ކޮންރެޑް މޯލްޑިވްސްގެ އެސިސްޓެންޓް ފުޑް އެންޑް ބެވަރޭޖްގެ މަގާމުގައި ވަޒީފާ އަދާކުރަމުން އަންނަ ބ. އޭދަފުށްޓަށް އުފަން މުހައްމަދު ޒަޢީމަކީ ކުޅަދާނަ ހިތްވަރުގަދަ ޒުވާނެކެވެ. ޒިންމާދާރު އާއިލާއެއް ބަލަހައްޓަމުން އަންނަ 2 ކުދިންގެ ބައްޕައެކެވެ. އަބަދުވެސް ހިތަށްއަރާ ކަމެއް ހާސިލް ކުރުމުގައި ފަސްނުޖެހި ކުރިއަށް ދިއުމުގައި ދެމިހުންނަން ބޭނުންވާ މީހެކެވެ. ހުވަފެނަކީ ބިލާހެކޭ ބުނާއަޑު އިވުނަސް އެއީވެސް ކޮންމެވެސް ދުވަހަކުން ހަގީގަތަކަށް ވެދާނެ އެއްޗެކެވެ. އެކަން ޒަޢީމު ދަނީ ސާބިތުކޮށްދެމުންނެވެ.
ދާއިރާއަށް ޝައުޤުވެރިވިގޮތް:
ގްރޭޑް 9 ގައި އުޅުނުއިރު އިނގިރޭސި ޓީޗަރު ލިޔަން ދިނީ މަޒުމޫނެކެވެ. "އޭގައި މައުލޫއަކަށް އޮތީ 'އެބައުޓް ޔުއާ ފިއުޗަރ ޑްރީމް'. ވަގުތުން ލިޔަންފެށީ އަބަދުވެސް ދެކެމުން އަންނަ ހުވަފެނުގެ ވާހަކަ. އެންމެ ކުޑައިރުއްސުރެވެސް ވަރަށް ބޭނުންވާ ކަމެއްގެ ވާހަކަ. މަޒުމޫނުގައި ލިޔުނީ 'ޓު ވާރކް އިން އަންޑަރސީ ރެސްޓޯރަންޓް'. އެއީ 2004 ވަނަ އަހަރު. އޭރު ސިކުނޑިވެސް ވަރަށް ޅަވާނެ. އޭރަކު މިކަހަލަ ތަނަކާއިބެހޭ މާބޮޑު މައުލޫމާތެއްވެސް ލިބިފަ ނުހުރޭ". ޒަޢީމު ކިޔާދިނެވެ.
އެއިރު ދުނިޔޭގެ ފުރަތަމަ އަންޑަރސީ ރެސްޓޯރެންޓް ހަދަން ފަށައިފަވަނީ ދިވެހި ރާއްޖޭގައެވެ. އެއީ އޭރުގެ ހިލްޓަން މޯލްޑިވްސްގެ ނަމުގައި ހިންގި މިހާރުގެ ކޮންރެޑް މޯލްޑިވްސް އެވެ.
މިދާއިރާއަށް ވަންނަން ފުރުސަތު ލިބުނީ ކިހިނެއް؟
މިދާއިރާއަށް ފުރުސަތު ހޯދައިދިނީ އޭނާގެ ބޭބެ އެވެ. "ބޭބެ ބުނީ އެބައިނޭ ވަޒީފާއެއް ކުރިމަތިލާންވީ ނޫންހޭ. ބުނީމަ ހިތަށްއެރީ އަޖުމަ ބަލާލާނަމޭ. ފުރަތަމަ އެޕްލައި ކުރީ ޕްރޮންޓް އޮފީސްގެ ބެލް ސަރވިސްގެ މަގާމަށް. އިންޓަވިއު ކޮށްފައި ބުނީ ފައިވް ސްޓާރ ތަނެއްގެ ބެކްގްރައުންޑެއް ނެތޭ. މިކަހަލަ ތަނެއްގައި ކިހިނެއްހޭ މަސައްކަތްކުރާނީ. އިންޓަވިއުކޮށް ނިމުމުން އެދުވަހު ވަރަށް ދެރަވި އެހެންނަމަވެސް ހިތްވަރު ދޫނުކޮށް އަނެއްކާވެސް އެޕްލައި ކުރީ. ދެން އެޕްލައި ކުރީ ބަދިގެއަށް. އެއީ 'ސްޓްވާޑިން' ގެ މަގާމަށް. އެވަޒީފާގައި ކުރަންޖެހޭ މަސައްކަތަކީ ތެލި، ތަށިފަދަ އެއްޗެހި ދޮވުން. އެވަޒީފާ ލިބުމުން ބުނީ މިކަންވާނެހޭ މިއީ ވަރަށް ބުރަ ވަޒީފާއެކޭ. ވަރަށް އުދަގޫވެސް ވާނެޔޭ. ހިތްވަރު އެބަހުރިހޭ. ބުނިން އާއެކޭ ވާނެޔޭ". އެ ވަޒީފާ ލިބުނީ 2006 ގެ ފެބުރުއަރީ މަހުގައެވެ. އޭރުގައި އުމުރަކީ އެންމެ 16 އަހަރެވެ. އެވަޒީފާ ލިބުނީމަ ހިތަށްއެރި ހިތްވަރު ދޫނުކޮށް މަސައްކަތުގައި އުޅޭނަމޭ ހިތްވަރާއެކު މަސައްކަތްކުރަން ފެށީމަ ރަނގަޅުވާނެ ކަމުގެ އުއްމީދުގައި ފަހަތަށް އެންމެ ފިޔަވަޅެއްވެސް އެޅުމެއްނެތި ޒަޢީމު ދިޔައީ ކުރިއަށެވެ.
2006 ގައި އޯލެވެލް ނިންމާފައި ޗުއްޓީއަށް ލިބުނު ދުވަސްކޮޅު ވަޒީފާއަށް ކުރިމަތިލީ. ފަހުން އޭލެވެލް އަށް ވަންނަން ފުރުސަތު ލިބުނީމަ އޮފް ދުވަސް ނަގައިގެން އަނބުރާ ރަށަށްގޮސް ސްކޫލަށް ދިޔައީ. ސްކޫލަށްގޮސް ކިޔަވަންވެސް ދިޔައިން. އެއަށްފަހު އަނެއްކާވެސް އޮފް ދުވަސް ނިމުނީމަ އައީ ރިސޯޓަށް. ފަހުން އެނގުނީ އޮންލައިންކޮށް ކިޔެވޭކަން. އެގުމުން ވަރަށް އުފާވި. ދެން ރިސޯޓަށް އައިސް ޓްރެއިނިން މެނޭޖަރ ކައިރީގަ އޭލެވެލް އޮންލައިން ކޮށް ކިޔެވޭނެ ގޮތެއް ހަމަޖައްސައިދޭށޭ ބުނުމުން އެފުރުސަތު ރިސޯޓުން ދިނުމުން ވަރަށް ހިތްހަމަޖެހުނު".
ޑިއުޓީ އަށް ދާންޖެހެނީ ހެނދުނު 7 އިން ހަވީރު 3 އަށެވެ. ކްލާސް އޮންނަ ގަޑިއަކީ ހަވީރު 4 އިން ރޭގަނޑު 7 އެވެ. ދެން އެގަޑީގައި ކްލާސް ނިންމާފައި އޮންނަ ވަގުތު ފިލާވަޅު ދަސްކޮށްފައި އަނެއްކާވެސް އަނެއްދުވަހު ހެނދުނު ޑިއުޓީއަށް ދިޔައިރު އެއްވެސް ހުސްވަގުތެއް ނުލިބި 2 އަހަރު ވަންދެން ޒަޢީމު އުޅުނީ ވަރަށް ބުރަކޮށެވެ.
ދާއިރާގައި ކުރެވުނު ތަޖުރިބާތައް
2006 ގެ ރޯދަމަހު ރޯދައަށް ހުރެ ބޮޑެތި ޑަސްޓްބިންތައް ސާފުކުރަން ޖެހުން އެއީ ވަރަށް ބޮޑު ގޮންޖެހުމެކެވެ. " ބޮޑެތިކަމުން އުފުލާވެސް ނުލެވޭ. ވަރަށް އުދަގޫ. ޑަސްޓްބިންތަކުން ވަރަށް ނުބައި ވަސްވެސް ދުވާ. ހޮޑުލެވޭ ބައެއްފަހަރު. ރޮވެންވެސް ރޮވޭ. އެކަމަކު ހިތަށްއެރީ ބޭނުންވާ ހިސާބަށް ވާސިލުވުމަށްޓަކައި ހިތްވަރުކޮށްގެން ކުރިއަށްދާނަމޭ. އޭރުންނޭ ނަތީޖާ ފޮނިވާނީ. ދެން ޖެހެނީ ބާބަކިއު ހަދާ ބޮޑެތި އެއްޗެހި ބަރޯއެއްގައި އުފުލައިގެން ބާބަކިއު ހަދާތަނަށް ގެންދަން. ބަރޯވެސް ވަރަށް ބަރު އެހެންވެ ވަރަށް ވަރުބަލިވެފައި ހުންނަނީ. ދެންޖެހެނީ ބޮޑެތި ތެލި އެއްޗެހި ދޮންނަން. މިހާރުވެއްޖިއްޔާ ވަރަށް ފަސޭހަވާނެތާ ދޯ! ޑިޝްވޮޝަރ ކަހަލަ އެއްޗެހި ނުހުރޭ އެޒަމާނުގައި. ތެލި އެއްޗެހި ދޮންނަން އެހާ ރަނގަޅަކަށް ނުވެސް އެގޭނެ. ގިނައިރު ހޭދަކުރަންޖެހޭ މަސައްކަތަކަށް ވެފައި ވަރަށް ވަރުބަލިވޭ". ޒަޢީމް އެއިރުގެ ހަނދާންތައް އާކުރަމުން ކިޔައިދިނެވެ.
ދުވަހަކުވެސް މަންމަމެން އެކަހަލަ މަސައްކަތެއް ހަވާލު ނުކުރާކަމަށް ވަނީ ބުނެފައެވެ. އަދި މަންމަމެން ދެރަވެދާނެތީ މަންމަ ކައިރީ ވަޒީފާގައި ކުރަންޖެހޭ މަސައްކަތަކީ ކޮބައިކަން ކިޔައިނުދޭ ކަމަށް ބުންޏެވެ. " އެއީ މަންމަމެން ބޭނުން ނުވެދާނެ މިކަހަލަ ބުރަ ވަޒީފާއަކަށް ފޮނުވަންވެސް. ބޭނުންވާ ރިސޯޓެއްގައި މަސައްކަތް ކުރަން ލިބުމުން މިފުރުސަތު ގެއްލިދާނެތީ އެކަން ބޭއްވީ ސިއްރުކޮށްފައި. ފަހުން މަންމަމެންނަށް އެނގުމުން ވަރަށް ދެރަވެފައި ބުނި ކުރިން އެނގުނުނަމަ ނުފޮނުވީމުހޭވެސް". އެހިތްދަތި ދުވަސްތަކުގެ ވާހަކަ ހިއްސާކުރަމުން ޒައީމު އަސަރާއެކު ކިޔާދިނެވެ.
ކުރިއެރުންތައް ލިބުނުގޮތް:
" ބަދިގޭގައި އުޅެމުން ރެސްޓޯރެންޓުގައި އުޅޭ ސްޓާފުންނަށް އެހީތެރިވެދެނީ ތަށިއެއްޗެހި ފުހެ ސަމްސާ ކަހަލަ އެއްޗެހި އަދި ގްލާސް ކަހަލަ އެއްޗެހި ފުހެ ތަރުތީބުކުރަން. އެއީ ހަމަ އެކަމަށް ޝައުގުވެރިކަން އުފެދިގެން. ކޮންމެވެސް ދުވަހަކުން ވެއިޓަރެއްގެ މަގާމަށް ދެވިދާނެ ކަމުގެ އުއްމީދުގައި. އެހެން އުޅެމުންގޮސް 2008 ގައި ވެއިޓަރެއްގެ މަގާމަށް ހުށަހެޅުމުން ކުރިމަތިލީމަ އެމަގާމު ލިބުނީ. އެދުވަހު ހިތަށްއެރި މިއަށްވުރެވެސް މައްޗަށް ދެވިދާނެޔޭ އަދިވެސް ހިތްވަރު ކުރާނަމޭ. ވެއިޓަރެއްގެ މަގާމުގައި 2 އަހަރު އުޅެފައި ދެން ލިބުނީ ޕްރޮމޯޝަނެއް" އެއީ ރެސްޓޯރެންޓް ކެޕްޓަނެއްގެ މަގާމެވެ. އެއަށްފަހު 3 އަހަރުފަހުން އަނެއްކާވެސް ރެސްޓޯރެންޓް ސްޕަވައިޒަކަށް ބަދަލުވިއެވެ. އެހެން އުޅެމުން ދެން ޕްރޮމޯޓްވީ ރެސްޓޯރެންޓް މެނޭޖަރަކަށެވެ. މުޅިއެކު 7 ރެންސްޓޯރެންޓް ހިމެނޭ މިރިސޯޓުގައި ފަހުން ޒަޢީމަށް ފުރުސަތު ލިބުނީ އަންޑަރސީ ރެސްޓޯރެންޓްގެ މެނޭޖަރު ކަމެވެ. ވަރަށް އުފާވެލާފައި ބުނީ އެއީ އޭނާގެ ވަރަށް ބޮޑު ހުވަފެނެއް ކަމަށެވެ. އަދި އެދުވަސް ވަރަށް ހަނދާންވާ ކަމަށްވެސް ފާހަގަކުރިއެވެ.
1 އެޕްރީލް 2022 ވަނަ ދުވަހުން ފެށިގެން މިހާރު ޒަޢީމު އަދާކުރަނީ ވަރަށް ޒިންމާދާރު ވަޒީފާއެކެވެ. އެއީ ކޮންރެޑް ރިސޯޓުގެ 7 ރެސްޓޯރެންޓުގެ 2 ވަނަ އިންޗާޖުގެ މަގާމެވެ. އެސިސްޓެންޓް ފުޑް އެންޑް ބެވަރޭޖް މެނޭޖަރުގެ މަގާމެވެ. މިއަދު އެމަގާމު ލިބުމުން ވަރަށް ފަޚުރުވެރިވާ ކަމަށްވެސް ޒަޢީމު އުފަލާއެކު ފާހަގަކުރިއެވެ. މިމަގާމު ލިބުމުން އަދިވެސް އުއްމީދަކީ ކުރިއަށްދިއުން ކަމުގައި ބުންޏެވެ. ޒަޢީމުގެ އެންމެ ބޮޑު އުއްމީދަކީ ރިސޯޓެއްގެ ޖެނެރަލް މެނޭޖަރުގެ މަގާމު އަދާކުރަން ލިބުމެވެ. ޒަޢީމު ބުނާގޮތުގައި ހިތްވަރާއެކު މަސައްކަތްކުރާ މީހަކަށް ކާމިޔާބަކީ މާއުދަގޫއެއްޗެއް ނޫނެވެ.
ޝުކުރު އަދާކުރަން ބޭނުންވަނީ ކޮންބަޔަކަށް
16 އަހަރު މެދުކެޑުމެއްނެތި ރިސޯޓް ދާއިރާގައި ކުރިއަށް ދިއުމަކީ އެހާ ފަސޭހަ ކަމެއް ނޫނެވެ. ޒިންމާތަކާއެކު މަސައްކަތް ކުރުމުގައި އެންމެ ބޮޑަށް ހިތްވަރު ލިބުނީ އާއިލާގެ ފަރާތުންނެވެ. އެންމެ ބޮޑަށް ޝުކުރު އަދާކުރަން ބޭނުންވަނީ މަންމައާއި ބައްޕައަށެވެ. އެއަށްފަހު ގާތް ރަހުމަތްތެރިންނަށެވެ. ޒަޢީމަކީ މީހެއްގެ ގޮތުގައި ބަލައިގެން މިއަދާ ހަމައަށްވެސް އެކުގައި ތިބި ރައްޓެހިންނަށެވެ.
ދޭން ބޭނުންވާ މެސެޖް
" ހިތުގައި އުއްމީދެއް އޮތިއްޔާ އެފުރުސަތު ލިބޭތޯ މަސައްކަތްކުރާށޭ. އެއްވެސް ކަމަކީ ނުވާނެ ކަމެއްކަމުގައި ނުދެކޭށޭ. ކަންކަމުގައި ހިތްވަރާއެކު ކުރިމަތިލާށޭ. ބައެއް މީހުން ހަޑިކަމަށް ދެކޭ މަސައްކަތެއް ކުރަންޖެހުނަސް އެކަމުގައި ފަސްނުޖެހި ކުރިއަށް ދެވިއްޖެނަމަ ބޭނުންވާ ހިސާބަށް ވާސިލްވެވޭނޭ. މީހާގެ ޝަޚުޝިއްޔަތު ދައްކުވައިދެނީ މީހާ ކުރާ މަސައްކަތަކުން ނޫން. މީހުން ބަލައިގަންނާނީ މަސައްކަތަށް ފަރުވާ ބަހައްޓައިގެން މަސައްކަތަށް ލޯބިދީގެން ކުރިއަށް ދިޔައީމަ. ވަޒީފާ އަދާކުރަންވާނީ މުސާރައިގެ ބޭނުމުގައި ނޫންކަމަށް ދެކިގެން ކުރާހިތުން މަސައްކަތްކުރާށޭ. ތެދުވެރިކަމާއެކު މަސައްކަތްކުރާނަމަ އަބަދުވެސް ކާމިޔާބުވާނެކަން ޔަގީން". މިއީ ޒަޢީމު ދިން އަގުހުރި މެސެޖެކެވެ.
ކިޔުންތެރިންގެ ހިޔާލު
2007 ga online koh kiyevun oveyths. Anehkka A level ah kiyavadheyni class thakah gosgen. V hama nujehey vaahaka
ކޮމެންޓްސް ބަންދުކުރެވިފައި