މިޒްނާ ކިޔަވަނީ އަމީނިއްޔާ ސުކޫލުގެ ގްރޭޑް 5 ގައެވެ. މިޒްނާ އަށް ކުރުކޮށް ކިޔަނީ މިޒޫއެވެ.

އެއްފަހަރަކު ސުކޫލު ޗުއްޓީގައި މިޒްނާ ގެ ބޮޑުދައިތަ ޒުބޭދާ އާއި ޒުބޭދާގެ ފިރިމީހާ އަބުދުﷲ ރަޝީދު އާއި އެއްކޮށް އިންޑިއާއަށް ދިޔައެވެ.

ހޮޓަލާއި ހަމަޔަށް ދެވުނުއިރު ހުރީ 3 ޖަހާ ބޮޑުވެފައެވެ. ދެން ހޮޓަލަށް ވަދެ ކޮޓަރިއަށް ގޮސް އެމީހުންގެ ސާމާނު ބަހައްޓާފައި ކޮޓަރިއަށް ގެންނަގޮތަށް ސަޔަށް އޯޑަރު ދީފިއެވެ.

ސައި ގެނައުމުން ސައިބޮއެގެން ކުޑަކޮށް ބާޒާރު ކޮށްލަން މަގުމައްޗަށް ނިކުތްތަނާ ފުންޏަކަށް ޖަހާފައި ހުރި ވަރަށް ތާޒާ މޭބިސްކަދުރު ތަކެއް ފެނިއްޖެއެވެ.

ރީތިކަމުން އޮމާންކަމުން ހީވަނީ ޕްލާސްޓިކުން ހަދާފައި ހުރި މޭބިސްކަދުރު ހެންނެވެ.

ދެން ޒުބޭދާ އެތަނުން ދެކޯޅި މޭބިސްކަދުރު ގަނެގެން މިޒްނާ އަށް ކުޅޭސާމާނުކޮޅެއް ގަނެދޭން ވެގެން ކުޅޭސާމާނު ހުރި ފިހާރަޔަކަށް ވަންއިރު އެތާހުރީ ހުސް ޕްލާސްޓިކުން ތައްޔާރު ކޮށްފައިހުރި ތަރުކާރީއާއި މޭވާގެ ސާމާނެވެ.

ދެން ޒުބޭދާ މިޒްނާ ގާތުން އަހާލިއެވެ.

ޒުބޭދާ: މިޒޫ ބޭނުމީ ކޯއްޗެއްތަ!

މިޒޫ: ބޭނުމީ ކުޅޭކުޅޭ މޭވާ ވަށިގަނޑަކާއި ތަރުކާރީ ވަށިގަނޑެއް.

ދެން ޒުބޭދާ ދެވަށިގަނޑު ނަގާފައި އެއް ވަށިގަނޑަށް ތަރުކާރީ އަނެއް ވަށިގަނޑަށް މޭވާ އަޅާފައި ތަރުކާރީ ވަށިގަނޑު އަބުދުﷲ ރަޝީދު އަތަށް ދީފިއެވެ.

ދެމީހުން ގޮސް ލާރި ދައްކާފައި މިޒޫ ގޮވައިގެން ހޮޓަލަށް ހިނގައްޖެއެވެ.

މޭޒުމަތީގައި ދެވަށިގަނޑު ބަހައްޓާފައި މޭބިސްކަދުރު ކޮޅު ދޮވެލާފައި ތައްޓަކަށް ލާފައި މިޒޫ ކާރީގައި ކާލާށޭ ބުންޏެވެ.

ޒުބޭދާ އާއި އަބުދުﷲ ރަޝީދު ވެސް ކުޑަކޮށް ވަރުބަލިވެފައި ތިބީމަ ޖައްސާލައިފިއެވެ.

މިޒޫ ވަށިގަނޑުތަކުގައި ހުރި ސާމާނު ބަލާހިތުން ވަށިގަނޑުން ސާމާނުތައް ނަގާފައި މޭޒުމަތީގައި އަތުރާލައިގެން ބަލަބަލާހުރެފައި ވަށިގަނޑަށް އެޅިއިރު އަސްލު މޭބިސްކަދުރު ކަމަށް ހީކޮށް ޕްލާސްޓިކް މޭބިސްކަދުރު ކޯޅިއެއް ނަގާފައި ތަބަކުގައި ބާއްވައިފިއެވެ.

ދެން މިޒޫވެސް ކުޑަކޮށް އަރާމުކޮށްލަން ޖައްސާލިއެވެ.

ތިން މީހުންވެސް ކުޑަކޮށް އަރާމުކޮށްލުމަށްފަހު ތެދުވެ ރޭގަނޑު ކައިގެން އައިސް ޒުބޭދާ މޭބިސްކަދުރު ތަބައް ގެނެސް އެނދުމަތީގައި ބަހައްޓާފައި ތިންމީހުން މޭބިސްކަދުރު ކާން އެނދުމަތީގައި ޖައްސާލައިފިއެވެ.

 

ޒުބޭދާއަށް ފުރަތަމަވެސް ނެގުނީ ނެއްޓިފައި އޮތް ޕްލާސްޓިކް މޭބިސްކަދުރެކެވެ.

ނޭގި އަނގަޔަށްލާފައި ހަފައިގަތުމުން ހަފައިގަނެވުނީ ރަބަރުގަނޑެކެވެ. ޒުބޭދާ ރުޅިއައިސް ރަތްވެގެން އަބުދުﷲ ރަޝީދު އަށް ބުންޏެވެ.

ޒުބޭދާ: އަހަރެންނަށް އޮޅުވާލަންދޯ! ޕްލާސްޓިކް މޭބިސްކަދުރު މިއަށްލީ.

އަބުދުﷲ ރަޝީދު: މިހާރު ކިހިނެއްވީ!

ޒުބޭދާ: އަދި އެބައަހައެއްނު. ކިހިނެއްވީހޭ ކިޔާފައި ރުޅިއައިސް ރަތްވެގެން ގޮސް މޭބިސްކަދުރު ތަބައް އެއްކޮށް މިޒޫގެ ކުޅޭ ވަށިގަނޑަށް ލައިފިއެވެ.

ޒުބޭދާ ހީކުރީ އެތަބަކުގައި ހުރީ އެއްކޮށް ޕްލާސްޓިކް މޭބިސްކަދުރު ކަމަށެވެ.

އަބުދުﷲ ރަޝީދު މޭބިސްކަދުރު ކާލާފައި ޒުބޭދާއަށް ލަނޑުދޭން ޕްލާސްޓިކް މޭބިސްކަދުރު ތަބަކުގައި ބެހެއްޓީކަމަށެވެ.

ޒުބޭދާއަށް އަނގަޔަށް ލެވުނީ ޕްލާސްޓިކް މޭބިސްކަދުރެއް ކަން އެނގުމުން އަބުދުﷲ ރަޝީދު އާއި މިޒޫ އާއި ދެމީހުން ޕަކަޕަކައަޅާފައި ހީގެންފިއެވެ.

އިރުކޮޅެއް ނުވަނީސް ވަށިގަނޑުން ވެސް ޕަކަޕަކައަޅާފައި ހީގެންފައި މިޒޫ އަށް ގޮވާލާފައި މޭބިސްކަދުރު ބުނާއަޑު އިވުނެވެ.

މޭބިސްކަދުރު: އޭ ބަލަ! މިޒޫ މިވަށިގަނޑުން އަހަރެން ނަގާބަލަ!

މިޒޫ: ކީއްކުރަންތަ!

މޭބިސްކަދުރު: ނުކައި ބޭއްވީމާ ތާޒާކަން ކެނޑޭނެއޭ. އަހަރެންނަކީ ހާދަހާ ހަށިގަނޑަށް ފައިދާހުރި މޭވާއެކޭ.

މިޒޫ: ތިޔައީ ޕްލާސްޓިކެއް ނޫންތަ!

މޭބިސްކަދުރު: ބަލަ އޭރު މިޒޫވެސް ކެއީމެއްނު.

މިޒޫ: އާނ. އޭރު ކެއީމޭ. ފަހުން އަހަރެންވެސް ހީކުރީ ދައްތަ އާއި ބޭބެ ކާލާފައި ތަބަކުގައި ކުޅޭ މޭބިސް ކަދުރު ބެހެއްޓީކަމަށް.

އަބުދުﷲ ރަޝީދު: ބޭބެ އަށް އެއްޗެކޭ ނުބުނެވިގެން މިއުޅެނީ ހެވޭވަރުންނޭ.

ދެން މިޒޫ މޭބިސްކަދުރުތައް ނަގާފައި ޕްލާސްޓިކް މޭބިސްކަދުރު ވަކިކޮށްލައިފިއެވެ.

ދޮވެލާފައި ތިން މީހުން ބައިވެގެން މޭބިސްކަދުރު ކާލައިފިއެވެ.

އެ މޭބިސްކަދުރު ވަރަށް މީރެވެ. އެހެންވެ އޭގެފަހުން މިޒޫ ވަރަށް ގިނައިން މޭބިސްކަދުރު ގަނެގެން ކައެވެ.