ހަރުބަހެއްގައި ވާގޮތުގައި ރަހްމަތްތެރީން އެނގޭނީ މުސީބާތުގެ ވަގުތުގައެވެ. މީހަކާ މުސީބަތެއް ނުވަތަ ކާރިޘާއެއް ނުވަތަ ދަތިކަމެއް ކުރިމަތިވުމުން އޭނާގެ ގާތުގައި އެކުވެރީންކަމުގައި ހެދިގެން އުޅުނު ގިނަ ބަޔަކު އޭނާ ދޫކޮށް ދުރަށް ދާތަން ފެނެއެވެ.
ﷲ ގެ ނަބިއްޔާ ސަލާމް ލެއްވި އައްޔޫބުގެފާނާ އާލާސްކަންފުޅެއް ކުރިމަތިވެ، އެކަލޭގެފާނުގެ ބޭފުޅުން އަވަހާރަވެ، މުއްސަނދިކަމާއި ތަނަވަސްކަން ގެއްލިގެން ދިޔަ ވަގުތު، އެކަލޭގެފާނަށް ޒިޔާރަތްކުރަމުން ދިޔަ މީހުންނާއި، އެކަލޭގެފާނުގެ މަޖިލީހަށް ހާޒިރުވަމުން ދިޔަ މީހުންގެ ތެރެއިން ގިނަ ބަޔަކު، އެކަލޭގެފާނު ދޫކޮށް ދުރަށް ދިޔައެވެ. އެކަލޭގެފާނުގެ އަރިހުގައި ތިބީ އިޚްލާސްތެރި މަދު ރަހްމަތްތެރީން ކޮޅެކެވެ. އިބްނު ޙިއްބާން ރިވާކުރައްވާފައިވާގޮތުގައި އައްޔޫބުގެފާނު މި އާލާސްކަންފުޅުގައި އަށާރަ އަހަރު ހޭދަކުރެއްވިއެވެ. އެކަލޭގެފާނު ދޫކޮށްނުލައި އެކަލޭގެފާނުގެ އަރިހަށް ޒިޔާރަތް ކުރަމުން ދިޔައީ ހަމަ އެންމެ ދެ މީހެކެވެ.
ރަހްމަތްތެރީންނަކީ ޖަމާއަތެއްގެ ކުރިއެރުމާއި، ފަހަތަށް ޖެހުމުގައި ވަރަށްބޮޑު ދައުރެއް އަދާކުރާ ބަޔެކެވެ. ހިތްހަމަޖެހުމާއި ނުތަނަވަސްކަން ގެނެސް ދިނުމުގައި މީހުންގެ ހަޔާތާއި ވިސްނުމާއި ފިކުރަށްވެސް ރަހްމަތްތެރީންގެ އަސަރު ވަރަށް ބޮޑަށް ކުރެއެވެ.
ރަހްމަތްތެރިކަމުގެ ގުޅުން އުފެދި އާލާވެފައިވަނީ އިޚްލާސްތެރިކަމާއި މަތިވެރި މަޤްސަދެއްގައި ކަމުގައި ވާނަމަ އެއީ މާތް ﷲ އެކަމުގައި ބަރަކާތް ލައްވާނެ ގުޅުމެކެވެ. އެއީ ދޯދިޔާ ނުބައި ގުޅުމެއް ކަމުގައި ވާނަމަ، އޭގެ ނުބައިކަން މާތް ﷲ އެފަރާތަކަށް ރައްދު ކުރައްވާނެއެވެ. ރަހްމަތްތެރިކަން އުފަންވެ އާލާވާން ޖެހޭނީ އީމާންކަމާއި، އިޙްސާންތެރިކަމުގެ މަގުގައެވެ. މިގޮތަށް އުފެދޭ ރަހްމަތްތެރިކަމަކީ މާތް ﷲ ދެކެ ލޯބިވުމުގެ ގިއުގަނޑުގެ ތެރޭގައި އޮންނާނެ ގުޅުމެކެވެ.
" ބޭނުންޖެހޭ ވަގުތުތަކުގައްޔާއި މުސީބާތުގެ ވަގުތުގައި މިފަދަ ރަހްމަތްތެރީންގެ އެހީ ލިބޭނެ. އިންސާނެއްގެ ހިތަށް އީމާންކަން ވަދެ، އެކަމުގެ ފޮނިކަން އިހްސާސް ކުރެވިއްޖެނަމަ އޭނާގެ އެކުވެރިކަން އޮންނާނީ މިއުސޫލުގެ މަތީގަ. މިއެކުވެރިކަމަކީ ވަކި އެދުމެއް ހާސިލުކުރުމަށްޓަކައި އުފެއްދޭ ގުޅުމަކަށް ނުވާނެ. އެފަދަ މީހުން މިގުޅުން ކަނޑާނީ ވެސް މިއުސޫލުން".
އިންސާނުގެ މިޒާޖުގައި ރަހްމަތްތެރީންނާއި އެކުވެރިން ކޮޕީކުރާގޮތް ހުރެއެވެ. އެކަކުގެ ނުބައި އަޚްލާހުން އަނެކާއަށް ނުބައި އަސަރު ފޯރުވައެވެ. އަހިވަކާޖެހި އަހިވައް ފާވާ ގޮތަށެވެ. ހެޔޮ ކަންތަކުގެ އަސަރަށްވުރެ ނުބައި ކަންތައްތަކުގެ އަސަރު އާއްމު ގޮތެއްގައި މާ ވަރުގަދައެވެ. ވަރަށް ގިނަ ފަހަރަށް ސިނގިރެޓް ބުއިން ފަދަ ނުބައި އަމަލުތައް ދަސްވަނީ ތިމާގެ ރަހުމަތްތެރިޔާގެ ކިބައިންނެވެ. މަސްތުވާތަކެތީގެ ދަލުގައި ޖެހެނީ ރަހްމަތްތެރީންގެ ސަބަބުންނެވެ. އިސްލާމް ދީން މަނާކުރާ ފާހިޝް އަމަލުތަކުގެ އަވައިގާ ޖެހެނީ ރަހްމަތްތެރިންގެ ސަބަބުންނެވެ.
މައުލޫމާތު: ހުކުރު ޚުތުބާ
