ސްޓެލްކޯ އިން އަންނަނީ ހައްޖާއި އުމްރާގެ އަޅުކަން އަދާކުރަން ދިއުމުގެ ފުރުސަތު މުވައްޒަފުންނަށް ހޯދައިދެމުންނެވެ. މިގޮތުން 1444 ވަނަ އަހަރުގެ ހައްޖު އަދި އުމްރާގެ އަޅުކަމުގެ ފުރުސަތު ލިބޭ މުވައްޒަފުން ގުރުއަތުން ހޮވާފައިވަނީ، މިދިޔަ ބުދަ ދުވަހުގެ ރޭ ކުޑަގިރީގައި ބޭއްވި މިއަހަރުގެ އަންހެނުންގެ ދުވަސް ފާހަގަކުރުމަށާއި، ރަމަޟާން މަހަށް މަރުހަބާ ކިއުމުގެ އިތުރުން ކުންފުނިން ދޭ ހައްޖު އަދި އުމްރާގެ ފުރުސަތަށް ގުރުއަތު ނެގުމަށް ބޭއްވި ރަސްމިއްޔާތުގައެވެ.
ހައްޖާއި އުމްރާގެ މަތިވެރި އަޅުކަން އަދާކުރުމަށް އަންހެން، ފިރިހެން މުވައްޒަފުން ވަކިން ކުރިމަތިލުމަށް ހުޅުވާލި ފުރުސަތުގައި ހައްޖުގެ އަޅުކަން އަދާކުރުމަށް އެދި ހުށަހެޅި މުވައްޒަފުންގެ ތެރެއިން ޝަރުތު ފުރިހަމަވެފައިވަނީ ފިރިހެން 96 މުވައްޒަފުން އަދި އަންހެން 22 މުވައްޒަފުންނެވެ.
އުމްރާގެ އަޅުކަން އަދާކުރުމަށް އެދި ހުށަހެޅި މުވައްޒަފުންގެ ތެރެއިން ޝަރުތު ފުރިހަމަވެފައި ވަނީ ފިރިހެން 262 މުވައްޒަފުން އަދި އަންހެން 56 މުވައްޒަފުންނެވެ.
ގުރުއަތުން ހައްޖުގެ އަޅުކަން އަދާކުރުމަށް ހޮވިފައިވަނީ:
އަބްދުﷲ ޝަރީފް، ޓްރާންސްމިޝަން އެންޑް ޑިސްޓްރިބިއުޝަން ޑިޕާޓްމަންޓް
ހަދީޖާ ތަޢުފީގާ، ފައިނޭންސް އެންޑް އެކައުންޓްސް ޑިޕާޓްމަންޓް
ގުރުއަތުން އުމްރާގެ އަޅުކަން އަދާކުރުމަށް ހޮވިފައިވަނީ:
ޝާހުލް ހަމީދު، ސަރވިސް ސެންޓަރ
ފާތިމަތު ރިޒްނާ، ޕްރޮކިއުމަންޓް ޑިޕާޓްމަންޓް
'ޒީޓައިމްސް' އަށް މައުލޫމާތު ދެމުން ސްޓެލްކޯގެ ޕްރޮކިއުމެންޓް ޑިޕާޓްމަންޓްގައި ސީނިއަރ އޮފިސަރެއްގެ ގޮތުގައި ވަޒީފާ އަދާކުރަމުން އަންނަ ރިޒްނާ ބުނީ މިއީ މުޅި އުމުރުގައިވެސް ގުރުއަތުން ނަސީބު ދިމާވި ފުރަތަމަ ފަހަރު ކަމަށެވެ. ގުރުއަތުން ހޮވިގެން އުމްރާ ދަތުރު ލިބުނު ގަޑީގައި އެލިބުނު އުފާ ބުނެދޭންވެސް ނޭނގޭ ކަމަށް ވަނީ ފާހަގަކޮށްފައެވެ.
" ސްޓެލްކޯގައި ވަޒީފާ އަދާކުރާތާ 6 ވަނަ އަހަރު. މިދިޔަ އަހަރުވެސް އުމްރާ ދަތުރަށް ކުރިމަތިލިން. އެކަމަކު އެއިރު 5 އަހަރު ނުވާތީ ކޮލިފައިނުވޭ. މިއީ ކޮލިފައިވި ފުރަތަމަ ފަހަރު. ވަރަށް ތަފާތު އިހުސާސެއް. ވަރަށް އުފާވި. މިއަހަރު ފަހުކޮޅު މަންމަ އާއި ބައްޕައާއެކު އުމްރާ އަށް ދެވޭތޯ މިމަސައްކަތް ކުރަނީ. ޝުކުރު އަދާކުރާނީ އެންމެ ފުރަތަމަވެސް ހެއްދެވި ފަރާތަށް އެއަށްފަހު ހެޔޮދުޢާ ކޮށްދިން އެންމެންނަށާާއިި މަންމަ އާއި ބައްޕައަށް. ޑިޕާޓްމަންޓްގައި އެއްދުވަހު އެންމެންތިބެގެން ވަރަށް ފޯރިގަދަކޮށް މަޝްވަރާކުރީ ޝަރުތުހަމަވާ އެންމެން ކުރިމަތިލާނީ އޭ. އެންމެން އެކީގައި އުޅެގެން ފޯމު ފުރައިގެން ކުރިމަތިލީ. ޑިޕާޓްމަންޓް އެންމެންނަށް ވަރަށް ބޮޑަށް ޝުކުރު އަދާކުރަން ބޭނުން. އަދި ކުންފުނިން މިފަދަ ފުރުސަތެއް މަގުފަހިކޮށްދޭތީ ޝުކުރިއްޔާ". ޒުވާން އުމުރުގައި އުމްރާގެ ދަތުރުގެ ފުރުސަތު ލިބުނު ރިޒްނާ ފާހަގަކުރިއެވެ.
ފައިނޭންސް އެންޑް އެކައުންޓްސް ޑިޕާޓްމަންޓްގައި އެސިސްޓެންޓް މޭނޭޖަރެއްގެ ގޮތުގައި މަސައްކަތް ކުރަމުން އަންނަ ހަދީޖާ ތަޢުފީގާ ފާހަގަކުރި ގޮތުގައި، ކަންދިމާކުރިގޮތުން ހައްޖުދަތުރު ގުރުއަތުނަގައި އިއުލާންކުރި ހަފްލާގައި ބައިވެރި ނުވެވުނެވެ.
" ވަރަށް އުފާވި. ހައްޖުދަތުރަށް ހޮވުނުކަން އެނގުނީމަ. ފުރަތަމަ ޔަގީންވެސް ނުވި. ގަބޫލުކުރަން ދަތިވެފަހުރީ. ސްޓެލްކޯއިން ހައްޖުދަތުރު ދޭންފެށި ފަހުން ކޮންމެ ފަހަރަކު ކުރިމަތިލަން. އުންމީދު ކުރަނީ އަންނަ އަހަރު ހައްޖަށް ދެވޭނެ ކަމަށް" ސްޓެލްކޯގައި މަސައްކަތްކުރާތާ 23 އަހަރު ވެފައިވާ ހަދީޖާ ފާހަގަކުރިއެވެ.
ސްޓެލްކޯ އިން ދެމުންދާ ހައްޖުގެ އަޅުކަމުގެ ފުރުސަތު ދެނީ ކުންފުންޏަށް 15 އަހަރު ހިދުމަތް ކޮށްދީފައިވާ މުވައްޒަފުންގެ ތެރެއިން އެކަމަށް ކުރިމަތިލާ އަންހެން މުވައްޒަފަކަށާއި ފިރިހެން މުވައްޒަފަކަށެވެ. އުމްރާގެ އަޅުކަމުގެ ފުރުސަތު ދެނީ ކުންފުންޏަށް 5 އަހަރު ހިދުމަތް ކޮށްދީފައިވާ މުވައްޒަފުންގެ ތެރެއިން އެކަމަށް ކުރިމަތިލާ އަންހެން މުވައްޒަފަކާއި ފިރިހެން މުވައްޒަފަކަށެވެ.
