޔުނިވަރސިޓީ' ގައި މެޑިސިން ކިޔަވަމުން އަންނަ ދަރިވަރަކު ނަން ހާމަނުކުރުމަށް އެދި 'ޒީޓައިމްސް' އަށް މައުލޫމާތު ދެމުން ބުނީ އާންމު ހާލަތު ކުރިއާއި ބަލާއިރު މިހާރު ވަކި ތަފާތެއް ނެތްކަމަށެވެ.
" ޔުނިވަރސިޓީ ކުރިއަށްދަނީ ކުރިންވެސް ގެންދާގޮތަށް ކްލާހަށް ގޮސްގެން. އަދިވެސް ބޯޑަރގައި އެބަތިބި ސިފައިން. އެތާ ސިފައިން ތިބިހާހިނދަކު އަޅުގަނޑުމެން އެއްކޮށް ރައްކާތެރިއެކޭ ނުބުނެވޭނެ. އަޅުގަނޑުމެން މިތިބެނީ ބޯޑަރާކައިރީގެ ސިޓީއެއްގައި"
އެ ޔުނިވަރސިޓީގައި އެކަނިވެސް މެޑިސިން ކިޔަވާ 34 ދިވެހިން އެބަތިބިކަމަށާއި، އެންމެބޮޑަށް ބޭނުންވަނީ އޮންލައިންކޮށް ކިޔެވުން ކުރިއަށްގެންދެވޭނެ ގޮތެއް ވޭތޯ ބެލުން ކަމަށް ވަނީ ބުނެފައެވެ. ޔޫކްރެއިންގައި ތިބި ދިވެހިން ވަނީ އެމީހުންގެ ކަންބޮޑުވުންތައް ބަޔާންކޮށް ފޮރިން މިނިސްޓްރީއަށް މެއިލްއެއްވެސް ފޮނުވާފައެވެ. އަދި އޮންލައިންކޮށް ކިޔެވުން ކުރިއަށްގެންދެވޭނެ ގޮތެއް ވޭތޯ ބެލުމުގެ މަޝްވަރާތައް ފޮރިން މިނިސްޓްރީއާއި ޔުނިވަރސިޓީއާއި ދެމެދު ކުރެވެމުންދާކަމުގެ މައުލޫމާތު ލިބިފައިވާކަމަށް ވަނީ ބުނެފައެވެ.
" ފޮރިންގ މިނިސްޓްރީއަށް އަޅުގަނޑުމެން މެއިލްކުރުމުން ލިބުނު ޖަވާބެއްގައި އިނީ މިހާރު ޔޫކްރެއިންގައި ތިބި ކުދިންގެ ތެރެއިން ކޮންމެހެން މަޑުކުރަން ނުޖެހޭ ކުދިން އެނބުރި ދިޔުމަށް ލަފާދޭކަމަށް. އަޅުގަނޑުމެންނަކީ މެޑިކަލް ދަރިވަރުން ވީމަ ވަރަށް އުނދަގޫވާނެ އެގޮތަށް ކްލާސް ކެންސަލްކޮށްފަ ދާން. ޔުނިވަރސިޓީގައި އިންނަގޮތުން ކުލާހެއް ކެންސަލްކޮށްފިއްޔާ ޖެހޭނީ ގަޑިއިރަކަށް 10 ޑޮލަރުގެ ރޭޓުން ދައްކައިގެން ޓީޗަރގެ ވަގުތު ހޯދައިގެން އެއްމަސް ދުވަސްތެރޭ އެކުލާސްތައް ފުރިހަމަކުރަން. އެއީ ފައިސާ އަދި ވަގުތުގެ ގޮތުން ބަލާއިރުވެސް ފަސޭހަކަމެއް ނޫން".
މި ދަރިވަރު އިތުރަށް ބުނީ އަބަދުވެސް ތިބެންޖެހެނީ ނޭނގުމެއްގެތެރޭގައި ކަމަށެވެ. މިގޮތުން ބޯޑަރު ކައިރީގައި 130،000 ސިފައިން ތިބިކަމަށް ރިޕޯޓްތައް ބުނާއިރު، އެސަރަހައްދު ދޫކޮށް ދިޔައީ އެންމެ 10،000 ސިފައިން ކަމަށް މައުލޫމާތު ލިބޭ ކަމަށެވެ. މިފަދަ ހާލަތެއްގައި ދަރިވަރުން ތިބިއިރު ޔޫކްރެއިންގެ މީހުން ދެކޭގޮތް ވަނީ ކިޔައިދީފައެވެ.
" ޔޫކްރެއިން މީހުން ބުނަނީ އެގައުމަށް ރަޝިއާ ސިފައިން ނައަރާނޭ. 2014 އިން ފެށިގެން އެގޮތަށް ތިބެއޭ. އެހެންވެ އެމީހުންނަށް އާދައިގެ ކަމެއްގެ ގޮތުގައި ދެކެވެނީ" ދިވެހި ދަރިވަރު ބުންޏެވެ.
ޔޫކްރެއިންގެ މަޝްރަހު ގޯސްވެފައިވާ މި ދަނޑިވަޅުގައި، ދިވެހި ރައްޔިތުން އެގައުމަށް ދަތުރު ނުކުރުމަށް ފޮރިން މިނިސްޓްރީން ވަނީ އިލްތިމާސްކޮށްފައެވެ. އަދި ޔޫކްރެއިންގައި މިވަގުތު ދިރިއުޅެމުންދާ ދިވެހި ރައްޔިތުން އެގައުމުގެ ސަރުކާރުގެ ނިންމުންތަކާއި އެންގުންތަކަށް ވަރަށް ބޮޑަށް ސަމާލުވެ ރައްކާތެރިކަމުގެ ފިޔަވަޅުތައް އެޅުމަށް ވަނީ އިލްތިމާސްކޮށްފައެވެ.
" ޔޫކްރެއިންގައި ތިބި ދިވެހި ރައްޔިތުން، މި މިނިސްޓްރީ އާއި، އެގައުމާ އެންމެ ކައިރީގައި ހުރި ރާއްޖޭގެ ޑިޕްލޮމެޓިކް މިޝަންކަމަށްވާ ޖަރުމަނުވިލާތުގައި ހުންނަ ދިވެހިރާއްޖޭގެ އެމްބަސީގައި ރަޖިސްޓްރީ ކުރުމަށް އިލްތިމާސް ކުރަން" ފޮރިން މިނިސްޓްރީން އާންމުކޮށްފައިވާ ބަޔާނުގައިވެއެވެ.
ޓިކެޓުގެ އަގު ބޮޑުވުމުން ދަރިވަރުންނަށް އަމިއްލަ ޚަރަދުގައި ރާއްޖެއައުމަކީ ފަސޭހައިން ކުރެވެން އޮތްކަމެއް ނޫނެވެ. މިގޮތަށް މިކަން އޮތްއިރު ދަރިވަރުންގެ އެންމެބޮޑު އެދުމަކީ ދިވެހި ސަރުކާރުން އެމީހުންނަށް ރައްކާތެރި މާހައުލެއް ހޯދައިދިނުމަށް މަސައްކަތްކޮށްދިނުމެވެ.
