ހިޔާ ޓަވަރުތަކުގައި އެތައްހާސް ބަޔަކު ދިރިއުޅެން ފެށީ 2021 ވަނަ އަހަރުގައެވެ. އެއިރު އެ ފުލެޓުތަކުގައި ދިރިއުޅެމުންދިޔަ މީހުންގެ ކަންބޮޑުވުންތަކެއް ހުއްޓެވެ. މިގޮތުން ވައްކަންކުރުމާއި، ޓަވަރުތަކުގެ ސިޑިމަތީގައި މަސްތުވާތަކެތި ބޭނުންކުރުންފަދަ ކުށްތައް ކުރާ މަންޒަރު ވަރަށް ކައިރިން އެތަނުގައި ދިރިއުޅޭ މީހުންނަށް ވަނީ ފެނިފައެވެ.
ޓަވަރުތަކުގެ އެކި ސަރަހައްދުތަކަށް ކުނިއުކުންފަދަ ނޭދެވޭ މަންޒަރުތައްވެސް ފެންނަމުންދިޔައިރު މިފަދަ ކަންތައްތަކަށް ބޮޑު ހައްލެއް ލިބުނީ ސެކިއުރިޓީ ބަލަހައްޓަން ފެށުމަށްފަހު ހަރުކުރި ސީސީޓީވީ ކެމެރާތަކުންނެވެ.
ތިރީގައި މިވަނީ ޓަވަރުތަކުގައި ސީސީޓީވީ ކެމެރާ ހަރުކުރެވިފައިވާ ގޮތާއި ގުޅޭގޮތުން ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ) އިން 'ޒީޓައިމްސް' އަށް ދީފައިވާ މައުލޫމާތެވެ.
އެޗް5 - 222 ކެމެރާ
އެޗް6 – 195 ކެމެރާ
އެޗް7 – 195 ކެމެރާ
އެޗް8 – 222 ކެމެރާ
އެޗް9 - 222 ކެމެރާ
އެޗް10 - 195 ކެމެރާ
އެޗް11 – 195 ކެމެރާ
އެޗް12 – 222 ކެމެރާ
ސީސީޓީވީ ކެމެރާ ފުރަތަމަ ހަރުކުރީ އެޗް13 އިން އެޗް16 އަށެވެ. ބާކީހުރި 4 ޓަވަރުގައި މިމަހުގެ ނިޔަލަށް ކެމެރާ ހަރުކޮށް ނިމޭނެކަމަށާއި، އާންމު ހުރިހާތަނެއްގައި ކެމެރާ ހަރުކޮށްފައިވާކަމަށް އެޗްޑީސީއިން ވަނީ ބުނެފައެވެ. 25 ބުރީގެ މިޓަވަރުތަކުގެ ކޮންމެ ޓަވަރެއްގައި ސެކިއުރިޓީ ބެލެހެއްޓުމަށް ސެކިއުރިޓީ އޮފިސަރ އެއް ހުންނާނެއެވެ.
ހިޔާޓަވަރުތަކުގައި އުޅޭ ބައެއް މީހުންގެ އެންމެބޮޑު ކަންބޮޑުވުމަކީ އެޓަވަރުތަކުގައި ނުއުޅޭ މީހުންނަށް ބޭނުންވަގުތަކު އެތަނަށް ވަދެ ނުކުމެ އުޅެވޭތީއެވެ. މިކަމަށް ހައްލެއް ގެނައުމުގެގޮތުން ވަކިކާޑެއް ބޭނުންކޮށްގެން ނޫނީ ޓަވަރުތަކަށް ނުވަދެވޭގޮތް ހަދަމުން އަންނަ ކަމަށް އެޗްޑީސީއިން ވަނީ މައުލޫމާތުދީފައެވެ.
" ލިފްޓް ކައިރީގައި އެއޮންނަ ހުސްޖާގަ ބޮޑުކުރުމުގެ މަސައްކަތް ނިމުމުން އެންޓްރީ ކާޑުން ވަދެވޭގޮތް ހަދާނެ. ލިފްޓްތަކުގަވެސް ވަނީ ކެމެރާ ހަރުކޮށްފަ".
ހިޔާޓަވަރުތަކުގައި އުޅޭ ބައެއް މީހުންނާއި ވާހަކަދައްކާލުމުން ބުނީ ކުރިއާއި އަޅާބަލާއިރު ކުށްކުރުން ވަރަށް މަދުވެފައިވާކަމަށެވެ. އަދި ގިނަ އަދަދެއްގެ ކެމެރާ ހަރުކޮށް ސެކިއުރިޓީ ބަލަހައްޓަން ފެށުމުން ކުށްކުރަން ފަސްޖެހޭނެކަމަށް ގަބޫލުކުރާކަމަށް ވަނީ ބުނެފައެވެ.
" ކުރިން ނުކެރޭނެ ފައިވާންވެސް ދޮރުކައިރީގައި ބަހައްޓަން. އެހާއަވަހަށް ވަގަށް ނަގާނެ. އެކަމަކު އެވަރަށް ކެމެރާ ހަރުކޮށް ސެކިއުރިޓީ ބަލަހައްޓަން ފެށުމުން މިފަދަ ކަންތަކަށް ހައްލު ލިބެންފަށައިފި". މީހަކު އޭނަގެ ހިޔާލު ފާޅުކުރިއެވެ.
ހިޔާގެ ހުރިހާ ޓަވަރެއްގައި ޖުމްލަ 3072 ސީސީޓީވީ ކެމެރާ ހަރުކުރުމަށް ހަމަޖެހިފައިވާއިރު އެ ސަރަހައްދުގައި ވަނީ ޕޮލިސް ސްޓޭޝަނެއްވެސް ހުޅުވާފައެވެ. ކުރިއަށްއޮތްތަނުގައި ހުޅުމާލޭގެ ދެވަނަފިޔަވަހީގައި ހަދާފައިވާ ހިޔާ ފްލެޓުތަކުގެ ސަލާމަތީ ކަންކަން އިތުރަށް ބެލެހެއްޓި ދިރިއުޅޭ މީހުންނަށް އަމާންކަން ލިބޭނެކަމަށް އުންމީދު ކުރެވެއެވެ.
