އިސްލާމް ދީނަކީ އިންސާނާ މާތްކުރައްވައި އޭނާގެ ނަފުސު ރައްކާތެރިކުރެއްވި ދީނެވެ. އިންސާނާގެ ކަރާމާތަށް އުނިކަން ލިބިދާނެ ކަންކަމުން އޭނާގެ ނަފުސު ސަލާމަތްކޮށް ރައްކާތެރިކުރުމަށް އިސްލާމްދީން ވަނީ ބާރުއަޅުއްވާފައެވެ. އެއްވެސް ހައްގަކާނުލައި ތިމާގެ މުސްލިމް އަޚާގެ ނަފުސުގެ ކަރާމާތާއި އިއްޒަތް ނަގައިނުލުމަށް އިސްލާމްދީން ވަރަށް ބޮޑަށް ބާރުއަޅައެވެ.
" އެހެން މީހުންގެ ކުށްތަކާއި، އައިބުތަކާއި އުނި ސިފަތައް ހޯދައި ކަޝްފުކުރުން ވަނީ މަނާކުރައްވާފަ. ސަބަބަކީ އެއީ އިންސާނާގެ ދުނިޔެއާއި އާޚިރަތް ފަސާދަކުރާ ބަލިމަޑުކަމަކަށް ވުން. އެހެނީ މިފަދަ މީހުންނަށް ތިމާމެންގެ އުނި ސިފަތަކެއް ނުފެނޭ. އަބަދުމެ ފެންނަނީ އަނެކުންގެ އުނިސިފަތައް". ހުކުރު ޚުތުބާގައި ބަޔާންކޮށްފައިވެއެވެ.
ރަސޫލާ ﷺ އިރުޝާދު ދެއްވާފައި ވަނީ އެހެން މީހުންގެ އުނި ސިފަތައް ހޯދައި ބެލުމުގެ ބަދަލުގައި އެންމެ ފުރަތަމަ ކޮންމެ މީހަކު ވެސް އޭނާގެ އަމިއްލަ ނަފްސުގެ އުނި ސިފަތައް ބަލައި ހޯދައި، އެ ސިފަތައް ރަނގަޅު ކުރުމަށް އިސްކަންދިނުމަށެވެ. ތިމާގެ ބުރިކަށީގައިވާ ގުދުތައް ބަލައި އަނެކާގެ ބުރިކަށީގައިވާ ގުދަށް ނުބެލުމަށެވެ.
" މިއަދުގެ ހާލަތަށް ބަލާއިރު ބައެއް މީހުންގެ މަސައްކަތަކީ އަބަދުމެ، މީސްތަކުންގެ އުނިސިފަތައް ހޯދައި ސޯޝަލްމީޑިއާގައި އެކަންކަން ހާމަކުރުން. ބައެއްފަހަރަށް އެމީހުން މީސްތަކުންނަށް މަލާމާތް ކުރަނީ މީހުންގެ ހާލަތާއި ސިފައާއި ބެހޭގޮތުން. އަނެއްބައިފަހަރަށް މަލާމާތްކޮށް ނެތިމޮށެނީ، މީހުންގެ ހަސަބާއި ނަސަބާއި ބެހޭގޮތުން. އެފަދަ މީހުން ދެކޭގޮތުގައި އެމީހުންނަކީ އެއްވެސް އުނި ސިފައެއް ނެތް ފުރިހަމަ ބައެއް. އެހެން މީހުންނަކީ އުނި ބައެއް".
އެހެންމީހުންގެ އައުރަތައް ކަޝްފުކުރުމާ ދުރުހެލިވާށެވެ. އެހެންމީހުންނަށް މުސީބާތެއް ކުރިމަތިވުމުން ތިބާ އެކަމާ އުފާނުކުރާށެވެ. އަނިޔާވެރިކަމަކީ ތަފާތު ސިފަސިފައިގައިވާ ކަމެކެވެ. އޭގެ ތެރޭގައި އަމަލުން ކުރާ އަނިޔާއާއި ބަހުން ކުރާ އަނިޔާއާއި ނަފްސާނީ ގޮތުން ކުރާ އަނިޔާ ވެއެވެ. އަމަލުން ކުރާ އަނިޔާގެ ތެރޭގައި މީހުންގެ ނަފްސަށާއި އަބުރަށާއި މުދަލަށާއި އަދި އެމީހުންގެ ހައްގުތަކަށް އަރައިގަތުން ވެއެވެ. މީހުންނަށް ފުރައްސާރަކުރުމަކީ އެމީހުންގެ ނަފްސަށް ދެވޭ އަނިޔާއެކެވެ.
މާތް ﷲ ވަހީކުރައްވާފައިވާ އާޔަތެއްގެ މާނައިގައިވެއެވެ. މާނައީ "އޭ އީމާން ވެއްޖެ މީސްތަކުންނޭވެ. ފިރިހެނުންގެ އެއްބަޔަކު އަނެއްބަޔަކަށް ފުރައްސާރަ ނުކުރާހުށިކަމެވެ. އެހެނީ އެފުރައްސާރަ ކުރި މީހުންނަށްވުރެ، އެފުރައްސާރަ ކުރެވުނު މީހުން މާހެޔޮކަން ބޮޑުކަމުގައި ވެދާނެތެވެ. އަދި އަންހެނުންގެ އެއްބަޔަކު އަނެއްބަޔަކަށް ފުރައްސާރަ ނުކުރާހުށިކަމެވެ. އެހެނީ އެފުރައްސާރަ ކުރި މީހުންނަށްވުރެ، އެފުރައްސާރަ ކުރެވުނު މީހުން މާހެޔޮކަން ބޮޑުކަމުގައި ވެދާނެތެވެ. އަދި ތިޔަބައިމީހުންގެ އަމިއްލަ ނަފްސުތަކަށް ޢައިބު ނުކިޔާށެވެ. (އެބަހީ އެކަކު އަނެކަކަށް ޢައިބު ނުކިޔާށެވެ!) އަދި އެއްބަޔަކު އަނެއްބަޔަކަށް ނުރުހޭކަހަލަ ލަގަބުތަކުން ނުގޮވާށެވެ. އީމާންވުމަށްފަހު ފާސިޤުވުމުގެ ނަން ލިބުމަކީ ހާދަހާ ނުބައިވެގެންވާ ކަމެކެވެ. އަދި (އެކަންތަކުން) ތައުބާ ނުވި މީހާ (ދަންނާށެވެ!) ފަހެ އެއުރެންނީ ހަމަ އަނިޔާވެރިންނެވެ.
މައުލޫމާތު: ހުކުރު ޚުތުބާ
