ވަޒީފާ އަދާކުރާއިރު ޑިޕްރެސްވުމާއި، އެންޒައިޓީ އާއި ދެރަވުން އަދި އެކަނިވެރިކަން އިހްސާސްކުރެވި މަސައްކަތަށް ހުންނަ ފޯރިއާއި ފަރުވާތެރިކަން ގެއްލޭ އެތައްބަޔަކު އުޅެއެވެ. ޑަބްލިއުއެޗްއޯގެ ތަފާސް ހިސާބުތަކުން ދައްކާ ގޮތުގައި ގާތްގަނޑަކަށް 280 މިލިއަން މީހުންނަކީ ޑިޕްރެޝަންގެ ބަލި ތަހައްމަލު ކުރަމުންދާ މީހުންނެވެ. ޑިޕްރެޝަންގެ ސަބަބުން ކޮންމެ އަހަރަކު 700,000 އަށްވުރެ ގިނަ މީހުން އަމިއްލައަށް މަރުވެއެވެ.
އެމެރިކާގައި ކޮންމެ އަހަރަކު 17 މިލިއަނަށްވުރެ ގިނަ މީހުންނަށް ޑިޕްރެޝަންގެ އަސަރު ކުރެއެވެ. 2021 ވަނަ އަހަރު އެމެރިކާގައި ކުރިއަށް ގެންދިޔަ މެންޓަލް ހެލްތް ސާވޭއަކުން ދެއްކިގޮތުގައި 2019 އިން 2020 އަށް ޑިޕްރެޝަނަށް ފަރުވާ ހޯދަން އެދުނު މީހުންގެ އަދަދު ވަރަށް ބޮޑަށް މައްޗަށް ޖެހިލިއެވެ.
ވަޒިފާ އަދާކުރާ މީހުންގެ ތެރެއިން ފުލްޓައިމްކޮށް ހަފްތާގެ ފަސް ދުވަހު 8 ގަޑިއިރު މަސައްކަތްކުރާ މީހުންނާއި ހަފްތާ ބަންދުގައި 5 ގަޑިއިރު މަސައްކަތްކުރާ މީހުންގެ ތެރޭގައި ޑިޕްރެޝަންގެ އަލާމާތްތައް ހުންނަ ގިނަ ބަޔަކު އުޅޭނެ ކަމަށް ދިރާސާކާރުން ބުނެއެވެ. އެހެންކަމުން ވަޒީފާގެ މާހައުލުގައި ޑިޕްރެޝަންގެ އަލާމާތްތައް ދެނެގަންނާނީ ކިހިނެއްތޯ އާއި އެހީ ހޯދާނީ ކިހިނެއްކަން އަދި އެކަމުން އަރައިގަނެ ނަފްސަށް ހަމަޖެހުން ހޯދާނެގޮތް އެނގުމަކީ ކޮންމެހެން މުހިންމު ކަމެކެވެ.
'ވޯކް ޑިޕްރެޝަން' ނުވަތަ ވަޒީފާގައި އުޅޭއިރު ކުރިމަތިވާ ޑިޕްރެޝަން އަކީ އެ މާހައުލުގެ ސަބަބުން ކުރިމަތިވާ ކަމަކަށްވެސް ވެދާނެއެވެ. ޑަބްލިއު އެޗްއޯއިން ބުނާގޮތުގައި ނެގެޓިވް ވޯކިން އެންވަޔަރމެންޓެއްގެ ސަބަބުން ޑިޕްރެޝަނަށް މަގުފަހި ކުރުވައެވެ. ނަފްސާނީ އަދި ޖިސްމާނީ ސިއްހީ ކަންބޮޑުވުންތައް، އޮފީހަށް ސަލާމް ބުނުން، މަސައްކަތުގެ ފެންވަރު ދަށްވުން، އަދި ބައެއް ހާލަތްތަކުގައި މަސްތުވާތަކެތި ބޭނުންކުރަން ފެށުން ކަހަލަ ކަންކަންވެސް ވަޒީފާގެ މާހައުލުން އަންނަ ޑިޕްރެޝަންގެ ސަބަބުން ކުރިމަތިވެއެވެ.
އެމެރިކާގެ މެންޓަލް ހެލްތާއި ގުޅޭ އިދާރާއިން ބުނާ ގޮތުގައި ވަޒީފާގެ މާހައުލުން ކުރިމަތިވާ މައްސަލަތަކުގެތެރެއިން އެންމެ ގިނައިން ކުރިމަތިވާ އެއް މައްސަލައިގެ ގޮތުގައި ޑިޕްރެޝަން ހިމެނެއެވެ. ވީމާ ވީހާ އަވަހަކަށް ޑިޕްރެޝަންގެ އަލާމާތްތައް ދެނެގަނެ އެކަމުން އަރައިގަތުމަށް މަސައްކަތް ކުރަންޖެހެއެވެ. އަދާކުރާ ވަޒީފާއެއްގެ ސަބަބުން ނުވަތަ ވަޒީފާއާއި ނުގުޅޭ ކަމަކުންވެސް ވަޒީފާގެ މާހައުލުން ޑިޕްރެޝަނާއި ކުރިމަތިލާން ޖެހިދާނެއެވެ. ވަޒީފާގެ މާހައުލުން ކުރިމަތިވާ ޑިޕްރެޝަންގެ ސަބަބުން އަދާކުރާ ވަޒީފާއަށް ބުރޫއެރުމާއި ގޭގައި އުޅޭއިރުވެސް ތިމާ ކުރާކަންކަމަށް އޭގެ އަސަރު ކުރެއެވެ. އެފަދަ މީހުންގެ އެންޒައިޓީ ލެވެލް އިތުރުވެ ވަޒީފާއިން ބޭރުގައި އުޅޭ ވަގުތުތަކުގައިވެސް ހާސްވެ ކަންބޮޑުވާގޮތް ވެއެވެ. ހާއްސަކޮށް ހާސްކަންބޮޑު ހާލަތްތައް މެނޭޖްކުރަން މަސައްކަތްކުރާއިރު އެންޒައިޓީ ލެވެލް މައްޗަށް ދެއެވެ.
ވަޒީފާގައި އުޅޭ އިރު ފޫހިވުމާއި، މަސައްކަތް ކުރާހިތްނުވުމަކީވެސް ވޯކް ޑިޕްރެޝަންގެ އަލާމާތެކެވެ. ގައިގައި ހަކަތަ ނެތުމާއި، މަސައްކަތަށްދޭ ސަމާލުކަން ކުޑަވެ މީހާގެ އުފެއްދުންތެރިކަން ދަށަށް ދިއުމާއި އާންމުކޮށް ހިތާމަވެރި މޫޑެއްގައި ހުރުމާއި ދެރަވުން ފަދަ ކަންކަމަކީވެސް ޑިޕްރެޝަންގެ އަލާމާތްތަކެވެ. މީގެއިތުރުން ކުރިން ވަރަށް ގަޔާވެގެން އޮފީހުގައި ކުރަމުންއައި މަސައްކަތްތައް ފަހުން ފޫހި މަސައްކަތަކަށްވެ އެކަންކަން ކުރާހިތް ނުވުންވެސް މިއީ ޑިޕްރެޝަންގެ އަލާމާތެކެވެ. ވަޒީފާ އަދާކުރާއިރު އާ މައުލޫމާތުތައް ހަނދާނުން ކައްސާލައިގެން ދިއުމާއި، ކުރާ މަސައްކަތުގައި ގިނަ މައްސަލަތައް ހުންނަން ފެށުން ނުވަތަ ކުށްތައް ފާހަގަ ކުރެވުމަކީވެސް އަލާމާތެކެވެ. އަދި ބޮލުގައި ރިއްސުމާއި ބަނޑުގައި ރިއްސުން ކަހަލަ ކަންކަން އާންމުކޮށް ކުރިމަތިވެ ވަޒީފާއަށް ގަޑި ޖެހުމާއި ގިނަގިނައިން ސަލާމް ބުނުންވެސް ޑިޕްރެޝަންގެ އަލާމާތްތަކުގެ ތެރޭގައި ހިމެނެއެވެ.
މަސައްކަތާއި ގުޅޭ ކަންކަމުގައި ގޮތް ނިންމަން އުނދަގުވުމާއި، ރުޅިގަދަވުން އިތުރުވުމާއި، ހިތްހަމަނުޖެހޭ ކަންކަން ތަހަންމަލު ކުރަން އުނދަގޫވުމަކީވެސް މީގެތެރޭގައި ހިމެނޭ އަނެއް އަލާމާތެވެ.
އެއްވެސް ކަމަކާއި ނުލާ ރޮވުމާއި ފެންކަޅިވެ ދެރަވެފައިނުން އަދި ރޭގަނޑު ނިދަން އުނދަގޫވެ އޮފީހުގައި އުޅޭ ގަޑީގައި ނިދޭގޮތްވުމަކީވެސް ވޯކް ޑިޕްރެޝަންގެ އަލާމާތްތަކެވެ.
މި އަލާމާތްތަކަކީ އެކުގައި މަސައްކަތް ކުރާ އެހެން މުވައްޒަފުންނަށް ބައެއް ފަހަރު ފާހަގަނުކުރެވޭ ގޮތަށް ސިއްރު ކުރެވޭ އަލާމާތްތަކެވެ. އެހެންނަމަވެސް އެކުގައި މަސައްކަތްކުރާ އެހެން މުވައްޒަފުންނަށް ދެނެގަނެވޭކަހަލަ އަލާމާތްތަކެއްވެސް ހުރެއެވެ. އޭގެ ތެރޭގައި އެހެން މީހުންނާއި އެކަހެރިވެގެން އެކަނި އެކަންޏަށް އޮފީހުުގައި އުޅުމާއި، އަމިއްލަ ސާފުތާހިރުކަން ކުޑަވާންފެށުން، (މިސާލަކަށް އޮފީހަށް އަންނަ އިރު ހެދުން އެޅުމުގައި ފަރުވާކުޑަވުން) ފަދަ ކަންކަމުން އެހެން މީހުންނަށް ޑިޕްރެޝަންގެ އަލާމާތް ހުރިކަން ދެނެގަނެވޭނެއެވެ. އަދި ކަންކަން ނިންމަން ޖެހޭ ސުންގަޑިތަކަށް ފަރުވާކުޑަކޮށްލުމާއިި، އުފެއްދުންތެރިކަން ދަށްވެ މަސައްކަތުން މައްސަލަތައް ފާހަގަކުރެވޭ މިންވަރު އިތުރުމާއި ކަންކަން ހަނދާންނެތުން ފަދަ ކަންކަމަކީ އެކުގައި މަސައްކަތްކުރާ މީހާއަށް އަނެކާގެ ކިބައިގައި ހުންނަ ޑިޕްރެޝަންގެ އަލާމާތްތައް ދެނެގަނެވޭނެ ކަންކަމެވެ.
އޮފީހުގައި ޑިޕްރެސް ވަނީ ކީއްވެ؟
އާންމުކޮށް ވަޒީފާގެ މާހައުލުން ކުރިމަތިވާ ޑިޕްރެޝަން ގުޅިފައިވަނީ އަދާކުރާ ވަޒީފާގައި ކުރިމަތިވާ މައްސަލަތަކުގެ ކޮންޓްރޯލް އަމިއްލަ އަތުގައި ނެތްކަން އިހްސާސްވުން، މާގަދައަށް މަސައްކަތް ކުރުވާފައި އެކަށީގެންވާ އުޖޫރަ ނުލިބުުން، ވަޒީފާގެ މާހައުލުގައި ގޯނާއާއި ތަފާތު ކުރުންފަދަ ކަންކަން ތަޖްރިބާކުރަން ޖެހުން ފަދަ ކަންކަމާއެވެ. އަދި އާންމުކޮށް މަސައްކަތް ނުކުރާ ގަޑިތަކުގައި ވަޒީފާއަށް ނިކުންނަން ޖެހުމާއި، ގެއާއި އޮފީހަށްދޭ ވަގުތު ބެލެންސް ކުރަން ނޭނގުމާއި، ތިމާގެ އަމިއްލަ ވެލިއުސްތައް އަގުނުކުރާފަދަ މާހައުލެއްގައި ވަޒީފާއަދާކުރަން ޖެހުން، އަދި ރައްކާތެރި ނޫންގޮތަކަށް ވަޒީފާ އަދާކުރަން ޖެހުމަކީވެސް ވޯކް ޑިޕްރެޝަނަށް މީހާ ގެންދާ ކަންކަމެވެ.
މިކަމުން އަރައިގަންނާނީ ކިހިނެއް؟
ޑިޕްރެސްވާހެން ހީވާނަމަ މަސައްކަތާއި ދުރުހެލިވެލަން 10 ވަރަކަށް މިނިޓްގެ ހުސްވަގުތުކޮޅެއް ނަގާށެވެ. މެންދުރު ކެއުމަށް ނޫނީ އެހެން ކަމަކަމަށް ވިޔަސް އޮފީހުން ބޭރަށް ނިކުމެލާށެވެ. ބައެއްފަހަރު ހިނގާލަން ނިކުމެލާށެވެ. ކަސްރަތު ކުރުމަކީ 'މެންޓަލް ހެލްތު' ރަނގަޅުކޮށްދޭ ކަމެކެވެ. އޮފީސްތެރޭގައި ނަމަވެސް ޑެސްކް ކައިރިން ތެދުވެގެން ކުޑަކޮށް ހިނގާލާށެވެ. އެހެން ހިޔާލުތަކާއި ދުރުވެ އަމިއްލައަށް ހަމަހިމޭން ވަގުތުކޮޅެއް ހޭދަކޮށްލާށެވެ. ފުންކޮށް ނޭވާލުން ކަސްރަތެއް ގޮތަށް ދުވަހުގެ ކޮންމެވެސް ގަޑިއެއްގައި ކޮށްލާށެވެ. މަޖާ ވީޑިއޯއެއް ބަލާލުން ފަދަ ކަމެއްވެސް ކުރެވިދާނެއެވެ.
ޑިޕްރެޝަން އާއި ވަޒީފާގެ މާހައުލާއި ގުޅުމެއްވާކަމަށް އަމިއްލައަށް އިހްސާސް ކުރެވޭނަމަ ލަސްނުކޮށް އެހީ ހޯދަންވާނެއެވެ. އެގޮތުން އޮފީހުގެ ވެރިމީހާ ނުވަތަ ސުޕަވައިޒަރާ ވާހަކަ ދައްކާލެވިދާނެއެވެ. އަދި ދިމާވާ މައްސަލަތައް ހިއްސާކޮށް އަމިއްލަ ނަފްސަށް ލުޔެއް ހޯދިދާނެއެވެ. ބައެއްފަހަރު އޮފީހުގައި އަދާކުރާ ޒިންމާތައް ބަދަލުކޮށްލުމާއި އޮފީހުގައި އިންނަ ޑެސްކުން އެހެން ޑެކްސްކަކަށް ބަދަލުކޮށްލައިގެންވެސް ޑިޕްރެޝަންގެ އަލާމާތްތައް ކުޑަކޮށްދޭނެއެވެ.
ހިއުމަން ރިސޯސް ޑިޕާޓްމެންޓްގެ ވެރިންނާވެސް ވާހަކަ ދައްކާލެވިދާނެއެވެ. ބައެއް ކުންފުނިތަކުގައި 'އެމްޕްލޯއީ އެސިސްޓެންސް ޕްރޮގްރާމް' ވެސް އޮވެއެވެ. އެހެންކަމަށްވާނަމަ މުވައްޒަފުންނަށް ދިމާވާ މިފަދަ ކަންކަމުގައި ހިއުމަން ރިސޯސް ޑިޕާޓްމެންޓުން އެހީވެދެނޭއެވެ. ތިމާގެ އަމިއްލަ ކަންކަންވެސް ހިއްސާކުރެވިދާނެއެވެ. ވަޒީފާގެ މާހައުލުގައި ހުންނަ ކަންބޮޑުވުންތަކާއި އަމިއްލަ ދިރިއުޅުމުގެ ކަންބޮޑުވުންތަކަށްވެސް މި ޕްރޮގްރާމް ހިންގާ އޮފީސްތަކުގެ އެޗްއާރުން އެހީވެދޭނެއެވެ. މިއިން ކަމެއް ކުރަން ނުކެރޭނަމަ ތަޖްރިބާކާރު ކައުންސިލަރެއްގެ ހިދުމަތް ހޯދާށެވެ. ނަފްސާނީ ދުޅަހެޔޮކަމަށް ކައުންސިލިން ހޯދުމާއި ރައްޓެހިންނާއެކު ވަގުތު ހޭދަކޮށް އަބަދުވެސް އެންމެގާތްކޮށް ކަންކަން ހިއްސާކުރާނެ އިތުބާރު ހިފޭ ރަނގަޅު އެކުވެރިއެއް ހުރުމަކީ ޑިޕްރެޝަނުން އަރައިގަނެވޭނެ ކަމެކެވެ.
މައުލޫމާތު: ހެލްތްލައިން ޑޮޓްކޮމް
