ކައިވެންޏަކަށް ތައްޔާރުވާއިރު ވާންޖެހޭ ތައްޔާރީތައް ވަރަށް ގިނައެވެ. މިޒަމާނުގައި ކައިވެންޏަކަށް ޚަރަދުކުރާ ފައިސާވެސް އެހާމެގިނައެވެ. ހަމައެކަނި ޕާޓީއެއް ބޭއްވުމަށްޓަކައި ދާނެ ޚަރަދުވެސް ވަރަށް ބޮޑެވެ. އަދި ދިރިއުޅޭނެ ތަނަކާއި އެތަނަކަށް ކުރަންޖެހޭ ޚަރަދުވެސް ފުދޭވަރަކަށް ބޮޑެވެ. މިޒަމާނުގައި ޚަރަދުތަކަކީ 2 މީހުންގެ މައްޗަށް ބަހާލައިގެން ކުރާ ޚަރަދުތަކެއް ކަމުގައިވިޔަސް ގިނަ ފަހަރަށް ބޮޑު ޚަރަދު ކުރަނީ ފިރިހެން މީހާއެވެ. ސަބަބަކަށް ވަނީ ދިރިއުޅުމުގެ ޒިންމާ އެޅިފައި އޮންނަނީ ފިރިހެންމީހާގެ ބޮލުގައެވެ.
ކައިވެނިކުރާ ހަފްލާގައި ރީތި ވެޑިން ޑްރެސްއެއް ލުމާއި ކައިވެނީގެ ދުވަހު އެތަން ރީތި ކުރުމަކީ ހަމަ ކޮންމެ މީހެއްގެވެސް ހުވަފެނެކެވެ. އެއީ އެމީހެއްގެ ފެންވަރުން ނުވަތަ މާލީ ތަނަވަސް ކަމަކަށް ބަލާފައެވެ. ބައެއް މީހުން އެމީހުންގެ ކައިވެނި ހަފްލާއަށް ޚަރަދުކުރަން ލޯނުވެސް ނަގައެވެ. އެކަމަކު ލޯނެއް ނެގުމުގެ ކުރިން އެލޯނު ދައްކާނެ ގޮތަކާމެދު ވިސްނާ ފިކުރުކުރަނީ ކިތައް މީހުންތޯއެވެ. އެއްވެސް އިރެއްގައި ތިމާގެ ނެތް ފެންވަރުން ކަންކަންކުރުމަކީ އެހާ އެދެވިގެންވާ ކަމެއް ނޫނެވެ.
މެލޭޝިއާގެ "ކޮންފެސްޓްވީޓްމައި" މިނަމުގައި ޓްވީޓްކޮށްފައި އިން އަސްލު ނަން ޖަހަން ބޭނުންނުވާ މީހަކު އޭނާގެ ކައިވެނީގެ ވާހަކަ ހިއްސާކޮށްފައި ވެއެވެ. އޭނާގެ ކައިވެންޏަށް 6 މަސް ވެގެން ދިޔައިރުވެސް ހިތްހަމަޖެހުމެއް ނުލިބޭ ވާހަކައެވެ. ކައިވެނީގައި ދިރިއުޅެންޖެހޭ ފިކުރުބޮޑުކަމުގެ ވާހަކައެވެ. ފައިސާއާއި މެދު ވަރަށްބޮޑަށް ވިސްނަންޖެހެއެވެ. ދިރިއުޅުމުގެ ބޭނުންތައް ފުއްދަން ބޭނުންވާ ވަރަށް ފައިސާ ނުލިބުމަކީ މީހާގެ ސިކުނޑިއަށް ބުރަބޮޑުވާ ކަމެކެވެ. މިކަމުގެ ހިތާމައާއި ހިތްދަތިކަމުގެ ވާހަކަ ހިއްސާކުރިއެވެ.
މިވާހަކަ ހިއްސާކޮށްފައިވަނީ އަންހެން ކުއްޖާއެވެ. އަންހެންކުއްޖާ ބޭނުންވީ އާދައިގެ ކައިވެނި ޕާޓީއެއް ބާއްވަން ކަމަށް އެކުއްޖާގެ އާއިލާ މީހުން ގާތުގައި ބުންޏެވެ. ނަމަވެސް އަންހެންކުއްޖާގެ މަންމަ ބޭނުންވީ ވަރަށް ބޮޑުކޮށް ޕާޓީ ބާއްވާށެވެ. އަންހެން ކުއްޖާގެ އާއިލާއިން ބުނީ "ފިރިހެންމީހާ ކިހިނެއްހޭ ތިމަންނަގެ ދަރިފުޅު ބަހަލައްޓާނީ މިފެންވަރުން ދަންޏާ".. މިޖުމްލައިން އަންހެންކުއްޖާ ވަރަށް ދެރަވެގެން ފިރިހެންމީހާ އާއި މަޝްވަރާ ކުރުމަށްފަހު ފިރިހެންމީހާ އަންހެން ކުއްޖާގެ އާއިލާއާއި ވާހަކަދެއްކިއެވެ. އަދި ފިރިހެންމީހާ މިކަމާމެދު ވަރަށް ހިތުގައި ޖެހުނެވެ. އަންހެންކުއްޖާގެ އާއިލާއިން ބުނީ އެމީހުންގެ ބައިވަރު ރައްޓެހިންނާއި ތިމާގެ މީހުންނަށް ދައުވަތު ދޭން ބޭނުންވާ ވާހަކައާއި ބާއްވަން ބޭނުންވަނީ ވަރަށް ބޮޑު ހަފްލާއެއް ކަމަށެވެ.
އަންހެން ކުއްޖާގެ އާއިލާއިން ހިސާބު ހެދުމަށްފަހު 1000 މީހުންނަށް ދައުވަތުދޭން ހޮޓަލެއް ހިފުމަށް ފިރިހެންމީހާގެ ގާތުގައި އެދުނެވެ. އަދި މިގޮތަށް ޕާޓީ ބާއްވަން ބޭނުންނަމަ 40000 މެލޭޝިއަން ރިންގިޓްގެ ލޯނެއްވެސް ނެގުމަށް އެދުނެވެ. މިކަމާމެދު ފިރިހެންމީހާ އެއްބަސްވެ އެކަން އެގޮތަށް ކުރިއެވެ. ކޮންމެއަކަސް އަންހެންކުއްޖާގެ އާއިލާއިން ބޭނުންވިގޮތަށް ކައިވެނީގެ ހަފްލާ ބޭއްވިގެން ދިޔައެވެ. އެމީހުން ހިތްހަމަޖެހި އަދި ރައްޓެހިން ކުރިމަތީގައި އެމީހުންގެ ދަރިފުޅުގެ ކައިވެނީގެ ހަފްލާ ކުލަގަދަކޮށް ބޭއްވުނެވެ.
ދެންއޮތީ މިކަމުގެ ސަބަބުން އުޅެން ޖެހުނު ގޮތެވެ. ކައިވެނީގެ ހަފްލާ ކުލަގަދަކޮށް ބޭއްވުނު ނަމަވެސް މިދެމަފިރިންނަށް ލިބުނު އުފަލެއް އަދި ހިތްހަމަޖެހުމެއް ކޮބާހެއްޔެވެ. އަންހެންކުއްޖާ ވަރަށް އަސަރާއެކު މިވާހަކަވެސް ހިއްސާކުރިއެވެ. ކައިވެނި ކުރީއްސުރެ އެމީހުންގެ ދަރަނިން ސަލާމަތްނުވެގެން ރެއާއިދުވާލު މަސައްކަތް ކުރަމުންދަނީއެވެ. އަންހެންކުއްޖާ އަކީ ސަރުކާރުގެ އާދައިގެ ވަޒީފާއެއްގައި އުޅެމުން އަންނަ ކުއްޖެކެވެ. އަދި ފިރިހެންމީހާ އަކީ ވެސް އާދައިގެވަރަކަށް މުސާރަ ލިބޭ ތަނެއްގައި ވަޒީފާ އަދާކުރާ މީހެކެވެ. މިދެމީހުންގެ މާލީ ތަނަވަސްކަން އެވަރަށް ނެތުމުން އެހާ ބޮޑު ޕާޓީއެއް ނުބާއްވަން އުޅުމުން އެކަން އެގޮތަށް ކުރީ އަންހެންކުއްޖާގެ މައިންބަފައިންގެ ހިތްހަމަޖެހުމަށެވެ.
މިދެމީހުންނަށް އެކަކު އަނެކަކަށް އެކުގައި ވަގުތު ހޭދަކޮށްލަންވެސް ވަގުތެއް ލިބެނީ މަދުފަހަރަކު އެވެ. ވަޒީފާ ނިންމުމަށްފަހު ގެއަށް އައިސް ފިރިހެން މީހާ ކުރާ މަސައްކަތަކީ ޑްރައިވަރެއްގެ މަސައްކަތެވެ. އަންހެންކުއްޖާ އޮންލައިންކޮށް އެއްޗެހި ވިއްކައި ޑެލިވަރީ ކުރަނީއެވެ. އަންހެންކުއްޖާ ބުނިގޮތުގައި އޭނާގެ ފިރިމީހާ އަކީ ކުރިން ބޭރަށްގޮސް ވަރަށް މަޖާކޮށް އުޅުނު މީހެއް ކަމަށާއި އެކަމަކު މިހާރު ގެއަށް އައުމަށްފަހު އޭނާ ވަރުބަލިވެގެން ނިދާފައި އަނެއްކާ ހޭލައިގެން ދަނީ މަސައްކަތަށެވެ. ދެމަފިރިންގެ ހާލަތު ހުރީ މިކަހަލަ ގޮތަކަށް ކަމުގައިވެސް ބުންޏެވެ.
މިއީ ލިބުނު ވަރަށް ބޮޑު އިބްރަތެއް ކަމުގައި ދެކިގެން މިކަހަލަ ކަންކަން މިހެން ކުރުމުގެ ބަދަލުގައި ރަނގަޅު ކަމަކަށް އެލާރި އިންވެސްޓް ކުރިނަމަވެސް މިއަށްވުރެ ދިރިއުޅުން އުފާވެރިވެފައި ހިތްހަމަޖެހުން ލިބުނީހެވެ.
