ލިވާތުކުރުން (އެއްޖިންސުން ގުޅުން ހިންގުން) މިއީ ރާއްޖެއަށް ކުރިމަތިވެފައިވާ އެއް ބަލިމަޑުކަން ކަމަށާއި މިއީ އިންސާނީ ފިތުރަތާވެސް ޚިލާފުކަމެއް ކަމަށް ޑރ. އަނާރާ ނަޢީމް ވަނީ ވިދާޅުވެފައެވެ. ވީޓީވީގެ ބޮޑުފެންޑާ ޕްރޮގްރާމްގަ ވާހަކަ ދައްކަވަމުން ޑރ. އަނާރާ ވިދާޅުވީ ލިވާތުކުރުމަކީ ﷲ ސުބުހާނަހޫ ވަތަޢާލާ ނަހީ ކުރައްވާފައިވާ ކަމެއް ކަމަށެވެ.
" ވަރަށް ބޮޑު ފާފައެއްގެ ގޮތުގަ ކަނޑައަޅާފައިވަނީ. އެގޮތުން ލޫތުއަލައިހިއްސަލާމްގެ ގައުމުގެ މީހުންނަށް އެކަމުގެ ހިތިރަހަ ދައްކުވައިފައިވަނީ. އަޢުރާފު ސޫރަތުގަ ބަޔާން ކުރައްވާފައިވޭ ލޫތުއަލައިހިއްސަލާމްގެ ގައުމުގެ މީހުން އެކުރަން ފެށި ކަންތައްތަކަކީ އޭގެ ކުރިން އެއްވެސް ބަޔަކު ކޮށްއުޅުނު ކަމެއް ނޫނޭ. އެހެންވީމަ އެރަށް ބަންޑުން ޖެއްސެވިކަމަށް. އެމީހުން އެކުރި ފާފައިގެ ބޮޑުކަމުން އަދި މުޖުރިމުންގެ ގޮތުގަ ސިފަކޮށްފައިވަނީ. އެހާވެސް ނުބައިކަމެއް އެއްޖިންސުގެ ގުޅުމަކީ". އިސްލާމިކް އޯރގަނައިޒޭޝަން ފޯރ ކަލްޗަރ އެންޑް ސިވިލައިޒޭޝަންގެ ޖެންޑަރ އެންޑް ސޯޝަލްއެފެއަރޒްގެ ނައިބު ރައީސް ޑރ. އަނާރާ ވިދާޅުވިއެވެ.
އަދި މިކަމުން މުޖުތަމައު ސަލާމަތްކުރުމަށްޓަކައި ކުރެވެންހުރި ކަންތައްތައް ކުރަންޖެހޭ ކަމަށާއި، އަބަދުވެސް ޕްރޮމޯޓް ކުރަންވީ ރަނގަޅުގޮތް ކަމަށް ފާހަގަކުރެއްވިއެވެ.
" ހަދީސް ބަސްފުޅުގަވެސް ވޭ ލޫތު އަލައިހިއްސަލާމް ގައުމުގެ މީހުން އެކުރި ފާފަ ކުރާ މީހުންނަށް ލައުނަތް ލެއްވި ކަމަށް. 3 ފަހަރު ތަކުރާރުކޮށް އައިސްފަވޭ އެވާހަކަ. ލައުނަތް ލެއްވުމުގެ މާނައަކީ ﷲ ރަހުމަތުން ބޭރުވުން. އެކަމުން ސަލާމަތްވުމަށް އެބަޖެހޭ ރަނގަޅު ފިޔަވަޅުތަކެއް އަޅަން މުޅި މުޖުތަމައުން ވެސް. ސަރުކާރުން ވެސް ކަމާބެހޭ ފަރާތްތަކުން ވެސް އެފަދަ ކަންތައްތައް ހުއްޓުވުމަށް ކުރެވެންހުރި ހުރިހާކަމެއް ކުރަން އެބަޖެހޭ. ކުށެއް ކުރެވިއްޖިއްޔާ އެމީހަކުވެސް އެބަޖެހޭ އެކަމަށް ތައުބާވެ އެކަންތައް ދޫކޮށްލަން. އެކަމުން ހިތްވަރު ލިބޭ ގޮތަށް އަމަލު ނުކޮށް އެބަޖެހޭ ފިތުރަތުގެ ސާފުކަންމަތީގަ އުޅެން ދަސްކުރަން" ޑރ. އަނާރާ ވިދާޅުވިއެވެ.
ކޮންމެ މުޖުތަމައެއްގައިވެސް ކުށް ކުރާ މީހުން އުޅޭނެ ކަމަށާއި، އެކަމަކު މިކަންތައް މާބޮޑަށް އާންމުވެގެން ސޯޝަލް މީޑިއާއިން ވެސް ފާޅުކަންބޮޑު ގޮތެއްގަ މި ވީޑިއޯތައް ދައުރުވަމުން ދިއުން އެއީ ވަރަށް ބޮޑު ނުރައްކަލެއް ކަމަށް ވިދާޅުވިއެވެ. އަޅުގަނޑުމެން ތިބެންޖެހޭނީ އެކަހަލަ ފާހިޝް ކަންތައްތައް ޕްރޮމޯޓް ނުކުރާ ބައެއްގެ ގޮތުގައިކަމަށާއި، އެކަންކަމާ ދުރުހެލިވެ ތިބެންޖެހޭ ކަމަށެވެ.
" ވަރަށް މުހިންމު އެފަރާތްތަކަށް ދޭންވާ އަދަބުދީ ރަނގަޅު ކުރުމަށްޓަކައި އެޅެންހުރި ފިޔަވަޅު އެޅުން. ނޫނީ މުޖުތަމައުން އެކަހެރި ކުރަންޖެހެންޏާ ކުރުން. އެއިރުން އެކުށްކުރާ ފަރާތްތަކަށް ވިސްނޭނެ ކިހާ ބޮޑު ކުށެއްކަން އެކުރެވުނީ. ވަރަށް މުހިންމު އަވަސް ސަމާލުކަން އެކަހަލަ ކަންކަމަށް ދީ ކަމާބެހޭ ފަރާތްތަކުން ފިޔަވަޅު އެޅުން". ޑރ. އަނާރާ ވިދާޅުވިއެވެ.
ދިވެހިންތަކެއް އެއްޖިންސުން ގުޅުންހިންގާ ވީޑިއޯ އާއި ފޮޓޯ ފޭސްބުކް އަދި ޓްވިޓަރ ގައި ދަނީ އާންމުކުރަމުންނެވެ. މިމައްސަލަ ތަހުގީގުކުރާކަމަށް ފުލުހުން ބުނެފައިވާއިރު މިހާތަނަށް މިމައްސަލައިގައި ހިމެނޭ ދިވެއްސެއް އަދި ބޭރު މީހެއްވެސް ހައްޔަރުކުރިކަމަކަށް ފުލުހުން ހާމަކޮށްފައެއް ނުވެއެވެ. މިފަދަ ބޮޑެތި ކުށްކުރާ މީހުން މުޖުތަމައުން އެކަހެރި ނުކޮށް ތިބުމަކީ އާންމުންގެ ކަންބޮޑުވުން އޮތްކަމެކެވެ. އެހެންވެ މިކުށްކުރާ މީހުން ހައްޔަރުކުރުމަށް ވެސް ގިނަބަޔަކު ދަނީ ސޯޝަލް މީޑިއާގައި ގޮވާލަމުންނެވެ.
