ހއ. ހޯރަފުށީ ކުރިކީލަގޭ ހާނީ އިބްރާހީމް 65އ، ބަލިވެ އުޅޭތާ ގިނަ އަހަރުތަކެއް ވަނީ ވެފައެވެ. އާއިލާއިން މައުލޫމާތު ދޭގޮތުގައި 2004 ވަނަ އަހަރުން ފެށިގެން ކިޑްނީގައި މައްސަލަތަކެއް އުޅޭކަން ފާހަގަވެ ބޭސްކުރަމުން އައިސް ކިޑްނީ ފެއިލްވިކަން އެނގުނީ 2019 ވަނަ އަހަރުއެވެ. އެއިރުން ފެށިގެން ހަފްތާއަކު 3 ދުވަހު ހާނީ ދަނީ ޑައެލިސިސް ހަދަމުންނެވެ.
" ކިޑްނީ ފެއިލްވުމުގެ އިތުރަށް ފުއްޕާމޭގެ މައްސަލަ ހުރޭ. ތައިރޮއިޑް މައްސަލަ ހުރޭ. ޕްރެޝަރ މައްޗަށް ދިއުމުގެ އިތުރަށް ވަރަށް މަދުން ނޫނީ ނުފެންނަ ޕޮޓޭޝިއަމް މަދުވާ މައްސަލަވެސް މަންމަގެ ހުރޭ". ހާނީގެ ބަލިތަކުގެ ތަފްސީލް ދެމުން އޭނާގެ އަންހެން ދަރިފުޅު ފާތިމަތު ޒިހުނާ ކިޔައިދިނެވެ.
ހިރުގަނޑު ހަލާކުވެ ދޮސްލުމުގެ އިތުރަށް ދަތުގެ މައްސަލަތައް ހުރުމުން ކާންވެސް އުދަގޫވެއެވެ. މިހުރިހާ ކަމަކަށް ފަރުވާ ހޯދަމުންދިޔަ ހާނީ އަށް ލިބުނު އެންމެ ބޮޑު ހިތްދަތިކަމަކީ ހިތުގެ ބޮޑު އޮޕަރޭޝަނެއް ކުރަންޖެހުމެވެ.
" ނޭވާލާން އުދަގޫވެ ހާސްވާތީ މިދިޔަ މަހުގަވެސް ދެފަހަރެއްގެ މަތިން މަންމަ އެޑްމިޓްކުރި. ހިތުގެ ބަލި ހުންނަކަން އެނގުނީ ކިޑްނީ ބަދަލުކުރަން ހަދަންޖެހޭ ޓެސްޓްތަކެއް މިމަހުގަ ހެދުމުން. ވޭލްއެއް ބަންދުވެފަ ހުރުމުން އެ ވޭލް ބަދަލުކުރުމަށް 'އޯޕަން ހާޓް ސާޖަރީ' އެއް ކުރަންޖެހޭ ކަމަށް ޑޮކްޓަރުން ވިދާޅުވީ. މިއީ ރާއްޖެއިން ކުރެވޭ އޮޕަރޭޝަނެއް ކަމަށް ބުނެ އާސަންދަ ވަނީ ލިބޭގޮތް ނުވެފަ. މަންމަ އަކީ ގިނަ ބަލިތަކަކަށް ބޭސްކުރާ މީހެއް ވީމަ އާއިލާއިން ބޭނުންވަނީ އާންމުންގެ އެހީތެރިކަން ހޯދައިގެން ނަމަވެސް ރާއްޖެއިން ބޭރުން މިފަދަ ބޮޑު އޮޕަރޭޝަން ކުރުމަށް". ހާނީގެ ދަރިފުޅު އަހްމަދު ފަލާހު ކިޔައިދިނެވެ.
ލޯބިވާ މަންމައަށް ކިޑްނީ ހަދިޔާ ކުރުމުގެ އުންމީދުގައި ހުރި ފަލާހު މައުލޫމާތު ދިންގޮތުގައި އާއިލާއިން ތައްޔާރުވަމުން ދަނީ އަންނަ ނޮވެންބަރު މަހުގެ 1 ވަނަ ދުވަހު ހާނީ ގޮވައިގެން ހިތުގެ (Mitral Valve Replacement) އޮޕަރޭޝަން ކުރުމަށް އިންޑިއާގެ ކޮޗިންގެ އަމްރިތާ ހޮސްޕިޓަލަށް ދިއުމަށެވެ.
" މަންމައަށް، އަޅުގަނޑުގެ ކިޑްނީ ހަދިޔާ ކުރުމަށް ހަދަންޖެހޭ ޓެސްޓްތައް ހަދާނިމިއްޖެ. ކިޑްނީ ބަދަލުކުރުމުގެ އޮޕަރޭޝަން ކުރެވެން އޮތީ ހިތުގެ އޮޕަރޭޝަން ކުރުމަށްފަހު 3 މަސްދުވަސް ފަހުން ކަމަށް ޑޮކްޓަރުން ވަނީ ވިދާޅުވެފަ. ހިތުގެ އޮޕަރޭޝަނަށް އެކަނި ރާއްޖޭގެ އެއްލައްކަ ރުފިޔާ ހަރަދުވޭ. އެއީ އަދި ޓިކެޓާއި އެހެނިހެން ހަރަދުތައް ނުހިމަނާ ހޭދަވާނެވަރު". ފަލާހު މައުލޫމާތު ދިނެވެ.
އާއިލާ އިން އުންމީދު ކުރަނީ ހާނީގެ ހިތުގެ އޮޕަރޭޝަން ކާމިޔާބުވެ ކިޑްނީ ބަދަލުކުރުމުގެ ބޮޑު އޮޕަރޭޝަންވެސް ކާމިޔާބުވުމެވެ. މިކަމަށް ބޭނުންވަނީ އާންމުންގެ އެހީތެރިކަމާއި ހެޔޮ ދުޢާ އެވެ.
ނޯޓް: ބޭސްފަރުވާ ފުރިހަމަ ކުރަމުންދަނިކޮށް ހާނީ ނިޔާވެފައިވާތީ، މިރިޕޯޓުގައި ކުރިން ހިމަނާފައިވާ ފޯނުނަންބަރާއި އެކައުންޓްނަންބަރު ވާނީ އުނިކޮށްފައެވެ. އެހީތެރިވެދިން ފަރާތްތަކަށް އާއިލާ އިން ވަނީ ޝުކުރު އަދާކޮށްފައެވެ.
ކިޔުންތެރިންގެ ހިޔާލު
Avas furihama shifa eh minvaru kurahvaashi.
ކޮމެންޓްސް ބަންދުކުރެވިފައި