މާތްﷲ އިންސާނުން ހައްދަވާފައި ވަނީ އެއްބަނޑު އެއްބަފާ ބައެއްގެ ގޮތުގައެވެ. އެއްބަޔަކު އަނެއްބައެއްގެ އެހީތެރިކަމާއި މަދަދަށް ބޭނުންވާ ގޮތަށެވެ. ކޮންމެ އިންސާނަކީވެސް އެހެން މީހުންގެ އެހީތެރިކަމާއި އަޅައިލުން ބޭނުންވާނެ މީހެކެވެ. އެހެންކަމުން މުޞީބާތާއި، ތަކުލީފުގެ ވަގުތުގައި، އެހެން މީހުންނަށް އެހީތެރިވެ ހަމްދަރުދީ ވާންޖެހެއެވެ.
" އެފަދަ ވަގުތުތަކުގައި އެ މީހުންނަށް އެހީތެރިވެ، އަޅައިލުމަކީ، އަޅުގަނޑުމެންގެ މައްޗަށް ވާޖިބު ކަމެއް. މިއީ އީމާންކަން ފުރިހަމަވުމުގެ ރަމްޒެއް. މުއުމިނުންގެ ސިފައެއް. މާތްﷲ އިންސާނުން ހައްދަވާފައިވަނީ އެކަކު އަނެކަކަށް އެހީތެރިވެ، އިޖުތިމާޢީ ދިރިއުޅުމެއް އުޅޭގޮތަށް. އެކަކު އަނެކަކާ ގުޅި ލާމެހިފައިވާ، އެއްބަޔަކު އަނެއް ބައެއްގެ އެހީތެރިކަން ބޭނުންވާ ގޮތުގަ".
މުއުމިނުން އެއްބަޔަކު އަނެއް ބަޔަކަށް ލޯބިވުމުގައްޔާއި، ރަޙުމްކުރުމުގަޔާއި އޯގާތެރިވުމުގައި، އެމީހުންގެ މިސާލަކީ އެއް ހަށިގަނޑެއްގެ މީސާލެވެ. އެ ހަށިގަނޑުން ގުނަވަނެއްގައި ވޭން އަޅައިފިނަމަ، ހޭލާހުރުމުންނާއި ހުން އައުމުން ހަށިގަނޑުގެ އެންމެހައި ގުނަވަންތައް އެގުނަވަނާއި ބައިވެރިވެއެވެ.
އިސްލާމީ މުޖުތަމަޢުގެ އަފްރާދުން ވާންޖެހޭނީ އެއް ހަށިގަނޑެއް ފަދަ އެކުވެރި ބައެއް ކަމުގައެވެ. އެއްބަޔަކު އަނެއްބަޔަކަށް އެހީތެރިވުމާއި، ހެޔޮކޮށް ހިތުމުގައެވެ. އެކަކު އަނެކަކަށް އަޅާލުމާއި އޯގާތެރިވުމުގައެވެ. މިކަމަކީ އިންސާނިއްޔަތުކަމުގެ އިތުރުން، މުސްލިމުންގެ އީމާންކަމާ ވެސް ގުޅިފައިވާކަމެކެވެ.
އެއް ބަޔަކަށް މާލީ އެހީތެރިކަން ބޭނުންވާއިރު އަނެއް ބަޔަކަށް ނަފްސާނީ އެހީތެރިކަން ބޭނުންވެއެވެ. އަނެއް ބަޔަކަށް، ހިތާމައާއި، ހިތްދަތިކަމުން އަރައިގަނެވޭފަދަ އޯގާވެރިކަމުގެ ބަހެއް ބޭނުންވެއެވެ. ލޯތްބާއި ކުލުނާއެކު ހެޔޮއެދިގެން ބުނެވޭ ބަހެކެވެ. މުޖުތަމަޢުގެ ނިކަމެތިންނާއި ފަޤީރުންނަކީ ނުހަނު މުހިންމު ބައެކެވެ. އެބައިމީހުންނަށް ހެޔޮއެދިގެން ކުރެވޭ ހޭދައާއި، ފޯރުކޮށްދެވޭ އެހީތެރިކަމުގެ ސަބަބުން މުޖުތަމަޢުގެ ގިނަބަޔަކަށް އޭގެ ލާބައާއި މަންފާކުރެއެވެ.
މުސްލިމް އަޚުންނޭވެ! ތިމާގެ އަމިއްލަ މަސްލަހަތަށްވުރެ އެހެން މީހުންގެ މަސްލަހަތު އިސްކޮށް، އެމީހުންނަށް އަޅާލައި އިހްސާންތެރިވާށެވެ. މުސްލިމުންނަށް ލިބެމުންދާ އަނިޔާތަކާއި، ތަކުލީފުތަކުގައި ބައިވެރިވާންޖެހެއެވެ. އެމީހުންނަށް ސާބިތުކަންދެއްވައި، ކެތްތެރިކަން ދެއްވުމަށް އެދި، މާތްﷲ ގެ ހަޟްރަތުގައި އިބްތިހާލުވެ، ދުޢާ ކުރާށެވެ.
މަޢުލޫމާތު: ހުކުރު ޚުތުބާ
