ސާނަވީ އިމްތިހާނުން ފެށިގެން މަތީ ސާނަވީއާއި އަދި ކޮލެޖް ނުވަތަ ޔުނިވަރސިޓީ ގައި އުޅޭ ދަރިވަރުންގެތެރެއިން ތިޔައީ ކުޑަދުވަސްކޮޅެއްގެ ތެރޭގައި ބައިވަރު ފިލާވަޅުތަކެއް ހިތުދަސްކުރަންޖެހޭ ދަރިވަރެއް ހެއްޔެވެ؟ ބައިވަރު އެއްޗެހި އެއްފަހަރާ ހިތުދަސްކޮށްގެން ގޮސް ޓެސްޓް ޕޭޕަރުގައި އެއެއްޗެހި ލިޔަންޖެހޭ ހެއްޔެވެ؟
މިކަން ކުރަންޖެހެނީ ވަރަށް ހާސްވެގެން ހެއްޔެވެ؟ އަދި ޓެސްޓުން ފާސްވުމަށް އުނދަގޫހެއްޔެވެ؟ އާންމުކޮށް ލިބޭ ނަތީޖާއާއި މެދުގައި ހިތްހަމަނުޖެހޭ ހެއްޔެވެ؟
މި ސުވާލުތަށް އަމިއްލަ ނަފްސާ ކުރެވޭނަމަ މިއޮތީ ތިކަމުގެ ހައްލެކެވެ.
ފިލާވަޅު ދަސްކުރަން ބޭނުން ކުރަނީ ކޮން ގޮތެއް؟
ބައެއް މީހުންނަކީ ކިޔައިގެންނާއި ލިޔެގެން ފިލާވަޅު ދަސްކުރަން ފަސޭހަ ބައެކެވެ. އަނެއްބައި މީހުންނަށް އެއްޗެހި ދަސްކުރަން ފަސޭހައީ އަޑު އަހައިގެންނެވެ. ފިލާވަޅު ދަސްކުރާއިރު ތިމާއަށް އެންމެ ފަސޭހައިން ދަސްވަނީ ކޮންގޮތަކަށް ކަން އަމިއްލައަށް ދެނެގަންނާށެވެ. ފިލާވަޅުތައް ކިޔާފަ އަތުން ލިޔެގެން ދަސްކުރުމަކީ ވެސް ފަސޭހަ ގޮތެކެވެ. ކިޔަވަންޖެހޭ ފިލާވަޅުތައް ބައިބަޔަށް ބަހާލައިގެން ދަސްކުރަން ފަސޭހަވާނެއެވެ. ފްލޭޝްކާޑު ގޮތަށް ލިޔެގެން އެކި ބައިތަކަށް އެކި ކުލަ ޖައްސައިގެން އެ ކާޑުތަކަށް ނަންބަރު ދީގެން ދަސްކުރާށެވެ. އެއިރުން ހަނދާން ކުރަން ފަސޭހަވާނެއެވެ. މުޅި ލިޔުންގަނޑު ހިތުދަސް ކުރަން އުޅުމުގެ ބަދަލުގައި މައިގަނޑު ޕޮއިންޓްތައް ދަސްކުރާށެވެ. އެއިރުން ފިލާވަލުގައި ބުނާ ހުރިހާ މައުލޫމާތެއް ހަނދާނުގައި ހަރުލައްވަން ފަސޭހަވެދާނެއެވެ.
އަޑު އަހައިގެން ފިލާވަޅު ދަސްކުރަން ބޭނުންވާ ކުދިންނަށް 'ގުރޫފް ސްޓަޑީ' އަކީ ރަނގަޅު ގޮތެކެވެ.
ލައިބްރަރީގައި ކިޔެވުން
ލައިބްރަރީ އަކީ މަޑުމައިތިރި މާހައުލެއްކަމުން ފިލާވަޅު ދަސްކުރާއިރު ފޯކަސް ކުރަން ފަސޭހަވެއެވެ. ގޭގައި ފިލާވަޅު ދަސްކުރާނަމަ ގޭގައި ހުންނަ އެހެން ކަންކަން ކުރަންޖެހުމާއި ބައެއްފަހަރު އިންޓަނެޓް ނުވަތަ ޓީވީ ފަދަ ތަކެތީގެ ސަބަބުން ފިލާވަޅު ދަސްކުރުމަށް ހުރަސްއެޅިދާނެއެވެ. އެހެންނަމަވެސް ލައިބްރަރީގައި މޭޒެއް ކައިރީގަ އެކަނި އިނދެގެން ކިޔަވާނަމަ މިބުނި ކަންކަން ހުރަހެއް ނާޅާނެއެވެ. އަދި އެހެން މަންޒަރުތަކާއި ދުރުގައި އިނދެގެން ފަސޭހައިން ފިލާވަޅުގެ ތެރެއަށް ވަދެވި ހަނދާނުގައި ބަހައްޓަން ފަސޭހަވެދާނެއެވެ.
ގްރޫޕް ސްޓަޑީ
ގުރޫޕް ސްޓަޑީ އަކީ ވަރަށް ފަސޭހައިން ފިލާވަޅު ދަސްކުރެވޭނެ ގޮތެކެވެ. އަބަދުވެސް އެއްބަޔަކު ހިމެނޭހެން ކުޑަގުރޫޕެއް ހަދާލައިގެން ކުލާސްރޫމެއްގައި ތިބެގެން ފިލާވަޅު ދަސްކުރުމަކީ ވަރަށްގިިނަ ކުދިން ހިޔާރުކުރާ ގޮތެކެވެ. މިގޮތަށް ގުރޫޕް ސްޑަޓީ ހަދާއިރު މީހާ ކިޔަވާހިތްނުވެ ކަންފަސޭހަ ކޮށްލެވުނަސް ގުރޫޕުގެ އެހެން މެންބަރުންގެ ސަބަބުން އަލުން މޯޓިވޭޓްވާ ގޮތްވެއެވެ. އަދި އެއްކުއްޖަކު އަނެއް ކުއްޖަކާއި ސުވާލުކޮށްގެން ޖަވާބުދޭ އުސޫލުވެސް ގުރޫޕް ސްޓަޑީގައި ހިމެނިދާނެއެވެ. ހުރިހާ ކުދިންގެ މެދުގައި އެއް ފިލާވަޅެއް އެތައްފަހަރަކު މަޝްވަރާކޮށް ފިލާވަޅުގައިވާ މައިގަނޑު ބައިތައް މުތޯލިއާ ކުރެވޭނެވެ. އަދި އަމިއްލައަށް ދަސްވެފައިވާ ގޮތަށް އެހެން ކުދިންނަށް ހުށަހަޅައިދެވުމުން އަމިއްލައަށް ހިތްހަމަޖެހުން ލިބިދެއެވެ. ގުރޫޕް ސްޓަޑީ ގައި އުޅޭއިރު ހަނދާން ބަހައްޓަންޖެހޭނެ ދެކަމަކީ އެއްކުއްޖަކު އަނެއް ކުއްޖަކަށް ފިލާވަޅުގެ ބޭރުން އެހެނިހެން ވާހަކަ ދެއްކުމާއި ކޮފީ ބްރޭކެއް ނަގާނަމަ އެހެންނަގާ ބްރޭތައް ވީހާވެސް ކުރުކުރުމަށެވެ.
ވަގުތު ހޭދަވާގޮތް
ޓައިމް މެނޭޖްމެންޓަކީ ވަރަށް މުހިންމު ކަމެކެވެ. އިމްތިހާނަށް ވަގުތު ކުޑަތަންވެގެން އަންނައިރު ރަނގަޅުގޮތުގައި ވަގުތު ބޭނުންކުރަން ނޭނގޭނަމަ ފިލާވަޅު ދަސްކުރަން ލިބޭ ވަގުތުވެސް މަދުވާނެއެވެ. ފިލާވަޅު ދަސްކުރަން ފެށުމުގެ ކުރިން ދަސްކުރަން ޖެހެނީ ކޮން އަދަދެއްގެ ފިލާވަޅުތަކެއްތޯ ބަލާލާށެވެ. އަދި ދުރާލާ ތާވަލެއް ހަދައިގެން ކުރިޔަށްދާށެވެ. ކަލަންޑަރެއް ހޯދާށެވެ. އަދި މުހިންމު ތާރީހުތައް ފާހަގަކުރާށެވެ. ފާހަގަ ޖަހައިގެން އެދުވަސްތަކަށް ކަމޭހިތައިގެން ދަސްކުރުމަށް މަސައްކަތް ކުރާށެވެ. އަދި އިމްތިހާނަށް ތައްޔާރުވާން އެކަށީގެންވާ ވަގުތު އޮއްވާ ފިލާވަޅުތައް މުތޯލިއާ ކުރަން ފަށަންވާނެއެވެ. ވަގުތަށް ކަމޭހިތައިގެން މިގޮތަށް ކުރިޔަށް ދެވިއްޖެނަމަ އިމްތިހާނު އޮންނަ ދުވަހާ ހަމައަށް އަމިއްލައަށް ހިތްހަމަޖެހޭ މިންވަރަށް ހުންނާނީ ފިލާވަޅުތައް ދަސްވެފައެވެ.
ބައެއް މީހުންނަކީ 8 ގަޑިއިރަށް ފޯކަސް ކުރެވޭ މީހުންނެވެ. އަނެއްބައި މީހުންނަށް ފޯކަސް ކުރެވޭނީ 4 ގަޑިއިރަށެވެ. މިގޮތަށް ކިޔަވަން ހޭދަވާ ވަގުތުގެ ތެރޭގައި ކުދިކުދި އިންޓަވަލް ބްރޭކް ނަގާލަންވާނެއެވެ. ދުވާލާ ރޭގަނޑުގެ އެކި ގަޑިތަކުގައި ކިޔަވަން މަސައްކަތް ކުރާށެވެ. އޭރުން އަމިއްލައަށް އެއްޗެހި ދަސްކުރަން ފަސޭހަ އަދި އެންމެ ބޮޑަށް ސަމާލުކަންދެވޭ ގަޑިއަކީ ކޮބައިކަން ދެނެގަންނަށް ފަސޭހަވާނެއެވެ. އޭގެފަހުން ފިލާވަޅު ދަސްކުރާއިރު އެގަޑިއަށް ފަރުވާތެރިވެގެން ފިލާވަޅު ދަސްކުރެވޭނެއެވެ.
ހުސްވަގުތުކޮޅެއް ނެގުން
ގިނައިރު ހުއްޓާނުލާ ކިޔެވުމަކީ ސިކުނޑިއަށް ވަރަށް ބާރުބޮޑުވާނެ ކަމެކެވެ. ސިކުނޑިއަށް ލުއެއް ދިނުމަށް ދޭތެރެއަކުން ހުސްވަގުތުކޮޅެއް ނަގާލަންވާނެއެވެ. އެކަށީގެންވާ މިންވަރެއްގެ ވަގުތުކޮޅަކަށް ކިޔެވުމާއި ދުރުވެލާފައި އެހެންކަމެއް ކޮށްލާށެވެ. އެއްޗެއް ކާލުން ނުވަތަ ރައްޓެއްސަކާއި ވާހަކަ ދައްކާލުން، ޓީވީ ބަލާލުން ފަދަ ކަމެއްވެސް ކުރެވިދާނެއެވެ.
ފޯކަސް ގެއްލޭކަން އަމިއްލައަށް އިހުސާސްވާން ފެށުމުން ކިޔެވުން ހުއްޓާލާށެވެ. އަދި އެގަޑީގައި ކުރާހިތްވާ ކަމެއް ކޮށްލާށެވެ. މީރު އެއްޗެއް ކާލުން ނުވަތަ ކުޑަދޮރުން ބޭރު ބަލާލުންފަދަ ކަމެއްވެސް ކޮށްލެވިދާނެއެވެ.
ރަނގަޅު މާހައުލެއް ދެނެގަތުން
ބައިވަރު އެއްޗެހިތަކެއް އެއްފަހާ ދަސްކުރަން އުޅޭއިރު ތިމާގެ މޯޓިވޭޝަނާއި، ނަފްސާނީ ހިތްހަމަޖެހުމަކީ ވަރަށް މުހިންމު ދެކަމެވެ. ތަފާތު މާހައުލުތަކުގައި ކިޔަވާ ތަޖުރިބާ ކުރާށެވެ. އަދި އޭގެތެރެއިން ތިމާއަށް އެންމެ އުފާވެރިކޮށް ހިތްހަމަޖެހިގެން ކިޔަވާލަން ފަސޭހައީ ކޮން މާހައުލެއްތޯ ދެނެގަންނަންވާނެއެވެ. ބައެއްފަހަރު ބޭރުގައި ޕާކެއް ކަހަލަ ތަނެއްގައި އިނދެގެން ކިޔަވަން ހިތްހަމަ ޖެހިދާނެއެވެ. ނުވަތަ ލައިބްރަރީގައި އިނދެގެން ކިޔެވުމަކީ އެންމެ ހިތްއެދޭ ގޮތްކަމަށް ވެދާނެއެވެ. ނުވަތަ ގޭގައި އަމިއްލަ ކޮޓަރީގައި އޮވެގެން ކިޔެވުމަކީ މާ ހިތްހަމަޖެހޭ ގޮތެއް ކަމަށްވެސް ވެދާނެއެވެ. ނުވަތަ ސިޓިންރޫމުގައި އިނދެގެން އެއްޗެއް ދަސްކުރާއިރު މާބޮޑަށް ސަމާލުކަންދެވޭ ކަމަށްވެސް އަމިއްލައަށް އިހުސާސް ކުރެވިދާނެއެވެ. ބައެއްކުދިން ކެފޭތަކުގައި ތިބެގެންވެސް ފިލާވަޅު ދަސްކުރެެއެވެ. އެކި މާހައުލުތައް ތަޖުރިބާކޮށް ކޮންސެންޓްރޭޓް ކުރަން ނުވަތަ ފިލާވަޅަށް ސަމާލުކަންދޭން އެންމެ ފަސޭހަ މާހައުލެއް ކަނޑައަޅާ އެތަނެއްގައި ދަސްކުރަން ފެށުމުން ހިތުދަސްކުރާ ބައިތައްވެސް ފަސޭއިން ދަސްވާގޮތްވެއެވެ.
ހިތްވަރު އެލުވާނުލާ އިތުބާރާއެކު ކުރިޔަށް ދިއުން
ބައެއް ކުދިންނަކީ ވަރަށް އަވަހަށް ހިތްވަރުއެލި 'ގިވް އަޕް' ކުރާ ކުދިންނެވެ. ސިއްހީގޮތުން ދުޅަހެޔޮ ހަށިގަނޑަކަށް ދުޅަހެޔޮ ސިކުނޑިއެއްވެސް ބޭނުންވާނެއެވެ. ނަފްސާނީ ގޮތުންނާއި ޖިސްމާނީ ގޮތުންވެސް ފިޓްކޮށް ހުރުމަކީ ވަރަށް މުހިންމު ކަމެކެވެ. ނިދި ހަމަނުވެ، ރަނގަޅަށް ނުކައި ނުބޮއި އުޅެގެން ފިލާވަޅު ދަސްކުރުމަކީ ރަނގަޅުގޮތެއް ނޫނެވެ. މީހާގެ ނަފްސާނީ ދުޅަހެޔޮކަން އެއީ ވަރަށް މުހިންމު ކަމެކެވެ. ވަރަށްބޮޑަށް ޕްރެޝަރުގައި ކިޔަވަންޖެހޭ ކުއްޖެއްނަމަ ގިނަފަހަރަށް ކެއުމަށާއި، ކަސްރަތުކުރުމަށް އަދި ހަމަނިދި ހޯދުމަށް ކުރިން ބޭނުންކުރި ވަގުތުތައްވެސް ދޫކޮށްލައެވެ. އަދި މިކަންކަން ކުރުމުގެ ބަދަލުގައި ފިލާވަޅު ދަސްކުރުމައިގެން ހޭބޯނާރާ އުޅެން ފަށައެވެ. މިގޮތަށް ކަންތައް ކުރާނަމަ އަމިއްލަ ނަފްސު އެ ވައްޓާލެވެނީ ކަންބޮޑުވުމުގެ ތެރެއަށެވެ. އޭގެ ސަބަބުން ހާސްވެ ދަސްވެފައި ހުންނަ އެއްޗެހިވެސް ހަނދާންނެތޭ ގޮތްވެއެވެ. 'ބެލެންސް ލައިފް ސްޓައިލް' އެއްގައި ހިފަހައްޓައިގެން ފިލާވަޅު ދަސްކުރަމުން ގެންދާށެވެ. މިސާލަކަށް ކަސްރަތު ކުރުމަށް ވަގުތުކޮޅެއް ހޭދަކޮށްލައިގެން ފަހުން ކިޔަވަން ފެށުމުން މީހާގެ ސިކުނޑި ތާޒާވެ އެކަމަށްދެވޭ ސަމާލުކަން އިތުރުވެދާނެއެވެ. ހަމަނިދި ލިބުމަކީ މީހާގެ ޕާފޯމެންސް އިތުރުކޮށްދީ ކަންކަމުގައި ފަރުވާތެރިވުމަށް އެހީއެކެވެ.
