ސްޓްރެޗްމާކް ހުރުމަކީ ވަރަށް ގިނަ މީހުން ކަންބޮޑުވާ އަދި އެކަމަށް ހައްލު ހޯދަން އުދަގޫކަމެކެވެ. ސްޓްރެޗްމާކް ފިލުވުމަށް ތަފާތު ބާވަތްބާވަތުގެ ކްރީމާއި ތެޔޮފަދަ ތަކެތި ގަނެގެން ބޭނުންކުރާ މީހުން އުޅެއެވެ. ސްޓްރޗްމާކް ހުރުން މިއީ އާދައިގެ ކަމެއް ކަމުގައިވީނަމަވެސް ހަންގަނޑުގައި ވަރަށްބޮޑަށް ފާހަގަވާން ހުރެއެވެ.
ހަންގަނޑު ރީތިކޮށް ބެހެއްޓުމަކީ ކޮންމެ މީހަކުވެސް ބޭނުންވާނެ ކަމެކެވެ. ސްޓްރެޗްމާކް ހުންނަނީ އާއްމުކޮށް އަންހެނުންގެ ހަންގަނޑުގައެވެ. މަދުން ނަމަވެސް ފިރިހެނުންގެ ހުރެއެވެ.
ކުއްލިއަކަށް ހަންގަނޑަށް އަންނަ ބަދަލަކުން ސްޓްރެޗްމާކް އުފެދެއެވެ. މާބޮޑަށް ހަށިގަނޑުގެ ބަރުދަން ލުއިވުމުން ހަންގަނޑުގައި ހުންނަ ވާންކަން ކުޑަވެގެންވެސް މިހެން ދިމާވެއެވެ. އަދި ހަމައެހެންމެ ހަށިގަނޑުގެ ބަރުދަން މާބޮޑަށް ބަރުވުމުން ހަންގަނޑު ވާންވާނެ ޖާގަ ނެތުމުން ހަންގަނޑުގައި އެމާކްތައް ފާހަގަވާން ފަށައެވެ.
ސްޓްރެޗްމާކް ބޮޑަށް ފާޅުވާން ހުންނަނީ ފައިގެ ފަލަމަސްގަނޑު، އަތުގެ ފަލަމަސްގަނޑު، ބަނޑު އަދި ފޫކޮޅުގައެވެ. މިއީ އެއްވެސް ހާލަތެއްގައި ނުރައްކާތެރި ކަމެއް ނޫން ކަމަށް ސިއްހީ މާހިރުން ވިދާޅުވެއެވެ. އާއްމުގޮތެއްގައި މިކަން ބޮޑަށް ދިމާވަނީ މާބަނޑު މީހުންނަށް ކަމުގައިވިޔަސް، އެއްވެސް ކަހަލަ ބަދަލެއް ނެތިވެސް ހަންގަނޑުގައި ސްޓްރެޗްމާކް ހުންނަ މީހުން އުޅެއެވެ.
މިކަމަށް ހައްލެއް ހޯދުމަށް ބޭނުންކުރެވޭ އަގުބޮޑު އަދި ކެމިކަލް ހުންނަ ކްރީމްގެ ބަދަލުގައި ފަތްޕިލާވެލި ބޭނުންކޮށްގެން އަމިއްލައަށް ގޭގައި ދެވިދާނެ ފަރުވާވެސް ހުރެއެވެ.
މާބަނޑުދުވަސްވަރު އާއްމުކޮށް ސްޓްރެޗްމާކް އުފެދެން ފަށާއިރު، އަލްމަންޑްތެޔޮ އަދި ކާށިތެޔޮ ކޮންމެ ދުވަހަކު އުނގުޅާނަމަ ސްޓްރެޗްމާކް އުފެދުމުގެ ފުރުސަތު ކުޑަވެގެންދެއެވެ.
ސްޓްރެޗްމާކް ފިލުވުމަށް ގޭގައި ދެވިދާނެ ފަރުވާއެއް:
3 ސައިސަމުސާ އެލޯވެރާ ޖެލް
5 ވިޓަމިން އީ ކެޕްސޫލް
3 ވިޓަމިން އޭ ކެޕްސޫލް
ތައްޓަކަށް މި 3 ބާވަތް އެޅުމަށްފަހު ރަނގަޅަށް އެއްކޮށްލާށެވެ. އަދި ސްޓްރެޗްމާކް ހުރި ތަންތަނުގައި ރަނގަޅަށް އުނގުޅާލާށެވެ. އެއަށްފަހު 10 ނުވަތަ 15 މިނިޓްވަންދެން ބަހައްޓާށެވެ. ގަވާއިދުން މިގޮތަށް ހާކަމުންދާނަމަ ސްޓްރެޗްމާކްގެ ކުލަ ފަނޑުވަމުން ދާނެއެވެ.
