އަތުގެ އަދި ފައިގެ ނިޔަފަތި ގިނަ މީހުން ވަރަށް ރީތިކޮށް ބަލަހައްޓައެވެ. ޚާއްސަކޮށް ގަވާއިދުން 'ޕެޑިކިޔަރ' އަދި 'މެނިކިޔަރ' ހަދަންދާ މީހުން މަދެއްނޫނެވެ. ގިނަފަހަރަށް އަތުގެ ނިޔަފަތިތައް ފަސޭހައިން މީހުންނަށް ފެންނަން ހުންނައިރު ބައްދަލުވުންތަކަށް ދާއިރުވެސް އެންމެ ފުރަތަމަ ލޮލުގައި އަޅައިގަންނަނީ އަތްތިލައާއި އަތުގެ ނިޔަފަތިތަކަށެވެ. މީހާގެ ސާފުތާހިރުކަންވެސް ދެނެގަންނާނީ ނިޔަފަތިތަކުންނެވެ.
ރީތި ހުދު ސާފު ނިޔަފައްޗެއް ބޭނުންނަމަ މިކަންކަން ގޭގައި ކުރެވިދާނެއެވެ.
ސްޓެޕް 1
1 މޭޒުމަތީ ސަމުސާ ލުނބޯހުތް
1/2 މޭޒުމަތީ ސަމުސާ ލޮނު
މި ދެބާވަތް ކުޑަ ބޯތައްޓަކަށް އެޅުމަށްފަހު އެއްކޮށްލާށެވެ. އެއަށްފަހު ނިޔަފަތީގައި ހާކާލުމަށްފަހު ރީއްޗަށް މަސާޖުކޮށްލާށެވެ. މިގޮތަށް މަސާޖުކޮށްލުމަށްފަހު 5 ވަރަކަށް މިނިޓް ބެހެއްޓުމަށްފަހު ދޮވެލާށެވެ. މިއީ ވަރަށް ފަސޭހައިން ގޭގައި ކުރެވިދާނެ ކަމެކެވެ. މިގޮތަށް ކޮންމެ ދުވަހަކު އެއްފަހަރު މަސާޖުކޮށްލުމުން ވަރަށް އަވަހަށް ތަފާތު ފެނިގެންދާނެއެވެ.
ސްޓެޕް 2
މިއީ ވިޓަމިން އީ އޮއިލް ބޭނުންކޮށްގެން ތައްޔާރު ކުރެވިދާނެ ފަރުވާއެކެވެ.
5 ތިކި ވިޓަމިން އީ އޮއިލް
5 ތިކި ލެވެންޑާ އެސެންޝިއަލް އޮއިލް
10 އެމްއެލް އެކްސްޓްރާވާޖިން އޮލިވް އޮއިލް
މިހުރިހާ އެއްޗެއް އެއްކޮށްލުމަށްފަހު ބިއްލޫރި ފުޅިއަކަށް އަޅާލުމަށްފަހު ރަނގަޅަށް އެއްކޮށްލާށެވެ. އެއަށްފަހު ދެތިން ތިކި ބޭނުންކޮށްގެން ނިޔަފަތިތައް މަސާޖުކޮށްލާށެވެ. މިހެން ހެދުމުން ނިޔަފަތިތައް ހުދުވެ އޮފް އަރާނެއެވެ. މިގޮތަށް ކޮންމެ ދުވަހަކު އަމަލުކުރާނަމަ ވަރަށް ބޮޑަށް ތަފާތު ފެންނާނެއެވެ.
ކެމިކަލްސް ފަދަ ބާވަތްތައް ބޭނުންކުރާއިރު އަންގި ބޭނުންކުރުމުން ނިޔަފަތިތައް ރީތިކޮށް ހުރުމަށް މަގުފަހިވެގެންދެއެވެ.
