2019 ވަނަ އަހަރުން ފެށިގެން ކުރިމަތިވި ކޮވިޑުގެ ބަލިމަޑުކަމަށްފަހު ދިރިއުޅުމަށް ބޮޑެތި ބަދަލުތަކެއް ވަނީ އައިސްފައެވެ. މިއައި ބަދަލުތަކުގެ ސަބަބުން ކަންކަމާ މާބޮޑަށް ފިކުރު ބޮޑުވެ އެކަންތައްތައް ހައްލުކުރުމަށް ބައެއް މީހުންނަށް ވަނީ ދަތިތަކެއް ކުރިމަތިވެފަ އެވެ.
ޑރ. އަނާރާ ނަޢީމް މިވަނީ 'ފިކުރު ބޮޑުވުމާއި އެކަމުގެ ހައްލު' ނަމުގައި ޚާއްސަ ފޮތެއް ނެރުއްވައިފައެވެ. އާންމުކޮށް ގަންނަން ލިބެންހުރި މި ފޮތް ލިޔުއްވުމަށް ޝައުގުވެރިވިގޮތް ވަނީ ވިދާޅުވެފައެވެ.
" ކޮވިޑްތެރޭގައި ވަރަށް ގިނަ މީހުންގެ ކަންބޮޑުވުންތައް އަޑުއިވުނު. އަޅުގަނޑަށް ފާހަގަވީ އެންމެންގެވެސް އުޅެނީ އެއް މައްސަލައެއްކަން. އެއީ މާބޮޑަށް ވިސްނުން. ކުޑަކުޑަކަމަކާ ވެސް މާބޮޑަށް ވިސްނެނީ. އެކަނި އެކަން ހައްލުކުރަން ނޭގޭވަރަށް ވިސްނެނީ. އެހެންވެ މީހުންނަށް އެހީއަކަށް މިފޮތް ލިޔުނީ. އަބަދަކު އެހީވާނެ މީހުންނެއް ނުތިބޭނެ". ޒީޓައިމްސް އަށް މައުލޫމާތު ދެއްވަމުން އަނާރާ ވިދާޅުވިއެވެ.
މީގެ ދެއަހަރު ކުރިން ލިޔުއްވަން ފެއްޓެވި މިފޮތް ލިޔުއްވައިފައި ވަނީ މީހުން ޝައުގުވެރިވާނެ ގޮތަށް ވާހަކައެއްގެ ގޮތުގައެވެ. އެ ވާހަކައިގައި އުޅޭ ކުއްޖާއަށް ދިމާވާ ކަންތައްތަކާއި، އެކަންތައްތައް ހައްލުކުރާނެ ގޮތުގެ މައުލޫމާތު ވަނީ ހިމަނުއްވާފައެވެ. ކަންކަމުގައި މާބޮޑަށް ނުވިސްނާ އެކަންތައް ހައްލުކުރާނެ ގޮތް ބަޔާންކޮށްފައި ވެއެވެ. ކީއްވެ؟ ކުރާހިތެއް ނެތް؟ ދެން ހަދާނީ ކިހިނެއް؟ ނުވާނެ؟ ހިތުގައި އުފެދޭ މިފަދަ ސުވާލުތަކަށް ޖަވާބު ވަނީ ލިޔުއްވާފައެވެ.
އިންޓަވިއު ނިންމާލަމުން ޑރ އަނާރާ ވިދާޅުވީ އަބަދުވެސް މީހުންނަށް އެހީތެރިކަން ފޯރުކޮށްދިނުމަށް ބޭނުންވާ ކަމަށެވެ. ދިރިއުޅުމުގައި ދިމާވާ ކަންތައްތަކަށް ރަނގަޅު ޚިޔާލު ދޭން ބޭނުންވާ ކަމަށެވެ. ދުޅަހެޔޮ މުޖުތަމައަށްޓަކައި އެންމެން ގުޅިގެން މަސައްކަތް ކުރަންޖެހޭ ކަމަށާއި، ރަނގަޅު މައުލޫމާތު ހިމެނޭ ފޮތްތައް ކިޔުމަށް އިސްކަން ދިނުމަކީ މުހިންމުކަމެއް ކަމަށް ފާހަގަކުރެއްވިއެވެ.
މި ފޮތް ލިޔުއްވިއިރު ނަފްސާނީ ދުޅަހެޔޮކަމާއި ގުޅޭ ތަޖުރިބާކާރު ބޭފުޅުންނާއި، ޑޮކްޓަރުންނާއި، ދީނީގޮތުން ކަންތައް އޮންނަގޮތް ބައްލަވާ ދިރާސާކުރައްވާފައިވެއެވެ. އަދި ބައެއް ދިރާސާތަކަށް ހަވާލާދީފައިވެއެވެ.
ކޮންމެ މީހަކުވެސް ކިޔާލަން ރަނގަޅު މިފޮތް ގަތުމަށް 7284910 މި ނަންބަރަށް ގުޅާލައިގެން ނުވަތަ މެސެޖު ކޮށްގެން އޯޑަރު ކުރެވިދާނެ އެވެ. ފޮތުގެ އަގަކީ 150 ރުފިޔާ އެވެ.
