މާބަނޑުވުމުން ހަށިގަނޑުގައި ލޭގެ މިންވަރު 50 އިންސައްތަ އަށް އިތުރުވެ ހިތަށާއި ލޭދައުރު ކުރުމަށް ބަދަލުތަކެއް އައިސް ހަށިގަނޑުގައިވާ ގުނަވަންތަކާއި ބަނޑުގައި ބޮޑުވަމުން އަންނަ ދަރިފުޅަށް ލޭފޯރުކޮށްދޭ މިންވަރު އިތުރުވެގެންދެއެވެ.
ބަލިވެ އިންނަތާ ފުރަތަމަ ދެމަސް ނުވަތަ ތިންމަސް ދުވަހުގެތެރޭގައި ލޭގެ އެޗް.ބީ ދަށަށް ދާކަން ފާހަގަކުރެވެއެވެ.
ތެލަސީމިއާ ބަލި ވާރުތަކުރާ ގޮތް ހުންނަނަމަ ގިނަފަހަރަށް ތަންކޮޅެއް ދަށުގައި ލޭ ހުރުން އެކަށީގެންވެއެވެ. މިފަދަ އަންހެނަކު ބަލިވެ އިނދެއްޖެނަމަ އެޗް.ބީ ކުރިއަށްވުރެ ދަށަށް ދިއުމުގެ ފުރުސަތުބޮޑެވެ.
ލޭމަދުވުމަކީ ސިއްހީ ގޮތުން ނުރައްކާތެރި މައްސަލައަކަށް ވަނީ ކީއްވެ؟
މާބަނޑު ދުވަސްވަރު ލޭގެ ސެލް އިތުރުކުރުމަށާއި ރަހިމް ވަރުގަދަ ކުރުމަށާއި މަސް އުފެއްދުމަށް އަދި ކުޑަދަރިފުޅުގެ ލޭ ހިނގާ ނިޒާމު އުފެދުމަށް ދަގަނޑުގެ ބައި އިތުރަށް ބޭނުންވެއެވެ. ލޭ މަދުނަމަ ދިމާވެދާނެ މައްސަލަތައް:
- ބަނޑުގައިވާ ދަރިފުޅު ހެދިބޮޑުވާން ބޭނުންވާ ވަރަށް ހަކަތަ ލިއްބައި ނުދެވުން
- މައިމީހާގެ ހަށިގަނޑު ބާރުދެރަވެ، ވަރުބަލިވެ އެކިއެކި ބަލި ޖެހުމުގެ ފުރުސަތު ބޮޑުވޭ
- ލޭ މަދުމައިން ވިހާ ދަރިފުޅު ވިހެއުމުގެ ތެރޭގައި މަރުވުމުގެ ފުރުސަތު ބޮޑުވޭ
- ތުއްތު ދަރިފުޅު ފުރިހަމައަށް ހެދިބޮޑުވުމުގެ ފުރުސަތު ކުޑަވެ އުފެދުމުގައި އައިބު ހުރުން އެކަށީގެންވޭ
- ބައިގެން ދިއުން، ދުވަސްނުފުރާ ވިހެއުން، ވިހާ ދަރިފުޅުގެ ބަރުދަން ހުންނަންވާ ވަރަށްވުރެ ދަށްވުން
- ވިހެއުމުގެތެރޭގައި މަސްތުރަނުވުން. ގިނައިން ލޭފޭބުން ފަދަ ފުރާނައަށް ނުރައްކާތެރި ކަންތައްތައް
ކާނާގައިވާ ދަގަނޑުގެބައި ހަށިގަނޑަށް ނަގައިދޭ މިންވަރު އިތުރުކުރުމަށްޓަކައި ވިޓަމިންސީ ހިމެނޭ ކާބޯތަކެތި ކާވަގުތުތަކުގައި ހިމަނާށެވެ. މިސާލަކަށް އޮރެންޖް، ފޭރު އަދި އަނބު
މާބަނޑު ދުވަސްވަރު ހަކުރު މައްޗަށް ދިއުމާއި ހަށިގަނޑުގައި ދަގަނޑުގެބައި މަދުވުމުން މެދުވެރިވާ އެނީމިއާ އަކީ ދިވެހިރާއްޖޭގައި މާބަނޑު މީހުންގެ ފަރާތުން ވަރަށްގިނައިން ފެންނަކަމެކެވެ. މިކަން މިގޮތަށް މެދުވެރިވަނީ ކެއުމުގައި ގެންގުޅޭ ނުރަނގަޅު އާދަތަކުގެ ސަބަބުންނެވެ. އެހެންކަމުން އެދުވަސްވަރު ބަދަލު އަންނަމުން ދާ ހަށިގަނޑަށާއި ބަނޑުގައިވާ ދަރިފުޅުގެ ހެދިބޮޑުވުމަށް ދެވޭނެ އެންމެ ބޮޑު އެހީއަކީ ހަށިގަނޑަށް ފައިދާހުރި ތަފާތު ބާވަތްތަކުގެ ކާނާ ބޭނުންކުރުމެވެ.
ލޭ މަދުވުމާއި ގުޅޭ އިތުރު މައުލޫމާތު ޒީޓައިމްސްގައި ކުރިން ޝާއިއުކޮށްފައިވާ މި ރިޕޯޓުގައި ހިމަނައިފައިވާނެއެވެ.
ލޭމަދުވުމާއި ގުޅޭ މުހިންމު މައުލޫމާތު!https://t.co/kxH6rRAojw
— XeeTimes (@xeetimes) September 17, 2022
ނޯޓް: މިލިޔުމުގައި ހިމަނާފައިވާ މައުލޫމާތަކީ ޔުނިސެފް، މިނިސްޓްރީ އޮފް ހެލްތް އަދި ހެލްތު ޕްރޮޓެކްޝަން އެޖެންސީ އިން ލޭމަދުވުމާއި ގުޅޭގޮތުން އާންމުކޮށްފައިވާ މައުލޫމާތެވެ.
