ދުވާލުގެ އެންމެ މުހިންމު ކެއުމަކީ ހެނދުނުގެ ނާސްތާއަށް ވާއިރު ހެނދުނުގެ ކެއުމަށް އެހާބޮޑަށް ސަމާލުނުވެ ކެއުން ލަސްކުރެވޭ ފަހަރު އާދެއެވެ. ޚާއްސަކޮށް އޮފީސްތަކުގައި މަސައްކަތްކުރާ މީހުންނަށް ވަގުތުވީއިރަކުން ހެނދުނުގެ ކެއުމަށް ސަމާލުކަންދެވޭ ފަހަރު އާދެއެވެ.
ރޭގަނޑު ލަހުން ނިދާ ކުދިން ހެނދުނު ލަހުން ހޭލެވުމުންވެސް ނާސްތާ ލަސްވާ ފަހަރު އާދެއެވެ. އެހެންނަމަވެސް ހެނދުނުގެ ނާސްތާ އަވަސް ކުރުމަށް ބާރުއަޅަން ޖެހެއެވެ. ދަރިފުޅު ނިދިއައިސްގެން ކާން ދެކޮޅު ހަދާނަމަ ފެނުކެއްކި ކުކުޅުބިހެއް ނުވަތަ ދޮންކެޔޮވަކެއް ދެވިދާނެއެވެ. ހުސްބަނޑާއިހުރެ ގިނައިރު ނުކުރުމަށް ސަމާލުކަން ދޭށެވެ.
ހެލްތް ޕްރޮޓެކްޝަން އޭޖެންސީ އާއި ޔުނިސެފް ގުޅިގެން ތައްޔާރުކޮށްފައިވާ 'މަންމަ އާއި ކުޑަދަރިފުޅުގެ ކާނާ' މި ފޮތުގައި ވަނީ ކެއުމުގައި ސިއްހަތަށް ފައިދާހުރި ކާނާ ހިމަނާނެ ގޮތްތައް ބަޔާންކޮށްފައެވެ. ތިރީގައި މިވަނީ ހެނދުނުގެ ނާސްތާ އާއި ގުޅޭ ގޮތުން މިފޮތުގައި ހިމަނާފައިވާ މުހިންމު މައުލޫމާތެވެ.
ކޯން ފްލެކްސް ފަދަ ސީރިއަލް ކާންދޭއިރު ކޮށާފައިވާ މޭވާ ކޮޅެއް އެއްކޮށްލާށެވެ. އޭގެތެރޭގައި ދޮންކެޔޮ، ފަޅޯ، އަނބު، އޮރެންޖު، އާފަލު އަދި މިނޫނަސް ކޮންމެވެސް ބާވަތެއްގެ ތާޒާ މޭވާ އެއް އެއްކުރެވިދާނެ އެވެ.
މަސްހުނީގެ ތެރެއަށް ތަރުކާރީގެ ބާވަތްތައް އެއްކުރާށެވެ. ބަރަބޯ، ބަށި، މުރަނގަތޮޅި، ޗިޗަންޑާ އަދި މިނޫނަސް ތަރުކާރީގެ ކޮންމެވެސް ބާވަތެއް މަސްހުންޏާ އެއްކުރެވިދާނެއެވެ. ފަސޭހައިން ލިބެން ހުންނަ ތަފާތު ފަތުގެ ބާވަތްތައް، މިސާލަކަށް މައްސާގު، ކޮޕީފަތް، ކަންކުން ނުވަތަ އެނޫންވެސް މިފަދަ ބާވަތްތައް ހިމަނައިގެން ސިއްހަތަށް ލިބިދޭ ފައިދާ އިތުރުކުރެވިދާނެއެވެ.
ތަރުކާރީ ބޭނުންކޮށްގެން ބިސްގަނޑު ތައްޔާރު ކުރެވިދާނެއެވެ. މިގޮތުން ފިޔާ، ތަފާތު ވައްތަރުގެ ފަތް، ޓޮމާޓޯ، ތޮޅި، ބޮޑުމިރުސް ވެސް ބިހާއި އެއްކުރެވިދާނެއެވެ.
ރޭގަނޑު ގިނައިރު ނިދުމަށްފަހު ހެނދުނު ހޭލާއިރު ޚާއްސަކޮށް ކުޑަކުދިން ތިބޭނީ ކާން ބޭނުންވެފައެވެ. އެގަޑީގައި އެކުދިންނަށް ފަސޭހައިން ފައިދާހުރި ގޮތަކަށް ކާނާ ތައްޔާރުކޮށްގެން ދިނުމަށް އިސްކަންދޭށެވެ. ފިހާރަތަކުގައި ވިއްކަން ހުންނަ ތައްޔާރީކާނާ ހެނދުނުގެ ނާސްތާއަށް ދިނުމަކީ ރަނގަޅުކަމެއް ނޫނެވެ. ގިނަ އަދަދަކަށް ހަކުރު ހިމެނޭ ގިނަ ދުވަހަށް ހަލާކުނުވެ ހުންނަގޮތަށް ތައްޔާރުކޮށްފައި ހުންނަ ކާނާ އަކީ ސިއްހަތަށް ފައިދާހުރި ބާވަތްތަކެއް ނޫނެވެ.
