ބޯއަނބުރާ މީހުންނަށް ދަތުރުފަތުރުކޮށް އުޅުންވަނީ ވޭނަކަށެވެ. އާއްމުކޮށް ބޯއެނބުރުމުގެ މައްސަލަ ދިމާވަނީ ދިގުދަތުރުކުރާ މީހުންނަށް ކަމުގައިވިއަސް، ދުއްވާއެއްޗަކަށް އަރާއިރަށް މިހެން ދިމާވާ މީހުން އުޅެއެވެ. މިފަދަ މީހުން ބޯޓު، ދޯނި އަދި ކާރަށް އެރުމުގެ އިތުރަށް އުނދޯލި ހެއްލުމުންވެސް ބޯއަނބުރައެވެ. މީގެއިތުރުން އެމިއުޒުމެންޓް ޕާކުތަކުގައި ހުންނަ ދުއްވުންތައް ދުއްވާލުމުންވެސް މިހެން ދިމާވެއެވެ. ރޯލާކޯސްޓަރ ފަދަ އެއްޗަކަށް އަރައިފިނަމަ މިގޮތަށް ބޯއަނބުރާ މީހުންނަށް ވަރަށް ބޮޑުވަރުވެ ހޮޑުލެވެއެވެ.

ބޯއަނބުރާގޮތް ދިމާވަނީ ކޮންބަޔަކަށް؟

މިކަހަލަ ކަންކަން ތަޖުރިބާކުރާ އެއްބަޔަކީ "މައިގްރޭން"ގެ މައްސަލަ ހުންނަ މީހުންނެވެ. އެމީހުންނަކީ ވަރަށް ނާޒުކު ބަޔަކަށްވާއިރު ކިރިޔާ ތަފާތު ވަހެއް ދުވިކަމުގައިވިޔަސް ބޯއަނބުރައެވެ. އަދި ދުއްވާފަދާއިރު އަލިގަދަކޮށް ހުންނަ ތަންތަނުން ދުއްވާނަމަވެސް އެހެން ދިމާވެއެވެ. ދެން މިހެންދިމާވަނީ ކުޑަކުދިންގެ ތެރެއިން އުމުރުން 5 އަހަރާއި 12 އަހަރުގެ ކުދިންނަށެވެ.

Advertisement

ބައެއް ކުޑަކުދިންނަކީ ފުލައިޓުގައި ދަތުރުކުރާއިރު ހޮޑުލާ ކުދިންނެވެ. އަނެއް އުމުރު ފުރައަކީ އުމުރުން ދުވަސްވީ މީހުންނެވެ. އެމީހުންގެ ދިފާއީނިޒާމުގެ ބާރު ނެތުމުންވެސް މިހެން ދިމާވެއެވެ. އަދި ގިނަ މީހުންނަށް މާބަނޑު ދުވަސްވަރަކީ ވެސް ބޯއެނބުރުމުގެ މައްސަލަ ވަރަށްބޮޑަށް ދިމާވާ ދުވަސްވަރެކެވެ.

މިހެންދިމާވަނީ ކީއްވެ؟

ކާރަކަށް އަރައިފިނަމަ ކާރުގެ ފަހަތު ސީޓުގައި އިނުމުން ކުރީކޮޅު ނުފެންނާތީ ބޯއަނބުރައެވެ. އަދި ހަމަ މިގޮތަށް ބައެއްމީހުން ކާރުގައި އިންނަ ވަގުތު ފޯނަށް ބަލަހައްޓައިގެން ނުވަތަ ވާހަކަފޮތެއް ކަހަލަ އެއްޗަކަށް ބަލަހައްޓައިގެން ގިނައިރު އިނުމުންވެސް މިހެން ދިމާވެއެވެ. އަދި ހަމަ މިއާއެކު ކާރުގައި އިންނައިރު ވައި ލިބެންވާވަރަށް ނުލިބުމުންވެސް މިހެންދިމާވެއެވެ. ފާޑުފާޑުގެ ވަސް ޖެހުމުންވެސް ބޮލަށް ގޮތްވެއެވެ. ބޯޓު ނުވަތަ ލޯންޗަކަށް އަރައިފިނަމަ ތެޅޭގޮތް ވުމުންވެސް ބޯއަނބުރައެވެ. މިހެން ދިމާވަނީ ކަންފަތާއި ލޮލުން ސިކުނޑިއަށް ފޯރުކޮށްދޭ މައުލޫމާތު އޮޅުންއަރައި ނުވަތަ ފުށުއަރާގޮތް ދިމާވުމުންނެވެ. އެކަން ބޮޑުވަރުވެގެންދާ ސަބަބުތަކެއް ކަމުގައި މިބުނި ކަންކަންވެއެވެ.

އަލާމާތްތައް:

ބޯއަނބުރާގޮތްވާކަން އެނގޭނަމަ ބައެއްފަހަރު ވަރަށްބޮޑަށް ދާހިއްލަން ފަށައެވެ. ނޫންނަމަ ބޮލަށް ކުޑަކޮށް އެނބުރުން އަރާގޮތްވެ ފެންނައެއްޗެހި ޑަބަލްކޮށް ފެންނަހެން ހީވާންފަށައެވެ. އަދި މޫނުމަތީގެ ކުލަ ބަދަލުވާންފަށައެވެ. ބައެއްފަހަރު ހަށިގަނޑު ފިނިވެ ތުރުތުރު އަޅާގޮތްވެއެވެ. ހޮޑުލަވާހެން ހީވާންފަށައި އޭގެ ސަބަބުން ބަނޑާއި ބޮލަށްވެސް ތަދުވެއެވެ.

ކޮންޓްރޯލް ކުރުމަށް ކުރެވިދާނެކަންތައްތައް.

• ދަތުރެއްދާން ތައްޔާރުވާނަމަ ދަތުރެއް ދިއުމުގެ 1 ގަޑިއިރު ނުވަތަ 2 ގަޑިއިރު ކުރިން ބޭސްކެއުން.
• ވެހިކަލެއްގައި ދަތުރުކުރާނަމަ ކުރީސީޓުގައި އިނުން އަދި ބޯޓެއް ނުވަތަ ލޯންޗެއްގައި ދަތުރުކުރާނަމަ މެދުގައި އިންނަ ސީޓުގައި އިނުން. ބަސް ނުވަތަ ރޭލުގައި ދަތުރުކުރާނަމަ ކުޑަދޮރާއި ކައިރިން ސީޓެއްގައި އިނުން.
• ވެހިކަލެއްގައި ދަތުރުކުރާނަމަ ސާފުވައި ލިބޭކަހަލަ ހިސާބެއްގައި އިނުން ނުވަތަ ވެހިކަލްގެ ދޮރު ތިރިކޮށްލައިގެން ވައި ލިބޭގޮތަށް އިނުން. މިގޮތަށް އިންނައިރު ބަންދުވެފައި ހުންނަ ވެހިކަލްއަށްވުރެ ވައި ދައުރު ކުރާގޮތަށް ހުންނަ ވެހިކަލްގައި އިނުމުންވެސް ބޯއެނބުރުން ރަނގަޅުވެއެވެ.
• ދަތުރުކުރާއިރު ލޯމަރާލައިގެން އޮށޯވެއޮތުން ނުވަތަ ނިދާލުން.
• ދަތުރެއްދާނަމަ ގިނައިން ކެއުމުގެ ބަދަލުގައި ލުއިކޮށް ކެއުން ނުވަތަ ތެޔޮ އަދި ކުޅިކޮށް ނުކެއުން. އަދި ޚާއްސަކޮށް ގޭހުގެ މައްސަލަ ހުންނަ މީހެއްނަމަ ވައި އުފެދޭ ކާނާ ނުކެއުން.

މައުލޫމާތު؛ ފެމެލީ ޑޮކްޓަރ ޑޮޓް އޯ.އާރ.ޖީ/ މެޑިކަލްނިއުސްޓުޑޭ