އަންހެނުންގެ ޚާއްސަ ޑޮކްޓަރު އާމިނަތު ނުސްރާ މިދާއިރާގައި މަސައްކަތްކުރައްވާތާ 10 އަހަރު ވީއެވެ. މިވަގުތު މަސައްކަތް ކުރައްވަމުން ގެންދަވަނީ ޓްރީޓޮޕް ހޮސްޕިޓަލުގައެވެ. ޓްރީޓޮޕަކީ ރާއްޖޭގައި އެންމެ ފުޅާދާއިރާއެއްގައި ތަފާތު އޮޕަރޭޝަންތައް ކުރަމުންދާ އެއް ހޮސްޕިޓަލެވެ.
'ޒީޓައިމްސް' އަށް ދެއްވި ޚާއްސަ އިންޓަވިއުގައި އަންހެނުންގެ ތަފާތު ގިނަ އޮޕަރޭޝަންތަކެއް ކުރައްވާ ޑރ. ނުސްރާ ވިދާޅުވީ ކުރިއާއި ބަލާއިރު ރާއްޖޭގައި އޮޕަރޭޝަން ކުރަން ބޭނުންވާ މީހުންގެ އަދަދު ދުވަހެއް ދުވަހަކަށް އިތުރުވަމުންދާ ކަމަށެވެ.
" ކުރިއާއި ޚިލާފަށް ވަރަށްގިނަ މީހުން އިތުބާރުކުރޭ. ބޭރަށް ގޮއްސަ އައިސްވެސް ބުނާނެ ބޭނުންވަނީ ރާއްޖޭގައި އޮޕަރޭޝަން ކުރުމަށޭ. އާބާދީ މަދުވީމަ އެކަކުގެ ތަޖުރިބާ އަނެކަކާއި ހަމައަށް ފަސޭހައިން ދާނެ. އެމައުލޫމާތު ލިބޭވަރަކަށް އިތުބާރު ކުރެވޭވަރު ބޮޑުވާނެ. ކޮވިޑު ދުވަސްވަރު މީހުންނަށް ބޭރަށް ނުދެވުން މިއީ ދިވެހި ޑޮކްޓަރުންނަށް ފަރުވާ ދިނުމަށް ލިބުނު ބޮޑު ފުރުސަތެއް. އެދުވަސްވަރު ރާއްޖޭގައި ތިބެގެން ގިނަ އޮޕަރޭޝަންތަކެއް ކުރަންޖެހުނު. އޭގެ ސަބަބުން މީހުންގެ ތެރޭގައި ވަރަށް ބޮޑަށް އިތުބާރު އުފެދިއްޖެ". ޑރ. ނުސްރާ ފާހަގަކުރެއްވިއެވެ.
ޑޮކްޓަރު ފާހަގަކުރެއްވި ގޮތަށް ކޮވިޑުގެ ޕެންޑަމިކްގެ ސަބަބުން 2020 ވަނަ އަހަރުގެ މެދުތެރެއިން ފެށިގެން އެއްއަހަރު ދުވަހުގެ މުއްދަތަށް ރާއްޖެއިން ބޭރަށް ދިއުމަކީ އެހާ ފަސޭހަކަމެއް ނޫނެވެ. ބަލި މީހުންނަށް އެއިރު މަޖުބޫރުވީ ރާއްޖެއިން ކުރެވެންހުރި އޮޕަރޭޝަންތައް ރާއްޖޭގައި ތިބެގެން ކުރާށެވެ.
ލޯވަޅު އަޅައިގެން ޑރ. ނުސްރާ ކުރައްވާ އޮޕަރޭޝަންތަކުގެ ތެރޭގައި ސިސްޓު ނެގުން، ފައިބްރޮއިޑް އަދި ރަހިމު ނެގުން ފަދަ އޮޕަރޭޝަންތައް ހިމެނެއެވެ. މީގެތެރެއިން ބައެއް އޮޕަރޭޝަންތައް މިވަގުތު ރާއްޖޭގައި ލޯވަޅު އަޅައިގެން އާއްމުކޮށް ކުރައްވަނީ ޑރ.ނުސްރާ ކަން ފާހަނގަ ކުރެވެއެވެ. ފަޅައިގެން އޮޕަރޭޝަން ކުރުމަށްވުރެ ލޯވަޅު އަޅައިގެން ކުރާ އޮޕަރޭޝަންތަކުގައި ބަލިމީހާގެ ހާލަތު ރަނގަޅުވާން ހޭދަވާ މުއްދަތު އަވަސްވެ ހޮސްޕިޓަލުގައި ހޭދަކުރަންޖެހޭ މުއްދަތު ވަރަށް ކުޑައެވެ.
" ކޮންމެ ސަރޖަރީއެއްގައިވެސް ކޭސް ސްޓަޑީ ކުރަންޖެހޭ. ކުރީގަ ސަރޖަރީތައް ހަދާފަހުރިތޯ. ކުރަންޖެހޭ އޮޕަރޭޝަންގެ ބޮޑުމިނަކީ ކޮބައިތޯ؟ އެމީހާގެ ބަރުދަނަކީ ކޮބައިތޯ؟ އޭނަގެ ހުންނަ އެހެން ބަލިތަކަކީ ކޮބައިތޯ؟ މިހުރިހާކަމަކަށް ބެލުމަށްފަހު ކުރިއަށް ދާނެގޮތެއް ނިންމޭނީ. ނިސްބަތުން ގިނަ އޮޕަރޭޝަންތައް މި ކުރަނީ ފަޅާނުލާ ލޯވަޅު އަޅައިގެން". ޑރ.ނުސްރާ
ބުރަކޮށް މަސައްކަތް ކުރައްވަމުންވެސް ޑރ. ނުސްރާ ވަނީ ޔޫކޭގެ ޚާއްސަ އެގްޒާމެއް ކަމުގައިވާ މެމްބަރޝިޕް އެގްޒާމް ފުރިހަމަކުރައްވާ 'ރޯޔަލް ކޮލެޖް އޮފް އޮބުސްޓެޓުރީޝަންސް އެންޑް ގައިނެކޮލޮޖިސްޓްސް' ގެ މެމްބަރަކަށް ވެފައެވެ. އޮކްޓޯބަރު މަހުގެ 28 ވަނަ ދުވަހު ބޭއްވި ރަސްމިއްޔާތުގައި ވަނީ ސެޓިފިކެޓް ހާސިލު ކުރައްވާފައެވެ. މިއީ 'ރޯޔަލް ކޮލެޖް އޮފް އޮބުސްޓެޓްރީޝަންސް އެންޑް ގައިނެކޮލޮޖިސްޓްސް' ގެ މެމްބަރަކަށްވި ފުރަތަމަ އަންހެނުންގެ ޚާއްސަ ދިވެހި ޑޮކްޓަރެވެ.
" އަޅުގަނޑުމެން ކިޔަވައިގެން އައި ދުވަސްވަރާއި ބަލާއިރު ކަންތައްތައް މިދަނީ ބަދަލުވަމުން. އަމިއްލަ ކުރިއެރުން ހޯދަން މަސައްކަތްކުރަން. ވަރަށް ގިނައިން ހުންނާނެ ބޭރުގެ އެކިއެކި އެގްޒާމްސް ހަދާފަ. މައުލޫމާތު މުއްސަނދިކުރުމުގެ ގޮތުން ސެޝަންތަކުގަ ބައިވެރިވެފަ. މިއީ ޔޫކޭގަ ގައިނޮކޮލޮޖިސްޓުން އެމީހުންގެ ޓްރެއިނިންގ އަށްފަހު ހަދާ އެގްޒާމެއް. އެތަނުގެ ބޯޑު އެގްޒާމެއް. އެއިރުން އެމީހުންގެ ރަޖިސްޓްރޭޝަން ލިބުނީ. އެކޮޅުގައި މަސައްކަތް ކުރަން ބޭނުންވާނަމަ މަސައްކަތް ކުރެވޭނެ މި އެގްޒާމް ފުރިހަމަކުރުމުން" ޑރ. ނުސްރާ
ޔޫކޭގައި ބޭއްވި ރަސްމިއްޔާތަށްފަހު ޑރ. ނުސްރާ
ދިވެހި އަންހެނުންގެތެރޭގައި ސިސްޓް އުފެދުމުގެ މައްސަލަ އާންމު
ދިވެހި އަންހެނުންގެ ތެރޭގައި އެންމެ ފާހަގަކުރެވޭ އެއް މައްސަލައިގެ ގޮތުގައި ޑރ. ނުސްރާ ފާހަގަކުރެއްވީ ކުރިއެކޭ އެއްގޮތަށް ޕޮލިސިސްޓިކް އޯވަރީގެ މައްސަލައެވެ.
" ޕޮލިސިސްޓިކް އޯވަރީ، މިއީ އެންމެ ގިނަ އަންހެނުން ފަރުވާ ހޯދާ އެއްކަންތައް. ސިސްޓް ހުރެގެން ކުދިން ނުލިބިގެން ގިނަ މީހުން ފަރުވާ ހޯދާ. ޚާއްސަކޮށް ޒުވާނުންގެ ތެރޭގައި މިމައްސަލަ ފާހަގަކުރެވޭ. ބަރުދަން ހުންނަންޖެހޭ މިންވަރަށް ބެހެއްޓުމަށް ސަމާލުކަންދީ ކަސްރަތުކުރުމަށް ސަމާލުކަން ދޭންޖެހޭ. އަދި ސިއްހަތަށް ފައިދާހުރި ކާނާ ކެއުން މުހިންމު" ޑރ. ނުސްރާ ވިދާޅުވިއެވެ.
އޭޑީކޭ ހޮސްޕިޓަލުގައި 10 އަހަރެއްހާ ދުވަހު މަސައްކަތް ކުރެއްވި ޑރ. ނުސްރާގެ އަމާޒަކީ ޓްރީޓޮޕް ހޮސްޕިޓަލުން ފަރުވާ ހޯދާ އަންހެނުންނަށް ފުރިހަމަ ފަރުވާއެއް ފޯރުކޮށްދެއްވުމެވެ. އަދި އާއިލާއާއެކު ރާއްޖޭގައި ތިބެގެން ފަރުވާ ހޯދުމަކީ ބަލިމީހާ އަށް ލިބޭނެ ބޮޑު ހިތްހަމަޖެހުމަކަށްވާއިރު އެހިތްހަމަޖެހުން އިތުބާރާއެކު ހޯދައިދިނުމަށް މަސައްކަތްކުރުމަކީ ޑޮކްޓަރުގެ އަމާޒެކެވެ.
" އުއްމީދަކީ 'މިނިމަލީ އިންވޭސިވް ސަރޖަރީސް' ނުވަތަ ފަޅާނުލާ ކުރާ އޮޕަރޭޝަން ތަކަށް ޚާއްސަވެ އެދާއިރާގައި އިތުރު ކުރިއެރުން ހޯދުން". އިންޓަވިއު ނިންމާލަމުން ޑރ. ނުސްރާ ފާހަގަކުރެއްވިއެވެ.
