އަހަރެމެންގެ މުޖުތަމައުގައި އިޙްތިރާމް ނުކުރުމުގެ އިޖްތިމާޢީ ވަބާ މިއަދު މިވަނީ ފެތުރިފައެވެ. ދަރީން މައިންބަފައިންނަށް، މައިންބަފައިން ދަރީންނަށް، އަވަށްޓެރީން އަވަށްޓެރީންނަށް، ދަރިވަރުން އުސްތާޛުންނަށް، އުސްތާޛުން ދަރިވަރުންނަށް، މުވައްޒަފުން ވެރީންނަށް، ވެރީން މުވައްޒަފުންނަށް އިޙްތިރާމު ކުރުން ވަނީ ހިތާމަކުރަން ޖެހޭފަދަ މިންވަރަކަށް ކުޑަވެފައެވެ.
އަހަރެމެންގެ ނަބިއްޔާ ﷺ އަކީ މަތިވެރި އަޚްލާޤުގެ ނަބިއްޔާއެވެ. މުޅި އިސްލާމީ ރިސާލަތު ބިނާވެފައިވަނީ އަޚްލާޤުގެ މައްޗަށެވެ. އިޚްތިރާމު ކުރުމަކީ މި ދީނުގެ މަތިވެރި އަޚްލާޤުގެ ތެރޭގައި ހިމެނޭ ކަމެކެވެ. ﷲ ސުބުހާނަހޫ ވަތަޢާލާ އިންސާނާ އުފައްދަވާފައި ވަނީ އިޙްތިރާމު ލިބިގެންވާ މީހެއްގެ ގޮތުގައެވެ.
" އިންސާނާ އަކީ އިޙްތިރާމު ކުރުމަށް ލޯބިކުރާ މަޚްލޫޤެއް. އޭނާ އަށް އިހާނެތިކޮށް ހިތުމަކީ، އޭނާ ބަލައިގަންނާނެ ކަމެއް ނޫން. ދޭދޭ އިންސާނުންނާއި، ޤައުމުތަކުގެ މެދުގައިވާ ގުޅުންތަކެއްގެ އަސާސަކީ، އިޙްތިރާމު ކުރުން. އެއީ ތަހްޛީބާއި ތަމައްދުނު ހާމަކޮށްދޭ މަލައެއް. މީސްތަކުންގެ ހިތްތައް ފަތަޙަ ކުރެވޭނީ އިޙްތިރާމުން".
މާތް ﷲ އަހަރެމެންނަށް ގޮވައިލައްވަނީ މީސްތަކުންނަށް އިޙްތިރާމު ކުރުމަށާއި، އިސްލާމީ އަޚްލާގުން އަދަބުވެރިވެ މުޢާމަލާތު ކުރުމަށެވެ. މުސްލިމުންގެ ހައިސިއްޔަތުން އަހަރެމެން އެންމެ ބޮޑަށް އިޙްތިރާމު ކުރަންޖެހޭ ފަރާތަކީ މާތް ﷲ އެވެ. އަހަރެމެން އެކަލާނގެ ޒާތުފުޅު މަތިވެރިކޮށް، އެކަލާނގެ ދީނަށް އިޙްތިރާމު ކުރަންޖެހޭނެ އެވެ. ހަމައެއާއެކު އަހަރެމެން ކީރިތި ރަސޫލާ ﷺ އަށް މާތްކޮށް ހިތަން ޖެހޭނެއެވެ.
އިޙްތިރާމް ކުރަންޖެހޭ ފަރާތްތަކުގެ ތެރޭގައި އަނބިންނާއި ފިރިން ވެއެވެ. ޒަވާޖީ ޙަޔާތް ކާމިޔާބުވުމުގެ އަސާސަކީ އިޙްތިރާމު ކުރުމެވެ. އެކަކު އަނެކެއްގެ ސިއްރުތައް ހިފެހެއްޓުމެވެ. އެކަކު އަނެކަކަށްޓަކައި ޤުރުބާންވެ ހެޔޮއެދުމެވެ. އާއިލާތައް ރޫޅެނީ ދެމަފިރިން އެކަކު އަނެކަކަށް އިޙްތިރާމު ނުކުރުމުގެ ސަބަބުންނެވެ.
އިޙްތިރާމު ކުރުމުގެ ތެރޭގައި އިޖްތިމާޢީ ގޮތުން އެއްބަޔަކު އަނެއްބަޔަކަށް އިޙްތިރާމުކުރުން ހިމެނެއެވެ. ދީނީ ގޮތުން ފާހަގަކުރެވޭ މުނާސަބާތަކުގައި ތަހުނިޔާ ކިޔުމާއި، ހަދިޔާބަދިޔާ ބަދަލުކުރުމާއި، ހިތާމަތަކުގައި ތަޢުޒިޔާ ކިޔައި އުފަލާއި ހިތާމައިގައި ބައިވެރިވުމާއި، ދަތިކަމެއް ކުރިމަތިވުމުން އެކަމުން ސަލާމަތްވުމަށް އެހީވުމަކީ އިޙްތިރާމު ކުރުމުގެ ތެރޭގައި ހިމެނޭ ކަންތައްތަކެވެ.
އިޙްތިރާމު ކުރުމުގެ ތެރޭގައި އެހެން މީހުންގެ ސިއްރުތައް ވަންހަނާކުރުން ވެއެވެ. މީހުންގެ ވާހަކަތައް ވަގަށް އަޑުއަހައި ފާޅުކުރުމާއި މީހުންގެ ފޮޓޯތަކާއި ވީޑިއޯތައް އާއްމުކުރުމަކީ އިޙްތިރާމުގެ ދާއިރާއިން މުޅިން ބޭރު ކަންކަމެވެ. މިއީ އިސްލާމީ ރިވެތި އަޚްލާޤާ އަރާރުންވާ ކަންކަމެވެ.
ޖަލްސާތަކާއި ބައްދަލުވުންތަކުގައި ހިނގާ ކަންތައްތަކާއި ދެކެވޭ ވާހަކަތަކަކީ ވެސް އެއަށް އިޙުތިރާމު ކުރަންޖެހޭ ސިއްރުތަކެވެ. އިޙުތިރާމު ކުރަންޖެހޭ ކަންތައްތަކުގެ ތެރޭގައި ތިބާއާއި އެހެން މީހުންގެ ވަގުތު ހިމެނެއެވެ. ވަގުތަކީ ޙަޔާތެވެ. ވަގުތަކީ ތިބާގެ ރައުސުލްމާލެވެ.
