މާތް ﷲ އިންސާނުން މިދުނިޔެއަށް ފޮނުއްވާފައި ވަނީ ނިސްބަތުން ވަރަށް މަދު ދުވަސްކޮޅަކަށެވެ. ކޮންމެ މީހަކީވެސް ވަކި އަޖަލެއް ކަނޑައެޅިފައިވާ މީހެކެވެ. ކޮންމެ މީހަކީވެސް އެމީހެއްގެ ދަންފަޅި ހަމަކުރުމަށްފަހު މާތް ﷲ ހަޟްރަތަށް އެނބުރި ދާންޖެހޭނެ މީހެކެވެ. އެއްވެސް މީހަކީ ތާއަބަދު މި ދުނިޔޭގައި ހުންނާނޭ މީހެއް ނޫންކަން އަހަރުމެން އެންމެންވެސް ދަންނަމުއެވެ.
ދުނިޔޭގައި އުޅުމަށްޓަކައި މާތް ﷲ އަހަރުމެންނަށް ދެއްވާފައި މިވާ ހަޔާތުގެ ބޭނުން ހެޔޮގޮތުގައި ހިފާ އުޚްރަވީ ހަޔާތް ބާއްޖަވެރި ކުރުމަށް މަސައްކަތްކުރަން ޖެހެއެވެ.
" އިންސާނާގެ ހަގީގީ މަންޒިލް މަގްސޫދަކީ އުޚްރަވީ ހަޔާތްކަން އެންމެ ހިނދުކޮޅަކަށްވެސް ހަނދާން ނައްތާލައިގެން ނުވާނެ. އިންސާނާ މިދުނިޔެއަށް ފޮނުއްވާފައިވަނީ އާޚިރަތުގެ ބާއްޖަވެރިކަން ލިބިގަތުމަށް މަސައްކަތްކުރުމަށް. ދުނިޔަވީ ހަޔާތަކީ ހެއްލުންތެރި ކެހިވެރި ތަނެއް. ދުނިޔޭގެ ކުލަވަރުތަކަކީ އަވާ މެންދުރެއް".
ދުނިޔޭގައި މާތް ﷲ ދެއްވާ މުދަލާއި އަނބިދަރިންނަކީ، އަޅުތަކުން އެކަލާންގެއަށް ކިޔަމަންތެރިކަން އަދާކުރާވަރު ބެއްލެވުމަށްޓަކައި ހުށަހެޅޭ އިމްތިހާނެކެވެ. އެބައިމީހުންގެ އީމާންކަން ވަޒަންކުރެއްވުމަށްޓަކައި ލައްވާފައިވާ އަޖުމަބެލުމެކެވެ. ދުނިޔެއިން ލިބޭނެހާވެސް އެއްޗަކީ އާޚިރަތުގެ ދަރުމައާއި ޘަވާބު ހޯދުމަށްޓަކައި ކުރާ ހެޔޮ އަމަލުތަކުގެ ނަތީޖާއެވެ.
" ދުނިޔޭގައި މުއްސަދިންނާއި ފަގީރުންނާއި މޮޅާއި ދެރަ ލައްވާފައި ވަނީ އެބައިމީހުން ކުރާ ހެޔޮ އަމަލުތަކުގެ މިންވަރު ބެއްލެވުމަށް. ދުނިޔޭގެ އުފަލާއި އަރާމަކީ ހިނދުކޮޅެއްގެ ކަމެއް. ނިމުމެއް ނުވާ ނިޢުމަތްތައް ހުރީ އާޚިރަތުގަ. ހަގީގީ ބާއްޖަވެރިކަން ވަނީ އުޚްރަވީ ހަޔާތުގަ. މި ބާއްޖަވެރިކަން ހާސިލުވާނީ ދުނިޔޭގެ ކެހިވެރިކަމުގެ ދަލުގައި ނުޖެހި މާތް ﷲ އަށް ކިޔަމަންތެރިކަން އަދާކުރާ މީހުންނަށް".
އުޚުރަވީ ހަޔާތަކީ މި މާއްދީ ދުނިޔެހެން ނިމި ފަނާވެގެން ދާނޭ ހަޔާތެއް ނޫނެވެ. އެއީ ލޮލަށް ނުފެންނަ ރޫހާނީ ކަންތައްތަކެއްގެ މައްޗަށް އެކުލެވިގެންވާ ތާއަބަދުގެ ހަޔާތެކެވެ. އިންސާނާ މިމާއްދީ ހަޔާތުގައި ކުރާ އެންމެހައި ކަންތައްތަކުގެ ހިސާބު ބެއްލެވުމަށް ދެވަނަ ފަހަރަށް ދިރުއްވައި، މަޙްޝަރުބިމަށް ޖަމާކުރެވޭނެކަމީ ކޮންމެ މުސްލިމަކުވެސް ހިތުގެއަޑީން ޤަބޫލުކުރާ އަޤީދާއެކެވެ. އެމީހެއްގެ ހެޔޮކަމުގެ ތިލަފަތް ބަރުވެއްޖެނަމަ ސުވަރުގޭގެ މަތިވެރި ނިޢުމަތް ލިބޭނެއެވެ. އަދި އެމީހެއްގެ ނުބައި ޢަމަލުގެ ތިލަފަތް ބަރުވެއްޖެނަމަ އެފަދަ މީހަކަށް ހައްޤުވެގެންވާ ތަނަކީ ނަރަކައެވެ.
ސުވަރުގެއަށް ދިއުމުގެ މަގަކީ ތަކުލީފުތަކާއި އުނދަގޫތަކުން ފުރިފައިވާ މަގެކެވެ. މުންކަރާތްތަކާއި ފާޙިޝް ޢަމަލުތަކާއި ޝަހުވާނީ އެދުންތަކުން ވަށާލެވިފައިވާ ދަތި އުނދަގޫ މަގެކެވެ. ދުނިޔަވީ ދަޅަތަކުން ގިރިޓީކުރެވިފައިވާ މަގެކެވެ. އާޚިރަތް ބާއްޖަވެރިކުރަން އެދޭމީހާ އަބަދުވެސް ތައުބާވުން މަތީގައި ދެމިހުންނަން ޖެހެއެވެ.
ފުރިހަމަގޮތުގައި ދުނިޔަވީ ހަޔާތުގެ ބޭނުންހިފައި އާޚިރަތުގެ ބާއްޖަވެރިކަން ލިބިގަތުމަށް އަވަސްވެގަންނާށެވެ. ކުރެވިފައިވާ ކުށްފާފަތަކުން ދުރުހެލިވެ ތެދުވެރި ތައުބާއަކުން ތައުބާވުމަށް އަވަސްވާށެވެ.
މައުލޫމާތު: ހުކުރު ޚުތުބާ
