މަތީ ތަޢުލީމް ހާސިލުކުރުމަށްފަހު ވަޒީފާއަށް ދެވޭނެގޮތެއް ނެތި ތިބި އެތައް މައިންނެއް އަޅުގަނޑުމެންގެ މި ދިވެހިރާއްޖޭގައި ވެސް އެބަތިއްބެވެ. ތުއްތު ދަރިފުޅުގެ އުމުރުން ވަކި އަހަރެއް ވަންދެން ގޭގައި އެދަރިފުޅު ބެލުމަށް މަޑުކުރުމަށްފަހުވެސް ވަޒީފާއަށް ދެވޭނެ ގޮތެއް ނެތް މައިންވެސް އެބަތިއްބެވެ. ސަބަބަކީ ދަރިން ލިބުމަށްފަހު ވަޒީފާއަށް ދާވަގުތުގައި އެދަރިން ބަލާނެ މީހެއް ނެތިގެންނެވެ. އެހެންނަމަވެސް ވަޒީފާ އަދާކުރާ އޮފީހުގައި، އަގެއް ނެގުމެއްނެތި ހިލޭ ދަރިފުޅު ބެލޭނެ އިންތިޒާމް ހަމަޖެހުމަކީ ލިބޭނެ އެންމެ ބޮޑު އެއް އުފަލެވެ. ހިތްހަމަޖެހުމެވެ. ކުޑަހުސްވަގުތުކޮޅެއް ލިބުނަސް އެދަރިފުޅު އުޅޭ ނުއުޅޭ ގޮތް ފަސޭހައިން ބަލާލެވޭނެއެވެ. އަދި އިތުބާރުކުރެވޭ ތަނަކަށް ދަރިފުޅު ފޮނުވުމަކީ ހިތްހަމަޖެހުމާއެކު ވަޒީފާ އަދާކުރެވޭނެ ސަބަބެކެވެ.
ސްޓެލްކޯގެ ޗައިލްޑް ކެއަރ ސެންޓަރުގައި ޚިދުމަތްދެވޭ އުމުރުފުރާއަކީ 5 އަހަރާއި 10 އަހަރާއި ދެމެދެވެ. މިއަދު ހުޅުވި މިސެންޓަރު ހުޅުވިފައި ހުންނަ ގަޑިތަކަކީ ސަރުކާރުގެ ރަސްމީ މަސައްކަތްކުރާ ދުވަސްތަކުގެ ހެނދުނު 8:15 އިން ހަވީރު ހަތަރުގަޑި ސުންމިނިޓެވެ.
" މިއީ ރައީސް އިބްރާހީމް މުހައްމަދު ސާލިހްގެ އިސްނެންގެވުމާއި އެއްގޮތަށް ސްޓެލްކޯގެ މެނޭޖްމަންޓް އިން ސްޓެލްކޯގެ މުވައްޒަފުންނަށް، މަސައްކަތު ގަޑީގައި މުވައްޒަފުންގެ ދަރިން ތިބޭނެ ރައްކާތެރި އިތުބާރުކުރާ މާހައުލެއް ހޯދައިދިނުމުގެ ގޮތުން ގާއިމްކުރެވުނު ތަނެއް". ސްޓެލްކޯ އިން މައުލޫމާތު ދިނެވެ.
މިސެންޓަރުން ޚިދުމަތް ހޯދާ ކުދިން ބެލެހެއްޓުމަށް ތިބޭނީ ކަމަށް ޤާބިލް، ކުދިން ގެންގުޅުމުގެ ހުނަރުހުރި މުވައްޒަފުންނެވެ. އަދި ކުދިންގެ އުމުރާއި ގުޅޭ ތަފާތު ގިނަ މަޖާ ހަރަކާތްތަކާއި ކުޅިވަރުގެ ތެރެއިން އުނގަންނައިދިނުމަށްވެސް އިސްކަންދެވޭނެ ކަމަށް ވަނީ މައުލޫމާތު ދީފައެވެ.
ޗައިލްޑް ކެއަރ ސެންޓަރ ހުޅުވުމުގެ ރަސްމިއްޔާތުގައި ސްޓެލްކޯގެ މެނޭޖިންގ ޑައިރެކްޓަރ އަހުމަދު ޝަރީފު ވިދާޅުވީ މިއީ ސަރުކާރުން މުވައްޒިފުންނަށް ދެއްވި ހަދިޔާއެއް ކަމަށެވެ. އެހަދިޔާ ބަލައިގަންނަކަން މުވައްޒަފުން ދައްކަންވާނީ ކުންފުނިން ރައްޔިތުންނަށް ފޯރުކޮށްދޭ ޚިދުމަތުންކަން ފާހަގަކުރައްވާ، މިހާރަށްވުރެ ފުރިހަމަ ޚިދުމަތެއް ދިނުމަށް މުވައްޒިފުންގެ ކިބައިން ވަނީ އެދިފައެވެ.
މިސެންޓަރ ހުޅުވައިދެއްވީ ސްޓެލްކޯގެ ޗެއަރމަން ބްރިގޭޑިއަރ ޖެނެރަލް ރިޓަޔަރޑް އިބްރާހީމް މުހައްމަދު ދީދީ އެވެ.
