ކުޑަކުދިންނަކީ އެކުދިން ބޭނުންވާ ކަންތައްތައް ވަގުތުން ވަގުތަށް ކުރަން ބޭނުންވާ ބައެކެވެ. ބޭނުންވާކަމެއް ނުވެއްޖެނަމަ ބޮޑާހޭކުން، ނުވަތަ ރުޅިއައުންފަދަ ކަންތައްތައް އެކުދިންގެ ކިބައިން ފެނެއެވެ. ކެތްތެރިވާން ދަރިފުޅަށް ދަސްކޮށްދިނުމަށް ތިރީގައިމިވާ ކަންތައްތައް ކުރެވިދާނެއެވެ.
- ދައްކާ ވާހަކަ ރަނގަޅަށް އަޑުއަހާށެވެ.
ދަރިފުޅު ކަމަކަށް އެދި ވާހަކަދައްކާނަމަ ކަނުލާ އެވާހަކަ އަޑުއަހާށެވެ. އަދި އެއެދޭ ކަމަކީ ކުރުމަށް ވަގުތު ނަގާނެކަމެއްކަން އެކުދިންނަށް އެނގޭނެ ގޮތަކަށް ކިޔައިދޭށެވެ. އަދި އެކަމަށް ވަގުތު ހޭދަވާ ސަބަބުވެސް ބުނެދޭށެވެ. ކެތްތެރިކަމަކީ ކިހާ އުދަގޫ ކަމެއްކަން ގަބޫލުކުރެވޭކަމަށާއި، އެބޭނުންވާ ކަމެއް ހާސިލުކުރަން ބޭނުންވާނަމަ ކެތްކުރުން ނޫންގޮތެއް އެވަގުތަށް ނެތްކަން ބުނެދޭށެވެ. އެއިރުން އެކުދިންގެ ހާސްކަން ކުޑަވެ ބުނާބަސް ގަބޫލުކުރުމަށް ފަސޭހަވާނެއެވެ.
- ކުޅުމުގެ ތެރެއިން ކެތްތެރިވާން ދަސްކޮށްދިނުން
ކުޑަކުދިން ޝައުގުވެރިވާނެ ފަދަ 'ޕަޒްލް' ވަރަށްގިނައިން ވިއްކަން ހުންނަތަން ފެނެއެވެ. މިފަދަ ޕަޒްލް އެއް ގަނެދޭށެވެ. އުމުރާގުޅޭ މިފަދަ ޕަޒްލް ދިނުމުން އެ ފުރިހަމަކުރުމަށް އެކުދިން މަސައްކަތްކުރާނެއެވެ. އެއީ ބައެއް ފަހަރަށް ވަގުތު ހޭދަވާނެ ކަމެކެވެ. މިއީ ކުދިންނަށް ކުޅުމުގެތެރެއިން ކެތްތެރިކަން ދަސްކޮށްދިނުމަށް ރަނގަޅު ގޮތެކެވެ.
- އުފާވެރި ވަގުތުތަކެއް ކުދިންނާއެކު ހޭދަކުރުން
ކަމަކަށް ބޭނުންވެ އެކަމުގެ އިންތިޒާރުގައި ކުދިން ހޭދަކުރާ ވަގުތަކީ ބައެއްފަހަރަށް އެކުދިން މާޔޫސްވާ ވަގުތަކަށްވެސް ވެއެވެ. އެހެންވުމުން އެމާޔޫސްކަން ކުޑަކުރުމަށް އެކުދިންނާއެކު މަޖާކުޅިވަރެއް ކުޅެލާ، ނުވަތަ ވާހަކަފޮތެއް ކިޔާލެވިދާނެއެވެ. އަދި އެކުދިން ހިތްހަމަޖެހޭފަދަ ޕާކަކަށް ވެސް ގޮވައިގެން ދެވިދާނެއެވެ. ނުވަތަ ކުރެހުމަށްވެސް ވަގުތު ހޭދަކުރެވިދާނެއެވެ. އެއިރުން އިންތިޒާރު ކުރަންޖެހޭ ވަގުތު ކުޑަކަމަށް އިހުސާސްކުރެވޭނެއެވެ.
- ކެތްތެރިވާން ޖެހެނީ ކިހާދުވަހަކަށްކަން ބުނެދިނުން
ކުދިން ކަމަކަށް އެދޭނަމަ އެކަމެއް ކޮށްދެވޭނެ ދުވަހެއް ކަލަންޑަރުގައި ފާހަގަކޮށްލާށެވެ. މިސާލަކަށް ކުޅޭއެއްޗެއް ގަނެދޭން އެދޭނަމަ މުސާރަ ލިބޭނެ ދުވަސް ފާހަގަކޮށްލާށެވެ. އަދި މުސާރަ ލިބުމުން އެބުނާ އެއްޗެއް ގަނެދޭނެކަމަށް ބުނެ ކޮންމެ ދުވަހެއްވެސް ފާއިތުވުމުން ކަލަންޑަރުގައިވާ އެދުވަހެއްގައި ބޮޅު އެޅުމަށް ދަރިފުޅު ކައިރީގައި ބުނެވިދާނެއެވެ. އެއިރުން މަޑުކުރަންޖޭހެ މުއްދަތު އެކުއްޖާއަށް އެނގި ދުވަސް ކައިރިވަމުން އަންނަކަމުގެ އުފާވެރި އިހުސާސް ކުރެވޭނެއެވެ. އެކަމަކު މިގޮތަށް އަމަލުކޮށްފިނަމަ ކޮންމެގޮތަކުންވިއަސް އެކުދިން އެބުނާ އެއްޗެއް ހޯދަދޭންވާނެއެވެ. އެހެންނޫނީ ލިބޭ ހިތާމަ ބޮޑުވެ އިތުބާރު ނުކުރެވުން އެކަށީގެންވެއެވެ.
- ރުފިޔާ ރައްކާ ކުރުމަށް އެހީތެރިވެދިނުން
މިސާލަކަށް ކުޑަކުއްޖަކު ބޭނުންވާ އެއްޗެއް ގަންނަން އެދޭނަމަ އެކަމަށް ބޭނުންވާވަރަށް ރުފިޔާ ރައްކާކުރުމަށް އެކުއްޖަކަށް އެހީތެރިވެދޭށެވެ. މިސާލަކަށް ދަރިފުޅު ބަސްއަހާނަމަ ކޮންމެ ހަފްތާއަކުވެސް ރައްކާކުރުމަށް ވަކި މިންވަރަކަށް ރުފިޔާ ދެވިދާނެއެވެ. އެގޮތަށް ރައްކާކުރާ ރުފިޔާ ގިނަކުރުމަށްފަހު ބޭނުންވާ އެއްޗެއް ގަނެވިދާނެއެވެ. އެއިރުން ލިބޭ އުފާވެރިކަން ބޮޑުވާނެއެވެ. ސަބަބަކީ އެކުދިންގެވެސް މަސައްކަތުން ލިބުނު ރުފިޔާއަށް ވާތީއެވެ.
- ކެއްކުން
ކެއްކުމަށް ނުވަތަ އެއްޗެއް ފިހުމަށް ވަގުތު ހޭދަވާނެއެވެ. ކޮންމެ ހަފްތާ ބަންދެއްގައިވެސް ދަރިފުޅާއެކު ބަދިގޭގައި ހޭދަވާ ވަގުތުގައި، ކާއެއްޗެހި ތައްޔާރުކުރުމަށް ހޭދަވާވަގުތު ކިޔައިދޭށެވެ. އަދި ކޭކެއް ފަދަ އެއްޗެއް ފިހުމަށްވެސް ވަގުތު ހޭދަވާކަން ބުނެދީ ކެތްތެރިވާނެ ގޮތް ދަސްކޮށްދޭށެވެ. އެކުދިންގެ ބައިވެރިވުމާއެކު ކައްކާނަމަ އެކަމަށް ހޭދަވާ ވަގުތު އިހުސާސްވެ ކެތްތެރިވާނެގޮތް ކެއްކުމުގެ ތެރެއިންވެސް ދަސްވާނެއެވެ.
