މި ފެބުރުއަރީ މަހުގެ 6 ވަނަ ދުވަހު ތުރުކީ އާއި ސީރިއާ އަށް އައި ބިންހެލުމުގެ ސަބަބުން އިމާރާތްތައް ވެއްޓި ލިބުނު ގެއްލުންތަކުގައި މިހާތަނަށް ސައުވީސް ހާހަށްވުރެ ގިނަ މީހުން ވަނީ މަރުވެފައެވެ. މީގެތެރޭގައި ހިމެނެނީ ތުރުކީގެ 20665 މީހުންނާއި ސީރިއާގެ 3500 މީހުން ކަމަށް އަލްޖަޒީރާގައި ފާހަގަކޮށްފައިވެއެވެ.
82 ހާހަށްވުރެ ގިނަ މީހުން ޒަހަމްވެފައިވާ ކަމަށް ރިޕޯޓްތަކުގައި ފާހަގަކޮށްފައިވާއިރު، ގެދޮރު ގެއްލި އެކި ގޮތްގޮތުން އެތައް މިލިއަން މީހުންނަށް އަސަރު ކޮށްފައިވެއެވެ.
ސީރިއާ އާއި ތުރުކީ ގުޅޭ ސަރަހައްދީ އިން ކައިރިއަށް އައި ބާރުގަދަ 2 ބިންހެލުމަށްފަހު އިތުރު ބިންހެލުންތައް އަންނައިރު، އިމާރާތްތައް ވެއްޓި އެތަންތަނުގެ ދަށުވެފައި ތިބި މީހުން ސަލާމަތް ކުރުމުގެ މަސައްކަތް ކުރާތާ މިވަނީ 5 ދުވަސް ވެފައެވެ. މަރުވެފައިވާ އެތައްބައެއްގެ ހަށިގަނޑު ފެންނަމުންދާއިރު ދިރިތިއްބާ ވެސް ދަނީ އެކި އުމުރުގެ މީހުން ސަލާމަތް ކުރަމުންނެވެ. އާއިލާތަކުގެ ގިނަ ބަޔަކު ނިޔާވެ، ބައެއް މީހުން ވީނުވީއެއް ނޭނގި ގެއްލިފައިވާއިރު، ޒަޚަމްވެފައި ތިބި މީހުންނަށް ދަނީ ފަރުވާ ދެމުންނެވެ.
މީގެތެރެއިން އެންމެ ހިތަށް އަސަރު ކުރުވި އެއް މަންޒަރަކީ ބިންހެލުމުގެ ސަބަބުން ވެއްޓިފައިވާ ގެއެއްގެ ދަށުގައި ވިހެއި ކުއްޖެއް ސަލާމަތްކުރާ ވީޑިއޯ އެވެ. މިކުއްޖާ ވިހެއުމަށްފަހު މަންމަ މަރުވެފައިވާއިރު މިކުއްޖާ އަށް ދަނީ ހޮސްޕިޓަލުގައި ފަރުވާ ދެމުންނެވެ. ލޯބިވާ މައިންބަފައިންނާއި އެއްބަނޑުއެއްބަފާ މީހުން މަރުވެ އާއިލާއިން ސަލާމަތްވި ކުއްޖެއްގެ ދުލުން އެކުއްޖާގެ އާއިލާގެ މީހުން މަރުވިކަމަށް ބުނާ ވާހަކައަކީ ވެސް އަޑުއަހާލަން ފަސޭހަ ވާހަކައެއް ނޫނެވެ. ވޭތުވެދިޔަ 5 ދުވަހު މިފަދަ އެތައް ހިތާމަވެރި މަންޒަރުތަކެއް މިސަރަހައްދުން ދަނީ ފެންނަމުންނެވެ. މިއީ ކޮންފަދަ ހިތްދަތިކަމެއް ހެއްޔެވެ.
ދާޚިލީ ހަނގުރާމައެއްގެ ތެރޭގައި އޮންނަތާ އަހަރުތަކެއް ވެފައިވާ ސީރިއާގައި ގެއްލުން ލިބުނު ސަރަހައްދުގައި ދިރިއުޅޭ މީހުންގެ ހާލަތު ވަރަށް ދަށެވެ. އަސާސީ ބޭނުންތައް ފުއްދުމަށް ވަނީ އިންތިހާއަށް ދަތިތައް ކުރިމަތިވެފައެވެ. ތުރުކީ އަދި ސީރިއާގައި ހާލުގައި ޖެހުނު މީހުންނަށް އެހީތެރިކަން ފޯރުކޮށް ދިނުމަށް ވެސް ދަނީ ގޮންޖެހުންތައް ދިމާވަމުންނެވެ. މަގުތައް ހަލާކުވެ، ކަރަންޓްކެނޑުމުގެ އިތުރަށް އެއްފަހަރާ އެތައްހާސް ބަޔަކު މަރުވުމުން ނަފްސާނީ ގޮތުން ވެސް މިކަމުގެ އަސަރު ވަނީ ވަރަށް ބޮޑަށް ކޮށްފައެވެ. އަދި ވެއްޓެން ކައިރިވެފައިވާ އެތައް އިމާރާތެއް ހުރިއިރު މިސަރަހައްދުގައި ހަރަކާތްތެރިވުމަކީވެސް ރައްކާތެރިކަމެއް ނޫނެވެ.
މިދުވަސްވަރަކީ އާދަޔާ ޚިލާފަށް އެސަރަހައްދަށް ފިނި ދުވަސްވަރަކަށް ވުމުން ވަގުތީ ހިޔާވަހިކަމެއްގައި ދިރިއުޅެން ޖެހިފައިވާ މީހުންނަށް މިވަނީ ފިނިން ރައްކާތެރިވުމަށް ވެސް އެހީތެރިކަން ބޭނުންވެފައެވެ. އަދި ޒަރޫރީ ބޭނުންތަކަށް ބޭނުންވާ އެހީތެރިކަން ފޯރުކޮށް ދިނުމުގެ މަސައްކަތް އެކި ގައުމުތަކުން ކުރަމުން އަންނައިރު އަޅުގަނޑުމެން ދިވެހީން ވެސް ވެވުނު މިންވަރަކުން އެހީތެރިކަން ފޯރުކޮށްދޭން ވީއެވެ.
ހާލުގައި ޖެހިފައިވާ މީހުންނަށް އެހީތެރިކަން ފޯރުކޮށްދިނުމަށް ހަރަކާތްތެރިވާ އިންޓަނޭޝަނަލް އެއިޑް ކެމްޕެއިން (އައިއޭސީ) މެދުވެރިކޮށް އެހީތެރިވެވިދާނެއެވެ. އައިއޭސީގެ ޓީމެއް ދަނީ ތުރުކީ އަދި ސީރިއާގައި ހާލުގައި ޖެހިފައިވާ މީހުންނަށް އެހީތެރިކަން ފޯރުކޮށްދެމުންނެވެ. ރާއްޖޭގެ މަޝްހޫރު ޑޮކްޓަރ މުހައްމަދު އަލީ ވެސް ދަނީ އައިއޭސީ ޓީމާއެކު ތުރުކީ އަށް ވަޑައިގެން އެހީތެރިކަން ފޯރުކޮށްދިނުމުގެ މަސައްކަތް ކުރައްވަމުންނެވެ.
އެހީތެރިކަން ފޯރުކޮށްދިނުމަށް ތިރީގައިވާ އެކައުންޓް ޚިޔާރު ކުރައްވާ!
ބީއެމްއެލް އިސްލާމިކް
އެކައުންޓް ނަންބަރު: 7770000062741
އެކައުންޓް ނަން: އިންޓަނޭޝަނަލް އެއިޑް ކެމްޕެއިން
ތުރުކީ އާއި ސީރިއާ އަށް އައި ބިންހެލުމާއި ގުޅިގެން ހުޅުވާލެވުނު އެމަޖެންސީ ފަންޑުގެ ދަށުން ދިވެހި ރައްޔިތުން ވަމުންދާ އެހީ ސީރިއާގެ ހާލުގައިޖެހުނު ފަރާތްތަކަށް ވަނީ ބަހަން ފަށައިފައެވެ. މިގޮތުން ކާނާ އާއި ބޯފެން އަދި ރަޖާ ދަނީ ހަދިޔާކުރަމުން ކަމަށް މިކެމްޕެއިން ކުރިއަށްގެންދާ އިންޓަނޭޝަނަލް އެއިޑް ކެމްޕެއިން (އައިއޭސީ) ފޭސްބުކް ޕޭޖުގައި ބަޔާންކޮށްފައިވެއެވެ.
