އަޅުގަނޑުމެން ލޯބިން ބަލަމުން އަންނަ ދަރިފުޅު އާދަޔާޚިލާފަށް ރުޅިގަދަވެ ކަންކަމުގައި ބޮޑާހާކާނަމަ އެކަމާމެދު ވިސްނާ ދެރަވާފަހަރު އާދެއެވެ. ދަރިފުޅަށް އެއަންނަ ބަދަލުތައް ދެނެގަނެ ހައްލުކުރުމަށް މަސައްކަތް ކުރެވިދާނެއެވެ.
ޕްރީސްކޫލުގައި ދަރިފުޅު ހޭދަކުރާ ދުވަސްތަކަކީ އަލަށް ގިނައަދަދެއްގެ ކުދިންނާއި ދިމާވެ އެކުދިންނާއެކު އާމަހައުލެއްގައި އުޅެންފަށާ ދުވަސްވަރެވެ. މިފަދަ ދުވަސްވަރެއްގައި ކުދިންނަށް ތަފާތު ބަދަލުތަކެއް އަންނާނެއެވެ. އާކަންތައްތަކަށް ހޭނެން ވަގުތު ނަގާނެއެވެ. މައިންބަފައިންނާއެކު ވަގުތު ހޭދަކުރި ކުދިން ސްކޫލަށް ގޮސް 3 ނުވަތަ 4 ގަޑިއިރު ސްކޫލުގައި މަޑުކުރަން ޖެހުމުން ވަރުބަލިވެ ބުނެދޭން ނޭނގޭ އިހްސާސްތަކެއް އެކުދިންނަށް ކުރެވޭނެއެވެ.
ކުދިން އާދަޔާޚިލާފަށް ރުޅިގަދަވެ، އެކުދިންގެ އުޅުމަށް ބަދަލު އަންނަނަމަ ކުރެވިދާނެ ކަންތައްތައް:
1. އަމަލުކުރާނެ ގަވާއިދެއް ކިޔައިދިނުން
ސްކޫލުގައާއި ގޭގައި ކުދިން އުޅެންވާނެގޮތް ވަރަށް ރަނގަޅަށް ކިޔައިދޭންވާނެއެވެ. ޚާއްސަކޮށް ގޭގައި ކުދިން އުޅޭނެ ގޮތް ކިޔައިދިނުމަކީ މައިންބަފައިންގެ ޒިންމާއެކެވެ. ކުޑަކުދިން ޝައުގުވެރިވާނީ އާއެއްޗެއް ފެނިއްޖެނަމަ އެއެއްޗެއްގައި އަތްޖައްސާ އަމިއްލައަށް އެއީ ކޯއްޗެއްކަން ތަޖުރިބާ ކުރާށެވެ. އެހެންވުމުން އެކުދިންނަށް ކުޅެން ދޭން ބޭނުންނުވާ އަގުބޮޑު ތަކެތި ހުރިނަމަ އެތަކެތި ނުފެންނަގޮތަށް ފޮރުވާށެވެ. އެހެންނޫނީ އެފަދަތަކެތި ބޭނުންވެގެން ރުޅިގަދަކުރުމަކީ ބައެއްކުދިން ކުރާކަމެކެވެ. ދަރިފުޅު ބޭނުންއިރަކު ބޭނުންކޮށްލެވޭނެ ގޮތަށް ހުންނަތަކެތި ފަސޭހައިން ނެގޭގޮތަށް ވަކިތަނެއްގައި ބަހައްޓާށެވެ. އެއިރުން އެކުދިން ބޭނުންވުމުން އެތަކެތި ނެގޭނެއެވެ. ގޭގައި ކުދިން ކިޔަވާނެ ވަގުތާއި ޓީވީ ބަލާނެ އަދި ކުޅޭނެ ވަގުތަކީ ކޮބައިކަން ކިޔައިދޭށެވެ. ކާގަޑިތަކާއި އެނޫންވެސް މުހިންމު ވަގުތުތައް ކުދިންނަށް ކިޔައިދޭށެވެ.
2. އަމުރުވެރި ރާގަށް ވާހަކަ ނުދެއްކުން
މައިންބަފައިންވެސް ވަރުބަލިވެ ކަމަކާ ފިކުރުބޮޑުވެފައި ހުންނަ ވަގުތުތަކުގައި ކުދިން ބަސްނައަހާ އުޅޭނަމަ ބާރަށް އެއްޗެހި ބުނެވޭ ފަހަރުވެސް އާދެއެވެ. އެކަމަކު ވިސްނަންވީ ބާރަށް ވާހަކަ ދެއްކުމުގެ ބަދަލުގައި އަދި ޚާއްސަކޮށް އަމުރުވެރި ރާގަށް މިސާލަކަށް 'ހުއްޓާލާ' މިގޮތަށް ނުބުނެ ރީތިކޮށް ވާހަކަ ދައްކައިގެން ކުދިންނަށް ވިސްނައިދޭށެވެ. ގޯސްކޮށް ކަންތައް ކުރާނަމަ އޭގެ ސަބަބުން ލިބިދާނެ ގެއްލުމަކީ ކޮބައިކަން ވިސްނޭގޮތަށް ކިޔައިދެވޭތޯ މަސައްކަތް ކުރާށެވެ. މިސާލަކަށް ތަކެތި އުކާނަމަ އެތަކެތި އުކުމުގެ ސަބަބުން ހަލާކުވެ އަބަދު ގަންނަން ނުލިބިދާނެކަން ބުނެދޭށެވެ. އަދި އެގޮތަށް އެއްޗެއް އުކާއިރު މީހެއްގެ ގައިގައި ޖެހި ތަދުވެދާނެކަމަށް ބުނެ ވިސްނައިދޭށެވެ.
3. ރުޅިގަދަވިޔަ ނުދިނުން
ގޭގަ އެންމެ ކުޑަކޮށް ހުންނަ ކުއްޖާ ރުޅިއެރުވުމަކީ ބައެއްފަހަރު މަޖަލަކަށްވެއެވެ. އެކުއްޖާ އަތުގައި އޮންނަ އެންމެ ބޭނުންވާ ކުޅޭއެތި ނަގާ، ނޫނީ އެކުއްޖާ ރޮއްވާލުމަކީ ބޮޑުކޮށް ތިބޭ ކުދިން ކުރާކަމެކެވެ. މިއީ އެއްގޮތަކަށްވެސް ކުރަން ރަނގަޅުކަމެއް ނޫނެވެ. ސަބަބަކީ ކުދިން ރުޅިއަރުވާނަމަ އެކުދިން ބޮޑަށް ރުޅިގަދަވެ އޭގެ އަސަރު ސްކޫލު މާހައުލުގައިވެސް ފެންނާނެއެވެ. ގޭގައި ބޮޑަށް ހުންނަ ކުއްޖަކު މިފަދަ ކަމެއް ކުރާނަމަ ވިސްނައިދޭށެވެ. އަވަހަށް އެކަން ހުއްޓުވޭތޯ ބަލަންވާނެއެވެ. އެހެންނޫނީ އޭގެ ނޭދެވޭ އަސަރު ކުޑަދަރިފުޅަށް ކުރާނެއެވެ.
4. އަމިއްލަ ނަފްސު ކޮންޓްރޯލް ކުރުން
މައިންބަފައިންގެ ވެސް އިހުސާސްތަކެއް ވާނެކަން ޔަގީނެވެ. ރުޅިވެސް އަންނާނެއެވެ. އެކަމަކު އަމިއްލަ ނަފްސު ކޮންޓްރޯލުކުރަން ދަސްކުރާށެވެ. ތިމާ އަމިއްލައަށް ރުޅިގަދަވާފަހަރު ކުރާ ކަންތައް ތިމާގެ ކުދިން 'ކޮޕީ' ކުރާނެއެވެ. އަދި ތިމާއަކީ އަނިޔާކުރާ މީހަކަށް ނުވިއަސް ބައެއްފަހަރު ކުދިން ރުޅިގަދަވުމުން މީހުންގެ ގައިގައި ޖަހައި ތަކެތިއުކާ ފަހަރު އާދެއެވެ. އޭގެ ބަދަލުގައި އަމަލީގޮތުން ރުޅިވެރިކަން ފާޅުނުކޮށް ރުޅިއައުމުން އެކަން ބުނެދޭނެގޮތް ކިޔައިދޭށެވެ. މިސާލަކަށް ސްކޫލުގައިވެސް ދަރިފުޅު ރުޅިގަދަވާ ސަބަބު އޮޅުންފިލުވާށެވެ. އަދި އެފަދަކަމެއް ދިމާވުމުން ޓީޗަރ ކައިރީގައި ބުނުމަށް ދަރިފުޅުކައިރީގައި ބުނާށެވެ. އަދި ދެރަވާކަމެއް ދިމާވިއަސް އުފާވާކަންތައް ދިމާވުމުން ކިޔައިދޭގޮތަށް މައިންބަފައިންނާއި ހިއްސާކުރުމަށް ބާރު އަޅާށެވެ.
5. ދަރިފުޅު ކުރާ ރަނގަޅު ކަންތައް ފާހަގަކުރުން
ދަރިފުޅު ގޯސްކަމެއް ކުރުމުން އެކަންތައްތައް ރަނގަޅު ކުރާނެގޮތް ކިޔައިދޭގޮތަށް ރަނގަޅުކަމެއް ކުރުމުން އެކަމުގެ އުފާފާޅުކުރާށެވެ. ދަރިފުޅު ތިކުރީ ވަރަށް ރަނގަޅުކަމެއް ކަމަށް ބުނެ އެކަމާއުފާވާކަން އަމަލީގޮތުން ދައްކާށެވެ. އެއީ ރަނގަޅު ކަންތައް ކުރުމަށް ދެވޭ ހިތްވަރެކެވެ.
6. ގުދުރަތީ މާހައުލެއްގައި އުފާވެރި ވަގުތުތަކެއް ހޭދަކުރުން
ދަރިފުޅުގެ އުޅުމަށް ބަދަލު އަންނަނަމަ އުފާވެރި ވަގުތުތަކެއް ހޭދަކުރުމަށް އިސްކަން ދޭށެވެ. ޕްރީ ސްކޫލުގައި އުޅޭ ކުދިންނަކީ އުމުރުގެ ގޮތުން ބަލާއިރު 6 އަހަރުން ދަށުގެ ކުދިންނެވެ. ހަފްތާ ބަންދުގައި ޕާކަށް ދިއުން، މޫދަށް ދިއުން ފަދަ ގުދުރަތީ ހިތްގައިމު މާހައުލެއްގައި ގިނަވަގުތު އެކުދިންނާއެކު ހޭދަކުރުމަށް މަސައްކަތްކުރާށެވެ. އަދި ގޭގައި އުޅޭ ވަގުތުތަކުގައި ވެސް އަބަދު ފޯނާއިކުޅުމުގެ ބަދަލުގައި އެކުދިންނާއެކު ކިޔަވާ، ކުޅެ ހެދުމަށް ވަގުތު ހުސްކުރާށެވެ. އެއިރުން ލިބޭ ހިތްހަމަޖެހުން ބޮޑުވާނެއެވެ.
ކުދިންގެ ރުޅި ކޮންޓްރޯލުކުރުމަށް ހިތްވަރާއެކު މަސައްކަތްކުރާށެވެ. ސްކޫލުގައި މާބޮޑަށް ރުޅިގަދަކުރާނަމަ ޓީޗަރާއި ވާހަކަދައްކާށެވެ. ދަރިފުޅަށް ވިސްނައިދީގެން ދިމާވާ މައްސަލަތައް ހައްލުކޮށްދޭން ދަސްކޮށްދީ ދަރިފުޅަކީ އުފާވެރިކުއްޖަކަށް ހެދުމަށް ކުރެވެންހުރި މަސައްކަތެއް ކުރާށެވެ.
