ޒަމާން ބަދަލުވަމުން މިދަނީ ޚިޔާލަށް ނުގެނެވޭހާ އަވަހަށެވެ. ފަހުން ވެދާނެކަމަށް މީގެއެތައް އަހަރެއް ކުރިން ހީވެސް ނުކުރާހާ އެތައްކަމެއް މި ދަނީ ވަމުންނެވެ. ދިވެހި މުޖުތަމަޢުގައި ވެސް ހަށި ވިއްކުމުގެ ހަރާމް ވިޔަފާރިއާއި، ކުޑަކުދިން ބޭނުންކޮށްގެން މަސްތުވާތަކެތީގެ ވިޔަފާރިކުރުމާއި، މީހުންނަށް މަކަރާއި ހީލަތް ހަދައިގެން ބޮޑެތި އަދަދުތަކުން ފައިސާ ފޭރުމާއި، މީހުން ލައްވައި ކުރާ މަސައްކަތްތަކަށް ދޭންޖެހޭ އުޖޫރަ ނުދީ ފިލައިގެން އުޅުން ފަދަ ކަންތައްތައް ދަނީ ހިނގަމުންނެވެ. މިފަދަ އަމަލުތަކަކީ ޒަމާނީ އަޅުވެތިކަމެވެ.
ކުޑަކުދިންލައްވައި ކުށްކުރުވުން
18 އަހަރު ނުފުރޭ ކުދިން ކުށްތަކަށް އަރައިގަންނަވަރު އިތުރުވާ ވާހަކައަކީ، ފުލުހުން ކުރިއަށްގެންދާ ނޫސްވެރިންގެ ބައްދަލުވުންތަކުން ވެސް އަޑުއިވޭ ވާހަކައެކެވެ. ޚާއްސަކޮށް މަސްތުވާތަކެތީގެ މައްސަލަތަކުގައި ކުދިން ޝާމިލުވާމިންވަރު ގިނަވުން މިއީ ކަންބޮޑުވުމެކެވެ. މިފަދަ ކުދިންލައްވައި މަސްތުވާތަކެތި ވިއްކާ އެންމެފަހުން ޒުވާން އުމުރު ޖަލުގައި ހޭދަކުރަންޖެހުން މިދަނީ އާންމުވަމުންނެވެ. ކުށުގެ ވެށިން ކުދިން ސަލާމަތްކުރެވޭނެ ގޮތްތަކާމެދު މައިންބަފައިންނާއި ޓީޗަރުން އަދި ކަމާބެހޭ ފަރާތްތަކުން ވަރަށް ބޮޑަށް ވިސްނަން އެބަޖެހެއެވެ.
ކުރާ މަސައްކަތަށް އުޖޫރަ ނުލިބުން
ރަސޫލާ ސައްލަﷲ ޢަލައިހި ވަޞައްލަމް ހަދީޘް ކުރައްވާފައިވެއެވެ. މާނައީ: "އުޖޫރައަށް މަސައްކަތް ކުރާ މީހާއަށް، އޭނާގެ ގައިން ދާ ހިކުމުގެ ކުރިން އޭނާގެ އުޖޫރަ ދޭހުށިކަމެވެ". (މައުލޫމާތު ނަގާފައިވަނީ ހުކުރު ޚުތުބާ)
ބުރަމަސައްކަތް ކުރުމަށްފަހު ލިބެންޖެހޭ އާމްދަނީ ނުލިބި އެތައް މީހުންނެއް އެބަތިއްބެވެ. ޤާނޫނާއި ޤަވާއިދުތަކަށް އަމަލު ކުރުމަކީ ވަޒީފާދޭ ފަރާތަށް ލާޒިމުވެގެންވާ ކަމެއް ކަމުގައިވީނަމަވެސް ލިބެންޖެހޭ އުޖޫރަ ހޯދުމަށް މައްސަލަޖައްސާނެ ހިތްވަރެއް ގިނަފަހަރަށް މަސައްކަތްކުރާ މީހުންގެ ނުހުރެއެވެ. ސަބަބަކީ ވަޒީފާ ގެއްލުމުގެ ބިރު އޮތުމެވެ. އަދި އެހެން ވަޒީފާ އެއް ލިބޭނެ ކަމުގެ ޔަގީންކަން ނެތުމެވެ. އެހެންވުމުން ހަގީގީ މިނިވަންކަމެއް މިފަދަ ފަރާތްތަކަށް މަސައްކަތުގެ މާހައުލުގައި ނޯވެއެވެ.
ފައިސާ ފޭރުން
ކުއްޔަށް އެޕާޓްމެންޓް ދޭނެކަމަށް ބުނެ ނުހައްގުން މީހުން އަތުން ލާރި ހޯދައި މަކަރުހެދި މީހުންގެ އަދަދުވެސް ބުނަން ނޭނގޭހާ ގިނައެވެ.
ބަލިހާލަތުގެ ސަބަބުން އާންމުންގެ އެހީއަށް އެދޭ އާއިލާތަކުގެ އެކައުންޓު ނަންބަރުގެ ބަދަލުގައި ވަގު އެކައުންޓް ނަންބަރެއް ޖަހައި ނުހައްގުން ލާރި ހޯދާ އެތައް ބަޔަކުވެސް އުޅޭކަމީ ހިތާމައެކެވެ. މިފަދަ ތަފާތު ކަންތައްތަކުގައި މަކަރުހަދާ މީހުންނާމެދު އެކަށީގެންވާ އަވަސް ފިޔަވަޅެއް އެޅެން އެބަޖެހެއެވެ. އެހެންނޫނީ ކެހި ލިބޭ މީހުންގެ އަދަދު އިންތިހާއަށް ގިނަވުން އެކަށީގެންވެއެވެ.
މުޖުތަމަޢު މިވަނީ ތަފާތު ބާވަތްތަކުގެ ކުށްތަކުގެ ފުންވަޅުގަނޑަކަށް ވެއްޓިފައެވެ. ފާހިޝް އަމަލުތަކާއި ލާއިންސާނީ އަމަލުތަކުން ކުރިއަށް އޮތް ޖީލު ސަލާމަތްކުރުމަށް އެންމެން އެކީ އަތުކުރި އޮޅާލަމާތޯއެވެ. ވަކި ސިޔާސީ ފިކުރަކަށް ބެލުމެއްނެތި ހައްގުބަސް ބުނަން އާދަކުރަން އެބަޖެހެއެވެ. ހަގީގީ މިނިވަންކަމުގެ އުފާ ލިބޭނީ، ކުއްތައް މަދުކުރެވި އަމާން ވެއްޓެއް ލިބިގެންނެވެ.
