އީމާންކަމުގެ ތެދުވެރި ބުރުހާނެއް ކަމުގައްޔާއި، ދުނިޔެއާއި، އާޚިރަތުގައި، މުއުމިނާގެ ނޫރުކަމުގައި އެކަލާނގެ ނަމާދު ލެއްވިއެވެ. ނަމާދަކީ އިސްލާމްދީން އެއެއްޗެއްގެ މައްޗަށް ބިނާވެގެންވާ ދީނުގެ ތަނބެވެ. އަޅާއާއި ކާފިރުކަމާ ދެމެދުގައިވާ ހުރަހެވެ. އެ ދޫކޮށްލައިފި މީހާ ދީން މުގުރާލައިފިއެވެ. އެ ޤާއިމުކޮށްފި މީހާ ދީން ޤާއިމުކޮށްފިއެވެ. އެއީ ރެއާއި ދުވާލު 5 ފަހަރު ތަކުރާރުވާގޮތަށް ފަރުޟު ކުރެއްވިގެންވާ އަޅުކަމެކެވެ.
ނަމާދަކީ އޭގެ ސަބަބުން އަހަރެމެންގެ ފާފަތައް ﷲ ތަޢާލާ ފުއްސަވައިދެއްވާނެ ކަމެކެވެ. އޭގެ މިސާލެއް ބަޔާންކުރައްވަމުން ރަސޫލާ ސައްލަﷲ ޢަލައިހި ވަސައްލަމް ހަދީޘް ކުރެއްވި ބަސްފުޅެއްގެ މާނައިގައިވެއެވެ. "ފަހެ ތިޔަބައިމީހުންގެ ތެރެއިން މީހެއްގެ ގޭގެ ދޮރުމަތީގައި، ސާފު ފެންގަނޑެއް އޮވެފައި އެއިން ކޮންމެ ދުވަހަކު 5 ފަހަރު ފެންވަރާ ކަމުގައިވާނަމަ، އެމީހެއްގެ ހަށިގަނޑުގައި އެއްވެސް ކަހަލަ މިލައެއް ހުންނާނެ ހެއްޔެވެ؟" ސަޙާބީން ދެންނެވިއެވެ. އޭނާގެ ހަށިގަނޑުގައި އެއްވެސް މިލައެއް ނުހުންނާނެއެވެ. ޙަދީޘްކުރެއްވިއެވެ. "ފަހެ އެއީ ފަރުޟު ފަސްނަމާދުގެ މިސާލެވެ. އޭގެ ސަބަބުން ﷲ ސުބުހާނަހޫ ވަތަޢާލާ ފާފަތައް ފުއްސަވައި ދެއްވައެވެ".
ނަމާދަކީ ހިތަށް ހަމަޖެހުން ލިބޭ އަޅުކަމެކެވެ. ކަންބޮޑުވުމާއި ހާސްވުންފަދަ ކަންކަމުން ސަލާމަތް ކޮށްދޭ އަޅުކަމެކެވެ. އެހެންކަމުން ރަސޫލާ ސައްލަﷲ ޢަލައިހި ވަސައްލަމް ކަންބޮޑުވެ ވަޑައިގަންނަވާ ކޮންމެ ފަހަރެއްގައިމެ ނަމާދު ކުރެއްވުމަށް އަވަސްވެ ވަޑައިގަންނަވާ ކަމުގައި ވާރިދުވެފައިވެއެވެ.
ނަމާދަކީ ކަނޑައެޅިފައިވާ ވަގުތުތަކެއްގައި އަދާކުރުމަށް މުއުމިނުންގެ މައްޗަށް ފަރުޟު ކުރައްވާފައިވާ އަޅުކަމެކެވެ. ފަރުޟު ފަސް ނަމާދަކީ، ރަށުގައި ގާއިމުވެ ހުންނަ މީހާގެ މައްޗަށާއި، ދަތުރުވެރިޔާގެ މައްޗަށާއި، ބަލިމަޑުކަމުގައިވާ މީހާގެ މައްޗަށްވެސް ފަރުޟު ކުރައްވާފައިވާ އަޅުކަމެކެވެ. ހަނގުރާމައިގެ ހާލަތުގައްޔާއި، ބިރުވެރިކަމުގެ ހާލަތްތަކުގައިވެސް ނަމާދު ކުރުމަށް ވަނީ އަންގަވައިފައެވެ. ބަލިމަޑުކަމުގެ ހާލަތުގައިވެސް ނަމާދު އަޅައިގެން ނުވާނެއެވެ.
"ކިތަންމެ ބަލި ބޮޑުވިޔަސް ބަލިމީހާއަށް ވެސް ނަމާދު އެޅުމެއް ނެތެވެ. މިއަދު ފެންނަނީ މިއާ ޚިލާފު މަންޒަރެއް. މީހަކު ހަމަ ބައްޔެއް ވެލާއިރަށް ނަމާދު ނުކޮށް ދޫކޮށްލާތަން. އެފަދަ މީހުންނަށް ނަމާދު ކުރުން ވެފައިވަނީ އުފުލަންޖެހިފައިވާ ބޮޑު ބުރައަކަށް. ބައެއް މީހުން ނަމާދު ނުކޮށް ދޫކޮށްލަނީ ބަލި ފަސޭހަވުމުން އެ ނަމާދުތައް ޤަޟާ ކުރާނަމޭ ބުނަމުން. އެބަލީގައި މަރުވެއްޖެނަމަ އެއީ އޭނާއަށް ލިބުނު އުޒުރެއް ކަމަށް ދެކިގެން. މިއީ ވަރަށް ބޮޑު އޮޅުމެއް. މިގޮތަށް ޤަޟާ ކުރުމަށް ނިޔަތްގަނެގެން ވެސް ނަމާދު އެޅުމަކީ ހުއްދަވެގެންވާނެ ކަމެއް ނޫން".
ޢިމްރާނު ބުނު ޙުޞައިނުގެ އަރިހުން ވާރިދުވެފައިވާގޮތުގައި، އެކަލާގެފާނަށް ޖެހިވަޑައިގެންފައިވާ އާލާސްކަންފުޅެއްގެ ވާހަކަ ރަސޫލާ ސައްލަﷲ ޢަލައިހި ވަސައްލަމް އަށް ދެންނެވުމުން އެކަލޭގެފާނު ހަދީޘް ކުރެއްވިއެވެ. " ކޮއްޅަށް ހުންނަވައިގެން ނަމާދު ކުރައްވާށެވެ! އެކަމަށް ކުޅަދާނަވެގެންނުވާނަމަ އިށީނދެ އިންނަވައިގެން، ނަމާދު ކުރައްވާށެވެ! އެކަމަށް ކުޅަދާނަވެގެން ނުވާނަމަ، އޮށޯވެ އޮންނަވައިގެން ނަމާދު ކުރައްވާށެވެ". ޢިލްމުވެރިން ވިދާޅުވާގޮތުގައި، އޮށޯވެގެން ނަމާދު ކުރުމަށް ކުޅަދާނަވެގެން ނުވާނަމަ ނަމާދު ކުރާނީ އިޝާރާތުންނެވެ. އިޝާރާތުން ނަމާދު ކުރުމަށް ނުކުޅެދިގެންވާނަމަ ނަމާދު ކުރާނީ ހިތުންނެވެ. އަލްއިމާމުއް ޝާފިޢީ ފަދަ ޢިލްމުވެރިން ވިދާޅުވާ ގޮތުގައި ބުއްދި ސަލާމަތުން ހުރިނަމަ ބާލިޢުވެފައިވާ ކޮންމެ މީހަކު ނަމާދު ކުރަން ޖެހޭނެއެވެ. ނަމާދުގެ ފަރުޟުކަން އެމީހާގެ ކިބައިން ކެނޑިގެންނެއް ނުދާނެތެވެ.
ނަމާދުގެ މަޤާމު ވަރަށް މަތިވެރިވެގެން ވެއެވެ. ނަމާދު ފަރުޟު ކުރައްވާފައިވަނީ ރަސޫލާ ސައްލަﷲ ޢަލައިހި ވަސައްލަމް މާތް ﷲ ގެ ޙަޟްރަތަށް ގެންދަވައިގެން އިސްރާއާއި މިޢުރާޖުގެ ދަތުރުފުޅުގެ ތެރޭގައެވެ.
މައުލޫމާތު: ހުކުރު ޚުތުބާ
