އިސްލާމީ އުއްމަތާ ކުރިމަތިވެފައިވާ މުސީބާތްތައް ގިރާކޮށްފައި ދެވޭވަރުގެ ގާބިލުކަން އިސްލާމީ އުއްމަތުގެ ވަޙްދަތުގައްޔާއި އެއްބަނޑުއެއްބަފައިކަމުގެ ގެތުންތަކުގައި އެބަ ހުއްޓެވެ. މިކަމަށްޓަކައި އެންމެ ފުރަތަމަ ކުރަންޖެހޭ ކަމަކީ އިސްލާމީ ވަހްދަތަށް ބޭނުންވާ ބިންގާ ވަރުގަދަ ކުރުމެވެ. އެކަމަށް ބޭނުންވާ އީމާންކަމުގެ އަސާސުތަކާއި ޝުޢޫރުތައް ހަރުދަނާކުރުމެވެ.
މުސްލިމުންގެ އެއްބައިވަންތަކަމާއި އިސްލާމީ އުޚުއްވަތްތެރިކަން ވަރުގަދަކުރުމަށްޓަކައި ކުރަންޖެހޭ ދެވަނަ ކަމަކީ، މުސްލިމުންގެ ހިތްތައް އެކަތިގަނޑަކަށް ހެދުމަށް، އެ މީހުންގެ ހިތްތަކުގައި އޯގާވެރިކަމާއި ކުލުނުވެރިކަމާއި ހިތެހެޔޮކަމުގެ ޝުޢޫރު އާލާކުރުމެވެ. މިކަމާ އަރާރުންވެދާނެ ކޮންމެ ކަމަކާ ދުރުހެލިވުމެވެ.
މާތް ނަބިއްޔާ މުޙައްމަދު ﷺ ވަނީ އައުސް ވަންހައާއި، ޚަޒްރަޖުވަންހައާއި ދެމެދުގައި އޮތް ދުވަސްވީ ހަތުރުވެރިކަމުގެ އަލިފާންގަނޑު ނިއްވާލައްވައި އަލިފާނުގެ ވަޅުގަނޑެއްގެ ތުންފަތްމަތިން އިސްލާމީ އުއްމަތް ދުރަށްލައްވައި ސަލާމަތްކުރައްވާފައެވެ. މިއަދުވެސް މުސްލިމުންނަށް މިކަން ނުކުރެވެންވީ ސަބަބެއް ނެތެވެ. މިކަމަށް ބޭނުންވާ އެއްގަލަކަށް އެރުމާއި އޯގާވެރިކަމާއި އެކަކު އަނެކަކަށް އަޅައިލުމުގެ ރޫޙު އިތުރުކުރާނެ ހަކަތަ މުސްލިމުންގެ ކިބާގައި އެބަހުއްޓެވެ. އެހެނީ މުސްލިމުންނަކީ އަޚުންތަކެކެވެ. އަޚުވަންތަކަމަކީ އީމާންކަމާ ގުޅިފައިވާ ކަމެކެވެ.
ބެލެނިވެރިންނާއި އެދުރުންނޭވެ. ދަރީންގެ ހިތްތަކުގައި އިސްލާމް ދީނަށް ލޯބި ޖެއްސުމާއި، އެ ދީން ގެނެސްދިން އެކުވެރިކަމާއި އެއްބައިވަންތަކަމާއި ވަޙްދަތު ދަރީންނަށް ދަސްކޮށްދީ އެގޮތުގެ މަތީ އެ ކުދިން ތަރުބިއްޔަތު ކުރުމަކީ ބެލެނިވެރިންނާއި އެދުރުންގެ މަސްއޫލިއްޔަތެކެވެ. އެ މަސްއޫލިއްޔަތު ފުރިހަމައަށް އަދާކުރާށެވެ.
އަހަރެމެންގެ މެދުގައި ވަޙްދަތު ޤައިމުކުރުމަށް ބޭނުންވާނަމަ އިސްލާމްދީނުގެ އަޚްލާޤުން އަހަރެމެން ޒީނަތްތެރިވާން ޖެހެއެވެ. އެއްބަޔަކު އަނެއްބަޔަކަށް އަޅާލައި ހެޔޮފޯރުވަން ޖެހެއެވެ. ރަޙްމަތްތެރިކަމާއި އެކުވެރިކަން ޤާއިމުކުރަން ޖެހެއެވެ. އެއްބަޔަކު އަނެއްބަޔަކާ ގުޅިގެން އުޅެންޖެހެއެވެ. ދެބަސްވުންތަކާއި އަރައިރުންތަކާއި ދުރުހެލިވާންޖެހެއެވެ. އިސްލާމީ ވަޙްދަތާއި އީމާންކަމުގެ އުޚުއްވަތްތެރިކަން ޤާއިމު ކުރެވޭނީ އަރައިރުންތަކާއި ދެބަސްވުންތަކާއި ބައިބައިވުމުން އެކަހެރިވެ ތިބެގެންނެވެ. އަމިއްލަ މަސްލަހަތުތަކާއި ދުނިޔަވީ މަންފާތަކަށްވުރެ މުޖުތަމަޢާއި ޤައުމާއި އުއްމަތުގެ މަސްލަހަތުތައް އިސްކޮށްގެންނެވެ.
އަހަރެމެން އެއްބައިވަންތަކޮށް އެކަތިގަނޑަކަށް ހަދައިދެނީ އަހަރެމެންގެ ތައުޙީދެވެ. މާތްވެގެންވާ އިސްލާމްދީނެވެ. އިސްލާމްދީން ގޮވައިލަނީ މުސްލިމުން އެއްބަޔަކު އަނެއްބަޔަކަށް ވާގިވެރިވެ ނަސްރު ދިނުމަށެވެ. މުސްލިމުން އެއްބަޔަކު އަނެއްބަޔަކަށް އަޅައިލުމަށެވެ.
އިސްލާމް ދީން ގޮވައިލަނީ އެއްބައިވަންތަކަމަށާއި، އެއްގަލަކަށް އެރުމަށެވެ. އެކަތިގަނޑަކަށް ވުމަށާއި، ބައިބައި ނުވުމަށެވެ. އެކަކު އަނެކަކު ދެކެ ރުޅިނައިސް އެއްބަނޑު އެއްބަފައި ބައެއްގެ ގޮތުގައި އުއްމަތް ބިނާކުރުމަށްޓަކައި އަތުގުޅައިލުމަށެވެ. ތައުޙީދުގެ ކަލިމައަށްފަހު އިސްލާމް ދީން ގެނެސްދީފައި ވަނީ ކަލިމައިގެ އެއްބައިވަންތަކަމެވެ. ޖަމާއަތާއި ސަފުތަކުގެ ވަޙްދަތެވެ.
މައުލޫމާތު: ހުކުރު ޚުތުބާ
