ގީނިސް ވޯލްޑް ރިކޯޑެއްގައި ބައިވެރިވާން ބޭނުންވޭ ހެއްޔެވެ؟ ފަތަން ނޭންގުނަސް މޫދު އަޑީގައި 2 މިނިޓް ނޭވާ ހިފަހައްޓާލެވޭނެ ހެއްޔެވެ؟ އެހެންވިއްޔާ އަވަހަށް 'ނޭވާ 2' އިވެންޓްގައި ބައިވެރިވެލާށެވެ.
ދުނިޔޭގެ ރިކޯޑެއް ގާއިމުކުރުމަށް 'ފްރީޑައިވް މޯލްޑިވްސް' އިން 12 ރިސޯޓެއްގައި ކުރިޔަށް ގެންދަން ނިންމާފައިވާ 'ނޭވާ 2' ގައި ބައިވެރިވެގެން ދުނިޔޭގެ ރިކޯޑެއްގައި ބައިވެރިވެވުނީއެވެ.
ދުނިޔޭގެ ފަތުރުވެރިކަމުގެ ދުވަސްކަމުގައިވާ 1 އޮކްޓޯބަރުގައި ބާއްވާ މި އިވެންޓްގައި ބައިވެރިވުމުގެ ފުރުސަތު އާންމުންނަށް ހުޅުވާލާފައިވަނީ ޖޫން މަހުގެ 30 ވަނަ ދުވަހުގެ ނިޔަލަށެވެ. އޮންލައިންކޮށް ފޯމު ހުށަހެޅުމަށް ހަމަޖެހިފައިވަނީ ތިރީގައިވާ ލިންކް މެދުވެރިކޮށެވެ.
https://forms.gle/rvyf8CEiWZHVLaWK9
ފްރީޑައިވް މޯލްޑިވްސް ޑައިވިން ސުކޫލްގެ ޕަބްލިކް ރިލޭޝަންސް މެނޭޖަރ ހައްވާ ނައުފާ ނިޒާމް (ނަންނި) މައުލޫމާތުދިންގޮތުގަ "ނޭވާ 2' އިވެންޓަށް 2019 ވަނަ އަހަރުން ފެށިގެން އަންނަނީ ތައްޔާރުވަމުންނެވެ. އެ ސުކޫލުން ދުނިޔޭގެ ރިކޯޑެއް ހެދުމަށް އިސްނެގީ ފްރީޑައިވް މޯލްޑިވްސްގެ ފައުންޑަރ ފަހުދު ފާއިޒް އެވެ. 2 މިނިޓް ވަންދެން ނޭވާ ހިފަހައްޓާލައިގެން މުޅިން އާ ރިކޯޑެއް ހެދުމަށް ނިންމީ 2019 ވަނަ އަހަރު ރާއްޖޭގައި އެއްފަހަރާ 521 މީހުން ޑައިވްކޮށްގެން ދުނިޔޭގެ ރިކޯޑެއް މުގުރާލި އިވެންޓުން އިންސްޕަޔަރވެގެން ކަމަށް ނައުފާ ފާހަގަކުރިއެވެ.
މިއީ ރާއްޖޭގެ ފަތުރުވެރިކަމަށް 50 އަހަރު ފުރޭ މުނާސަބާއާއި ގުޅުވައިގެން ކުރިޔަށް ގެންދަން ނިންމާފައިވާ ހަރަކާތެކެވެ. ދުނިޔޭގެ ރިކޯޑް ގާއިމުކުރުމުގެ މި އިވެންޓަކީ ތިމާވެއްޓަށް ޚާއްސަ އިވެންޓެއްގެ ގޮތުގަ ވަނީ ފާހަގަކޮށްފައެވެ. އެގޮތުން މިއިވެންޓް ޕްރޮމޯޓް ކުރުމަށް ތީމެއްގެ ގޮތުގައި ބޭނުން ކުރަނީ '#1ބްރެތް4އޯޝަން' އެވެ.
މި އިވެންޓްގައި ބައިވެރިވެފައިވާ ރިސޯޓްތަކުގެ ތެރޭގައި ޑަބްލިއު މޯލްޑިވްސް، ސަން އައިލެންޑް ރިސޯޓް އެންޑް ސްޕާ، ޕެރަޑައިސް އައިލެންޑް ރިސޯޓް އެންޑް ސްޕާ، ޖުމެއިރާ މޯލްޑިވްސް އޮޅަހަލި އައިލެންޑް، ކްރޮސްރޯޑްސް މޯލްޑިވްސް، އަމިއްލަފުށި، ކޮއްދިއްޕަރު، ވަން އެންޑް އޮންލީ ރީތިރަށް، ރޯޔަލް އައިލެންޑް، ފިލިތެޔޮ އައިލެންޑް ރިސޯޓް، ފޯ ސީޒަންސް އަދި ސޮނޭވާ ފުށި ހިމެނެއެވެ.
ރިސޯޓުންތަކުން ބައިވެރިވި ފަރާތްތަކުގެ ލިސްޓްތައްވެސް އަންނަނީ އިވެލުއޭޓް ކުރަމުންނެވެ. މިއިވެންޓަށް އާންމުންގެ ވަރަށް ބޮޑު ތަރުހީބެއް ލިބެމުން އަންނަ ކަމަށްވެސް ނައުފާ ފާހަގަ ކުރިއެވެ. އެގޮތުން އިވެންޓްގައި ބައިވެރިވުމަށް އެދި ގިނަބަޔަކު އަންނަނީ ފޯމު ހުށައަޅަމުންނެވެ.
'ނޭވާ 2' ގައި ބައިވެރިވާ ރިސޯޓްތަކުގައި މިހާރުވެސް ޓްރެއިނިންތައް ކުރިޔަށްދާކަން ފާހަގަކޮށް ނައުފާ މައުލޫމާތު ދިންގޮތުގަ އާންމުންގެތެރެއިން ބައިވެރިވާ އެންމެންވެސް އިވެލުއުއޭޓް ކުރާނެއެވެ. ބޭނުންވާ ކްރައިޓީރިއާއަށް ފެތޭ މީހުން އިވެންޓްގައި ބައިވެރިކުރުމަށް ވަނީ ހަމަޖެހިފައެވެ.
ނޭވާ 2 ކަށް ތައްޔާރުވެފައިވާ ރިސޯޓްތަކުގެ ތެރެއިން ސަން އައިލެންޑް އަދި ޕެރެޑައިސް އައިލެންޑް ރިސޯޓްގައި މިހާރުވަނީ ޓްރެއިނިންތައް ބާއްވާ ނިންމާފައެވެ. ބައިވެރިންގެ ހުންނަންޖެހޭ ޝަރުތުތަކުގެ ތެރޭގައި އުމުރުން 18 އަހަރުވެފައިވުމާއި ސިއްހަތު ރަނގަޅު މީހަކަށްވާން ޖެހެއެވެ. ނޭވާ އިވެންޓްގައި ބައިވެރިވެވޭނީ ނޭވާގެ އެއްވެސް މައްސަލައެއް ނުހުންނަ މީހުންނަށެވެ.
މި އިވެންޓަކީ ވަރަށް ގިނަ ސްޕޮންސަރުންގެ އެއްބާރުލުމާއެކު ކުރިޔަށްގެންދަން ނިންމާފައިވާ އިވެންޓެކެވެ. އެންވަޔަރމެންޓް މިނިސްޓްރީ، ޓޫރިޒަމް މިނިސްޓްރީ އަދި ޔޫތު މިނިސްޓްރީގެ ފަރާތުން މި އިންވެންޓަށް ވަރަށް ބޮޑު އެއްބާރުލުމެއް ލިބެމުންދާ ކަމަށް ނައުފާ ފާހަގަ ކުރިއެވެ.
މީގެ ކުރިން އެއްވެސް ބަޔަކު ހަދާފައިނުވާ މުޅިން އާ ރިކޯޑެއް ހެދުމަށް ތައްޔާރުވަމުން އަންނަ އިރު ނޭވާ 2 އިވެންޓަކީ ވަރަށް ތާރީހީ އިވެންޓަކަށް ވާނެއެވެ. ރިކޯޑް ކާމިޔާބުކަމާއެކު ފުރިހަމަކުރެވިއްޖެނަމަ 'ނޭވާ 2' ވާނީ ދުނިޔޭގެ ރިކޯޑް ފޮތުގައި ހިމަނާ ރާއްޖެއަށް ލިބޭ ދެވަނަ ރިކޯޑަށެވެ.
