ހުއްޓުމެއްނެތި ވެހެމުންދިޔަ ވާރޭގެ ސަބަބުން ޕާކިސްތާނުގެ އަވަށްތަކުގައި ފެންބޮޑުވީ ހީވެސްނުކުރާހާ އަވަސްމިނެއްގައެވެ. ކޯރުތައް ބަންޑުންވެ، ބިންގަނޑު ކަނޑައިގެންގޮސް ބުރިޖުތައް ހަލާކުވެ އެތައްބަޔަކު ހާލުގައި ޖެހުނެވެ. މީހުން ދިރިއުޅެމުންދިޔަ ބައެއް ގެތަށް ބިމާހަމަވެ، އަނެއްބައި ގެތަކުގައި ދިރިނުއުޅެވޭ ވަރަށް ފެންގަނޑު ބޮޑުވިއެވެ.
މިއީ ފަހުގެ ތާރީޚެއްގައި ޕާކިސްތާނަށް ކުރިމަތިވި އެންމެ ބޮޑު ކާރިސާގެ ގޮތުގައި މީޑިއާތަކުގައި ވަނީ ފާހަގަކޮށްފައެވެ. މިއަހަރުގެ ޖޫން މަހުން ފެށިގެން ކުރަމުންދިޔަ ވިއްސާރައިގައި ގެދޮރު ގެއްލި ހާލުގައިޖެހުނު މީހުންގެ އަދަދު 7 މިލައަނާ ގާތްކުރާ ކަމަށް ބައެއް ރިޕޯޓުތަކުގައި ބުނެފައިވެއެވެ.
ވިއްސާރައިގައި އެންމެ ބޮޑު ގޮންޖެހުމަކަށްވީ ދަތުރުފަތުރު ކުރުމަށް ބޭނުންކުރާ ބުރިޖުތައް ހަލާކުވެ އެއްތަނުން އަނެއްތަނަށް ދަތުރު ކުރުމަށް ދަތިތަކެއް ދިމާވުމެވެ. އަދި އެތައް ދުވަހެއްގެ ބުރަ މަސައްކަތުން ހެއްދި ދަނޑުބިންތައް އެއްކޮށް ހަލާކުވުމުން ކާނެ އެއްޗެއް ނެތި އެތައްބަޔަކު ވަނީ ހާލުގަޖެހިފައެވެ.
މިވިއްސާރައިގެ ސަބަބުން 1500 އެއްހާ މީހުން ވަނީ މަރުވެފައެވެ. އޭގެތެރޭގައި 300 އަށް ވުރެ ގިނަ ކުޑަކުދިން ހިމެނެއެވެ. އާއިލާތަކުގެ ކުއްލި ވަކިވުމާއެކުވެސް އެތައްބަޔަކަށް ވަނީ ފުން އަސަރުތަކެއް ކޮށްފައެވެ.
ކާރިސާގެ ސަބަބުން އާމްދަނީ ހޯދުމަށް ކުރާނެ މަސައްކަތެއް ނެތި، ގެންގުޅުނު ގެރިބަކަރި ފަދަ ޖަނަވާރުތައް މަރުވެ ހާލުގައި ޖެހިފައިވާ ރައްޔިތުންނަށް ބޭނުންވަނީ އަޅުގަނޑުމެންގެ އެންމެންގެ އެހީތެރިކަމެވެ. ގިނަ ގައުމުތަކެއްގެ އެހީތެރިކަން ނުލިބި ޕާކިސްތާނަށް އެގެއްލުންތަކުން އަރައިގަތުމަކީ އެހާ ފަސޭހަކަމެއް ނޫނެވެ.
ޕާކިސްތާނުގައި ތިބި އަޅުގަނޑުމެންގެ މުސްލިމް އަހުންނާއި އުހުތުންނަށް އެހީތެރިވުމަށް އެންމެން އެކީ މަސައްކަތްކުރަމާ ހިނގާށެވެ. ސާފު ބޯފެންފޮދެއް، ރަނގަޅު ކާނާ ފޯރުކޮށްދިނުމަށް، އަދި އަންނައުނާއި ބޯހިޔާވަހިކަން ފޯރުކޮށްދިނުމަށް ވެވުނު މިންވަރަކުން އިންސާނިއްޔަތަށްޓަކައިވެސް އެހީތެރިކަން ފޯރުކޮށްދެމާތޯއެވެ.
ޕާކިސްތާން މޯލްޑިވްސް ފްރެންޑްޝިޕް އެސޯސިއޭޝަން އާއި ދިވެހި މީޑިއާ ގުޅިގެން ޓެލެތޯން ކުރިއަށް ގެންދިއުމަށް ހަމަޖެހިފައިވަނީ 1 އޮކްޓޯބަރު 2022 ވާ ހޮނިހިރު ދުވަހު ހެނދުނު 8 އިން ރޭގަނޑު 12 ގަޑި ސުންމިނިޓަށެވެ.
ޕާކިސްތާނަށް އެހީތެރިކަން ފޯރުކޮށްދިނުމަށް:
އެކައުންޓު ނަން: PAKISTAN MALDIVES F.ASSOCIATION
އެކައުންޓު ނަންބަރު: (ދިވެހި ރުފިޔާ) 7730000502372
(ޑޮލަރު އެކައުންޓް) 7730000502373
