ދުނިޔޭގައި ހުރި އެންމެ ގިނަދުވަސްވީ ބޮޑީބިލްޑަރުގެ މަގާމަށް ދުނިޔޭގެ ރެކޯޑް ފޮތުން ޖާގަ ހޯދާފައިވަނީ އެމެރިކާގެ ކެލިފޯނިއާއަށް އުފަން އުމުރުން 90 އަހަރުގެ ޖިމް އަރިންގޓަންއެވެ. މީނާ މިކަމަށް ޝައުގުވެރިވި ގޮތާއި މިކަން ފެށުނުގޮތް ވަނީ ކިޔައިދީފައެވެ. މީނާ ބުނާ ގޮތުގައި ބޮޑީބިލްޑް ކުރުމަކީ ވަކި އުމުރަކަށް ވަކި ފަންތިއަކަށް ބަލައިގެން ކުރެވޭކަމެއް ނޫނެވެ. މިކަމަށް ބޭނުންވަނީ ކެރުމާއި ހިތްވަރެވެ. ޖޯޝާއި ފޯރިއެވެ. ކޮންމެ ކަމަކީވެސް ވަރުގަދަ އަޒުމެއްވެސް އޮވެގެން ކުރެވޭނެ ކަމެކެވެ.
ޖިމް އަރިންގޓަންގ މިކަމަށް ޝައުގުވެރިކަން އުފެދުނުގޮތް؟
ޖިމް އަރިންގޓަން ބޮޑީބިލްޑް ކުރުމަށް ޝައުގުވެރިކަން އުފެދިގެންދިޔައީ އުމުރުން 12 އަހަރުގައެވެ. ބެލެނިވެރިޔާއާއެކު އެއްދުވަހަކު ބޭސްފިހާރައަކަށް ގޮސް ބޭސް ލިބެންދެން އޮންނަ ވަގުތުކޮޅު ފުރާލުމަށްޓަކައި ކޮމިކްސް ކިޔަން އިންދާ ކުއްލިއަކަށް ފެނުނު މެގަޒިންއަކަށް ޖިމްގެ ސަމާލުކަން ހުއްޓުނެވެ. އެމެގަޒިންގައި ޖަހާފައި އިން ފޮޓޯގައި އިން 'މަސްލްސް ބިލްޑަރެއް'ގެ އަތާއި ތަންތަން ފެނިފައި ހަމަ ރަނގަޅަށްވެސް ހައިރާން ކުރުވިއެވެ. ޝައުގުވެރިކަން އުފެދި އެކަމާވިސްނެން ފެށުނީ އެހިސާބުންނެވެ.
މަޝްހޫރު އެމެރިކަން ލިފްޓްވެއިޓަރ ކަމަށްވާ 'ޖޯޖް ޖޮވެޓް' ގެ ފޮތެއް ހޯދިއެވެ. 'މަސްލްސް ބިލްޑް' ކުރާނެ ގޮތުގެ މައުލޫމާތު އެފޮތުން ލިބުނެވެ. އޭރު އުމުރުން ހަގުވުމާއެކު އޭނާގެ އަތުގައި އެއްވެސް އިކުއިޕްމެންޓެއް ނެތެވެ. އެހެންނަމަވެސް ގޭތެރޭގައި ބައްޕަ ގެންގުޅުނު ސްޓީލް ބޯޅަތަކެއް ހުއްޓެވެ. އެންމެ ފުރަތަމަ އެބޯޅަތައް ހިފައިން ފޮތް ބަލައިގެން މަޑުމަޑުން އެކިކަހަލަ ޓްރެއިނިންތައް ހަދަން ދަސްކުރިއެވެ. އެބޯޅަތަކަކީ 3 ޕައުންޑުގެ ބޯޅަތަކެކެވެ. މަދު ދުވަސްކޮޅެއްގެ ތެރޭގައި އެބޯޅަތައް ބޭނުންކޮށްގެން 115 ޕައުންޑުން ފެށިގެން 128 ޕައުންޑަށް މަތިކުރިއެވެ.
ތަމްރީން ދެމެހެއްޓީ ކިހިނެއް؟
އޭނާ އަކީ 'ގޯލް އޮރިއެންޓެޑް' މީހެއް ކަމަށާއި، އަޒުމެއްގައި ހުރެގެން ކަންކަން ކުރުމަށް އަބަދުވެސް ބޭނުންވާކަމުގައި ޖިމް ބުނެއެވެ. މިގޮތަށް މިކަންކަން ކުރާތަން އެހެން މީހުންނަށް ފެނުމުން އެހެން މީހުން މީނާއަކީ ނަމޫނާއެއް ކަމުގައި ދެކި، އެމީހުން މީނާއާއިމެދު ޝައުވެރިކަން އުފެދުމުން ބޮޑީބިލްޑްކުރުމަށް އިތުރަށް ލޯބިޖެހެން ފެށިއެވެ. މީހުން އޭނާއާއި މެދު ޝައުގުވެރިވާތީ އެކަމާމެދު ހައިރާންވެ އެކަން ގަބޫލުކުރަންވެސް ފުރަތަމަ ދަތިވި ކަމަށް ވަނީ ފާހަގަކޮށްފައެވެ.
1974 ވަނަ އަހަރު 'އާނޯލްޑް' އަކީ ދުނިޔޭގައި ހުރި އެންމެ ވަރުގަދަ އެންމެ ބޮޑު ބޮޑީބިލްޑަރެވެ. އޭނާއާއި އެންމެ ކައިރިކުރާ މީހަކަށް ދެން ހުރީ 'ކެން ވޯލާ' އެވެ. އޭނާއަކީ 1975 ވަނަ އަހަރު މިސްޓަރ ޔުނިވަރސްގެ ފަޚުރުވެރި މަގާމު ހޯދި މީހެކެވެ. ޖިމް ކިޔާދިން ގޮތުގައި އެއްދުވަހަކު 'ވާކްއައުޓް' ނިންމާލުމަށްފަހު 'ގޯލްޑްސް ޖިމް' އިން ކެން ވޯލާއާއި ބައްދަލުވިއެވެ. މިބައްދަލުވުމުގައި މިކަމާއި ބެހޭގޮތުން ޖިމް ވަނީ ކެން ވޯލާއާއި ވަރަށް ސުވާލުކޮށްފައެވެ.
"ގިނަދުވަހު ތިމަސައްކަތުގައި ދެމެހެއްޓުނީ ކިހިނެއް އަދި ތިކަމުގެ ސިއްރަކީ ކޮބާ؟" މިސުވާލުތައް ކުރުމުން ކެންގެ ޖަވާބު ވަރަށް ކުރުވެފައި ވަރަށް ފުރިހަމައެވެ. " ޑޫ ވަޓް ވަރކްސް ފޯ ޔޫ " މިހެން ބުނެލުމުން ވަރަށް ފުން މާނައެއް ދޭހަވެގެން ދިޔައެވެ. އަމިއްލައަށް ތަޖުރިބާކޮށްގެން ތިމާއާއި އެކަށޭނަ ގޮތަށް ބޮޑީބިލްޑް ކުރުމުގެ މަސައްކަތް ކުރިއަށް ގެންދިއުމުން ދާންވީ އެންމެ ރަނގަޅު ހިސާބަށް ވާސިލް ވެވޭނެކަން ގައިމެވެ. މިކަމަކީ އެންމެ ދުވަހަކުން އެންމެ މަހަކުން ކުރެވޭނެ ކަމެއް ނޫނެވެ. މިއީ ވަކިގޮތަކަށް ކެއުން ބަހައްޓައިގެން ވަކި ތާވަލަކުން ކުރިއަށް ގެންދެވޭނެ ކަންކަމެވެ.
ކެއުމުގެ އާދަތައް ބެހެއްޓީ ކިހިނެއް؟
ޖިމް ބުނިގޮތުގައި އޭނާގެ އުމުރުގެ 30 ގެ އަހަރުތަކުގެ ތެރޭގައި އޭރު އުޅުނު އެންމެ ވަރުގަދަ މީހަކީ 'ޕައުލް އެންޑަރސަން' އެވެ. އޭނާ ކުރިއަށްގެންދިޔަގޮތް އޮޅުން ފިލުވައިގެން ކުރިއަށް ދިޔައެވެ. ހަތަރުބައިކުޅައެއްބައި ކިރު ބޮއެގެން ކުރިއަށް ގެންދިޔައެވެ. ދެން ކެއީ މީޓާއި ކޮޓެޖް ޗީޒް އެވެ.
ބަރުދަން ކުރިއަށް ގެންދިޔައީ ކިހިނެއް؟
އެންމެ ފުރަތަމަ ފެށީ 150 ޕައުންޑުންނެވެ. އެއަށްފަހު 9 މަސްދުވަހުން 65 ޕައުންޑް އިތުރުވިއެވެ. އެއަށްފަހު 56 ދުވަހުން 35 ޕައުންޑް އަނެއްކާވެސް ދަށަށް ޖެހިލިއެވެ. އެންމެ ފުރަތަމަ ފެށިއިރު އުނަގަނޑުގައި 32 އިންޗި ހުއްޓެވެ. އެންމެ މައްޗަށްވެސް އުނަގަނޑުގެ މިން ދިޔައީ 38 އިންޗިއަށެވެ. އެއަށްފަހު 180 ޕައުންޑުގައި ހުރެ 32 އިންޗިއަށް އުނަގަނޑުގެ މިން ބަދަލުކުރިއެވެ.
މިއުމުރުގައި ކުރިއަށް ގެންދަނީ ކިހިނެއް؟
މިހާރު އޮންނަގޮތަކީ ކޮންމެ ދުވަހެއްގެ ތާވަލުގައި ހަށިގަނޑުގެ ވަކި ބަޔަކަށް ސަމާލުކަންދީގެން ކުރިއަށް ގެންދިއުމެވެ. ހަފްތާއެއްގެ އެކިދުވަހު އެކި ކަންކަން ބަހާލައިގެން ގެންދިއުމެވެ. މިގޮތަށް ކުރިއަށްގެންދިއުމުން ހަށިގަނޑު ވަކިގޮތަކަށް ހޭނި ވަކިގޮތަކަށް ކެއުންވެސް ބައްޓަން ކޮށްގެން ގެންދިއުމުން ވަރަށް ފަސޭހަވެގެންދާ ކަމުގައި ޖިމް ކިޔާދިނެވެ. އޭނާ ވަނީ 70 އަހަރުވަންދެން އެކި މީހުން ތަމްރީނު ކުރުމުގައި އަވަދިނެތި އުޅެފައެވެ.
މައުލޫމާތު: މެންސްހެލްތް.ކޮމް
