މިއީ ދިވެހިން އުންމީދު ކުރި ދިވެހިރާއްޖެއެއް ނޫނެވެ. 100 އިންސައްތަ މުސްލިމް ގައުމެކޭ ބުނާވަރަށްވުރެ ޤައުމުގެ ހާލަތު ދަށަށް ގޮސްފިއެވެ. އިސްލާމްދީން ނަހީކުރެއްވި ބޮޑެތި ކުށްތަކަށް އަރައިގަނެ، ބިރެއްނެތި އިންސާނުން މަރަމުންދާއިރު ޤައުމަށް މިވަނީ ކީއްތޯ ބަލާލީ ކާކުހެއްޔެވެ؟ އަންނަންއޮތް މުސްތަގުބަލު، މިއަދުގެ ޅަ ދަރިން މިކުށުގެ ވެށިން ސަލާމަތް ކުރުމަށް އެޅެންހުރި ފިޔަވަޅުތަކަކީ ކޮބައިތޯ ބަލަނީ ކޮންބައެއް ހެއްޔެވެ؟
މިއަދު ހެނދުނު އިރުއަރައިގެން އައީ ބިރުން ސިހިގެންދާފަދަ އަނިޔާވެރި މަރެއްގެ ޚަބަރަކުންނެވެ. ޏ. ފުވައްމުލަކު، ކުރި، ޝިއާއު މުޙައްމަދު ސައީދު (22 އަހަރު) މަރާލުމަށްފަހު ބޯ ބުރިކޮށް، އަތާއި ފައިވެސް ބުރިކޮށްފައިވާކަމަށް ވަނީ މައުލޫމާތު ލިބިފައެވެ. މިވަރުގެ ކުށްކުރަން ފަސްނުޖެހޭ މީހުން މިމުޖުތަމައުގަ އުފެދެމުންދާ ސަބަބު ވިސްނާ އަވަސް ހައްލެއް ހޯދަންޖެހެއެވެ. އެހެންނޫނީ މާދަމާ އަޅުގަނޑުމެންނަށް އަޑުއިވޭނީ މިފަދަ ކިތައް މަރުގެ ޚަބަރުތޯ ހިތަށް އަރައެވެ.
ކުރީގެ ރައީސް ޑރ.މުހައްމަދު ވަހީދު ލިޔުއްވައިފައިވެއެވެ. "މިއީ އަޅުގަނޑުމެން ދަންނަ ދިވެހިރާއްޖެ އެއް ނޫނެވެ. މިގައުމުގައި ގޯސްވީ ކޮންކަމެއްކަން އެނގެން އެބަޖެހެއެވެ". ތެދެކެވެ. ގައުމުގެ ޒުވާނުން މިހާލަތަށް ވެއްޓެން ޖެހުނު ސަބަބު ހޯދިގެން ނޫނީ ކުށްމަދު ނުކުރެވޭނެއެވެ. އެސަބަބު ހޯދުމަށް ދިރާސާއެއް ކުރުން މުހިންމެވެ.
ބޮޑެތި ކުށްކުރާ މީހުންނަކީ ބައެއްފަހަރު ނަފްސާނީ ބައްޔެއް ތަހައްމަލު ކުރާ ބައެއްކަމަށް ބުނާއިރު، އެމީހުން އެބަލި ތަހައްމަލު ކުރަންޖެހުނު ސަބަބާމެދު ވިސްނަންޖެހެއެވެ. އަދި އެބައްޔަށް ފަރުވާ ނުހޯދާ މުޖުތަމައަށް ދޫވި ސަބަބު ދެނެގަންނަން ޖެހެއެވެ. އެފަދަ މީހުންނަށް ފަރުވާ ހޯދައިދިނުމަކީ އާއިލާގެ ޒިންމާއެކެވެ. އަދި ކުށްކުރާނަމަ ހައްގު އަދަބު ދިނުމަކީ ކަމާގުޅުންހުރި މުއައްސަސާތަކުން ކުރަންޖެހޭ ކަމެކެވެ. ޒިންމާ އަދާނުކުރާ މީހުންނާމެދު ފިޔަވަޅު އެޅެން އެބަޖެހެއެވެ. އަދި ކޮންމެ ކުށެއްގެ ފަހަތުގައި ވަނީ ނަފްސާނީ ބައްޔެކޭ ބުނެ ފުއްދާލެވޭކަށް ނެތެވެ. އެއަށްވުރެ ހާލަތު މާގޯހެވެ.
ވެރިރަށް މާލެ ހެންވޭރު އަވަށުގެ 'ޝީރީންވިލާ' ގޭގައި ޝިއާއު މަރާލިއިރު، ކުށުގެ ވެށިން ދިވެހި ފިރިހެނަކު ފުލުހުންގެ ބެލުމުގެ ދަށަށް ގެންގޮސްފައިވާކަމަށާއި، އިތުރު މައުލޫމާތު ލިބޭ މިންވަރަކުން ހިއްސާކުރާނެ ކަމަށް ފުލުހުން ވަނީ ބުނެފައެވެ.
ޝިއާއުގެ އަނިޔާވެރި މަރާގުޅޭގޮތުން ތުހުމަތުކުރެވޭ ފ.ނިލަންދޫ އަލީ ޝާހިލް (22 އަހަރު) އަކީ މީގެކުރިން ވެސް އަނިޔާކުރުމުގެ މާޒީއެއް އޮތް ރުޅިގަދަ މީހެއް ކަމަށް ނޫސްތަކުގައި ރިޕޯޓްކުރަމުންދާއިރު، އޭނާ މިހާލަތަށް ދާންޖެހުނު ސަބަބު ވަރަށް ރަނގަޅަށް އެނގެން އެބަޖެހެއެވެ. އެސަބަބު ހޯދިއްޖެނަމަ މިފަދަ އެތައްބަޔަކުގެ އުޅުން ރަނގަޅުކުރުމަށް އެހީއަކަށް ވާނެއެވެ. އަދި މުޖުތަމައުގައި ބޮޑެތި އަނިޔާ ކުރުމަށް ފަސްނުޖެހޭ ކުށުގެ ރިކޯޑު އޮތް އެތައް ބަޔަކު ތިބުން އެކަށީގެންވާއިރު އެމީހުންނަކީ ކޮބައިތޯ ހޯދެން އެބަޖެހެއެވެ.
މައިންބަފައިންނޭވެ. ދަރިންނަށް އަންނަ ބަދަލު ރަނގަޅަށް ބަލާށެވެ. އާދަޔާޚިލާފަށް ރުޅިގަދަ، އަނިޔާވެރިކަމަށް އިސްކަންދޭ ކުއްޖެއްނަމަ ފަރުވާހޯދައިގެން އަޅަންޖެހޭ ފިޔަވަޅު އަޅާށެވެ. އެހެންނޫނީ ފަހުން ކުރަންޖެހޭ ހިތާމަ މާބޮޑުވާނެއެވެ.
މުޅި މުޖުތަމައު މިއަދު މިވަނީ އެކައްޗެއް ކިޔައި ކުށުގެވެށިން ދަރިން ސަލާމަތްކުރުމަށް ކުރެވެންހުރި މަސައްކަތެއް ކުރަންޖެހިފައެވެ.
މީހުން މަރާ މީހުންނަށް މަރުގެ އަދަބު ދީގެން ނޫނީ މިފަދަ ކުށްތަކަށް އަރައިގަންނަ މީހުން މަދުނުވާނެކަމަށް ދެކޭ މީހުންވެސް އެބަތިއްބެވެ. އިސްލާމްދީނުގައި އަންގަވައިފައިވާ ގޮތަށް ކުށްކުރާ މީހުންނަށް އަދަބުދެވިއްޖެނަމަ އަޅުގަނޑުމެންގެ މިމުޖުތަމައަކީ އަމާން ވެއްޓެއްގެ ގޮތަށް ބަދަލުކުރެވިދާނެއެވެ. ބޭނުންވަނީ ހިތްވަރެކެވެ. އަވަސް ފިޔަވަޅެކެވެ. އެއްބައިވަންތަކަމާއެކު، އެންމެން އެކީ އަތްކުރި އޮޅާލައިގެން ދިވެހިރާއްޖެ މިބިރުވެރިކަމުން ސަލާމަތްކުރުމަށް މަސައްކަތްކުރަން މިވަނީ މަޖުބޫރުވެފައެވެ.
ކިޔުންތެރިންގެ ހިޔާލު
ޑރ. ވަހީދުގެ ބަސްފުޅު ތެދު
ކޮމެންޓްސް ބަންދުކުރެވިފައި