މި ދެމަފިރިންނަށް އެއްމާބަނޑު 5 ކުދިން ލިބުނުއިރު އިތުރު 2 ކުދިން ތިއްބެވެ. އެއީވެސް 4 އަހަރުން ދަށުގެ ދެކުދިންނަށްވުމާއެކު އެއްފަހަރާ 7 ކުދިން ބަލަހައްޓަން ޖެހުން މިއީ ފަސޭހަ ކަމަކަށް ނުވާނެއެވެ. އެހެންނަމަވެސް މި ދެމަފިރިންގެ މަސައްކަތުން މިވަނީ މި ކުދިންތައް އެންމެ ފަސޭހަގޮތަކަށް ބެލުމަށް އާ އީޖާދުތަކެއް ކޮށްފައެވެ.
އެއްފަހަރާ ކުދިންނަށް ބުއްފުޅި ދިނުމާއި ނެޕީ ބަދަލުކުރުމަކީ ދިމާވި އެންމެ ބޮޑު ގޮންޖެހުމެވެ. ނެޕީ ބަދަލުކުރާ ކޮންމެ ފަހަރަކު އެއްފަހަރާ 5 ނެޕީ ބަދަލުކުރަންޖެހެއެވެ. މިކުދިންގެ ބެލެނިވެރިން ކަމުގައިވާ އަމީ އަދި ޗޭޑް ފާހަގަކުރިގޮތުގައި މި 7 ކުދިން ލިބުމުގެ ކުރިން އެމީހުންނަށް ވަނީ ދަރިމައިވުމުގެ މައްސަލަ ކުރިމަތިވެފައެވެ. ތަފާތު ފަހަރުމަތިން ބައިގެން ދިޔައިރު ބަނޑަށް 22 ވަނަ ހަފްތާގައި ވަނީ އެއްމާބަނޑު ދެފިރިހެން ކުދިންވެސް މަރުވެފައެވެ.
" ބިރުވެސް ގަތް އެއްފަހަރާ 5 ކުދިންނަށް ބަނޑުބޮޑުކަން އެނގުނުއިރު. އެކަމަކު ލޮލުން އެވަގުތު ހިފެހެއްޓުމެއްނެތި ކަރުނައައި. ދިމާވި ހިތްދަތި ކަންތައްތަކަށްފަހު އެއްފަހަރާ މިހާ ގިނަ ކުދިން ލިބެން އުޅޭކަން އެނގުމުން".
އަމީގެ ބަނޑަށް 27 ހަފްތާ ވުމުން ވަނީ ސިޒޭރިއަން ހެދުމަށްފަހު 5 ކުދިންވެސް ނަގާފައެވެ. ދުވަސްފުރެން 3މަސް ދުވަސް އޮތްކަމުގައިވިއަސް އެހާއަވަހަށް ސިޒޭރިއަން ހަދަން ޖެހުނީ މައިމީހާ އާއި ކުދިންގެ ވެސް ރައްކަލަކަށްޓަކައެވެ.
ހޮސްޕިޓަލުގެ އެންއައިސީޔޫގައި 73 ދުވަސް ބޭއްވުމަށްފަހު މި 5 ކުދިން ގެއަށް ފޮނުވާލިއިރު ހުރިހާ ކުދިންގެ ހާލުވެސް ރަނގަޅެވެ.
" މިއީ މިކުދިންނަށް ޚާއްސަ ކޮށްފައިވާ ގެއެއް. ބޭނުންކުރަމުން އައި ފަރުނީޗަރުތަކުގެ ބަދަލުގައި އެ ކުދިންނަށް ބޭނުންވާނެ ތަކެތި މިހިރީ ބަހައްޓާފަ. އަޅުގަނޑު ވަޒީފާ އަށް ދާއިރު އަންހެނުންނަށް ފަސޭހައިން ކުދިން ބެލޭނެ އިންތިޒާމް މިވަނީ ހަމަޖައްސާފަ. ފަސޭހައިން ބުއްފުޅި ދިނުމަށް 'ޕްރޮޕް ފީޑިންގ ސިސްޓަމެއް' މިވަނީ ގާއިމްކޮށްފަ. ބުއްފުޅީގައި ހިފަހައްޓަން މީހަކު ބޭނުމެއް ނުވާނެ". މިކުދިންގެ ބައްޕަ އިންޓަވިއުގައި ފާހަގަކޮށްފައިވެއެވެ.
އެއްމާބަނޑު މި 5 ކުދިންނަށް ކާން ދިނުމަށް ގޮނޑިތައްވެސް ހުންނަނީ މޭޒެއްގެ ގޮތަށް ހަދާފައެވެ. އެއިރުން ކުދިންނަށް އެ މޭޒުގައި ހަރުކޮށްފަ ހުންނަ ގޮޑިތަކުގައި ބައިންދައިގެން ކާން ދޭން ފަސޭހަވާނެތީއެވެ. އެއްތަނުން އަނެއްތަނަށް ކުދިން ގެންދިއުމަށް ބޭނުންކުރާ ސްޓްރޯލަރ ގައި ވެސް ކުދިންގެ ހެދުމާއި ނެޕީ ފަދަ ތަކެތި ބެހެއްޓޭނެ އިންތިޒާމު ހަމަޖައްސައި އެއްފަހަރާ 5 ކުދިން ގޮވައިގެން ދެވޭނެ ގޮތަށް ވަނީ ހަމަޖައްސާފައެވެ.
7 ކުދިންނާއެކު ކެލިފޯނިއާ އަށް ދިރިއުޅުން ބަދަލުކޮށްފައިވާއިރު، މި ދެމަފިރިން ފާހަގަކޮށްފައިވާ ގޮތުގައި މި ކުދިން ބެލުމަކީ ލިބޭ ވަރަށް ބޮޑު އުފަލަކާއި ހިތްހަމަޖެހުމެކެވެ. ބަލާބެލުމަށް މިއީ ވަރަށް އެއްވައްތަރު ލޯބި ކުދިންތަކެކެވެ.
މައުލޫމާތު އަދި ފޮޓޯ: 'ނައު ދިސް ނިވްސް'/ ފޭސްބުކް
