މިދުނިޔޭގައި ކޮންމެ މީހަކުވެސް އެންމެ ބޮޑަށް މަސައްކަތް ކުރަނީ އުފާވެރި ބާއްޖަވެރި ދިރިއުޅުމެއް ހޯދުމަށެވެ. އުފާވެރިކަމާއި ބާއްޖަވެރިކަމަކީ އަގު ދީފައި ގަނެވޭނެ އެއްޗެއް ކަމުގައި ވަނީނަމަ އެކަން ކުރާނެކަން ކަށަވަރެވެ. އެހެންކަމުން ބާއްޖަވެރިކަމަކީ ކޮބައިކަން ދަނެގަންނާނީ ކިހިނެއް ހެއްޔެވެ؟
މީސްތަކުންގެ ޚިޔާލާއި ފިކުރު ތަފާތުވެފައިވާ ފަދައިން ބާއްޖަވެރިކަން މާނަކުރުމުގައިވެސް މީހުންގެ ވިސްނުން ތަފާތުވެފައި ވެއެވެ. "އެއްބަޔަކު ދެކޭގޮތުގައި ބާއްޖަވެރިކަމަކީ މުއްސަނދިކަން. ނުވަތަ އެންމެ ބޮޑަށް ބޭނުންވާ އެއްޗެއް ހާސިލުވުން. ނުވަތަ މަތީ މަޤާމަކާ ހަމައަށް ވާސިލުވުން. ނުވަތަ އެކި ރޮނގުރޮނގުން ކާމިޔާބީތައް ހާސިލުވުން. އުފެދޭ ސުވާލަކީ ބާއްޖަވެރިކަމަކީ ހަމައެކަނި މިއީ ހެއްޔެވެ؟ މުދާވެރިވުމަކީ ހަމައެކަނި ބާއްޖަވެރިކަމެއް ކަމުގައިވީނަމަ، ޤާރޫނަކީ އެންމެ ބޮޑު ބާއްޖަވެރިޔާއަށް ވާނެ ނޫން ހެއްޔެވެ؟".
ޙަޤީޤީ ބާއްޖަވެރިކަމަކީ އަޅާ ﷲ އަށް އީމާންވެ، ﷲ ސުބުހާނަހޫ ވަތަޢާލާ އެންގެވި ގޮތް އިޚުތިޔާރުކޮށް، އެކަލާނގެ ނަހީކުރެއްވި ކަންކަމާ ދުރުހެލިވުމުން ﷲ ސުބުހާނަހޫ ވަތަޢާލާ އޭނާގެ ހިތުގައި ލައްވާ ހަމަޖެހުމާއި، އުފާވެރިކަމުގެ ޝުޢޫރެކެވެ. އެއީ އެއްގޮތަކަށް ވެސް މާއްދީ ގޮތުން ހާސިލުކުރެވޭނެ އެއްޗެއް ނޫނެވެ.
ބާއްޖަވެރިކަމުގެ އަސާސަކީ އީމާންކަމާއި ކިޔަމަންތެރިކަމެވެ. ޙަސަނުލްބަޞަރީ (ރަހިމަހުﷲ) ވިދާޅުވެފައިވެއެވެ. "އީމާންކަމަކީ މީހާ ކުރާ އުއްމީދަކުން ޙާސިލުކުރެވޭނެ ކަމެއް ނޫނެވެ. އެކަމަކު އެއީ ހިތުގައި ނުހަނު ވަރުގަދައަށް ހަރުލައި، އަމަލުން އެކަމުގެ ތެދުކަން ސާބިތުކޮށް ދެއްކުމުން ހާސިލުވާނެ ކަމެކެވެ".
ނަބިއްޔާ ﷺ ދެއްވި އިރުޝާދު އަޑުއަހާށެވެ. އެކަލޭގެފާނު ހަދީޘް ކުރައްވާފައިވާ ބަސްފުޅެއްގެ މާނައިގައިވެއެވެ.
" އެމީހެއްގެ ހުރިހާ ވިސްނުމަކާއި ފިކުރެއް އާޚިރަތް ހާސިލުކުރުމަށް ހުސްކޮށްފި މީހާ ދަންނާށެވެ. ﷲ އެމީހެއްގެ ހިތުގައި ފުދުންތެރިކަން ލައްވައެވެ. އަދި އޭނާއަށް ހުރިހާކަމެއް ފަހިކުރައްވާ ހުށްޓެވެ. ނުރުހިގެންވާ ހާލުގައި ދުނިޔެ އޭނާ ގާތަށް އަންނާނެއެވެ. އެބަހީ (ދުނިޔެއިން ﷲ އޭނާއަށް މިންވަރުކުރައްވާފައިވާ އެއްޗެއް އޭނާއަށް ލިބޭނެއެވެ.) އަދި އެމީހެއްގެ ހުރިހާވެސް ވިސްނުމަކާއި ފިކުރަކީ ދުނިޔެ ހާސިލުކުރުން ކަމުގައި ހަދައިފި މީހާ ދަންނާށެވެ. އޭނާގެ ބޭނުންތައް ނުފުދިފައިވާތަން ﷲ ތަޢާލާ އޭނާއަށް ދައްކަވާނެތެވެ. އަދި އެކަންކަމުގެ މައްޗަށް އޭނާގެ ހުރިހާ ކަމެއް ވިއްސިވިހާލި ކުރައްވާނެތެވެ. އަދި އޭނާ ކިތަންމެ ވަރަކަށް މަސައްކަތް ކުރިޔަސް ﷲ މިންވަރު ކުރެއްވި އެއްޗެއް މެނުވީ އޭނާއަށް ނުލިބޭ ހުށްޓެވެ."
ކޮންމެ މީހަކުވެސް ގަދައަޅައި ބުރަ މަސައްކަތް ކުރަނީ އުފާވެރި ހިތްހަމަޖެހޭ ދިރިއުޅުމެއް ހޯދުމަށެވެ. އެގޮތުން އެކިއެކި ކަންކަމުގައި އަވަދިނެތި މަސްއޫލުވެ އުޅެއެވެ. ބާއްޖަވެރިކަން ދެއްވުމަށް ވައުދުވެވޮޑިގެންނެވި ގަދަ ކީރިތިވަންތަ ﷲ ސުބުހާނަހޫ ވަތަޢާލާ ހަނދުމަކުރަންވެސް ހަނދާނެއް ނުހުރެއެވެ. އެކަލާނގެ އެންމެ ބޮޑަށް ލޯބިވެވޮޑިގަންނަވާ ފަރުޟު ފަސްނަމާދު މަތިން ވެސް ހަނދާން ނުހުރެއެވެ. މާތް ﷲ އެންމެ ބޮޑަށް ލޯބިވެވޮޑިގަންނަވާ އަޅުކަމަކީ ނަމާދެވެ. ނަމާދަށް ރައްކާތެރިނުވެ ކިތަންމެ ބުރަ މަސައްކަތެއް ކުރިކަމުގައިވިއަސް ބާއްޖަވެރިކަން ލިބޭނީ ކިހިނަކުން ހެއްޔެވެ؟.
މައުލޫމާތު: ހުކުރު ޚުތުބާ
