ސޯޝަލް މީޑިއާ އިން އާންމުވާ ބައެއް ވީޑިއޯތަކަކީ ބަލާލަން އުދަގޫ ކަންބޮޑުވާފަދަ މަންޒަރުތައް ހިމެނޭ ވީޑިއޯތަކެކެވެ. ބޭއަދަބީ ބަސްތަކުން ކުދިންނާއި މުހާތަބުކޮށް، އެކުދިން ރުޅިއަރުވާ އަނިޔާކުރާ ވީޑިއޯ އާންމުވުމުން ދޭހަވަނީ މިފަދަ ކުށްކުރާ މީހުން މިމުޖުތަމައުގައި އުޅޭކަމެވެ.
ޤާނޫނުގައި ބުނަނީ ކީކޭ؟
" ކުޑަކުދިންގެ ހައްގުތަކަށް އުނިކަން ލިބޭގޮތަށް ވާހަކަދެއްކުމާއި، އެކުދިންގެ ހައްގުތަކަށް އުނިކަން ލިބޭނެފަދަ ކަންކަމަށް ހިތްވަރުދިނުމަކީ މަނާކަމެކެވެ. މިފަދައިން އެއްވެސް ފަރާތަކުން އަމަލުކޮށްފިނަމަ، އެކަން ތަހްގީގުކޮށް އެކަމުގެ ކުޑަބޮޑުމިނަށާއި، އެކަން ތަކުރާރުވާ މިންވަރަށް ބަލައި އެކަމުގައި ޝާމިލުވާ ފަރާތްތައް ޖޫރިމަނާކުރުން ނުވަތަ އާންމުންނަށް ޚިދުމަތެއް ދިނުމުގެ ލައިސެންސް ލިބިފައިވާ ފަރާތެއްނަމަ، ލައިސެންސް ހިފެހެއްޓުންފަދަ ފިޔަވަޅުތައް މިނިސްޓަރު އަޅަންވާނެއެވެ". ކުޑަކުދިންގެ ހައްގުތަށް ރައްކާތެރިކުރުމުގެ ގާނޫނުގައި ބަޔާންކޮށްފައިވެއެވެ.
ކުޑަކުދިން ރުޅިއެރުވުމަކީ މަޖާކަމެއް ނޫން!
ސްކޫލު މާހައުލުގައިވެސް އަދި އެނޫން ތަންތާގައިވެސް ކުޑަކުދިން ރުޅިއަރުވައި އެކުދިންނާއިމެދު އިހާނެތިކޮށް އަމަލުކުރާއިރު ވިސްނަން އެބަޖެހެއެވެ. އެމަންޒަރު ފެންނަ މީހުން އެކަން ހުއްޓުވަން ޖެހެއެވެ. ދާދިފަހުން ސްކޫލެއްގެ ކުލާސް ރޫމެއްގައި ދަރިވަރަކު އެހެން ދަރިވަރަކަށް އަނިޔާކުރި ވީޑިއޯއެއް އާންމުވެފައިވެއެވެ. އެވީޑިއޯގައި ކުލާސް ޓީޗަރެއްވެސް ފެންނަން ހުރިއިރު އެއީ ކުލާހެއްގެތެރޭގައި ހިނގައިގެން ވާނެ ކަމެއް ނޫނެވެ. އެއަށްވުރެ ރައްކާތެރި މާހައުލަކަށް ވާންޖެހެއެވެ. އެފަދަ ދަރިވަރުންނާއިމެދު ވަގުތުން ފިޔަވަޅު އަޅަންޖެހެއެވެ. އެއީ އެހެން ކުދިންގެ ވެސް ރައްކަލަކަށްޓަކައެވެ.
ބެލެނިވެރިއަކު ދެކޭގޮތް:
ސްކޫލެއްގައި ކިޔަވަމުން އަންނަ 10 އަހަރުގެ ކުއްޖެކެވެ. ފަހަކަށް އައިސް އެކުއްޖާ ސްކޫލަށް ގެންދާ ފޮތްތައް ހުންނަނީ ވީދާލާފައެވެ. ދަރިފުޅު ގެއަށް އައިސް ރޮނީ އެވެ. މިވަނީ ކީއްތޯ ބެލުމަށް ބެލެނިވެރިޔާ ސްކޫލަށް ދިއުމުން އެނގުނީ ސްކޫލު މާހައުލުން އެކުއްޖާ އާއި ދިމާކޮށް އިހާނެތިކޮށް އަމަލުކުރާ ކުއްޖަކު އުޅޭކަމެވެ.
" އަޅުގަނޑު ދަރިފުޅު ހުންނަނީ ތަންކޮޅެއް ފަލަކޮށް ކުލަ އަނދިރިކޮށް. އެހެންވެ 'ފަލަ ކަޅު ބެރު' މިފަދައިން ގޮވާ ދަރިފުޅާއި ދިމާކޮށް ފޮތްތައް ވީދާ ހަދާކުއްޖެއް އުޅޭ. އެކަމަކު އެކަން ކުލާސްރޫމުގައި ކުރާއިރުވެސް ނުހުއްޓުވޭ. އެކަން ވާނީ ސްކޫލު މެނޭޖްމެންޓާއި ހިއްސާކޮށްފަ. ދެން އެފަދަ ކަމެއް ކޮށްފިނަމަ އެކަން ކުރި ކުއްޖާ ސްކޫލުން ވަކިކުރާ ހިސާބަށް މައްސަލަ ގޮއްސަ އޮތީ".
މިފަދައިން ދިމާވި ކުއްޖާއަށް ދަނީ ކައުންސިލިން ވެސް ދެމުންނެވެ. އެކުއްޖާ އަކީ ވަރަށް މޮޅު ދަރިވަރެކެވެ. އެހެންނަމަވެސް ސްކޫލަށް ދާން ފޫހިވެ އަމިއްލަ ނަފްސަށް ކުރާ އިތުބާރު ކުޑަވެ ކާން ބޭނުންނުވުން ފަދަ މައްސަލަތައް ވަނީ ދިމާވެފައެވެ. އެކުއްޖާގެ ހައްގު ކަށަވަރު ކޮށްދޭން އެބަޖެހެއެވެ. މިމުޖުތަމައުގައި މިފަދަ އެތައް ހާދިސާ އެއް ދަނީ ހިނގަމުންނެވެ.
ދިވެހިރާއްޖޭގައި ދިރިއުޅޭ ކޮންމެ ކުއްޖަކަށްވެސް އެއްވެސް ތަފާތުކުރުމެއް ނެތި އުނގެނުމުގެ ހައްގު ލިބިގެންވެއެވެ.
ކުޑަކުދިންގެ ކަރާމަތަށް އުނިކަން އަންނަ މައުލޫމާތު އާންމުނުކުރޭ
ކުޑަކުދިންގެ މޫނު ސާފުކޮށް ފެންނަގޮތަށް ހުންނަ އެކުދިންގެ ކަރާމަތަށް އުނިކަން ލިބޭ ވީޑިއޯއާއި ފޮޓޯ އާންމުކުރަމުންދާ މީހުން ވިސްނަން އެބަޖެހެއެވެ. ކުޑަކުދިންގެ ކަރާމަތަށް އުނިކަން އަންނަގޮތަށް ކުޑަކުދިންގެ ޒާތީ މައުލޫމާތު އެއްވެސް ފަރާތަކުން އާންމުކޮށްގެން ނުވާނެ ކަމަށް ޤާނޫނުގައިވެސް ބަޔާންކޮށްފައިވެއެވެ.
ކުޑަކުދިން ރައްކާތެރިކުރުމަކީ އެންމެންގެ ޒިންމާއެއް!
ކުޑަކުދިންނަށް އަޅާލުމާއި ރައްކާތެރިކަން ފޯރުކޮށްދިނުމަކީ މައިންބަފައިންނާއި، އާއިލާއާއި، ބެލެނިވެރިންނާއި، މުޖުތަމަޢާއި، ދައުލަތާއި އެހެނިހެން ފަރާތްތަކުގެ ޒިންމާއެކެވެ. ރަހުމްކުޑަ، ލާއިންސާނީ ނުވަތަ ކުއްޖާ ލަދުގަންނާނެ ފަދަ އަދަބެއް ކުއްޖަކަށް ދީގެން ނުވާނެއެވެ.
އަނިޔާ ކުރުމާއި އިހުމާލުވުމުގެ ޝިކާރައަކަށްވާ ކުދިން އަނބުރާ މުޖުތަމައަށް ނެރުމަށް ބޭނުންވާ ޖިސްމާނީ އަދި ނަފްސާނީ ފަރުވާ ލިބުމުގެ ހައްގު ކޮންމެ ކުއްޖަކަށް ލިބިގެންވެއެވެ.
ޤާނޫނުގައި ކުޑަކުދިން ކަމުގައި ބުނެފައިވަނީ މައިމީހާގެ ބަނޑުގައި ގަރުބަގަތީއްސުރެ ދުނިޔެއަށް އުފަންވުމާ ދެމެދުގައިވާ ހާލަތުގައިވާ ކުދިންނާއި، ދުނިޔެއަށް އުފަންވުމަށްފަހު މީލާދީގޮތުން 18 އަހަރު ފުރިހަމަނުވާ ކުދިންނަށެވެ.
