އިސްލާމްދީނަކީ އަމާންކަމާއި ސަލާމަތުގެ ދީނެވެ. އެ ދީނުގެ ނަބިއްޔާ މުހައްމަދު ﷺ އަކީ ސަލާމަތުގެ މަގަށް އިރުޝާދު ދެއްވި ނަބިއްޔާއެވެ.
ހަގީގީ މުސްލިމަކީ އޯގާވެރި ކުލުނުވެރި މަޑުމައިތިރި ލުއި ފަސޭހަކަމަށް ލޯބިކުރާ މީހެކެވެ. އޭނާއަކީ އޭނާގެ ނަފްސަށާއި ހަށްޓަށް ލުއި ފަސޭހަ އަދި ލުއި ފަސޭހަކަމާއެކު އޭނާގެ އަހްލުންނާ މުއާމަލާތު ކުރާ މީހެކެވެ. އޭނާ އަކީ އޭނާގެ އަވަށްޓެރީންނަށާއި ރަހްމަތްތެރިންނަށާއި މުޖުތަމައުގެ އެންމެހާ އަފުރާދުންނަށް ހިތްހެޔޮ މީހެކެވެ. އޭނާ އަކީ މުށްބާރުކަމެއް ނެތް ދީލަތި މީހެކެވެ. އެންމެންނަށް ހެޔޮއެދޭ މީހެކެވެ. މުޖުތަމައުގެ ފަރުދުންނަށް އަޅައިލާ މީހެކެވެ.
މުއުމިނަކީ އޭނާ އެތާނގައި ދިރިއުޅޭ ވެށްޓާ ސުލްހަވެރި، އެ ވެށްޓާ ކުރިމަތިވާ ނުރައްކާތަކުން އެ ވެށި ރައްކައުތެރިކޮށް ސަލާމަތްކޮށްދޭ މީހެކެވެ. އޭނާ ދަންނަ ގޮތުގައި ވެށި ރައްކައުތެރިކުރުމަކީ އޭނާގެ ދީނީ އިންސާނީ އަދި ވަޠަނީ މަސްއޫލިއްޔަތެކެވެ.
" ވެށްޓަކީ އަހަރެމެންގެ ހަޔާތުގައި ވަރަށް މުހިންމު ބަހާއެއް. އެ ތަން ފާސިދުވެއްޖެނަމަ އަހަރެމެންގެ ސިއްހަތު ފާސިދުވެގެން ހިނގައިދާނެ. މި ވެށި ރަނގަޅުވެއްޖެނަމަ އަހަރެމެންގެ ހަށިތަކަށް ދުޅަހެޔޮކަން ލިބޭނެ. ސަބަބަކީ އަހަރެމެން ކާ ތަކެއްޗާއި ބޯ ފެނާއި ނޭވާލާ އޮކްސިޖަން ހުރީ އެ ވެށީގަ".
ވެށި ތަޣައްޔަރު ކުރަނީ އަހަރެމެންގެ އަތުންނެވެ. މާތް ﷲ ފެނާއި ވަޔާއި ހަޔާތް ޚަލްޤު ކުރެއްވީ ސާފު ތާހިރުކޮށްނެވެ. އެކަލާންގެ ގަސްގަހާގެހި ހައްދަވައި އޭގައި މޭވާ އަޅާގޮތް ލެއްވެވީ ކެމިކަލް ހިމެނޭ ކާދަކާ ނުލައެވެ. އިންސާނުން ވިރާސީ މޭސްތިރިކަމުގެ ދަށުން މޭވާއަށާއި ގަސްގަހާގެއްސަށާއި ދިރޭ އެއްޗެއްސަށް ގެންނަމުންދާ ބަދަލުތަކުގެ ސަބަބުން މާތް ﷲ ޚަލްޤު ކުރެއްވި ތަކެތި މި ދަނީ ތަޣައްޔަރުވަމުންނެވެ.
ކުކުޅުހާލަށް ކާންދޭ ހޯމޯންތަކުގެ ސަބަބުން ސާޅީހަކަށް ދުވަހުގެތެރޭގައި އޭގެ ބަރުދަނަށް ކިލޯއެއް އިތުރުވެއެވެ. އޭއްޗެއްސަށް ރޭދުވާ އޮޅުވާލައިގެން ދުވާލަކު ދެތިންފަހަރު އެބަ ބިސް އަޅުވައެވެ. މި އެއްޗެހި ކެއުމުން އިންސާނާގެ ހަށިގަނޑަށް އިންސާނާއާ ނުގުޅޭ ނުރައްކާތެރި ހޯމޯންތައް ވަދެ އިންސާނާގެ ދިފާޢީ ބާރުތައް ހަލާކުކޮށްލައެވެ. އިންސާނާ ބަލިމާނަކަށް އެބަ ހަދައިލައެވެ.
ދިވެހީންނަކީ ކަނޑުގެ އަހުލުވެރީންނެވެ. އަހަރެމެންގެ އިޤްތިސާދު ބަރޯސާ ވަނީ ކަނޑަށެވެ. ފަތުރުވެރިކަން ކަމުގައިވިޔަސް މަސްވެރިކަންކަމުގައި ވިޔަސް، އަހަރެމެންގެ އިޤްތިސާދުގެ މައިނާރަކީ ކަނޑެވެ. އަހަރެމެންގެ އަމިއްލަ އަތުންވެސް މިދަނީ މިނަލަނަލަ ކަނޑުތައް ކިލަނބު ކުރަމުންނެވެ.
" އެއްގަމުން އުކާލާ ކުނީގެ ސަބަބުން ރީތި ގޮނޑުދޮށްތަކާއި ސާފު ކަނޑު ވަނީ ތަޣައްޔަރުވެ މުޑުދާރުވެފަ. މީގެ އިތުރަށް ކަނޑުދަތުރުކުރާ އުޅަނދުފަހަރުން ބޭރުވާ ކުންޏާއި ކަނޑަށް ޣަރަޤުވާ ތެޔޮ ބޯޓުފަހަރުން ކަނޑަށް އެޅޭ ތެލާއި ޕެޓްރޯލުން އެ ކަނޑުތައް ވަނީ ތަޣައްޔަރުވެފަ. ކަނޑަށް އުކާލާ ވިހަ ކުނިބުނީގެ ސަބަބުން ކަނޑުތަކުގައި އުޅޭ މަސްމަހާމެހި ވަނީ ވިހަވެފަ. މާތް ﷲ ކަނޑުތައް ހެއްދެވީ އެތަންތަނުން ފައިދާހުރި ކާބޯތަކެއްޗާއި އެހެނިހެން ފައިދާތައް ހޯދުމަށް".
ރަސޫލާ ﷺ ވެށި ސާފުތާހިރުކޮށް ބާއްވައިގެން ދިރިއުޅުމަށް އިރުޝާދު ދެއްވައިފައިވެއެވެ. ތިމާވެށި މުޑުދާރު ނުކުރުމަށް ޚާއްސަކޮށް ފެން މުޑުދާރު ނުކުރުމަށް ނަސޭހަތް ދެއްވާފައިވެއެވެ.
މައުލޫމާތު: ހުކުރު ޚުތުބާ
