ފުޓްބޯޅަ ފޯރީގައި އެތައްބަޔަކު ގަތަރަށް ދަތުރު ކުރަމުންދާއިރު އެ ގައުމުގެ ސަގާފީ ކެއުންތައް ތަޖުރިބާކޮށްލުމަކީ ވަރަށް މުހިންމު ކަމެކެވެ. މި ލިޔުމުގައި މިހިމަނާލަނީ ގަތަރުގެ މަޝްހޫރު 5 ކެއުމެއްގެ މައުލޫމާތެވެ.
1. ތަރީދު
މިކެއުމުން ފެންނަން ހުންނާނީ ކެރެޓް، އަލުވި، ފިޔާ، ބީންސް ފަދަ ބާވަތްތަކެވެ. މިއީ ތަރުކާރީގެ އިތުރަށް ކުކުޅު ނުވަތަ ބަކަރި މަސް ބޭނުންކޮށްގެން މިރުހާއި ޓޮމާޓޯސޯސް އަޅައިގެން ތައްޔާރުކުރާ ކެއުމެކެވެ. މީރުކޮށް ކާލެވޭނެ ގޮތަކަށް ރޮށިކޮޅުތަކެއްވެސް ހުންނާނެއެވެ. ބައެއް މީހުން މިކެއުމަށް ކިޔާއުޅެނީ 'ގަތަރީ ލަސަގްނާ' އެވެ.
2. މަޗްބޫސް ނުވަތަ ކަބްސާ
ގަތަރުގެ ކަބްސާ ފެންނަން ހުންނާނީ ބިރިޔާނީ ގޮތަށެވެ. ބޭނުންވައްތަރެއްގެ މަހެއް ބޭނުންކޮށްގެން ތައްޔާރުކުރާ މިބަތަކީ ވަރަށް މީރު އެއްޗެކެވެ. ކުކުޅުމަސް، ގެރިމަސް، ބަކަރިމަސް ފަދަ މަސްތައް ބޭނުންކޮށްގެން މި ބަތް ތައްޔާރުކުރާއިރު މިއީ ގަތަރުގެ ގެތަކުގައިވެސް އެންމެ އާންމު ކެއުމެކެވެ. މިކެއުމާއެކު ލުނބޯ ޖޫސް ބޭނުންކުރުމުން ރަހަ އިތުރަށް ފުރިހަމަކަމަށް ގަބޫލުކުރެވެއެވެ.
3. ހަރީސް
މިއީ ރަމަޟާން މަހުގައި އެގައުމުގައި ވަރަށް މަޝްހޫރު ކެއުމެކެވެ. އެނޫން ދުވަސްތަކުގައި ވެސް މިކެއުން ލިބެން ހުންނައިރު ތައްޔާރުކޮށްފައިވަނީ ހަނޑުލާއި މަސް ބޭނުންކޮށްގެންނެވެ.
4. ބަލަލީތް
ބަލަލީތަކީ އާންމުކޮށް ހެނދުނުގެ ނާސްތާއެއްގެ ގޮތުގައި ބޭނުންކުރާ ކެއުމެކެވެ. ފިނިކޮށް ނުވަތަ ހޫނުކޮށް މި ކެއުން ބޭނުންކުރެވިދާނެއެވެ. މިއީ އިންޑިއަން ކެއުމަށް ލޯބިކުރާ މީހުންނަށްވެސް މީރުވާނެ ކެއުމެއްކަމަށް ބެލެވެއެވެ.
5. މަހާލަބިޔާ
މަހާލަބިޔާ އަކީ ހަނޑޫ ހިމުންކޮށްގެން ތައްޔާރުކުރާ ޕުޑިންއެކެވެ. މި ޕުޑިން ތައްޔާރުކުރާއިރު އޭގެ މައްޗަށް އެމީހަކު ބޭނުންވާ ވައްތަރެއްގެ ބާވަތްތަކެއް އަޅާލެވިދާނެއެވެ. މިއީ ލުއިކެއުމަށް ލޯބިކުރާ މީހުންނަށް ރަނގަޅު ފޮނި ކެއުމެކެވެ. ގަތަރުގެ ކެއުންތަކާއެކު ރޭގަނޑުގެ ފަހުގެ ކެއުމަކަށް މިއީ ރަނގަޅުކެއުމެކެވެ.
